Mɑtʉ̈ɔ 21
21
Yɛ́su sɛ́ ŋ́kúu Yɛlúsɑlɛm pɑ́Ꞌ fɔɔ
(Mɑ́lɛ́kúshi 11.1-11; Lúkɑ́shi 19.28-40; Jɑ̂ŋ 12.12-19)
1Yɛ́su pɔ́p ɡɑŋku pɛ́ ɡʉ tɛ ḿbɔ́ ŋ́kúu Yɛlúsɑlɛm, ḿbɛ́t ḿbɔ́ shʉ́ Mbɛdfɑjɛ́ɛ, zʉꞋ nɛŋkɔ́Ꞌ-mɛtʉ́-mɛɡwɛ́t-ɔliivɛ. A ɡɔ́ɔ ŋ́kɛ́ ńtúu ɡɑŋku pɛ́ pɛ́pɑ́, 2ńcú mbɔ̌ pɔ́p ŋɡɔ: «Pʉʉ ɡʉ tsɛt lɑ́Ꞌ yɑ́ yi ɛ́ mbi pʉʉ lɑ́, pʉʉ ɡʉ ŋ́ɡɔ ŋ́kúu zúꞋu ńjʉ́ɔ njɑkɑ́ɑshi, mbɔ pɛ́ ńcʉŋɛ, mɔ́ɔ nɛ pɔ́ nɛjɔ́ŋ yɛ́, pʉʉ kíɛꞋ wɔ́p, ńdɔk wɔ́p ńtɔ́, ŋ́ɡɑ́ mbɔ̌ mɔ.» 3Pʉʉ lɑɑ ḿbɔ́ ŋ́kíɛꞋ, ŋu cú nu, pʉʉ pʉ̈ɔt ŋɡɔ: «Ndɛ tsɑ́ɑnɛ. Mbɔ ɑ ɡʉ ŋ́ɡɔ́ɔ ńnɑ́ pʉʉ lɔk ŋ́ɡʉ.» 4Mɔnɛ mɛnu pɔ́ pɑ́Ꞌɑ ńdɔk ḿbuutɛ nǔu nu yi Ŋɡɛ́mndʉ̈ɔ́Ꞌ-Sɛ́ kɑ lɑ́Ꞌnɛ ńcú ŋɡɔ:
5pʉʉ cú mbɔ̌ pʉɔ pí pɔ́p tsɛt tʉ́sɔŋ-Syɔ́ŋ ŋɡɔ:
«Pɔ́p líŋɛ ńjʉ́ɔ pɑ́Ꞌ fɔɔ wɔp sɛ́ ńtɔ́ nɛ́ nɛjɔ́ŋ pɔ́p,
ḿbɔ́ ŋɡɑŋ-mbɔ́tnɛ,
ńnɑ́ŋ ndǔ njɑkɑ́ɑshi, ɑ pɔ́ mɔ́ɔ njɑkɑ́ɑshi.»
6Gɑŋku-Yɛ́su ɡʉ ŋ́kúu zúꞋu, ŋ́ɡɛ mbɑ kʉ̈ɔ́lɑ́ pɔ pɑ́Ꞌ Yɛ́su lɑ́Ꞌnɛ ńcú, 7ńdɔk njɑkɑ́ɑshi pɔ́p mɔ́ɔ nɛ ńtɔ́, ńzɑ́p mɛndẅí-fɑ́k mɔ́p ŋkwɛn mɔ́ɔ-njɑkɑ́ɑshi, Yɛ́su nɑ́ŋ ndǔ wɛcɔ́. 8Nɛzɑ́ɑ pʉɔ sɑŋtɛ mɛndẅí mɔ́p ndǔ sɛ̂ndúŋ, pɛcɔ́ pʉɔ fɑk mɛpɔ́-tʉ́ ńtɔ́ ɛ́sɑŋtɛ sɛ̂ndúŋ ɡúu.
