Luk 11

Yesò ziʼì ndi və kɨ əjɨ̀m

(Mat 6.9-13; 7.7-11)

1A ndìʼ kətsi kətsen kə, Yesò sə jɨ̀mə a kəshi kətsen kə. Ando ghə̀ njɨ̀mə̀ myètə, ndzɨ̀mtə̀ bàm wen tsen ə gàʼ à wen la, “Bobo, dìʼsə yès nə̀ nyʉ̀ vyi a yès diʼi ngàʼà a zhʉ a yès jɨ̀mə, ndə̀ŋndəŋ ando Joyn ndìʼsə̀ ndzɨ̀mtə̀sə bàm wen.”

2Yesò gàʼ à vəwenə la, “Ghə̀ŋ ne sə njɨ̀mə̀, ghə̀ŋ ə gàʼà la:

‘Tìʼ,

ne viʼi nghoʼsə zhiʼi wu,

ne la soʼ fòyn wù nvì.

3Ku yès nə̀ fozhɨvə no məntsi tsèm

4Lyèsə̀ ku nyʉ̀ byɨvə yès

ando yès lyèsə̀ ku no məndo yì a ghə̀ ne mbyɨ à yès.

Kə a ghʉsə la mwòmsə vì à yès.’”

5Ghə̀ bè gàʼ à vəwenə la, “A diʼ ndo à ghə̀ŋ a ntìntìn a ghə̀ zì ghə̀ lu ə dyʉ̀ a ngə̀ŋ wùndoŋ wen a ntìntìn nəntʉʼʉ ə gàʼ à wen la, ‘Choʼ mo nə̀ təghɨf tə kəbayn tə taʼ a Wùndoŋ mò, 6byìʼàndo wùndoŋ mò tsen a ghə̀ diʼi a jèʼ chò li fà mo a ngə̀ŋ, kò mà lə̀ nkiʼ kəfo kə zhɨ kə ə ku à wen.’ 7Wùndoŋ wu ayì mù yì bwènsə̀ fa tyì ngə̀ŋ la, ‘Kə be zhuŋsə mo, Mà shwìnə̀li ngə̀ŋ ghom yowù vunə vwomə nyòŋmə̀, mà zì kò ma bè lù əku kəfo à wù,’ 8Wù a nè ale? Mà shə̀ʼtə̀ à ghə̀ŋ la, ghə̀ sətsèn faŋ ke lù ə̀ ku kəfo à wù ando ghə̀ŋ wen diʼ viʼi ndoŋsə, ghə̀ à lù ə ku tə̀ ghò tsen à wù a wu kəŋ, byìʼàndo kətʉ kyè ko dìʼì wù bèmə̀ tò bèmə̀. 9Ma sə shə̀ʼtə̀ à ghə̀ŋ la, ghə̀ŋ bèm a və ne ku à ghə̀ŋ, ə kəŋ a ghə̀ŋ ne yen bè kùmtə ngə̀ŋ a və ne bòʼ a ghə̀ŋ. 10Byìʼì no ndò a ghə̀ bèm, və a ku à wen, no ndò a ghə̀ kəŋ, ghə̀ à yen, à be kùmtə̀ no ndò kùmtə̀ chʉ̀ ngə̀ŋ və à boʼ à wen. 11A diʼ tìʼ wàyn ko a ghə̀ŋ a ntìntìn a ghə̀ zì ghə̀ ku zhù a wàyn, a zhʉ a ghə̀ bèmə̀ shʉ̀ a? 12Adiʼ wìʼ ko a ghə̀ zì ghə̀ ku əŋam à wàyn a zhʉ a ghə̀ bèmə̀ wum a? 13A zhʉ a ghə̀ŋ viʼi nè nyʉ̀ byɨvə, zì ghə̀ŋ kɨ əku fo jùŋ və à vunə vəŋə, no Tìʼ ghə̀ŋ a ghə̀ diʼi a kàŋ ne faŋ ale ke ku Kəzhwì kəŋwoʼkə à viʼi vyì à və bèmə̀ à wen a?”

Yesò gàʼ kùmə̀ fòyn zhwì byɨvə

(Mat 12.22-30; Mak 3.20-27)

14A sə ndiʼ kətsi kətsenkə Yesò sə dzɨ̀mə̀ kəzhwì kə byɨkə fà wìʼ a wèn a kə nè ghə̀ sə diʼ jɨ. Ando ghə̀ dzɨ̀mə̀, kəzhwì kə byɨ kə a kyì kə fʉ̀ no zhʉ kò wìʼ ayi zìtə̀ sə gàʼà. Nòyn viʼi a və ndiʼì tsu sə diʼ nə̀ kàynə. 15Alì vəwenə və tsenəvə sə gàʼà la, “Ghə̀ dzɨ̀mə̀ zhwì byɨvə a kədyòʼ Belzibùl, fòyn zhwì byɨvə.”

