Luk 10
10
Yesò tɨm viʼi ntɨm wen njʉ̀sə̀bò a məwum sòmbo
1A sə ndiʼ a bàm nyʉ̀ a venə, Bobo tsuʼ viʼi vətsenvə njʉ̀sə̀bò a məwum sòmbo ə tɨm vəwenə, və bò və bò la və dyʉ̀ a mbì a ntə̀ʼ sətsèm nə̀ a shi a nkàyntə wen ndiʼ dyʉ̀ tsu, 2Ghə̀ bè gàʼ à vəwenə la, “Fozhɨvə dìʼ no ghoʼ a mə kəŋ alì viʼi və kəŋvə diʼ tò və tyetə. Ghə̀ŋ jɨ̀m à Nyìngòŋ a diʼì Tì sɨm, ghə̀ tɨm viʼi shyèʼ, kwʉ̀ʼsə̀ və fʉ̀ ə kəŋ ə pfwo nə̀ wen və. 3Ghə̀ŋ dyʉ̀. Ghə̀ŋ sə ndyʉ̀, ghə̀ŋ kɨ la ma təmə ghə̀ŋ a nə̀ vunə byisə njɨ̀ a ntìntìn nyamsə bo. 4Kə ghə̀ŋ à lyɨ̀ ko kò mbò wafəvə. Kə ghə̀ŋ à lyɨ̀ gwʉsə aghʉ wù sə tsensə. Kə ghə̀ŋ à lyɨ̀ zhʉ ətoŋtə wìʼ a ji. 5Ghə̀ŋ nè dyʉ̀ kwen no kəbəŋ kə kò, ghə̀ŋ chò mbì əgàʼ la, ‘Nyìngòŋ ku mbwaʼmə a ghə̀ŋ vətsèm a kəbəŋ a shə̀.’ 6Wìʼ sətsèn ndiʼ a kəbəŋ ayì a ghə̀ kòŋ mbwaʼmə, mbwaʼmə ayì à dyʉ̀ à wen. Wìʼ sətsèn faŋ ke ndiʼ, mbwaʼmə ayì bwènə̀ vì à ghə̀ŋ. 7Ghə̀ŋ kwen, ghə̀ŋ faŋ tò kəbəŋ ayì ə zhɨ bè nyʉ no ghò a və ku à ghə̀ŋ byiʼàndo wù shyèʼ diʼi kiʼ lòʼ wen. Kə ghə̀ŋ à dyàŋtə məbəŋ. 8Ghə̀ŋ nè kwen no ntə̀ʼ ko və shisə ghə̀ŋ tsu, ghə̀ŋ zhɨ no ghò a və ku à ghə̀ŋ. 9Ghə̀ŋ kwen a ntə̀ʼ ayì ə chʉʼ viʼi və kwaʼkə və a və diʼì tsu ə shə̀ʼtə̀ à vəwenə la soʼ fòyn Nyìngòŋ boʼsə li vəwenə. 10Alì ghə̀ŋ sətsèn kwen a ntə̀ʼ, və faŋ ke shisə ghə̀ŋ, ghə̀ŋ fʉ̀ dyʉ̀ a nfòsə jisə ə gàʼ à viʼi a vyì la, 11‘Tè kəbyìʼ kə ntə̀ʼ ghə̀ŋ a kə kuʼ à yès aghʉ yès zhès fà yès aghʉ ədìʼ kəchwitə la ngəʼ faŋli à ghə̀ŋ. Alì ghə̀ŋ kɨ la soʼ fòyn Nyìngòŋ boʼsə li à ghə̀ŋ.’ 12Mà gàʼ à ghə̀ŋ nəmwèʼè la à lu ndiʼ a kətsi kə nsoʼ Nyìngòŋ, ngəʼ ndiʼ à viʼi ntə̀ʼ a vyi əcho ando ghə̀ ndiʼì à viʼi Sodòm.
(Mat 11.20-24)
13“Ngəʼ ghoʼo lu ndiʼ à ghə̀ŋ viʼi Kòlazìn bènə̀ ghə̀ŋ viʼi Bèsaydà! A tu ndiʼ la nyʉ̀ kaynəvə venə a ve nè a ghə̀ŋ lə̀ la və nè a viʼi Tayà nə̀ viʼi Sidòn, mu tʉʼ bwen a vəwenə ə ŋwʉʼ kəbʉ a kəchɨ bè moʼ mənchì ndi dìʼ la vəwenə bwènsə̀ nkwitə tətyɨm tə vəwenə fà vəwenə mbyɨsə. 14A lu ndiʼ a kətsi kə nsoʼ Nyìngòŋ, ngəʼ lu ndiʼ à ghə̀ŋ chò ando ghə̀ lu ndiʼ à viʼi Tayà bènə̀ viʼi Sodòn. 15Ando ghə̀ŋ viʼi Kabanùm tə nkəŋ nkuʼsə təwen təŋtə a kàŋ lì, və a moʼ ghə̀ŋ a zhìʼ a ghə̀ ko lù mè.”
