Matiu 7
7
Ineeꞌ mosalaꞌi hángká rángámi
(Luk. 6:37-38,41-42)
1“Ineeꞌkou mosalaꞌi hángká rángámi, bona tiꞌarakou woꞌo nasalaꞌi Pueꞌ Ala, 2láwiꞌ noumbá rárá pobutusimi i hángká rángámi, rárá iti woꞌo to ina napakeꞌ Pueꞌ Ala i kómu.
3Moapa riꞌi haneꞌi mampeita pekou kabiloána rángámi to kókóiꞌ peá, mole riꞌi kabiloámi to nodo miꞌi tuhaꞌ kamahilena, tiꞌaranto nihádiá? 4Noumbá miꞌi kapeisámi mampolaluitaꞌá rángámi, ‘Maikoꞌ, ina kuwehángi kabiloámu,’ mole i mátámi ara kabiloámi to nodo miꞌi tuhaꞌ. 5Mampe to maroꞌa pekou! Hangaa-ngaa niwehángi sieruꞌ kabiloámi to nodo tuhaꞌ to ara i mátámi haduduámi bona tongawaꞌ kaniꞌitána mowehángi kabiloána rángámi.”#7:5 Lempóna: ineeꞌkou sieruꞌ mosalaꞌi tauna ntániꞌna ane tiꞌara maniꞌi nibáliki bábehiámi haduduámi to melumbuꞌ kakadakena hangko i rángámi.
6Roo onoꞌ, Iesu mopahaweꞌ ngkóráꞌ pándiriꞌ deꞌe, Nauliꞌ, “Ineeꞌkou mampoweꞌi pandeꞌ to maroꞌa i ahu, láwiꞌ ahu iti ina menggoli peá moharaꞌkou. Hai ineeꞌkou mampoweꞌi mutiara to masuliꞌ i boeꞌ, láwiꞌ boeꞌ ina mopangka-pangka mbero peá mutiara iti.”#7:6 Iesu mepaturoꞌ bona ineeꞌkeꞌ mopahaweꞌ oaꞌ ngkóráꞌna Pueꞌ Ala i tauna to mesápuáka oaꞌ.
Membiáꞌ i Pueꞌ Ala
(Luk. 11:9-13)
7“Hangaa-ngaa nipembiáꞌ oaꞌ i Pueꞌ Ala,
hai bateꞌna ina Naweꞌikou.
Nipeliꞌ miꞌi apa to niparaluu,
hai bateꞌna ina nilámbiꞌ.
Nikadoꞌ babaꞌ moliu pekakaemi,
hai Pueꞌ Ala ina mobungkáhiákou rárá molámbiꞌ apa to niparaluu.#7:7 Nipembiáꞌ… Nipeliꞌ… Nikadoꞌ: Upu-upu laluita iti molempónga hangaa-ngaa mekakaekeꞌ i Pueꞌ Ala.
8Láwiꞌ heáná to membiáꞌ ina raweꞌi.
Heáná to mampeliꞌ ina molámbiꞌ.
Heáná to mokadoꞌ babaꞌ, ina rabungkáhiá.
9-10Ara paꞌi tosae hangko i oloꞌmi to mampoweꞌi watu i ánáꞌna ane membiáꞌ rótiꞌ? Ba arakou to mampoweꞌi lelótó ane ánáꞌmi membiáꞌ bouꞌ? Tiꞌara! 11Kehapiꞌ kadake lalumi, agáiáná niꞌisá mani mampoweꞌi apa to maroꞌa i ánáꞌmi. Pelumbuꞌna mani Umámi to ara i surugáꞌ! Naisá ntepuꞌu mampeweꞌi apa to maroꞌa i heáná peá to membiáꞌ i Hia.”
Rárá to manótó
12“I pákáꞌ-pákáꞌna, apa to niundeꞌ rabábehi hángká rángámi i kómu, iti woꞌo to hangaa-ngaa nibábehi i tauna ntániꞌna. Iti miꞌi ntóáꞌna Paturoꞌna Musa hai paturoꞌ hangko i nabiꞌ-nabiꞌ.
13-14Mahingkiꞌ babaꞌ hai maꞌángkárá rárá to monóntóhi katueꞌ to maroꞌa to tiꞌara mokahópóꞌá, hai tiꞌara handaꞌ tauna to mouláꞌ rárá iti. Maeláꞌ babaꞌ hai rárá to monóntóhi naraka, hai handaꞌ tauna to mouláꞌ rárá iti. Mewaliꞌ mesuaꞌkou moliu babaꞌ to mahingkiꞌ, bona ina tueꞌkou oaꞌ hingkakani hai Pueꞌ Ala.”