9Lɑ́Ꞌ pɔ́ mbi, yɛcɔ́ pɔ́ nzʉʉ, ńnɛn ńcú ŋɡɔ:
«Wûuẅíi»#21.9 Ɛ́ lɔk ḿbɔ́ Ɔzɑ́nɑ. Ḿbɔ́ ntɛ́ yi pɑyúdɑ kɑ pɔ́ ńdɔk ŋ́ɡɛ́mtɛ fɔɔ.! Mbɔ̌ ŋu nǔu njẅɛt-fɔɔ Ndɑvît.
Mbɔ́tnɛ pɔ́ mbɔ̌ ŋu ẅí ɑ tɔ́nɛ nǔu lík-Tsɑpʉɔ.
Wûuẅíi mbɔ̌ Sɛ́ tɛ tʉ́nɛ́pú.
10Yɛ́su ɡʉ tɛ ŋ́kúu Yɛlúsɑlɛm, tʉ́sɔŋ puu ńtsʉꞋnɛ, pʉɔ pɔ́ ḿbíkŋɛ ŋɡɔ: «Wɔ ŋu pɔ́ wɔ̌?» 11Lɑ́Ꞌ pʉ̈ɔt ŋɡɔ: «A Yɛ́su Ŋɡɛ́mndʉ̈ɔ́Ꞌ-Sɛ́, ɑ fú tʉ́sɔŋ-Nɑ̌zɑlɛt nǔu pɑk-ŋɡɔŋ-Ŋɡɑlilɛɛ.»
Yɛ́su zuŋ pɑfɛn yúu zʉꞋ-nɔŋpɔꞋ
(Mɑ́lɛ́kúshi 11.15-19; Lúkɑ́shi 19.45-48; Jɑ̂ŋ 2.13-16)
12Yɛ́su ɡʉ tɛ ŋ́kúu tsɛt zʉꞋ-nɔŋpɔꞋ, ŋ́kɛm pɑfɛn yúu pɔ́p pɑzúu, ńtsʉ́ʉ mɛŋkɔꞋ-mɛtɑ́ɑ-pɑkúpmɛ ŋkɑ́p ḿmɑꞋ sɛ́, ḿbɛn ńtsʉ́ʉ mɛŋkɔꞋ-pɑfɛn puutɛ ḿmɛꞋ, 13ŋ́ɡɔ́ɔ ńcú mbɔ̌ pɔ́p ŋɡɔ: Ɛ́ tsɛt ŋwɑꞋnɛ-Sɛ́, Sɛ́ cú ŋɡɔ: «pɛ́ ɡʉ ńdɑ́Ꞌ ɛ́fúŋ ndɑ́ yɑɑ ŋɡɔ: Ndɑ́-cɛꞋlɛ Sɛ́ lɑ́ pʉʉ sɛ́ ńdɔk ŋ́ɡɛ ŋkɑɑ-pɛtsɔ́ŋ.» 14Pɛfʉmík mbɑ ɡɑŋpʉ̈ɔ́Ꞌtɛ mɛku pɛn ńtɔ́ nɛjɔ́ŋ Yɛ́su tsɛt zʉꞋ-nɔŋpɔꞋ, ɑ ɡɛ pɔ́p fíitɛ. 15Pɛtɑ́tndɑ́-pɑnɔŋpɔꞋ pɔ́p pɑkyɛ́ꞌtɛ nɛpʉ́ʉ-Mɔ̌sɛ̂ɛ, jʉ́ɔ mɛŋkʉꞋnɛ mɛnu mi Yɛ́su ɡɛnɛ, ḿbɛn ńzúꞋ pɑ́Ꞌ mbɔ́ŋkʉ̈ɔ́ tsɛt zʉꞋ-nɔŋpɔꞋ ńzɔp ńcú ŋɡɔ: «Wûuẅíi, mbɔ̌ ŋu nǔu njẅɛt-fɔɔ Ndɑvît, ńzɑ́ŋ lɔ́ŋ,» 16ŋ́ɡɔ́ɔ ŋ́kɛ́ ḿbíkŋɛ Yɛ́su ŋɡɔ: «Tɛ ɔ sɛ́ ńzúꞋ yúu mi mbɔ́ŋkʉ̈ɔ́ sɛ́ ńcú