Mɑtʉ̈ɔ 22
22
Sɑknɛkɛt nǔu ndínɑ-lɑ́ɑndɑ́
(Lúkɑ́shi 14.15-24)
1Yɛ́su pɛn ńdɔk pɔ sɑknɛkɛt, ńcú mbɔ̌ lɑ́Ꞌ yi ɛ́ sɛ́ ńzẅíꞋlɛ sẅiŋɛ yɛ́ ŋɡɔ: 2«Pʉʉ jʉ́ɔ pɑ́Ꞌ nɛfɔɔ-Sɛ́ pɔ́nɛ. Ɛ́ pɔ́ pɔ pɑ́Ꞌ nu-wɛcɔ́ fɔɔ ẅí ɑ kɑ lɑ́Ꞌnɛ ńniitɛ mɑ́mɑ́ ndínɑ nǔu nu-lɑ́ɑndɑ́ mɔ́ɔ nɛ wɛ mbɛ́ɛnɛ. 3Ŋkɑ́ nɛjʉ́ yúu ɡɛ ŋ́kuꞋ, ɑ túu pɛtsiindɑ́ pɛ́, ŋɡɔ pɔ́p ɡʉ ńdɔɔ pʉɔ pínɛ ɑ kɑ cúnɛ mbɔ̌ pɔ́p pɑ́Ꞌ pɔ́p ɡʉ ńtɔ́ pɔ́p pɛ́pɔ́p kwɛ́t yúu. Lɑ́ pɛtsiindɑ́ pɛ́ ɡʉ ńjʉ́ɔ wɛ́t ŋu lɑ́ nǔu pɔ́p, ɑ lʉꞋ lʉꞋnɛ nɛtɔ́.» 4A pɛn túu pɛcɔ́ pɛtsiindɑ́ pɛ́, ńcú mbɔ̌ pɔ́p ŋɡɔ: «Pʉʉ cú mbɔ̌ pʉɔ pínɛ ŋ kɑ fúŋnɛ wɔ́p ŋɡɔ pɛ́ niitɛ yúupɛjʉ́ tɛ ńtík sɛ́, ŋɡɔ n cú pɛ́ jẅí pɛfɔŋ pɑ́ɑ, ńjẅí mɛyúumɛku mɑ́ɑ mi ɛ́ ɡúꞋnɛ tɛꞋ, ŋɡɔ yúu ńdɑ́Ꞌmɔ́ ńtʉ́ʉ sɛ́, pɔ́p tɔ́ pɛ́ jʉ́ ndínɑ-lɑ́ɑndɑ́.»
5Pʉɔ pí pɛ́ kɑ fúŋnɛ wɔ́p nǔu ndínɑ-lɑ́ɑndɑ́ pɔɔ lɔk nu yi pɔ́p cúnɛ ɛ́fúŋ yɛcɔ́ nu pɔ́, wɛ́t ŋu lɑ́ lɛɛ pɔ wɛ́ ndúŋ. Wɛcɔ́ ŋu ɡʉ nɛ́ ŋkɑ́Ꞌ yɛ́, wɛcɔ́ ŋ́ɡʉ nɛ́ tɑ́ŋ mɛntɑ́ɑ wɛ. 6Pɛcɔ́ ɡẅɛɛ pɛtsiindɑ́ fɔɔ ɛ̂pɑ́, ŋ́ɡɑ́ɑnɛ wɔ́p, ńjẅítɛ wɔ́p. 7Nu pʉ́k fɔɔ. A túu pɑlʉ̈ɔ́Ꞌntsɔ pɛ́, ŋɡɔ pɔ́p ɡʉ ńjẅítɛ pɛfút ɛ̂pɑ́, ńtɔɔ tʉ́sɔŋ yɔ́p, 8ḿbɛn ńcú mbɔ̌ pɛtsiindɑ́ pɛ́ ŋɡɔ: «Pɛ́ ńdɑ́Ꞌmɔ́ ńtík yúupɛjʉ́-lɑ́ɑndɑ́ sɛ́. Pʉɔ pínɛ ŋ kɑ zɛɛnɛ ɛ́fúŋ wɔ́p ŋkɑɑ pi pɔ́p kuꞋnɛ nɛkwɛ́t pɔ́.» 9Pʉʉ ɡɔ́ɔ ŋ́kɛ́ ŋ́ɡʉ ŋkɔ̂ɔnɛ nǔu mɛtú-ndúŋ, ńjʉ́ɔ mbɑ wɛ́t ŋu zúꞋu lɑ́, ɛ́fúŋ wɛ́ fúŋnɛ. 10Pɛtsiindɑ́ pɛ́ pɑ́ ɡʉ ńtʉ́ʉ nǔu mɛtú-ndúŋ, ńjʉ́ɔ mbɑ wɔ̌ lɑ́, ɛ́fúŋ wɛ́, kɛ ɑ pɔ́ ŋu sʉ́Ꞌnɛ ɔɔ, kɛ ŋu kɛpɔŋ ɔɔ. Pɛ́ tɛmtɛ ńníꞋ wɔ́p pɔ tsɛt ndɑ́-ndínɑ, tɛ ɛ́ lúu.
