Matiu 8
8
Iesu mopakauriꞌ hadua tauna to ketánggáꞌ
(Mrk. 1:40-45; Luk. 5:12-16)
1Karoona Iesu mepaturoꞌ, Ia mendáulu hangko i buluꞌ, hai handaꞌ tauna meuláꞌ i Hia. 2I tempó iti, haweꞌ miꞌi hadua tauna to ketánggáꞌ hai molingkudu i bitina Iesu, nauliꞌ, “Pueꞌ, kuisá kaNubukuna mopakauriꞌaꞌ. Ane Nupokanai, Nupakauriꞌaꞌ wongkódóꞌá!”#8:2 To ketánggáꞌ tiꞌara peisá mesuaꞌ i lalu támbi penómbáꞌá. (Básá Áturá Menómbá gáláꞌna ka-13.) Mouláꞌ pekiriraꞌ toIahudiꞌ, Pueꞌ Ala peá to peisá mepakauriꞌ.
3Napekamaꞌ miꞌi Iesu tauna iti#8:3 Tempóna Iesu mampekamaꞌ to ketánggáꞌ iti, Iesu woꞌo rapakedái mouláꞌ ádáraꞌ toIahudiꞌ. Básá Áturá Menómbá 5:3. haneꞌi Nauliꞌ, “Kupokana. Mauriꞌmokoꞌ!” Tempó onoꞌ, hakiꞌna kásáliu mauriꞌ. 4Roo onoꞌ, nauliꞌ wopiꞌi Iesu i hia, “Ineeꞌ nupolaluita i heáná peá apa to mewaliꞌ deꞌe. Laomokoꞌ sieruꞌ nupetudeꞌá wátámu i tadulako menómbá bona naita kamauriꞌmu miꞌi, hai hangaa-ngaa nuánti popenómbámu mouláꞌ párentá to teukiꞌ i lalu Paturoꞌna Musa,#8:4 Básá Áturá Menómbá 14:1-32; Pohuleki 24:8. bona tongawaꞌ i upu-upu tauna kamauriꞌmu miꞌi.”
Iesu mopakauriꞌ hadua hawiꞌna tadulako surudadoꞌ toRoma
(Luk. 7:1-10; Ioh. 4:46-53)
5Roo onoꞌ, Iesu lao i wánuá Kapenau. I pesuaꞌNa ionoꞌ, haweꞌ miꞌi hadua tadulako surudadoꞌ toRoma mampohidupaꞌá Iesu hai membiáꞌ tulungi, 6nauliꞌ, “Tuá! Hawiꞌkuꞌ maturu peá oaꞌ i támbi mantódihá. Mapári ntepuꞌu nahádi láwiꞌ paluꞌ.”
7Nauliꞌ Iesu, “Ina lao Kupakauriꞌ.”
8-9Nahániki tadulako surudadoꞌ iti, “Tuá, tiꞌara hintotoꞌ Io mesuaꞌ i lalu támbingkuꞌ {láwiꞌ toRomaꞌaꞌ}.#8:8-9 Mouláꞌ áturáraꞌ toIahudiꞌ, tiꞌaraheꞌ peisá mohintuwuꞌ hai tauna to tiꞌara toIahudiꞌ. Ina rapakedáiheꞌ. Kódóꞌ deꞌe tadulako surudadoꞌ. Ara to i reá lántiꞌna hangko i kódóꞌ, hai araheꞌ woꞌo to kupohawaꞌá. Ane rápáꞌna kupohawaꞌá hadua surudadoꞌ, kuhángáꞌá, ‘Laokoꞌ!’ hangaa-ngaa lao. Ane kukióꞌ surudadoꞌ to ntániꞌna, ‘Maikoꞌ!’ hangaa-ngaa mai. Ane kuhángáꞌá hawiꞌkuꞌ, ‘Nubábehi iti!’ hangaa-ngaa nabábehi. Noꞌonoꞌ woꞌo Io, Tuá. Nuhuwárá peá hantepóꞌ laluita, hawiꞌkuꞌ iti bateꞌna ina mauriꞌ.”
10Tingkáráꞌ Iesu mohádi laluitana tadulako surudadoꞌ iti, onoꞌ miꞌi haneꞌi mampehaileꞌ tauna to meuláꞌ i Hia, Nauliꞌ, “Maróhó ntepuꞌu pepoináláina tauna deꞌe! Toꞌu! Hai Kuhángáꞌáꞌákou, i oloꞌraꞌ toSáráeliꞌ, tiꞌara mani haweꞌ hadua to Kulámbiꞌ to maróhó pepoináláina nodo pepoináláina tauna deꞌe to tiꞌara toSáráeliꞌ.