Nabiꞌ-nabiꞌ to mepakanawoꞌ tongawaꞌ hangko i bábehiáraꞌ
15“Maingáꞌ-ingáꞌkou i nabiꞌ-nabiꞌ to moánti laluita to salaꞌ. Rauliꞌ laluitaraꞌ hangko i Pueꞌ Ala, mole riꞌi tiꞌara. Haweꞌheꞌ i oloꞌmi nodoheꞌ dimbá, mole riꞌi hira nodoheꞌ serigala to maseke. 16Niꞌisá podongkoꞌraꞌ ane niꞌita wuaꞌna pobágóꞌraꞌ to kadake. Wuaꞌ anggoroꞌ tiꞌara rapupu hangko i putri malu, hai wuaꞌ ara tiꞌara rapupu hangko i dui sule. 17Kau to maruduꞌ maroꞌa wuaꞌna, kau to maduhuꞌ tiꞌara maroꞌa wuaꞌna. 18Tiꞌara ara kau to maroꞌa, wuaꞌna kadake, hai tiꞌara woꞌo ara kau to kadake, wuaꞌna maroꞌa. 19Upu-upu kau to tiꞌara mowuaꞌ maroꞌa, ina ratiwi hai ratibe i lalu api. 20Noꞌonoꞌ woꞌo, ina niꞌisá heáná nabiꞌ to mepakanawoꞌ, láwiꞌ ina tongawaꞌ hangko i wuaꞌna bábehiáraꞌ.
21Handaꞌ tauna to mokióꞌAꞌ ‘Pueꞌ’, agáiáná tiꞌara upu-upuraꞌ to ina mesuaꞌ i lalu popárentána UmáNgkuꞌ to ara i surugáꞌ, bateꞌna peá tauna to mampeuláꞌi peundeꞌána Pueꞌ Ala to i surugáꞌ. 22I alo pobutusi i kahópóꞌána duniáꞌ, handaꞌ tauna ina manguliꞌ, ‘Pueꞌ! Tiꞌara paꞌi Nuisá kakaiꞌna miꞌi to mopahaweꞌ laluita i lalu hangaꞌMu? Kipopesuwuꞌ miꞌi setáꞌ i lalu hangaꞌMu, hai handaꞌ woꞌo tandaꞌ kuasaꞌ to kibábehi.’
23Tempó iti, ina Kuhánikiheꞌ, ‘Tiꞌarakou Kuisá! Pohuꞌmokou hangko ieneꞌ, kómu to kadake bábehiámi.’ ”
Ngkóráꞌ pándiriꞌ kana i rodua tauna to moaró támbi
(Luk. 6:47-49)
24“Heáná to mampehádingi laluitaNgkuꞌ hai mampeuláꞌi, peisá rapándiriꞌ nodo hadua tauna to bukeꞌ pekiri to moaró támbina i wongko watu to mahile ntepuꞌu hai maróhó. 25Hangkani tempó, meangi hai udána rumihi. Membulalaꞌ uwai. Wui moropoꞌ támbi iti, agáiáná tiꞌara madungká láwiꞌ támbi iti raꞌaró i wongko watu to maróhó.
26Agáiáná tauna to mampehádingi laluitaNgkuꞌ deꞌe hai tiꞌara mampeuláꞌi, peisá rapándiriꞌ nodo hadua tauna to bebe to moaró támbina i wongko wungi. 27Hangkani tempó, meangi hai udána rumihi. Membulalaꞌ uwai. Támbi iti naropoꞌ woꞌo wui. Kásáliu madungká hai magero.”
28Karoona Iesu mopaturoꞌ tauna, tingkáráꞌheꞌ upu-upu to mohádi paturoꞌNa, 29láwiꞌ ráráNa mepaturoꞌ tiꞌara nodo guru-guru agama {to mouláꞌ peheꞌ paturoꞌraꞌ tauna ntániꞌna}. Ngkáliꞌna riꞌi Iesu mopakanótóáheꞌ ngkóráꞌna Pueꞌ Ala hangko i kuasaꞌNa haduduáNa.
Nu geselecteerd:
Matiu 7: NTBEP
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Bahasa Behoa Shorter Bible © Indonesian Bible Society, 2015.
