Luk 9
9
Yesò tɨm viʼi ntɨm wen njʉ̀sə̀bò
(Mat 10.5-15; Mak 6.7-13)
1Yesò dzàŋtə̀ viʼi ntɨm wen njʉ̀sə̀bò ə tsèntə vəwenə a kəshi kə mùʼ ə ku adyòʼ tsèm a vəwenə ndi vəwenə ndzɨ̀mə̀ zhwì byɨvə no tsèm bè chʉʼ təkwaʼa, 2tɨm vəwenə la və fʉ̀ dyʉ̀ ə shə̀ʼtə̀ nyʉ̀ kùmə̀ soʼ fòyn Nyìngòŋ bè chʉʼ viʼi və kwaʼa kə və. 3Ghə̀ gàʼ à vəwenə la, “Ghə̀ŋ sə ndyʉ̀, kə wìʼ à lyɨ̀ no kəfo, kə wìʼ à lyɨ̀ mbàŋ kò kəmbò kə wafəkə, kə wìʼ à lyɨ̀ kəfo kə zhɨ kə kò ko, kə wìʼ à lyɨ̀ ndisə bò. 4Ghə̀ŋ dyʉ̀ no à ntə̀ʼ ko ayì, ə kwen no a ngə̀ŋ ko, ghə̀ŋ ntsi tò tsu əzaʼa fa zhʉ a ghə̀ŋ lə lù fa ntə̀ʼ ayì. 5Ghə̀ŋ dyʉ̀ no fe, viʼi a vyi faŋ kè shisə ghə̀ŋ, ghə̀ŋ sə nlù, ghə̀ŋ lasə aghʉ a ghəŋə a bàm ndi vəwenə kɨ la vəwenə nèli nshwè.”
6Viʼi ntɨm wen a vyi mù fʉ̀ sə jèʼè dyʉ̀ no ntə̀ʼ sə tsèm shə̀ʼtə̀ dyʉ̀ nə̀ ntɨm jùŋ, bè chʉʼʉ viʼi no fe a vəwenə yenə.
Nyʉ̀ sə zhuŋsə Helòd byìʼì shyèʼè kaynə yi a ghə̀ nzhʉ
(Mat 14.1-12; Mak 6.14-29)
7Helòd ando ghə̀ nsoʼ shə Galìlì tsen ghə̀ nè zhʉ nyʉ̀ tsèm a və nchò,və sə zhuŋsə wen, byìʼàndo viʼi vətsen və ngàʼ à wen la Joyn wù Ku Amù bwènsə̀li nlù fa pfʉ, 8vətsenvə gàʼà la nshə̀ʼtə̀ Elijà be bwènə̀ nvi, vətsenvə gàʼà la à diʼ nshə̀ʼtə̀ ghoʼo tsen tò nə̀ shìsə a sə ndiʼ a tʉʼʉ mbì a ghə̀ bwènsə̀li lu li fa pfʉ. 9Helòd zhʉtə nyʉ̀ venə sə kayntə à wen tyɨm gàʼ la, “Ma ntyinli kətʉ kə Joyn wù Ku Amù. A lè bè diʼ ndo a ghèn a və gàʼà nyʉ̀ venə kùmə̀ wen a?” Ghə̀ mù zìtə̀ sə kəŋ əyen Yesò.
Yesò zhis viʼi chò nkam sətàyn
(Mat 14.13-21; Mak 6.30-44; Jon 6.1-14)
10A ndiʼ ando viʼi ntɨm Yesò mbwènə̀ pfwo vì a wen ə shə̀ʼtə̀ no ghò a vəwenə nèli, ghə̀ lyɨ̀ vəwenə, wenə vəwenə ghʉsə viʼi ə dyʉ̀ jì fa ntə̀ʼ tsen a və dzàŋ la Betsadà. 11Nòyn viʼi a vyi nè kɨ̀ kəshi a ghə̀ diʼi tsu, vəwenə dzɨ̀mtə̀ dyʉ̀ nə̀ wen tsu. Yesò shisə vəwenə no a nkàyn sə gàʼ à vəwenə kùmə̀ soʼ fòyn Nyìngòŋ be chʉʼʉ viʼi a və nkəŋ la ghə̀ chʉʼ vəwenə.
12A nè sə ndìʼ a kəlyɨŋ kə zhʉ mpfwòmə,viʼi ntɨm wen vyi njʉ̀sə̀bò vì gàʼ à wen la, “Gàʼa viʼi venə la vəwenə gə̀sə̀ ə kwen dyʉ̀ a tyì ntə̀ʼsə nə̀ a shi təsɨm titə a tə boʼsə ndi kəŋ kəfo kə zhɨkə be kiʼi kəshi kə tsi kə, byìʼàndo kəshi kènkə diʼ nse zɨm.”
13Yesò bwènsə̀ à vəwenə la, “No nkàyntə̀ ghə̀ŋ ku kəfo, vəwenə zhɨ.”
