Halloo 23
23
Saari Qitoonaa Abrahami Maashee Xaaꞌoon Kemoona
1Saari balli hiyaa shabaatta nattaachaa, 2Kanaanee showooch beeti Qiriyaat Aribaa, ebiyoo Kebiroonaa qitiyan. Abrahami oogeton eeppii muushenehe.
3Abrahamiyoo dubenee aafoochee tiyii hammiꞌi, Hitee asheenaꞌoyich ishichiye: 4“Ta ittoshi daggooch dallaawoonaa shiqqoona taane. Ittoshi showee daggoochee maashee xaaꞌoon taach ittoshi kemaa, arooch ta mecheechi cahoon duuhona” iye.
5Hiteenaꞌoo Abrahamich wochiꞌi ishichiyeete: 6“No doonocho, waayebe. Ne, no daggooch ooge woraaferashoo neene. No maashee xaaꞌoochee ne shunnemmi gaawe xaaꞌooch ne mechee cahoon duuhe. Ne mechee cahoon ne duukkemmoyich koniyoona no daggoochee maashoon neech bayaache” iyeete.
7Abrahamiyoo tiyii are showee asheenaꞌo tuneti Hiteenaꞌoyich yittii tiyiye. 8Ishichiinoo iye: “Ta mechee cahoon ta duukkemmoyich ittoshi daaggitoyee, and illa Tsohaari bushoo Efiroonin taach qollebote. 9Ebiyoo bi goyee buchi gashooch beeti, Makifeli xaqqee gofoon taach ittoshi aafoochaa bi kemmemmoyichiye. Ittoshi showee daggooch maasho taach bi beeyemmoyich, ceeni gatiyoona taach bi kemmemmoyich qollebote” iye.
10Arooba Efirooni bi asheenaꞌo tuneti Hiteenaꞌo daggooch koteꞌi beetone. Biyoo katemeexi uxeree kellooch waaꞌi kiceeti asheenaꞌo bulli waayee beetaa, Abrahamich ishichii wochiye: 11“Ta doonocho, waayebe; goyee budonaa bi gashooch beeti xaqqee gofoonon neech immeto taane. Ta asheenaꞌo aafoochaa neech immeto taane. Ne mechee cahoon arooch duuhe” iye.
12Abrahamiyoo wochinnoon are asheenaꞌoyich yittii tiyiꞌi, 13asheenaꞌo waayee beetaa, Efiroonin “Ta qolloon ne waayemmoyich neen qollehoye. Showee gatiyoon qocona; gijjoon ta waanee ne deqqemmona, ta mechee cahoon arooch duuhona” iye.
14Efirooniyoo Abrahamich ishichiꞌi wochiye: 15“Ta doonocho, waayebe. Showee gatiyoo awudde balle sheqeelee birewoo baachiye. Neennaa taannoyich ebi am beddahane? Ne mechee cahoon arooch duuhe” iye.
16Abrahamiyoo Hiteenaꞌo aafoochaa Efirooni gettiti gatiyoon gaawiye iꞌi, aroobee giixechinaꞌochi qeellee doyoommon, awudde balle sheqeelee birewoon machoona qoccii immiye.
17Ebiyoommi gommona Mamirichi goroochaa aabi-keyo waan beeti, Makifel beeti Efiroonichi budo, are budooch beeti xaqqee gofoonaa buchi daggooch beeti mixo bullina Abrahami hajjoo tunehe. 18Katemee uxeree kellooch waati Hiteenaꞌo bulli aafoochaa, Abrahami hajjoo bi tuno manjiye. 19Aroyee gubb Abrahami Kanaanee showooch, Kebirooni getteeti Mamirichi goroochaa aabi-keyo waan, Makifeli budooch beeti xaqqee gofee maacooch, bi mechee Saarichi cahoon duukkiye. 20Ebich budonaa bi daggooch beeti xaqqee gofoona, maasho bi tunemmoyich, Hitee asheenaꞌo Abrahamich bi hajjoo tunii guudiiheete.
Nu geselecteerd:
Halloo 23: KBRC
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
SIM International, 2020.