16Viʼi vətsen və tò nòyn ayì sə kəŋ jì əkuʼsə ghaʼ Yesò fa tsu mù gàʼ à Yesò la ghə̀ nè kənyʉ̀ kə kaynə kətsenkə a nə̀ kəchʉtə ədìʼ la kədyòʼ kə wen kə lù fa Nyìngòŋ. 17Yesò kɨ təkwòʼtə̀ tə vəwenə ə gàʼ à vəwenə la, “A dìʼ tè viʼi loʼ kò a vəwenə kiʼi kəngə̀sə, loʼ ayi à fəŋ. Ngwaʼa ngə̀ŋ ko a ghə̀ ko tsi a chʉ̀ mùʼ, ghə̀ a saykə. 18Satan lè sətsèn mù sòyn wenə wen, mu kə diʼ la ghə̀ ko bè kiʼ adyòʼ a kətʉ fo vyi a ghə̀ soʼo li. Mà gàʼà alì byìʼàndo ghə̀ŋ gàʼà la mà dzɨ̀mə̀ zhwì byɨvə nə̀ kədyòʼ a ku Belzibùl. 19Mà lè sətsèn dzɨ̀mə̀ zhwì byɨvə nə̀ adyòʼ mu a ku Belzibùl, ghə̀ŋ à gàʼ la viʼi vəŋə dzɨ̀mə̀ zhwì a vyi nə̀ adyòʼ ndo? A ne dìʼ tò viʼi vəŋə la ghə̀ŋ wamə wamə mu ghə̀ŋ gàʼà nəmwèʼè lo. 20A kù Nyìngòŋ ku adyòʼ la mà dzɨ̀mə̀ zhwì byɨvə a venə. Kə lì dìʼì la soʼ fòyn Nyìngòŋ vì li à ghə̀ŋ.

21“Zhʉ a wù kədyòʼ baʼtə̀ fo ghòŋ wen sə tsɨŋ kəbəŋ kə wen, fo wen bwòŋ fa avu vətsoŋə. 22Wù kədyòʼ tsen sətsèn vì to chò wen, sòyn əzhɨ wen, ghə̀ à boŋtə fo ghòŋ wen a ghə̀ yi zhəʼtə tsu boʼsə nə̀ fo a ghə̀ a tsoŋ ghə̀ dyʉ̀ gə̀tə̀ a ngwaʼ wen.

23“No məndo a ghə̀ ko diʼ bàmə mùʼ yo wen mu ghə̀ lì soynə mò. No məndò a ghə̀ ko gyàmtə̀ mò əpfʉtə viʼi Nyìngòŋ mu ghə̀ lì sàsə̀ sàsə̀.

(Mat 12.43-45)

Məbwènə̀ vì kəzhwì kəbyɨkə

24“A ndiʼ a zhʉ a kəzhwì kə byɨkə fʉ̀ fa wìʼ a wen, kə sə jèʼè kaʼa fa nse zɨm no tsèm, kəŋ kəshi əzhʉ̀tə̀ tsu, ne dìʼ ke yen, kə gàʼà la, ‘Ma bwènə̀ dyʉ̀ tò a ngə̀ŋ yì a mà tə fʉ̀ fa tsu lì.’ 25Kə nè gàʼa lì kə mù bwènə̀ dyʉ̀ a ngə̀ŋ ayi yen la və nə̀ zhyèsə̀ li shɨtə baʼtə̀ fo ayi a tin, 26kə mù bwènə̀ dyʉ̀ vì nə̀ zhwì byɨvə tsen sòmbo, və fwàynsə chò kəwenkə, zhwì a vi mu vì sə tsi a tì ngə̀ŋ a yi. A zhʉ a yì wìʼ ayi sə fwàynsə chò to ndo ghə̀ tə ndìʼ fa mbì.”

Yesò dìʼsə̀ byìʼ saŋlə nəmwèʼè

27A ndiʼ tò ndo Yesò ngaʼà mwetə ənyʉ̀ a venə, wùwì tsen fa nòyn a yì zɨmə gàʼ la, “Mbwaʼmə diʼ a wùwì yi a ghə̀ tə bwi wù be nyòŋsə̀ wu!”