11Fɔɔ ɡɛ ŋ́kúu tsɛt ndɑ́-ndínɑ nɛjʉ́ɔ lɑ́Ꞌ yi ɛ́ tɔ́nɛ nǔu lɑ́ɑndɑ́, ŋ́kúu zúꞋu, ńjʉ́ɔ wɛcɔ́ ŋu mbɛ́ɛnɛ, mbɔ ɑ kɑ́ mɑꞋ ndẅí lɑ́ɑndɑ́ pɔ́#22.11 Ɛ́ kɑ pɔ́ nǔu mɑt pɑyúdɑ, ŋu fúŋ ndínɑ-lɑ́ɑndɑ́, ńnyɛt mɛndẅí mi pʉɔ ɡʉ ḿmɑꞋ lɑ́ ŋ́kúu ndɑ́. 12A cú mbɔ̌ wɛ́ ŋɡɔ: «Súu wɑɑ, ɔ ɡɛ ŋɡɔ́ku ŋ́kúu zɑꞋnɛ kɛ́ mɑꞋ ndẅí lɑ́ɑndɑ́?» Ŋu ɛ̂wɑ́ pɔɔ jí nu yí ɑ ɡʉ ńcú pɔ́. 13Fɔɔ ɡɔ́ɔ ŋ́kɛ́ ńcú mbɔ̌ pɛtsiindɑ́ pɛ́ ŋɡɔ: «Pʉʉ kút mɛku mɛ́, ŋ́kút mbɔ́ mɛ́, ḿmɑꞋ wɛ́ píi, tsɛt nzɛ́nzʉ́ʉ. A ɡʉ ńnɑ́ŋ zúꞋu ḿbɔ́ ńdɑɑ, ḿbɔ́ ŋ́kwɛ́t mɛsɔŋ.»
14Yɛ́su mɛkŋɛ ŋɡɔ: «Ɛ́ pɔ́Ꞌɔ, mbíꞋŋɡɔ Sɛ́ sɛ́ ɛ́fúŋ pʉɔ tɛ ńzɑ́ɑ lɑ́ pɑɡʉ tɛ ŋ́kúu pɔɔ zɑ́ɑ.»
Pɛ́ zẅíꞋ ntsu-Yɛ́su nǔu nu ntsup-Kɑ́sɑ
(Mɑ́lɛ́kúshi 12.13-17; Lúkɑ́shi 20.20-26)
15Ɛ́ ɡɛ pɔ́Ꞌɔ, Pʉɔ-fɑlísɑy ɡɛ cúꞋlɛ, ńdɔɔ pɑ́Ꞌ ɛ́ lɑɑ ḿbɔ́ pɔ́p fú nǔu nu yi Yɛ́su cúnɛ ŋ́ɡẅɛɛ wɛ́, 16ńtúu pɛcɔ́ ntɑ́Ꞌ pʉɔ nǔu ɡɑŋku yɔ́p, mbɑ pɛcɔ́ ntɑ́Ꞌ pʉɔ nǔu ku-pʉɔ-fɔɔ Ɛlɔ̂dɛ ŋɡɔ: Pɔ́p ɡʉ ńcú mbɔ̌ Yɛ́su ŋɡɔ: «Cícɑ, pɛk sɛ́ ńjí ŋɡɔ ɔ cú nu, ḿbɛn ńdɛꞋlɛ pɔ nu yí ɛ́ tʉ́ʉnɛ ndʉ́ŋndʉŋ, ńcú kɛ́ pɔ́k ŋu, ḿbɛn ŋ́kɛ́ mbɔɔ líŋɛ ŋumɛsɔŋ pɔ nǔu shʉ́ pɔ́, ńdɛꞋlɛ nu nɛ́nẅín pɔ pɑ́Ꞌ Sɛ́ sɛ́ ḿbíkŋɛ ŋɡɔ pɛ́ ɡɛ pɔ́Ꞌɔ. 17Sẅíi wɛk pɑ́Ꞌ ɔ kwɑŋɛ́nɛ yú nǔu yɔ nu: Nɛpʉ́ʉ nɛkŋɛ pɛ́Ꞌɛ ḿbɛ́m ŋɡɔ pɛkŋɛ mɑꞋ ntsup-Kɑ́sɑ-Pɑlɔ́mɑ kɛ ŋɡɑ́ŋ?»