lɑ́?» Yɛ́su tsɔ́Ꞌ mbɔ̌ pɔ́p ŋɡɔ: «Mɔ sɛ́ ńzúꞋ!» Ḿbɛn ŋɡɔ: Pʉʉ ŋkɑɑ mɔ́ ɛ́fúŋ ŋkɑŋ-ŋwɑꞋnɛ-Sɛ́ yi ɛ́ cúnɛ ŋɡɔ: «mbɔ́ŋkʉ̈ɔ́ tɛ mbɑ pɔ́ɔ mbɔ́t, ḿbɔ́ ńdɔk ntsu wɔ́p ŋ́ɡúꞋlɛ wú pɑ́Ꞌ ɔ kɑ tsɑ́ɑnɛ pɔ́ kɛ?» 17Ńcú pɔ́Ꞌɔ, ńnɑ́ wɔ́p, ɛ́fú tʉ́sɔŋ ńcẅɛt ŋ́ɡʉ nɛ́ Mbɛtɑni, ŋ́kúu zúꞋu ńdɛ́.
Yɛ́su níꞋ ndɔɔ nǔu yɛcɔ́ tʉ́-ŋɡɛ̌m#21.18 Ɛ́ lɔk ḿbɔ́ tʉ́ yi pɛ́ fúŋnɛ ŋɡɔ «fiɡue», ɛ́ pɔ́ pɔ pɑ́Ꞌ ŋɡɛ̌m. Pɛ́ pi tsɛt mɛŋkɑ́Ꞌ-Íslɑyɛ̂l, ɛ́ zɛ́m mɛntɑ́ɑ ɛ́ ɡúꞋ ńtsɑ ŋɡɛ̌m.
(Mɑ́lɛ́kúshi 11.12-14, 20-24)
18Njí ɡɛ ŋ́kiɛ pɔ́p ɡɔ́ ḿbɛn nɛ́ tʉ́sɔŋ, njí zɑ́ŋ Yɛ́su. 19A jʉ́ɔ tʉ́-ŋɡɛ̌m mbʉʉ-sɛ̂ndúŋ, ŋ́ɡʉ nɛtsɛ́n nú, ńjʉ́ɔ pɔ ndɑꞋ mɛfu nǔu, ńcú mbɔ̌ tʉ́ ɛ̂yɑ́ ŋɡɔ: «Ɔ kɛ́ lɑ́Ꞌ ḿbɛn ńzɛ́m ntɑ́ɑ pɔ́!» Tʉ́ ɛ̂yɑ́ ɡɔ́ɔ ńzúu. 20Gɑŋku pɛ́ jʉ́ɔ pɑ́Ꞌ ɛ́ zúunɛ, ɛ́ tsɑ wɔ́p, pɔ́p cú ŋɡɔ: «Ɛ́ ɡɛ ŋɡɔ́ku lɑ tʉ́ yɔ tʉ́ʉ pɔ ŋkɑ́ yɔ ńzúu?» 21Yɛ́su pʉ̈ɔt mbɔ̌ pɔ́p ŋɡɔ: «Ɛ sẅíi wʉ́ʉ, kwɑꞋ nɛ́nẅín, pʉʉ lɑɑ ńzɑ́p tʉ́m nǔu Sɛ́, tɛ mbɔɔ mʉꞋlɛ, mbɔ pʉʉ ɡʉ kuꞋ nɛɡɛ yúu mi ŋ ɡɛnɛ nǔu tʉ́-ŋɡɛ̌m lɑɑ tɛ ńdɛɛ pɔ́Ꞌɔ.» Mbɔ ɛ́ lɑɑ ḿbɔ́ pʉʉ kuꞋ nɛcú mbɔ̌ nɛŋkɔ́Ꞌ nɔ ŋɡɔ: «Fú zɑ́Ꞌɑ ŋ́ɡʉ ńtʉ́ʉ tsɛt ŋki kɛ́ nɛpɑt! Ɛ́ zúꞋ ntsu wʉ́ʉ.» 22Pʉʉ lɑɑ ńzɑ́p tʉ́m nǔu Sɛ́, ḿbúꞋ mbɔ́ mbɔ̌ wɛ́ ńdɔ́ɔ mbɑ kʉ̈ɔ́ lɑ́, mbɔ ɑ ɡʉ ŋ́ɡɑ́.