28Yesò bwènsə̀ la, “Mbwaʼmə bòŋsə dìʼ a viʼi vyì a və zhʉ kənyʉ̀ kə Nyìngòŋ be nè tò ndo kə gaʼa!”

Viʼi bèmə yenə nchwi

(Mat 12.38-42)

29Tənòyn tə viʼi nə̀ sə vì ghoʼo a mbyɨ̀ nə̀ Yesò, ghə̀ gàʼ la, “Kəlyɨŋ kenkə diʼ tò no kəlyɨŋ kə byɨkə. Kə kəŋə yen nchwi fa mo ali ma ko dìʼ nchwi tsen a wen cho nchwi Jonà. 30Wàyn Wìʼ ne boŋ dìʼ nchwi a kəlyəŋ kènkə ndə̀ŋndəŋ tò ando Jonà ndìʼ nchwi a viʼi Nenivè. 31A lu ndìʼ a kətsi kə nsoʼ Nyìngòŋ, wì fòyn, a ghə̀ soʼo shə̀ loʼ teyn lu tɨmə ə ghàm viʼi kəlyəŋ kə luwèn byìʼàndo ghə̀ nlu fà wen loʼ ə jèʼè kəghaf mimbu əvi zhʉtə ziʼi tof fòyn Sòlomùyn. Ali, wìʼ diʼ a shə̀ luwen, a ghə̀ cho Sòlomùyn. 32A be lu ndìʼ a kətsi nsoʼ Nyìngòŋ, viʼi Nenivè be tɨmə ə ghàm ghə̀ŋ byìʼàndo vəwenə nzhʉtəli ziʼi Jonà ə kwitə tətyɨm tə vəwenə fa vəwenə mbyɨsə ə ghʉsə ntsìnə̀ byɨ vəwenə. Wìʼ diʼ a shə̀ luwen a ghə̀ cho Jonà.”

(Mat 5.15; 6.22-23)

33Yesò be gàʼ à vəwenə la, “Wìʼ ko zì ghə̀ dyàyn kənkàʼtə̀ ə lyòmtə̀ kò chiʼtə nə̀ nkyè. Ghə̀ diʼi dyàyn ə tom a kəshi kə ŋaŋtəkə ndi no ndo a ghə̀ kwenə ghə̀ yen əbayn yi. 34Ashɨ wù diʼ kənkàʼtə̀ kə wen. Ashɨ wù sətsen ndiʼ a nkàyn, wenə wu no tsèm sə bayn. Ali ashɨ wu sətsen byif, wenə wu no tsèm à ndiʼ a nfɨnə̀. 35Ghə̀ŋ ntùʼmə̀ la kə bayn yi a ghə̀ŋ kiʼi li à kaʼkə ndiʼ nfɨnə. 36Wenə wu tsèm sətsen nkiʼi bayn kò kəshi kə fenə kə lə ndiʼ tsu, ghə̀ a baynə no tsèm ando kənkàʼtə̀ kə baynə à wù a wèn nə̀ baynə yi no tsèm.”

Yesò ghàm viʼi Falàsi nə̀ ndìʼsə̀sə təsoʼ

(Mat 23.1-36; Mak 12.38-40)

37Ando Yesò ngàʼà myetə̀, wù Falàsi tsen dzàŋ wen la ghə̀ vi ə zhɨ à wen kəbəŋ. Ghə̀ kwèn ŋwʉʼ a kəshi əzhɨ. 38Wù Falàsi ayi sə diʼ nə̀ kàynə yen la Yesò zhɨ kènla ghə̀ shʉli avu. 39Bobo mù gàʼ à wen la, “Ghə̀ŋ viʼi Falàsi, ghə̀ŋ lyɨ kaŋ vəŋə nə̀ ndoŋ seŋsə, ghə̀ŋ tuʼ shʉ̀ tò dzemə shisə, ali tətyɨm təŋtə diʼ mu tə lwinli tò nə̀ nkùf nə̀ nyʉ̀ byɨvə tsen və. 40Ghə̀ŋ diʼi ngu fo! Ghə̀ŋ kwòʼtə̀ la Nyìngòŋ nshɨtə tò dzèm kò ghə̀ lə shɨtə tin mu? 41Ghə̀ŋ nə̀ mbòŋsə ku fo a ghə̀ŋ kiʼi à viʼi kəfem ndi no məghò ne ndiʼ layn a ghə̀ŋ.