18Lɑ́ Yɛ́su jí kwɑŋɛ kɛpɔŋ yɔ́p, ńcú mbɔ̌ pɔ́p ŋɡɔ: «Pɑŋkɔŋ-mík, pʉʉ kwɑꞋnɛ wɑ́ɑ mɛlɑ́Ꞌ kʉ̈ɔ́?» 19Pʉʉ nyɛt wɑ́ɑ nɛ́ ŋkɑ́p yi pɛ́ lɔknɛ ŋ́ɡɑ́ ntsup. Pɔ́p lɔk pɑk-ŋkɑ́p ńtɔ́, ńnyɛt wɛ́. 20A píkŋɛ wɔ́p ŋɡɔ: «Yɔ shʉ́ wɔ̌ yi ɛ́ nǔu ŋkɑ́p? Yɔ pɔ́ lík wɔ̌ yi ɛ́ nǔu? 21Pɔ́p pʉ̈ɔt mbɔ̌ wɛ́ ŋɡɔ: “Ɛ́ shʉ́-Kɑ́sɑ, lík pɛn ḿbɔ́ pɔ yɛ́.” Yɛ́su ɡɔ́ɔ ŋ́kɛ́ ńcú mbɔ̌ pɔ́p ŋɡɔ: “Ɛ́ lɑɑ ḿbɔ́ pɔ́Ꞌɔ, pʉʉ ɡɑ́ yúu mi ɛ́ yɛ́ Kɑ́sɑ mbɔ̌ Kɑ́sɑ, ŋ́ɡɑ́ yɛ́ Sɛ́ mbɔ̌ Sɛ́.”» 22Pɔ́p zúꞋ pɑ́Ꞌ ɑ pʉ̈ɔtnɛ pɔ́Ꞌɔ, ɛ́ tsɑ wɔ́p. Pɔ́p nɑ́ wɛ́ zúꞋu, ŋ́ɡʉ.
Pɛ́ zẅíꞋ ntsu-Yɛ́su nǔu nɛzẅíimɛ nǔu nɛvú
(Mɑ́lɛ́kúshi 12.18-27; Lúkɑ́shi 20.27-40)
23Ɛ́ pɛn ḿbɔ́ pɔ lɛ́Ꞌ ɛ̂yɑ́, pɛcɔ́ ntɑ́Ꞌ pʉɔ nǔu nɔɔ-pɑsɑdukɑy ɡɔ́ɔ ŋ́kɛ́ ńtɔ́ nɛjɔ́ŋ Yɛ́su. Pɑsɑdukɑy pʉɔ pí pɔ́p kɑ́ pɛ́m ŋɡɔ pɛpfú ɡʉ ŋ́ɡɛ zẅíimɛ nǔu nɛvú pɔ́. Pɔ́p píkŋɛ mbɔ̌ Yɛ́su ŋɡɔ: 24Cícɑ, Mɔ̌sɛ̂ɛ kɑ cú ŋɡɔ: «Ŋu lɑɑ ńzɔ́Ꞌ mɑŋɡɛ́, ḿpfú kɛ́ nɑ́ yúu, mbɔ mɔ́ɔmɑ́ wɛ ɡẅɛɛ nɛsuk mpfúk, pɔ́pmɛ pí mbɔ́ŋkʉ̈ɔ́, ńdɔk ńnɔŋ njẅɛt mɔ́ɔmɑ́ wɛ.» 25Pɔ́Ꞌɔ, pɛcɔ́ pɔ́ɔpɛ́mɑ́ kɑ pɔ́ ɡú, ḿbɔ́ mbɛ́ɛnɛ sɑɑmbɑ́, nduŋmbi zɔ́Ꞌ, ḿpfú kɛ́ nɑ́ yúu, mbɑ́ɑtɛ suk mpfúk, ḿbɛn ḿpfú yɛ́ kɛ́ nɑ́ yúu, 26mbɑ́ɑtɛ yɛ́tɑ́t pɛn suk mpfúk wɑ́, ḿpfú pɔ kɛ́ nɑ́ yúu, pɔ pɔ́Ꞌɔ, tɛ pɔ́p sɑɑmbɑ́ tɛmtɛ ńzɔ́Ꞌ ẅîwɑ́ mɑŋɡɛ́, ŋ́kɛ́ ḿpfú pɔ kɛ́ nɑ́ yúu. 27Ɛ́ ɡɔ ńdẅiklɛ, mɑŋɡɛ́ pfú yɛ́. 28Pɑ́Ꞌ pʉɔ pɔnɛ sɑɑmbɑ́ kɑ tɛmtɛ ńzɔ́Ꞌ mɑŋɡɛ́ wɔ lɑɑ, pɛ́ ɡʉ ńdɑ́Ꞌ ńzẅíimɛ nǔu nɛvú, ɑ pɔ́ nzwɛ́ wɔ̌?