11Mewaliꞌ, bona niꞌisá: i lalu popárentáNa Pueꞌ Ala, handaꞌ tauna to tiꞌara toIahudiꞌ ina mewaliꞌheꞌ taunáNa. Ina haweꞌheꞌ hangko i humalele duniáꞌ, mehodaheꞌ hai mandeꞌ i kagóeꞌ-góeꞌ i lalu surugáꞌ hingkakani hai Burahima, Isakiꞌ hai Iako, toioruraꞌ toSáráeliꞌ.#8:11 Ina tingkáráꞌ ntepuꞌu tauna mohádi apa to nauliꞌ Iesu, láwiꞌ toSáráeliꞌ mandeꞌ peheꞌ hai hangka toSáráeliꞌraꞌ. Ane tauna to tiꞌara toSáráeliꞌ ina mandeꞌ hingkakani hai toioruraꞌ toSáráeliꞌ, lempóna: hira woꞌo natarima Pueꞌ Ala. Básá Iesaia 25:6. 12Katoꞌuána, kómu riꞌi toSáráeliꞌ to hintotoꞌ mewaliꞌ taunána Pueꞌ Ala i lalu popárentáNa. Agáiáná handaꞌkou to ina ratibe i lalu kakáindiána, karaoꞌ hangko i Pueꞌ Ala. Ionoꞌ, ina teriaꞌkou hai mapári ntepuꞌu nihádi.”
13Roo onoꞌ, nauliꞌ Iesu i tadulako surudadoꞌ iti, “Mesuleꞌmokoꞌ, láwiꞌ apa to nupoinálái, bateꞌna ina mewaliꞌ.” Tempó onoꞌ woꞌo, mauriꞌ mpuꞌu miꞌi hakiꞌna hawiꞌ iti to tangaꞌna maduꞌa i támbina.
Iesu mopakauriꞌ handaꞌ tauna
(Mrk. 1:29-34; Luk. 4:38-41)
14Roo onoꞌ, Iesu lao i támbina Peturuꞌ. Ionoꞌ, Naita pengántiꞌina Peturuꞌ towawine maturu-turu láwiꞌ malengiꞌ. 15Kanatibaaꞌna Iesu taena towawine iti, kásáliu mauriꞌ. Hangko ionoꞌ, ia mearó miꞌi haneꞌi mokádipurá pandeꞌna Iesu.
16Kalumbaꞌ miꞌi, handaꞌ tauna lao i Iesu moánti to maduꞌa hai to napesuaꞌi setáꞌ. Iesu mampopesuwuꞌheꞌ setáꞌ iti moliu peá laluitaNa, hai tauna ntániꞌna to maduꞌa Napakauriꞌheꞌ woꞌo. 17Upu-upu to nabábehi Iesu iti mobukeki laluitana nabiꞌ Iesaia hangkoia to manguliꞌ:
“Ia miꞌi to mokábáhákeꞌ hangko i pantódihántaꞌ
hai mopakauriꞌ hakiꞌtaꞌ.” (Iesaia 53:4)
Tauna to mampoinao meuláꞌ i Iesu
(Luk. 9:57-62)
18Hangkani tempó, lelimoheꞌ tauna to lao i Iesu. KamoitáNa tauna to handaꞌ iti, Nahuoꞌheꞌ topeguruNa mengkalimba lao tándáꞌ i hambali rano. 19Agáiáná haweꞌ miꞌi hadua guru agama toIahudiꞌ, mohángáꞌá Iesu, nauliꞌ, “Guru, iumbá kalaoáMu, ionoꞌaꞌ woꞌo ina meuláꞌ!”
20Nahániki Iesu, “Serigala ara katoroꞌáraꞌ i balamba, hai tádáhi ara háráraꞌ, agáiáná Ánáꞌ Mánusiá,#8:20 Ánáꞌ Mánusiá: Iesu mopakeꞌ laluita Ánáꞌ Mánusiá ane mokábelái wátáNa haduduáNa, agáiáná lempóna to kaladu, rungu-runguna tiꞌara raisá tauna, ia miꞌi kaꞌIana Datu Topehómpóꞌ to nahuoꞌ mai Pueꞌ Ala. Básá Danieli 7:13-14. tiꞌara ara támbiNa.”
21Roo onoꞌ, ara woꞌo hadua tauna to meuláꞌ i Hia to manguliꞌ, “Pueꞌ, Nupaliuaꞌ sieruꞌ lao motawu umángkuꞌ. Upu rái ratawu, hangko peisáraꞌaꞌ meuláꞌ i Hio.”