Yɛ́su lɔk lík wɔ̌ ɛ́fɑꞋ?
(Mɑ́lɛ́kúshi 11.27-33; Lúkɑ́shi 20.1-8)
23Yɛ́su pɛn ḿbɛn tsɛt zʉꞋ-nɔŋpɔꞋ tɛ ńzɛ nɛzíꞋ pʉɔ nɛ́ nu-Sɛ́, pɛtɑ́tndɑ́-pɑnɔŋpɔꞋ pɔ́p pɛlʉ́m tsɛt lɑ́Ꞌ tɔ́ ḿbíkŋɛ wɛ́ ŋɡɔ: «Ɔ lɔk lík wɔ̌ ŋ́ɡɛ mɔnɛ mɛnu? KwɑꞋ wɔ̌ túunɛ wú ŋɡɔ ɔ ɡɛ pɔ́Ꞌɔ?» 24Yɛ́su tsɔ́Ꞌ mbɔ̌ pɔ́p ŋɡɔ: «Mbɑ mɔ yɑ́ɑ ŋ ɡʉ ḿbíkŋɛ wʉ́ʉ nɛ́ tɑ́Ꞌ nu. Pʉʉ pʉ̈ɔt mbɔ̌ mɔ, ŋ ɡɔ́ɔ ŋ́kɛ́ ɛ́sẅíi wʉ́ʉ kwɑꞋ nɛ́ ŋu ẅí ɑ kɑ túunɛ wɑ́ɑ nɛɡɛ mɔnɛ mɛnu.» 25Wɔ̌ kɑ túunɛ Jɑ̂ŋ nɛnuꞋ pʉɔ ŋki? Sɛ́ kɛ ŋumɛsɔŋ? Pɔ́p zúꞋ, ŋ́kwɑŋɛ tsɛtsɛt pɔ́p ŋɡɔ: «Pɛkŋɛ lɑɑ ŋɡɔ Sɛ́ kɑ túunɛ wɛ́, mbɔ ɑ ɡʉ ḿbíkŋɛ wɛkŋɛ ŋɡɔ tɛ mɛlɑ́Ꞌ kʉ̈ɔ́ pɛkŋɛ ŋ́kɑɑ pɛ́m nu yí Jɑ̂ŋ kɑ pɔ́ ńcú pɔ́ ɔɔ?» 26Ḿbɛn ŋɡɔ pʉɔmɛsɔŋ, mbɔ lɑ́Ꞌ kɛ́ ɡɛ ńnɑ́ wɛkŋɛ pɔ́, mbíꞋŋɡɔ pʉɔ tsʉʉ sɛ́ ńjí ŋɡɔ Jɑ̂ŋ kɑ pɔ́ Ŋɡɛ́mndʉ̈ɔ́Ꞌ-Sɛ́. 27Pɔ́p kwɑŋɛ pɔ́Ꞌɔ, ńtsʉ́Ꞌ ńtsɔ́Ꞌ mbɔ̌ Yɛ́su pɔ ŋɡɔ: «Pɛk kɑ́ jí.» Yɛ́su cú mbɔ̌ pɔ́p ŋɡɔ: «Mbɑ mɔ yɑ́ɑ ŋ kɛ́ sẅíi wʉ́ʉ nɛ́ ŋu ẅí n dɔknɛ lík yɛ́ ŋ́ɡɛ mɔnɛ mɛnu pɔ́.»