29Yɛ́su pʉ̈ɔt mbɔ̌ pɔ́p ŋɡɔ: «Jínu yʉ́ʉ sɛ́ fʉ́klɛ wʉ́ʉ mbíꞌŋɡɔ pʉʉ kɑ́ jí yúu ɛ́ tsɛt ŋwɑꞋnɛ-Sɛ́ pɔ́, ḿbɛn ŋ́kɛ́ mbɔɔ jí pɑ́Ꞌ mɛtʉʉ-Sɛ́ pɔ́Ꞌɔ, pɔ́.» 30Pʉʉ zɛɛ ńjí ŋɡɔ: «Ŋkɑ́ yi pɛpfú ɡʉ ŋ́ɡɛ ńzẅíimɛ lɑ́, mbɛ́ɛnɛ nɛ́ pɑŋɡɛ́ pɔɔ pɛn ńzɔ́Ꞌ pɔ́. Pɔ́p ɡʉ ŋ́ɡɛ ńtsʉ́Ꞌ ńnɑ́ŋ yɔ́p pɔ pɑ́Ꞌ pɛcʉ̈ɔ́Ꞌ-Sɛ́ tʉ́nɛ́pú lɑ́,» 31ŋ́ɡʉ nǔu pɛpfú pɑ́Ꞌ pɔ́p ɡʉ ŋ́ɡɛ ńzẅíimɛ, mbɔ pʉʉ ŋkɑɑ mɔ́ fúŋ yúu mi Sɛ́ kɑ cúnɛ pɔ́ kɛ, ɑ ŋkɑɑ cú ŋɡɔ: 32«Mɔ Sɛ́-Ábɛlɛhɑ̂m, ḿbɔ́ Sɛ́-Ɛsɑk, ḿbɔ́ Sɛ́ Yɑkɔ̂p pɔ́ ɔɔ? Sɛ́ Sɛ́-pʉɔntʉʉ#22.32 Ɛ́ lɔk ńcú ŋɡɔ pʉɔ-Sɛ́ pɔnɛ pí pɔ́p kɑ lɑ́Ꞌnɛ ḿpfú, pɔ́p pɔ́ ɡú, pɔ́p pɛ́ Sɛ́ pɔ́nɛ..» Yɛ́su pɛn ńcú ŋɡɔ: «Sɛ́ kɑ́ pɔ́ Sɛ́-pɛpfú-pʉɔ pɔ́, Sɛ́ Sɛ́-pʉɔntʉʉ.» 33Nɔɔ-lɑ́Ꞌ yi ɛ́ m̄bɔ́nɛ zúꞋu kɑ pɔ́ ŋ́ɡʉ̈ɔꞋtɛ ntɛ́ yi Yɛ́su lɔknɛ ńzíꞋ pʉɔ nɛ́ yúu pɔ́Ꞌɔ.
