Halloo 22
22
Abrahami Yisaaqin Bi Deejjemmoyich Yeeri Geto
1Ebi mooyinaꞌo tunetoyee gubb, Yeeri Abrahamin biich deꞌa bi getonaa getti bi qayonon beegga qaawiye. Ebich “Abrahamo!” ii ceeggiye.
Abrahamiyoo eekkehe.
2Yeeriyoo “Ne shuni bushoon, ikke mixxe ne bushoo Yisaaqin, yeshiree, Mooriyee showooch hambe. Neech ta bekkiyemmi ikke guudi toommoochaa deejjoon tuniiree michi taach deejjibe” iye.
3Abrahamiyoo maaddoona tiyiye. Deejjoo miccemmi mixon baddee kiciye; ebinoo kuree toommooch xaaniye. Bi bushoo Yisaaqinaa gutte gaddireteenaꞌonon biinna tookkii yechiꞌi, Yeeri biich bi gettiti xaaꞌooch hammiye. 4Keejjinnee qemooba, Abrahami kaama ciinniꞌi, ebi xaaꞌoon wohoochaa beeggiye. 5Biyoo biinna tookkii waati gutte gaddireteenaꞌoyich “Kuroon yeshiree hiniich ittoshi beetaa, taannaa ta bushoona okk ebiich hami Yeerich goyinneechi, ittoshi waan wotteree woyemmo noone” iye.
6Abrahamiyoo deejjoo miccemmi mixon tiijjii Yisaaqich shaakkiihe; biyoo qaaqqoonaa shikkoonon yechiye. Gutteenaꞌo tookkii hammiyeete. 7Hammii boonoshi beetaa, Yisaaqi bi nihoo Abrahamin “Taabbo!” iye.
Abrahamiyoo eekkeꞌi, “Ta bushoocho, amoone?” iye.
Yisaaqiyoo “Qaaqqoonaa mixona beete; tunebaani micciibeeti deejjoyich giddemmi bago aaye?” iye.
8Abrahamiyoo “Ta bushoocho, Yeeri bi alla micciibeeti deejjoyich giddemmi bagoon qanniyemmone” iye. Gutteꞌi tookkii hammiyeete.
9Yeeri gettiti xaaꞌoochoo shaggiyeete. Abrahamiyoo arooch deejjee gudoon shuunehe; baddetaa waati mixonoo arooch qeenniye. Bi bushoo Yisaaqichi kishoonaa baatoonon cuchiꞌi, deejjee gudooch bi qeenniti michi toommooch qeejjiye. 10Abrahamiyoo bi bushoon guuriya shikkoon tiijjii yechiye. 11Tunebaani Doono Yeerichi maraakoo shimaayoochaa “Abrahamo, Abrahamo!” ii ceeggiye.
Abrahamiyoo eekkehe.
12Maraakoo “Bushoochi achooch shaggaahine. Bi toommooch amoonolla halliyaahine. Ne bushoon, ikke mixxe ne bushoon, taach woonaano ne tunetoyich, Yeerin shattaabeeto ne tunoon and ariito taane” iye.
13 Abrahamiyoo kaama ciinniꞌi, biyee gubb beeti tushooch qaroona yecheꞌi beeti, ikke bagee baaddoon beeggiye. Hammii ebi bagoon deebii, bi bushoo keroon deejjoo tuniiꞌi guurii michii deejjiye. 14Ebich Abrahami ebi xaaꞌoon “Doono Yeeri qanniyemmone” ii shigiihe. Hanaach beddaahaa, “Doono Yeerichi guudi toommoochaa qannemmone”#22:14 woyee, “Bekkee beetone” geto hakkeehe. getteehe.
15Doono Yeerichi maraakoo shimaayoochaa Abrahamin guttinnoon ceeggiꞌi 16ishichiye: “Doono Yeeri ta ishichaꞌa taanna wogaabeeto taane: Ebi mooyon ne tuniitoyich, ne bushoon, ikke mixxe ne bushoon, taach woonaano ne tunetoyich, 17iberoon neen diiremmo taane; ne shiijjereenaꞌonoo shimaajji xojjenoochoommon, baharee gasheexi qacoochoommonoo meechemmo taane. Ne shiijjereenaꞌo boonoshi etteenaꞌochi katemeenaꞌon koyi yeshiree hajjemminaꞌone. 18Showee toommeexi aageteenaꞌo bulliyoo ne shiijjereenaꞌochi gommona diireyemminaꞌone. Ebi tunemmo, ta qaaroon ne waayetoyichiye” iye.
19Aroochee Abrahaminaa bi bushoona gutte bi gaddireteenaꞌo beetooch wotteheete. Tookkii tiyiꞌinoo Beershaab hammiyeete. Abrahamiyoo are Beershaab kotehe.
Nakoorichi Shiijjereenaꞌo
20Ebiyee gubb, Abrahami bi manoo Nakoori Milik waanee anaami bushiishoon bi shimon waayehe. 21Boonoshiyoo gutenee bushoo Uutsi, bi hilloo Buuzi, Araamichi nihoo Qemuꞌeeli, 22Keseedi, Haazi, Filidaashi, Yidilaafinaa Batuꞌeelinane. 23Batuꞌeeliyoo Ribiqin shiyihe. Ebi shimitte anaami bushiishoon Abrahami manoo Nakoori bi mechee Milik waanee shiyihe. 24Wotta Rehuumi getteebeeti bi naamache waanee Xebaahi, Gahaami, Tahaashinaa Maꞌakinon shiyihe.
Nu geselecteerd:
Halloo 22: KBRC
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
SIM International, 2020.