16Ghə̀ gàʼ alì mù gàʼ à viʼi ntɨm vyi la,“No məndò a ghə̀ tyen əzhʉ ghə̀ŋ mu ghə̀ tyenli əzhʉ mò. No məndò a ghə̀ tyen mo mu ghə̀ tyenli wìʼ a ghə̀ tɨmə mo.”
Viʼi vyi njʉ̀sə̀bò a məwum sòmbo bwènə̀ pfwo
17Viʼi vyi njʉ̀sə̀bò a məwum sòmbo njèʼè dyʉ̀ ə bwènə̀ pfwo nə̀ saŋlə ghə̀ mù gàʼ à Yesò la,“Bobo, tè zhwì byɨvə tə nzhʉ fà yès ando yès tə kənkə̀ vəwenə à wù a zhiʼ.”
18Yesò gàʼ à vəwenə la,“Mà tə yen ando Satan lù fa kàŋ ə fəŋ tò nə̀ ghʉ a ghə̀ mwànə̀. 19Ghə̀ŋ kɨ la mà kuli adyòʼ à ghə̀ŋ a ghə̀ŋ zì ghə̀ŋ tùʼlə̀ zhusə nə̀ təŋam be nku kədyòʼ la ghə̀ŋ to chò viʼi kəbàyn, ghə̀ŋ no a jisə tsèm, kò no kəfo kə a lyomsə ghə̀ŋ. 20Alì kə ghə̀ŋ à nsaŋlə̀ la zhwì byɨvə zhʉ fà ghə̀ŋ, ghə̀ŋ mbòŋsə saŋlə la və nyoʼli təzhiʼ təŋtə a ŋwàʼlə̀ Nyìngòŋ a kàŋ.”
(Mat 11.25-27; 13.16-17)
21Tò a zhʉ ayì, kəzhwì kəŋwoʼəkə nè Yesò sə saŋlə mù jɨ̀m la,“Tìʼ ghom, Bobo yì a ghə̀ soʼo kaŋ bènə̀ nse, mà ku kəzòŋ à wù byìʼàndo wù lyomtəli nyʉ̀ venə fà viʼi a və kwòʼtə̀ la vəwenə tofə ə ndìʼ à ndzɨ̀ŋtə. Nəmwèʼè a Tìʼ, à tə kòŋ tò wù ənè alə̀.”
22Ando Yesò ngàʼ alì, ghə̀ mù gàʼ à ndzɨ̀mtə̀sə bàm wen la,“Tìʼ ghom kuli fo tsèm à mò. Wìʼ ko zì ghə̀ lə̀ kɨ wìʼ a wàyn diʼi wen a bwen tò tìʼ wen. Wìʼ ko zì ghə̀ kɨ wìʼ a tìʼ diʼ wen bwen tò wàyn, nə̀ viʼi vyi a wàyn tsuʼli ə dìʼ tìʼ wen à vəwenə.”
23Ghə̀ gàʼ alì mù fuʼtə wen wèn ə nyoʼtə gàʼ à ndzɨ̀mtə̀sə bàm wen la,“Mbwaʼmə dìʼ à viʼi vyi a və yen nyʉ̀ vyi a ghə̀ŋ yenə. 24Ma gàʼ à ghə̀ŋ la, nshə̀ʼtə̀sə bènə̀ təfòyntə tò kədə̀ŋ nkoŋli yen nyʉ̀ vyi a ghə̀ŋ yenə alì kò vəwenə lə̀ yenə bè kòŋ əzhʉ nyʉ̀ vyi a ghə̀ŋ zhʉ alì kò vəwenə lə zhʉ.”
Ngàyn kùmə̀ wù Sàmalitàn jùŋ
25Ndìʼsə̀ soʼ tsen tɨmə a kàŋ sə mwòmsə Yesò ə̀ bèm la,“Ndìʼsə̀, ma nè no ghò ndi kiʼi bwòŋ yi a ghə̀ ko lu mè lì?”
26Yesò bwènsə̀ bèm a wen la,“Və nyòʼ la ghò a ŋwàʼlə̀ soʼ Mosìs a? Wù dzàŋ ə zhʉ la ghò fa tsu a?”