Nɛpʉ́ʉ ɡwɛ́
(Mɑ́lɛ́kúshi 12.28-34; Lúkɑ́shi 10.25-28)
34Pɑfɑlísɑy pɔ́ tɛ ńzúꞋ pɑ́Ꞌ Yɛ́su jʉ́ɔꞋnɛ ntsu-pʉɔ-sɑdukɑy, ńtɛmtɛ ńcúꞋlɛ ńtɑ́ŋ mɛnɑŋ. 35Wɛcɔ́ ŋu tsɛtsɛt pɔ́p, pɔ́ ŋkyɛ́Ꞌtɛ nɛpʉ́ʉ-Sɛ́ tɛ ḿbɔ́ wɛ́t, tɔ́ ŋ́kwɑꞋlɛ Yɛ́su, ḿbíkŋɛ wɛ́ ŋɡɔ: 36«Cícɑ, ɛ́ nǔu mɛnɛpʉ́ʉ-Sɛ́ pɛ́Ꞌnɛ yɛ́tɛ́ pɔ́ yɛ ɡwɛ́.» 37Yɛ́su pʉ̈ɔt mbɔ̌ wɛ́ ŋɡɔ: «Kɔŋ Tsɑpʉɔ Sɛ́ wu, nɛ́ ŋɡɔŋ tʉ́m yú tsʉʉ, mbɑ nɛ́ wu nɛpɔ́, ńzɑ́p kwɑŋɛ yú ndɑꞋ nǔu wɛ́», 38ɛ́ nɛpʉ́ʉ nɛ́ ɡwɛ́ ńdɔk ḿbɔ́ nduŋmbi. 39Nɛpʉ́ʉ mbɑ́ɑtɛ yɛ́pɑ́ ni ɛ́ fínɛ nɔ pɔ́ ŋɡɔ: «Ɛ́ sɛ́ ḿbíkŋɛ ŋɡɔ ɔ Kɔŋ ŋumɛsɔŋ pɑ́Ꞌ túmbʉʉ yú.» 40Nɛpʉ́ʉ-Mɔ̌sɛ̂ɛ tsʉʉ mbɑ mɛnu mi pɛŋɡɛ́mndʉ̈ɔ́Ꞌ-Sɛ́ kɑ cúnɛ fú pɔ nǔu mɛnɛpʉ́ʉ mɔnɛ mɛmbɑ́.
Nu-Nzɑ́Ꞌŋkʉ pɔ́p fɔɔ Ndɑvît
(Mɑ́lɛ́kúshi 12.35-37; Lúkɑ́shi 20.41-44)
41Pɑfɑlísɑy pɔ́ tɛ ńcúꞋlɛ, Yɛ́su píkŋɛ wɔ́p nɛ́ tɑ́Ꞌ nu ŋɡɔ: 42«Pʉʉ kwɑŋɛ yʉ́ʉ ŋɡɔ nzɑ́Ꞌŋkʉ wɔ̌? Ŋɡɔ ɑ mɔ́ɔ wɔ̌?» Pɔ́p pʉ̈ɔt mbɔ̌ wɛ́ ŋɡɔ: «A ŋu nǔu njẅɛt-fɔɔ Ndɑvît.» 43Yɛ́su píkŋɛ ŋɡɔ: «Ɛ́ pɛn ŋ́ɡɛ pɑ́Ꞌɑ, mbɔ Zẅikŋɛ Lɛ́ɛnɛ́nɛ kɑ jʉ́ fɔɔ Ndɑvît ɑ fúŋ Nzɑ́Ꞌŋkʉ ŋɡɔ Ndɛ,» 44tɛ ńcú ŋɡɔ:
«Tsɑpʉɔ Sɛ́ cú mbɔ̌ wɑɑ Ndɛ ŋɡɔ:
Tɔ́ Nɑ́ŋ nǔu ɡúŋ-pɔ́ yɑ́ɑ yɛ́ tʉʉ,
tɛ ńdɑ́Ꞌ ŋ́kúu ŋkɑ́ yi mɔ ŋ́ɡɛ ɔ ńnʉŋtɛ ɡɑŋmbuu pú.»
45Tɛ fɔɔ Ndɑvît kɑ pɔ́ ɛ́fúŋ wɛ́ nɛ́ wɛ Ndɛ pɑ́Ꞌɑ, ɑ pɛn ḿbɔ́ mɔ́ɔ nɛ ŋɡɔ́ku? 46Ɛ́ ɡʉ tsɛtsɛt pɑfɑlísɑy, ŋu pɔɔ kuꞋ nɛsii ḿbʉ̈ɔt pɔ tɑ́Ꞌ nu nǔu nu yí Yɛ́su píkŋɛ́nɛ pɔ́. Ɛ́ fú lɛ́Ꞌ ɛ̂yɑ́ ŋu pɔɔ pɛn, ŋ́ɡẅɛɛ sʉktʉ́m, nɛpíkŋɛ wɛ́ nɛ́ yɛcɔ́ nu pɔ́.
Nu geselecteerd:
Mɑtʉ̈ɔ 22: JGO
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
CABTAL, 2017