Sɑknɛkɛt nǔu mbɔ́ŋkʉ̈ɔ́-ŋu pɛ́pɑ́
28Yɛ́su pɛn ńcú ŋɡɔ: «Pʉʉ zúꞋ yɔ nu, ɛ́sẅíi wɑ́ɑ nɛ́ nu yí pʉʉ kɑ kwɑŋɛ́nɛ. Wɛcɔ́ ŋu kɑ lɑ́Ꞌ ŋ́ɡẅɛɛ mbɔ́ŋkʉ̈ɔ́ pɛ́ pɛ́pɑ́, ńcú mbɔ̌ nduŋmbi ŋɡɔ: “Mɔ́ɔ wɑɑ, ɡʉ ŋkɑ́Ꞌ lɔ́Ꞌnɛ ńjúk zúꞋu ɛ́fɑꞋ.”» 29A pʉ̈ɔt ŋɡɔ: «N dʉꞋ.» Ḿbɛn ńnɑ́ŋ, ŋ́kíi yúu mi ɑ lɑ́Ꞌnɛ ŋ́ɡɛ ɑ cú pɔ́Ꞌɔ, ŋ́ɡʉ nɛ́ ŋkɑ́Ꞌ. 30Tɑ̌ɑ wɔp pɛn ńcú pɔ tɑ́Ꞌ nu mbɔ̌ wɛcɔ́ mɔ́ɔ, ẅîwɑ́ mɔ́ɔ pʉ̈ɔt ŋɡɔ: «Ɔ́ɔŋ tɑ̌ɑ mɔ, ŋ ɡʉ ŋ́ɡʉ,» lɑ́, ńcú pɔ́Ꞌɔ, ŋ́kɛ́ mbɔɔ zúꞋu ɡʉ. 31Pɔ́Ꞌ lɑ́, wɔ̌ nǔu mbɔ́ŋkʉ̈ɔ́ pɔnɛ pɛ́pɑ́ kɑ ɡɛnɛ yúu mi tɑ̌ɑ wɔp sɛ́ ŋ́kɔŋ? Pɛtɑ́tndɑ́-pɑnɔŋpɔꞋ pɔ́p pɛlʉ́m tsɛt lɑ́Ꞌ pʉ̈ɔt ŋɡɔ: Ɛ́ nduŋmbi. Yɛ́su ɡɔ́ɔ ŋ́kɛ́ ńcú mbɔ̌ pɔ́p ŋɡɔ: «Ɛ sẅíi wʉ́ʉ, kwɑꞋ nɛ́nẅín, pɑcẅɛ́ɛ ntsup-Lɔ́mɑ pɔ́p ɡɑŋɡɑ́ɑ pɑŋɡɛ́ sɛ́ ńjʉ́ pii nɛkúu nǔu nu-nɛfɔɔ-Sɛ́ ńtsɑ wʉ́ʉ,» 32ɛ́ lɔk ḿbɔ́ ŋɡɔ Jɑ̂ŋ kɑ tɔ́ ńnyɛt wʉ́ʉ nɛ́ sɛ̂ndúŋ ẅi Sɛ́ sɛ́ ŋ́kɔŋ ŋɡɔ pʉʉ nɛn nǔu, pʉʉ lʉꞋ lʉꞋnɛ nu yí ɑ cúnɛ. Lɑ́ Pɑcẅɛ́ɛ ntsup mbɑ ɡɑŋɡɑ́ɑ pɑŋɡɛ́ kɛ́ ḿbɛ́m yɔ́p, pʉʉ pɛn ŋ́kɛ́ mbɔɔ jʉ́ɔ pɔ́Ꞌɔ, ŋ́kúp mɑt wʉʉ, ḿbɛ́m yʉ́ʉ pɔ́.