Vəwenə gàʼ à wen la, “Yès kiʼi tò təghɨf tə kəbayn tə tàyn nə̀ shʉ səbò sə. Wù kəŋ la yès dyʉ̀ ə zen fozhɨvə à nòyn ghenə no tsèm mu?” 14Viʼi ndiʼ a nòyn a ghèn, zaʼa nkam sətàyn.
Yesò gàʼ à ndzɨ̀mtə̀sə bàm wen shì la “Ghə̀ŋ ne, vəwenə ŋwʉʼtə a shi a shi, a no nòyn kò a nkiʼi viʼi məwum ntàyn.”
15Vəwenə nè viʼi a vyi ŋwʉʼtə a nse. 16Yesò shi təghɨf tə kəbayn a tìtə nə̀ shʉ shi səbò ə ki kuʼsə nə̀ kaŋ ə ku kəzòŋ a Nyìngòŋ ə byèʼ ku a ndzɨ̀mtə̀sə bàm wen la sə gə̀tə̀ a viʼi a vyì. 17Vəwenə zhɨ ə kwìʼkə no və tsèm, ndzɨ̀mtə̀sə bàm wen boŋtə byèʼ vyi a və nfaŋ, və lwin a nkyèsə njʉ̀sə̀bò.
Bità shə̀ʼtə̀ wìʼ a Yesò diʼ wen
(Mat 16.13-19; Mak 8.27-29)
18A ndìʼ kətsi kətsenkə, Yesò sə njɨ̀mə̀ tò wen, ndzɨ̀mtə̀sə bàm wen vì a wen, ghə̀ mù bèm à vəwenə la “Viʼi gàʼà la ma diʼ ndo?”
19Vəwenə bwènsə̀ la “Və gàʼà la wu diʼ Joyn wù Ku Amù, vətsenvə gàʼà la wù diʼi nshə̀ʼtə̀ Elijà, vətsenvə gàʼà la wù diʼ nshə̀ʼtə̀ mu tsen a ghə̀ bwènə̀ nlù fa pfʉ.”
20Yesò bwènsə̀ bèm à vəwenə la “No nkàyntə̀ ghə̀ŋ gàʼà la ma diʼ ndo?”
Bità gàʼ la, “A diʼ wù Klistò, yì a Nyìngòŋ ntsuʼli ə ghʉ.”
(Mat 16.20-28; Mak 8.30–9.1)
21Yesò mù ku soʼ la kə vəwenə à shə̀ʼtə̀ kənyʉ̀ kènkə à wìʼ, 22ə bè gàʼ la, “Wàyn Wìʼ diʼ yen ngəʼ no a nyʉ̀ ghoʼo və, vəchəʼ wenə tʉtʉ vəpfèm və ngə̀ŋ Nyìngòŋ nə̀ ndìʼsə̀sə təsoʼ mo wen, ə və zhwi wen, à sə ndiʼ a məntsi ntaʼ, və bwòŋsə wen fa pfʉ.”
Jì ə dzɨ̀mtə̀ Yesò
23Yesò gàʼ alì mù gàʼ à nòyn viʼi vyi a və nvì lì la, “No məndò a ghə̀ kəŋ dzɨ̀mtə̀ mo, ghə̀ diʼi tyen ngə̀ŋ kətʉ wen ə byèʼè kəntò kə wen no məntsi ntsèm ə dzɨ̀mtə̀ mo. 24No məndo a ghə̀ mwòmsə ə bwòŋsə̀ ngə̀ŋ kətʉ wen ghə̀ a pfʉ alì no məndo a ghə̀ sətsèn lè sàŋ kətʉ wen byìʼì mò, mu ghə̀ a bwòŋ. 25Wìʼ lè zì ghə̀ se no ghò a zhʉ a ghə̀ kiʼi fo mbi venə no tsèm alì lè sàŋ kətʉ wen a? 26No məndo a ghə̀ sətsen dìʼì kətʉ kədiʼikə byìʼì mò nə̀ ziʼi ghomə, ghə̀ nkɨ la Wàyn Wìʼ lu be dìʼsə kətʉ kùmə̀ wen a zhʉ a ghə̀ bwènə̀ vì a ntìntìn bayn ghoʼghə yi a ghə̀ kiʼì, nə̀ Tìʼ bènə̀ ntsɨ̀ŋsə wen a sə ŋwòʼə. 27Mà gàʼ à ghə̀ŋ nəmwèʼè la, viʼi vətsenvə ti a shə̀ luwèn, a vəwenə ko diʼ lə pfʉ no fa mpfen əzaʼa fa tʉʼ a vəwenə lu yen soʼ fòyn Nyìngòŋ.”