42“Ngəʼ ghoʼo diʼ a ghə̀ŋ, viʼi Falàsi, byìʼàndo ghə̀ŋ lyɨ̀ fo təsɨm, ghə̀ŋ gə̀tə̀ shi wum, ə ku kəshi kə mùʼ a Nyìngòŋ, ali kò ghə̀ŋ lə nè nyʉ̀ a tɨmə və a viʼi vətsen və, a Nyìngòŋ kòŋə̀. Ghə̀ŋ yi ndiʼ nwè nyʉ̀ a venə, kò ghə̀ŋ lə chasə tsen və.

43“Ngəʼ ghoʼo diʼ à ghə̀ŋ, viʼi Falàsi, byìʼàndo ghə̀ŋ kòŋ dyʉ̀ a loʼ ntsentə, Nyìngòŋ ə kuʼ ŋwʉʼmə tò ambì, bè fʉ̀ a woŋ ə kòŋ la viʼi nyɨŋ vì toŋtə̀ ghə̀ŋ. 44Ngəʼ ghoʼo diʼ à ghə̀ŋ vyi a ghə̀ŋ diʼì tsu kò və le chʉtə̀, viʼi sə jèʼè a yi tʉ kò vəwenə lə nkɨ.”

45Ndìʼsə̀ soʼ tsen gàʼ à Yesò la, “Ndìʼsə̀, wù gaʼa nyʉ̀ vènə alə̀, telə̀ yès.”

46Yesò gàʼ à vəwenə la, “Ngəʼ ghoʼo bè ghə̀ŋ, ndìʼsə̀sə təsoʼ, byiʼ ando ghə̀ŋ nè la viʼi byèʼè kəbyèʼè a kə diʼi chò vəwenə kò lə kòŋə̀ əgyàmtə vəwenə. 47Ngəʼ ghoʼo diʼ à ghə̀ŋ vyi a ghə̀ŋ bwòmə təsè tə jùŋtə tə nshə̀ʼtə̀ sə ghoʼkə sə shì a vətiʼi vəŋə nlù zhwilə. 48Ghə̀ŋ diʼi la ghə̀ŋ tomsə kənyʉ̀ a vətiʼi vəŋə nlù nè byiʼ ando vəwenə nluli zhwi lə nshə̀ʼtə̀ a shì, ghə̀ŋ sə bwòmə təsè tə vəwenə. 49Byìʼì la, wìʼ yì a və dzàŋ la, ‘Tof Nyìngòŋ’ ngàʼa la, ‘Ma ne tɨm nshə̀ʼtə̀ sə ghoʼkəsə nə̀ viʼi ntɨm à vəwenə, à vəwenə a zhwilə vətsevə, be tsuʼ aghʉ və tsen və.’ 50Byìʼì viʼi kəlyɨŋ kenkə lə shə̀ʼtə̀ chʉ vəwenə kùmə̀ mənlyuŋ mə nshə̀ʼtə̀ sènsə no sətsèm a və zhwi li, əzìtə̀ fa nsè, 51ə zìtə̀ fa Abèl əkuʼ zaʼa à Zakaliya a və nlù zhwi vəwenə əlù fa kəshi kə ŋwòʼəkə əzaʼa kəbaŋ kə kəku a ngə̀ŋ Nyìngòŋ. Ma gàʼ à ghə̀ŋ nəmwèʼè la kəlyɨŋ kènkə lə shə̀ʼtə̀ chʉ vəwenə byìʼì viʼi a venə no vətsèm.

52“Ngəʼ ghoʼo diʼ à ghə̀ŋ ndìʼsə̀sə təsoʼ, byiʼ ando ghə̀ŋ lyòmtəli kənzàs a kə bòʼò chʉ̀ ngə̀ŋ tof, no nkàyntə̀ ghə̀ŋ ko kwen tsu, bè sə tàmə̀ viʼi vyì a və kəŋ əkwen a ngə̀ŋ tof a ghèn.”

53Ando Yesò nlu fa ngə̀ŋ ayi, ndìʼsə̀sə təsoʼ nə̀ viʼi Falàsi sə gàʼ lə byìʼì wen,bèmtə̀ ngwàʼà nyʉ̀ a wen, 54kuʼsə ətam ətsòʼ wen tsu no kənyʉ̀ kə shwè kə kò a ghə̀ ne gàʼ.

Nu geselecteerd:

Luk 11: bbkDBLnt

Markering

Deel

Kopiëren