22Agáiáná nauliꞌ Iesu, “Nupatodáhimoheꞌ tauna to mate pepoináláiraꞌ motawu hangka tomateraꞌ. Agáiáná io, meuláꞌmokoꞌ i Kódóꞌ!”
Iesu mampopengkaroo angi mataꞌ
(Mrk. 4:35-41; Luk. 8:22-25)
23Roo onoꞌ, mengkaheꞌ miꞌi Iesu i lalu duanga hingkakani hai topeguruNa, haneꞌi pohuꞌmoheꞌ ina mengkalimba i rano Galilea. 24Hangkaꞌ-hangkaꞌ peá mampohidupaꞌáheꞌ wui to rumihi ntepuꞌu. Duangaraꞌ narokaꞌ bálumbá duuꞌna ina bukeꞌ miꞌi uwai. I tempó iti, Iesu tangaꞌna letaꞌ. 25TopeguruNa moruaꞌ, rahángáꞌá, “Pueꞌ! Tulungiangkaiꞌ! Ina hurewuꞌkeꞌ!”
26Iesu mohángáꞌáheꞌ, “Moapa riꞌi haneꞌi malááꞌkou? Makuraꞌ mani pepoináláimi.” Meángkáꞌ miꞌi Iesu haneꞌi mokámbáróá wui hai bálumbá iti. Kásáliu tinda ntepuꞌu rano iti.
27Tingkáráꞌ ntepuꞌuheꞌ, rauliꞌ, “Heáná ripaꞌi tauna deꞌe? Mogalo riꞌi wui hai bálumbá mouláꞌ hawaꞌNa!”#8:27 Tandaꞌ kuasaꞌ iti mopatongawaꞌ kaꞌIesuna miꞌi Pueꞌ Ala, láwiꞌ Pueꞌ Ala peá to makuasaꞌ i wui hai tahiꞌ. Básá Sura Petóiá 65:8; 89:10; 107:24-25,29.
Iesu mopakauriꞌ rodua tauna to napesuaꞌi setáꞌ
(Mrk. 5:1-20; Luk. 8:26-39)
28Iesu hai topeguruNa haweꞌmoheꞌ i hambali rano i tampoꞌ Gadara. Ionoꞌ ara rodua tauna to napesuaꞌi setáꞌ, to toroꞌheꞌ i balamba popatawuá.#8:28 balamba popatawuá: Tempó onoꞌ, tauna ratawu i lalu balamba to rakae hangko i buluꞌ watu. Mesuwuꞌheꞌ hangko i popatawuá iti, haneꞌi laoheꞌ mampohidupaꞌá Iesu. Tauna to rodua iti melááꞌ-lááꞌi ntepuꞌuheꞌ, onoꞌ miꞌi haneꞌi tiꞌara piꞌi ara tauna to pebáiꞌ melempó ionoꞌ. 29Monganga-ngangaheꞌ setáꞌ to mesuaꞌ i tauna to rodua iti, rauliꞌ, “Ánáꞌna Pueꞌ Ala! Moapa riꞌi haneꞌiKoꞌ mai ieneꞌ? Ba ina Nuhukumongkaiꞌ, kehapiꞌ tiꞌara mani haweꞌ tempóna Alo Pobutusi?”
30Tiꞌara karaoꞌ hangko ionoꞌ, araheꞌ boeꞌ to handaꞌ harómbóngá tangaꞌraꞌ masungkiꞌ. 31Setáꞌ to mesuaꞌ i tauna iti membiáꞌ i Iesu, rauliꞌ, “Ane Nupopelóhóꞌangkaiꞌ hangko ieneꞌ, Nuhuoꞌangkaiꞌ mesuaꞌ i boeꞌ to handaꞌheꞌ doꞌo.”
32Nauliꞌ Iesu, “Laomokou!” Mesuwuꞌ mpuꞌumoheꞌ setáꞌ iti, haneꞌiheꞌ mesuaꞌ i boeꞌ. Melangkamoheꞌ boeꞌ iti haneꞌi manawoꞌheꞌ i pingke lao i lalu rano, álána mateheꞌ humpu.
33Tauna to mokámpái boeꞌ iti moita apa to pewaliꞌ i boeꞌraꞌ hai apa to pewaliꞌ i tauna to napesuaꞌi setáꞌ iti. Melangkamoheꞌ lao i wánuá mopahaweꞌ upu-upu to pewaliꞌ. 34Onoꞌ miꞌi haneꞌi pueꞌ wánuá mobárárámoheꞌ lao motunggái Iesu. Rahuoꞌ bona pohuꞌ hangko i tampoꞌ Gerasa iti.
Nu geselecteerd:
Matiu 8: NTBEP
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Bahasa Behoa Shorter Bible © Indonesian Bible Society, 2015.
