Halloo 21
21
Yisaaqi Shiijjo
1Doono Yeeri Abrahamich bi gettitoommon, Saarin diiriye. Doono Yeeri bi gibenikkitoommon, Saarich tuniihe. 2Saariyoo xifahan. Yeeri Abrahamich bi gettiti goorooch, Abrahami geenaachaa, anaami bushoon biich shiyahan. 3Abrahamiyoo Saari biich shiyeti bushoon, Yisaaqi ii shigiihe; 4Abrahami Yeeri biich bi gettitoommon, Yisaaqi shiijjeti shimitte qemooba dokiriye.#Hal. 17:12-13 5Abrahami bi bushoo Yisaaqi shiijjehooba, balle nati ashoone.
6Saariyoo “Yeeri emiriree ta miiccemmoyich tuniitone. Hini mooyon waayemmo bulli ta naboona emiri miiccemmone” iyan. 7Wotta daakkaꞌa, “ ‘Saari bushoon shiyiree xaachemmine’ geti Abrahamich konine gettesho? And ebiyoche, bi geenaachaa, anaami bushoon biich shiyeti taane” iyan.
8Bushoo dicciꞌi xano kuxxiye. Abrahamiyoo Yisaaqi xano bi kuxxiti aabooba, oogeti gifiroon geddiye.
Haggaarinaa Ishmaꞌeelina Kexoochee Yookko
9Ikke areddoon Gibitsee ashe Haggaari Abrahamich shiyeti bushoo Ishmaꞌeeli bi bushoo Yisaaqina tookkii miiccii kaachii bi beetaa, Saari ciinnahan. 10Ebich Abrahamin “Hini gonneen bi bushoona tookki kichi yoohe. Amoommo bi tunetaa, hini gonneechi bushoo ta bushoo Yisaaqina tookki gijjoon woraashaachemmone” iyan.
11Ishmaꞌeeli bi bushoo bi tunetoyich, ebi mooyo Abrahamin oogeton maggehe. 12Tunebaani Yeeri Abrahamich ishichiye: “Bushoyichoo tuneba, ne gonnech duꞌeyaahine. Ne shiijjereenaꞌo ceekkemmo Yisaaqina bi tunetoyich, Saari neech getteto bullin waayebe. 13Gonneechi bushoo wotta ne bushoo bi tunetoyich, biin aagetoon tuniyemmo taane” iye.
14Abrahamiyoo bi dechara maaddoona tiyiye; shohoonaa aaco ceenniti mollexxoonon Haggaarich immiye; bi gogoochoo shaakkiiꞌi bi bushoona tookkii kichii daachiihe. Biyoo kechaa hammahan; Beershaabi barahoochoo yallyallimiyan.
15Mollexxeexi aaco ciirehooba, bushoon ikke tushee yiirooch kotiihan. 16“Bushoo qitoon ciinaache” iyaa balle shaadd bedoon wokkaa kotahan; aroochaa tiittaa eeppaa beehan.
17Yeeri bushoochi eefon waayehe. Yeerichi maraakoo shimaayoochaa Haggaarin ceeggiꞌi ishichiye: “Haggaare, akkitine? Yeeriyoo ne bushoo eeppiti eefon waayetone. Ebich shattaahine. 18Tibe; tiyiree bushoon tiijji tiqqe kupphiibe. Aricheti aagetoon biin tuniyemmo taane” iye.
19Yeeri bi aafoon qechaa, aachi oppoon beeggahan. Hammaa mollexxoona aacon ceechiyan; bushoyichoo uchiyan.
20Yeeriyoo ebi bushoona tookkii tunehe; bushoo dicciye. Bi beemonoo barahooch tuniihe; aricheti aaddoon tunehe. 21Bi beemi xaaꞌoon Faraani barahooch tuniihe. Bi indeyoo Gibitsee showoochee mecheen deebaa biich shaakkiihan.
Abrahaminaa Taatoo Abimeleekina Wogoon Gimo
22Ikke areddoon Abimeleeki bi ginee iraashoo Fikoolina tookkii Abraham waan hammiꞌi ishichiye: “Ne tuniyaabeeti mooyo bullina Yeeri neenna tookkii beetone. 23Illa taan, ta bushiisheenaꞌonaa ta shiijjereenaꞌonon ne dawushaachemmoyich, Yeerina wogebe! Wotta neech deꞌoon ta tuniitoommon, newoo taannaa iibbittinoona ne beeti showeexi asheenaꞌonoyich deꞌoon ne tuniyemmoyich wogebe” iye.
24Abrahamiyoo “Gaawiye; wogemmo taane” iye.
25Aroochee bi gaddireteenaꞌo boggii deqqiti aachi oppee naboyich ayinito bi tunoon Abrahami Abimeleekich gettiye. 26Abimeleeki wochiꞌi ishichiye: “Ebi mooyon koni tuniito gaata ta ariyaano taane. Newoo wotta taach getaano neene. Hanaachiyee besh, ebiyee aaf ebi mooyon waayeyaano taane” iye.
27Ebich arooba Abrahami bagoonaa miimonon deebii Abimeleekich immiye; gutteenaꞌoo wogoon giyiyeete. 28Abrahamiyoo shabaatte bagee gidereenaꞌon bariiꞌi badd kichiye. 29Abimeleeki Abrahamin “Ebi bariyaꞌa badd ne kichiti, shabaatte bagee gidereenaꞌo, ameechinaꞌone?” ii echehe.
30Biyoo “Hini aachi oppoon iijjeto ta tunoon ne miixemmoyich, ebi shabaatte bagee gidereenaꞌon ta waanee deꞌe” iye.
31Gutteenaꞌo wogoon boonoshi giyiti xaaꞌoo bi tunetoyich, ebi xaaꞌoo, Beershaabi#21:31 Beershaabi geto, “Wogee oppo” woyee “Shabaatteenaꞌochi oppo” getone. getteehe.
32Beershaabaa wogoon boonoshi giyitoyee gubb, Abimeleekinaa bi ginee iraashoo Fikoolina Filsixeemee showooch wotteheete. 33Abrahamiyoo Beershaab tamariskee mixon bechiye. Aroochaanoo Bulli Yemeenee Nuggishoo, Doono Yeerich goyinnehe. 34Abrahamiyoo meeti naton dallaawittinoona Filsixeemee showooch kotehe.
Nu geselecteerd:
Halloo 21: KBRC
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
SIM International, 2020.
