Matayo 15
15
ABAFARIZAYO N’ABANDIKI NIBAROZA YEZU.
1Aho abandiki n’Abafarizayo ba Yeruzalemu nibamwizaho nibagira bati: 2Abahemba bawe batambukira ki amasigirane g’abakuru?#15, 2 Amasigirane ni magambo agatayandikirwe ago ikura lindi likusigirana ikura lindi. Mu naku ezo Abayahudi basinyaga kugumya amagambo ago kukira ebigambo byonene bya Mungu by’Enandiko Ntakatifu. Kampaho tibakunaba ngaro zabo ka bakulya emikate. 3Wenene nasubamo nabagambira ati: Kai imwe mukutambukira ki ekilagiro cha Mungu, nimuruba amasigirane ganu? Mungu akagira ati: 4Otinega iso na noko, kai ati: Akuzumiriza ise hamo nina, ogwo ahikire kwitw’olufu. 5Nawe imwe muti: Buli muntu akugambira ise hamo nina ati: Buli kintu echo nkuhereza Mungu kikukugasira, 6talitina ise hamo nina#15, 6 Mungu akalagira abana kuhwera abazere babo. Abandiki bati: Omuntu ayahereze Mungu obutunga bwe takili n’omulimo gwo huhwera abazere be, kunu naikara ali nabwo, buli buhereza bwo mu kanwa chonka.. Mbe mukehaho ekilagiro cha Mungu, nimuruba amasigirane ganu. 7Bazigi mwe, waza! omulagi Izaiya akabalaga akomereze, nagira ati: 8Abantu banu bakunkuliza mu minwa honka; kasi! omutima gwabo guli hara n’ene#15, 8 Abantu bo mu naku za Yezu basusanaga n’abo mu naku za Izaiya: bayendaga kusoma olulandara muno no kuhereza emiherezo mingi ha bweru, basimwe abantu, nawe basomaga batyo chonka, omutima gutaliho, buli buzigi chonka.; 9mbe bakunkolera busa chonka, kunu nibayolekerera obwenge n’ebilagiro by’abantu. 10Nayeta embaga kumwizaho, nagigambira ati: Muhulire, musombokerwe. 11Ekikuza mu kanwa ticho kikubihya omuntu, nawe ekikuruga mu kanwa, echo nicho kikubihya omuntu. 12Aho abahemba be nibamuzaho nibamugambira bati: Okumanya okwo Abafarizayo basitara kuhulira ekigambo echo? 13Wenene nasubamo nagira ati: Buli mbibo etabibirwe Tata wo mw’igulu elikurwa. 14Nimubaleke: ni bahume, kai bebembezi b’abahume; mbe omuhume akebembererwa omuhume, bakugwa mu lina ha bubili bwabo. 15Nawe Petro nasubamo ati: Notusomborere olugani olwo. 16Wenene nagira ati: N’emwe timukagizire bwenge nangu? 17Timukusombokerwa okwo buli kintu ekikutaha mu kanwa kikuza mu nda, kai kikusagarwa h’esazi? 18Nawe ebikuruga mu kanwa bikuruga mu mutima, ebyo nibyo bikubihya omuntu. 19Kuba mu mutima harugamo ebitekateko bibi, obwisi, obukwate, obusihani, n’obusuma, no kuchwererera, no kuzuma Mungu. 20Ebyo nibyo bikurofuhaza omuntu; nawe kulya, engaro zitanabire, tikurofuhaza omuntu#15, 20 Yezu hanu akutwolekerera kutina muno obulofu bw’omwoyo kukira obulofu bw’engingo, kuba kutungwa kubi kukurofuhaza omwoyo..
OMUKAZI WA KANANEYA NASASIRWA.
21Yezu ka yarugire aho, nagenda mu byaro bya Tiro na Sidoni. 22Niwe n’omukazi wa Kananeya, ayarugaga mu nsi ezo, nayeta nagira ati: Nonsasire, Mukama wange, mwana wa Daudi; omuhara wange akunazibwa kubi sitani. 23Wenene tiyamusubiremo kigambo n’ekimo. Abahemba be nibamuzaho nibamusaba bati: Omusindike agende, akutuyombera muno enuma yetu. 24Nawe wenene nasubamo ati: Ine tinatumirwe handi, hatali ha nabalega ezabuzire z’ezu ya Israeli#15, 24 Omwana wa Mungu akatumwa Ise kuchungula abantu bona, nawe akesorera omulimo gwo kurabirira Abayahudi bonka mu mwanya gw’emyaka isatu. Kumara aligambira Entumwa ze kuza kwolekerera abantu b’amahanga gona.. 25Nawe omukazi ogwo naiza, namugwa mu maguru namugira ati: Mukama wange, nzuna. 26Wenene nasubamo ati: Ti kuzima kwihaho ebilyo by’abana kubigabira embwa. 27Omukazi nagira ati: Nikwo, Mukama wange, nawe otusore tw’embwa twona tukulya obulagarika obukulagala h’eliro lya baninatwo. 28Aho Yezu nasubamo namugira ati: Mukazi we, kwikiriza kwawe ni kuhango; nogirwe nk’omw’okwendera. Mbe omuhara nakira ha katungu ako#15, 28 Omukazi ogwo akutumanyisya kulembereza kuzima. Yezu yatandikire kwanga kumuhulira, ahiche kusima kwikiriza kwe n’obweguminsiriza bwe..
YEZU NAKIZA ABARWERE. — NAKANISYA EMIKATE N’OTUFWI LWA KABILI.
29Yezu ka yarugire aho, naiza ha chambu ch’enanza ya Galilaya, nanegera mw’ibanga, niyo naba wo kwikara. 30Mbe embaga ningi y’abantu nemuzaho, bali n’abatita n’abahume n’abalema n’abasuntizi n’abandi bengi, nibabasagara mu maguru ge, nabakiza. 31Aho embaga nekumisibwa kubona abatita nibafumora, abalema nibalibata, abahume nibabona; mbe nibakuza Mungu wa Israeli.
32Mbe Yezu nayeta abahemba be nabagira ati: Nkusasira embaga, kuba bamazire naku isatu bali n’ene, kai batali n’ako kulya; tinkwenda kubasindika kutaha batalire, leka bataramatira mu muhanda. 33Abahemba nibamugira bati: Mw’iswa munu twihe hai emikate zihikire zo kwigusya embaga egi yona? 34Yezu nabagambira ati: Muli na mikate zingaha? Bonene nibagira bati: Musanzu n’otufwi tuke. 35Nalagira embaga kwikara ha nsi. 36Nakwata emikate musanzu n’enfwi; ka yasimire, nahinzura naha abahemba be, kai abahemba nibaha abantu. 37Nibalya bona nibeguta. Ebihinzu ebyasigere, nibehayo bitukuru musanzu bizwire. 38Abalire baliga bali bantu bihumbi bina, kwihamo abana n’abakazi. 39Ka yasindikire embaga, naza mu bwato, nagenda mu mbibi za Magedani.
Nu geselecteerd:
Matayo 15: KED1946
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
First published in 1946 by the White Fathers. Published online with the permission of the White Fathers.