Sɑknɛkɛt nǔu pʉɔ pí pɛ́ kɑ níꞋnɛ ŋkɑ́Ꞌ mbɔ̌ pɔ́p
(Mɑ́lɛ́kúshi 12.1-12; Lúkɑ́shi 20.9-19)
33Yɛ́su cú ŋɡɔ: «Pʉʉ pɛn ńzúꞋ yɛcɔ́ sɑknɛkɛt. Wɛcɔ́ ndʉ́m kɑ lɑ́Ꞌ ŋ́ɡẅɛɛ zʉꞋ-ŋkɑ́Ꞌ yɛ́, ŋ́ɡʉ tsɛtú ḿbi mɛtʉ́ mi pɛ́ kíɛ mɛntɑ́ɑ mɛ́ ńdɔk ńniitɛ mɛluꞋ, ḿbɔ́ɔ tɑ́ɑŋkɑ́Ꞌ ńdɔk ŋ́kíitɛ, ŋ́ɡʉ tsɛt ŋkɑ́Ꞌ ḿbuꞋ ɡʉ̈ɔ́ nǔu ŋɡɔꞋ zʉꞋ yí pɛ́ ɡʉ kíɛ mɛntɑ́ɑ zúꞋu, ḿbɔ́ɔ zʉꞋ yi pɛ́ ɡʉ ŋ́kɔ́Ꞌ ńtʉ́ʉ tsɛtú lɑ́ ḿbyɛ́p ŋkɑ́Ꞌ, ŋ́ɡɛ pɔ́Ꞌɔ, fɛ́ɛ ŋkɑ́Ꞌ mbɔ̌ pɑniitɛ mɛluꞋ, ŋ́ɡɔ́ɔ ŋ́kɛ́ ŋ́ɡʉ nɛ́ túu.» 34Ŋkɑ́ nɛkɑ́p ntɑ́ɑ-tʉ́ ɡɛ ŋ́kuꞋ, ɑ túu ɡɑŋfɑꞋ pɛ́ mbɔ̌ pʉɔ pí pɔ́p ŋkɑ́Ꞌ ŋɡɔ pɔ́p ɡʉ ńcẅɛ́ɛ mɛ́ mɛntɑ́ɑ-tʉ́ ńdɔk ńtɔ́. 35Pɔ́p ɡʉ tɛ ŋ́kúu zúꞋu, pʉɔ pí pɔ́p ŋkɑ́Ꞌ yɛ́ kɑ vu nǔu nduŋmbi ńtswɑ́ɑ wɛ́, ńjẅí mbɑ́ɑtɛ, ḿbɛn ńdɔk mɛŋɡɔꞋ ńtɛ́mtɛ mbɑ́ɑtɛ yɛ́tɑ́t ńjẅí. 36Ndʉ́m wɑ́ pɛn ńtúu pɛcɔ́ ɡɑŋfɑꞋ tɛ pɔ́p zɑ́ɑ ńtsɑ pɛ́ mbi. Lɑ́ pʉɔ pɑ́ pɛn ŋ́ɡɛ pɔ pɑ́Ꞌ pɔ́p zɛɛ ŋ́ɡɛ nǔu pɛcɔ́ ɡɑŋfɑꞋ lɑ́. 37Ɛ́ ɡɔ ńdẅiklɛ, ndʉ́m ɛ̂wɑ́ túu kwɑꞋ mɔ́ɔ nɛ, ḿbɔ́ ŋ́kwɑŋɛ ŋɡɔ ɑ ɡʉ ŋ́kúu zúꞋu, pɔ́p ɡɛ mɛkuꞋ mɛ́. 38Lɑ́ pʉɔ pɑ́ jʉ́ɔ mɔ́ɔ-ndʉ́m wɑ́, ńcú tsɛtsɛt pɔ́p ŋɡɔ: «Njʉ́ndɑ́ wɛ pʉɔlɑ́ ɑ tɔ́nɛ lɑɑ. Pʉʉ tɔ́ pɛkŋɛ jẅí wɛ́ ńjʉ́ ŋkɑ́Ꞌ,» 39ńcú pɔ́Ꞌɔ, ŋ́ɡẅɛɛ wɛ́, ɛ́shuŋ wɛ́ ńdɔk ɛ́fú ŋkɑ́Ꞌ ńcẅɛt, ŋ́ɡʉ ńjẅí!