27Wìʼ ayì bwènsə̀ la “Wù diʼi kòŋ Bobo Nyìngòŋ wù nə̀ tyɨmə wu no tsèm, nə̀ kəzhwì kyè no kə tsèm, nə̀ kədyòʼ kyè no kə tsèm nə̀ kwòʼtə̀ wu no tsèm, bè kòŋə lèmə̀ wù tò ndə̀ŋndəŋ ando wù kòŋə̀ wenə wu.”
28Yesò gàʼ à wen la “Wù bwènsə̀li tò nkàyn. Dyʉ̀ nə̀ tò alì a wu lu kiʼi bwòŋ.”
29Ndìʼsə̀ soʼ a ghèn sə mwòmsə ədìʼ la kənyʉ̀ a yi bèmə̀ dìʼ kənyʉ̀ kətɨməkə, mù bèm a Yesò la “Lèmə̀ ghom dìʼ ndo?”
30Yesò bwènsə̀ gàʼ la “Wìʼ nlu fa Jelusalèm sə shiʼi dyʉ̀ a Jèlikò, və tsoŋ ghaʼ wen ə tsuʼtə ndisə fà wen a wèn, ə ghòm wen ghə̀ sə diʼi tò mə pfʉ. 31Kə fʉ̀ la pfèm Nyìngòŋ tsen nshiʼi fa ji ayì ə yen ando wìʼ ayì nyoŋ, ghə̀ kwoʼtə chò fa shə ji tsen yi. 32Wutsen bè sə nchò tò fa jì ayì, à diʼ wù shyèʼ a ngə̀ŋ Nyìngòŋ mu ghə̀ lù fa ngwàʼ ngə̀ŋ Levì ə yen ando ghə̀ nyoŋ, ghə̀ bè kwòʼtə̀ chò. 33Alì wù loʼ Sàmalitàn tsen sə ndyʉ̀ a jèʼ fa ji a ghèn, vì fʉ̀ à wenə a wèn sə kiʼi kusə nshinsə à wen. 34Ghə̀ shʉ̀ shi wen ə zuʼtə nə̀ kəfʉ̀kə mù kwìʼ nə̀ basə ndisə ə lyɨ̀ wen ə kuʼsə à wen kwi nyàm ə dyʉ̀ nə̀ wen a ngə̀ŋ a viʼi jèʼ tsi tsu sə tuʼmə nə̀ wen. 35Tʉʼ layn ghə̀ shìsə ko fa wen kəmbò ə ku à wìʼ yì a ghə̀ shyèʼè a ngə̀ŋ ayì, ə gàʼ la ‘Tuʼmə nə̀ wìʼ ghèn. Wù sətsen kwʉʼsə tè ghò a kwi ko a shə̀, ma nè bwènə̀ vì ə lòʼ à wù.’”
36Yesò gàʼ myètə mù bèm à ndìʼsə̀ soʼ yì la “A wù a kwòʼtə̀ à diʼ wìʼ ko fa ntìntìn viʼi venə və taʼ a ghə̀ ndiʼi a nə̀ lèmə à wìʼ ghèn a vətsoŋ ghaʼ lə̀ a?”
37Ghə̀ bwènsə̀ la, “A dìʼ wìʼ yì a ghə̀ ndìʼi kusə nshinsə à wen lì.”
Yesò mù gàʼà wen la, “Dyʉ̀ be nè tò ndə̀ŋndəŋ.”
Yesò ghayntə Matà wenə Mèli
38Yesò wenə ndzɨ̀mtə̀sə bàm wen mù sə̀ jèʼè dyʉ̀ ə dyʉ̀ kwen a ntə̀ʼ tsen, wùwì tsen diʼ tsu a və ndzàŋ nə̀ Matà. Yesò kwen à wen ngə̀ŋ, Matà shisə wen no nkàyn. 39A ndiʼ alì Matà kiʼ lèmə̀ wen tsen a zhiʼ wen ndiʼ Mèli. Mèli nvì ŋwʉʼ no mənzhʉ̀ tsèm a shɨ Bobo zhʉtə ziʼi wen. 40Matà nsə̀ femə nə̀ shyèʼ ando ghə̀ nghoʼo mù vì a Yesò ə gàʼ la,“Bobo, wù ko yen la lèmə̀ ghom ghʉsəli mò mà sə dzɨŋ nə̀ shyèʼè tò mo nyɨ̀ŋ a? Gàʼ à wen ghə̀ vì ə gyàmtə̀ mò.”
41Bobo toŋtə wen ə gàʼ la “Matà, Matà, nyʉ̀ sə̀ ku ngəʼ à wù no ghoʼo. 42A diʼ tò kənyʉ̀ kə mùʼ a və kəŋ. Mèli tsuʼli kənyʉ̀ kə jùŋ kə a kì a və ko zì və be shi fà wen.”
Nu geselecteerd:
Luk 10: bbkDBLnt
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