40Yɛ́su píkŋɛ ŋɡɔ: «Tɛ ndʉ́m wɔ ɡʉ ŋ́ɡɛ ńtɔ́, ŋ́ɡɛ ŋɡɔ́ku nǔu pʉɔ pí ɑ kɑ níꞋnɛ ŋkɑ́Ꞌ mbɔ̌ pɔ́p?» 41Pɛ́ pʉ̈ɔt ŋɡɔ: «A ɡʉ ńtɔ́ ŋ́ɡɛ pɛ́ jẅítɛ pɛfút ɛ̂pɑ́, ḿbɛn ńníꞋ ŋkɑ́Ꞌ mbɔ̌ pɛcɔ́ pʉɔ pɛndɛꞋ, pínɛ ɛ́ ɡʉ ŋ́ɡɛ kuꞋ ŋkɑ́ yi pɛ́ kíɛnɛ mɛluꞋ, pɔ́p ɡɑ́ mɛ́.» 42Yɛ́su pɛn ńcú mbɔ̌ pɔ́p ŋɡɔ: «Pʉʉ ŋkɑɑ mɔ kɑ́ fúŋ zʉꞋ-ŋwɑꞋnɛ-Sɛ́ pɔ́ ɔɔ?» Ɛ́ cú ŋɡɔ:
«ŊɡɔꞋ yí pɑpɔ́ɔndɑ́ kɑ mɛꞋnɛ,
kɑ tsʉ́Ꞌnɛ ŋɡɔꞋ yí ɛ́ piꞋnɛ ndɑ́.
Tsɑpʉɔ kɑ ɡɛnɛ pɔ́Ꞌɔ,
ɛ́ pɔ́ mɑ́mɑ́ nu sʉ́Ꞌnɛ mík pɛkŋɛ?
43Ɛ́ pɔ́Ꞌɔ, lɑ ɛ sẅíi wʉ́ʉ ŋɡɔ pɛ́ ɡʉ cẅɛ́ɛ zʉꞋ yʉ́ʉ tsɛt nɛfɔɔ-Sɛ́, ŋ́ɡɑ́ mbɔ̌ yɛcɔ́ túu yi ɛ́ ɡʉ ŋ́ɡɛ yúu mi Sɛ́ sɛ́ ŋ́kɔŋ.» [ 44ŊɡɔꞋ ɛ̂yɑ́ yi ŋu lɑɑ ḿvu nǔu, mbɔ ŋɡɑŋ ɡʉ ḿbʉ̈ɔ́Ꞌtɛ, ɛ́ pɛn ḿvu nǔu ŋu, mbɔ ɛ́ ɡʉ ŋ́ɡɔꞋ ŋɡɑŋ.] 45Pɛtɑ́tndɑ́-pɑnɔŋpɔꞋ pɔ́p pɑfɑlísɑy zúꞋ yɔ sɑknɛkɛt, ńdii ŋɡɔ Yɛ́su cú mbɔ̌ pɔ́p, 46ńdɔɔ shʉ́ nɛɡẅɛɛ wɛ́, lɑ́ ḿbɔ́k mík-lɑ́Ꞌ, mbíꞌŋɡɔ lɑ́Ꞌ kɑ pɔ́ ńjí ŋɡɔ Yɛ́su Ŋɡɛ́mndʉ̈ɔ́Ꞌ-Sɛ́.
Nu geselecteerd:
Mɑtʉ̈ɔ 21: JGO
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
CABTAL, 2017