Kəʼə Yesò kwitə a kwi pfen
(Mat 17.1-8; Mak 9.2-8)
28A sə nkuʼu dyʉ̀ məntsi fwomə ando Yesò ngàʼà nyʉ̀ a vènə, ghə̀ lyɨ̀ Bità nə̀ Joyn nə̀ Jems, wenə vəwenə kuʼ a kwi pfen əjɨ̀m. 29Ando Yesò njɨ̀mə̀, kəʼə wen bvʉ̀tə kwitə, ndisə wen sə mù sə fəfə ŋwàŋtə̀. 30Tò a zhʉ a ghèn, viʼi vəbò tɨmə sə bèsə̀ nyʉ̀ wenə wen. A ndìʼ Mosìs wenə Elijà. 31Vəwenə ndìʼ no a ntìntìn bayn ghoʼghə. Vəwenə sə gàʼà kùmə̀ pfʉ yi a Yesò ndiʼi pfʉ a Jelusalèm ə lwinsə kənyʉ̀ kì a Nyìngòŋ ghʉli. 32A sə ndiʼ alì, mu Bità wenə viʼi ndoŋsə wen dyʉ̀ li kəghaf a mbəynsə. Vəwenə nè lu ə yen bayn ghoʼghə Yesò bè yen viʼi vyi vəbò a wenə vəwenə ndiʼ a muʼu. 33Viʼi a vyi sə nlù, Bità mù gàʼ à Yesò la, “Tìʼ, kə bòŋli ando vəghəŋ vətsèm diʼ a shə̀. Yès a bwom təto tə taʼ, ghə̀ mùʼ à wù, ghə̀ mùʼ à Mosìs nə̀ tsen ghə̀ à Elijà.” Ghə̀ ngàʼà alì, kò ghə̀ nlutə sù kɨ kənyʉ̀ a ghə̀ ngàʼà.
34Ando Bità mbu gàʼà, mboʼsə shiʼi ə chiʼtə vəwenə, fayn vì à ndzɨ̀mtə̀sə bàm Yesò ando vəwenə nkwen a tyì mboʼsə a shì. 35Gɨ̀ fʉ̀ fa tyì mbòʼ ayì ə gàʼ la, “Ghèn diʼ Wàyn ghom a mà tsuʼli. Ghə̀ŋ nzhʉ fà wen!”
36Ando gɨ̀ ayì ngaʼà myètə, vəwenə yen Yesò ghə̀ dìʼ tò wen nyɨŋ. Vəwenə ghʉ nyʉ̀ a venə kò vəwenə lə shə̀ʼtə̀ no wutsen kənyʉ̀ a vəwenə yenə a məntsi ayì.
Yesò chʉʼ wàyndyə, a ghə̀ nkiʼi kəzhwì kə byɨkə
(Mat 17.14-18; Mak 9.14-27)
37Tʉʼ layn, Yesò wenə ndzɨ̀mtə̀sə bàm wen shì sətaʼ bwènə̀ shìʼi fa pfen, nòyn viʼi vì no ghoʼo ə yen wen. 38Wùtsen fa nòyn ayì dì a gɨ̀ to à Yesò la, “Ndìʼsə̀, ma sensə wù la wù gyàmtə̀ wàyn wulɨm ghom ghèn byìʼe a diʼ tò wen nyɨŋ à mo kəvu. 39Kəzhwì kə byɨkə ghaʼa wen, ghə̀ shen ə zɨmə dì ə fəŋ a nse, kəfʉ̀ʼʉfʉ̀ʼʉ kə sə fʉ̀ fa wen a chʉ̀. Kə sə nè alì, ku ngəʼ à wen, to əmòʼtə wen. 40Mà tə nsensə ndzɨ̀mtə̀sə bàm wù la vəwenə dzɨ̀mə̀ ə shìsə, alì kə to chò vəwenə.”
41Yesò bwènsə̀ gàʼ la, “A diʼi nòyn byɨ ghə̀ a ghə̀ ko kiʼi byɨmə a, ma tsi zaʼa ale vəghəŋ mimbu ghə̀ŋ byɨmə a?” Ghə̀ gàʼ alì mù gàʼ à wìʼ ayì la, “Vi nə̀ wàyn wù ayì a shə̀.”
42Ghə̀ sə fʉ̀ dyʉ̀ nə̀ wen, kəzhwì kə byɨkə kyì moʼò wàyn ayì a nse, alì Yesò kàyntə̀ nyʉ̀ a kəzhwì kə byɨkə a kyì, kə fʉ̀, wàyn ayì to. Ghə̀ mù bwènsə̀ ku wen à tìʼ wen. 43No viʼi vətsèm tsu sə diʼ nə̀ kaynə kùmə̀ adyòʼ Nyìngòŋ.
Yesò bè gàʼ kùmə̀ pfʉ wen
(Mat 17.22-23; Mak 9.30-32)
Viʼi sə bu kayntə nyʉ̀ tsèm a Yesò nè, Yesò gàʼ à ndzɨ̀mtə̀sə bàm wen la, 44“Ghə̀ŋ tuʼù zhʉtə kənyʉ̀ a mà kəŋ gàʼ à ghə̀ŋ. Və a ku Wàyn wìʼ avu viʼi.” 45Vəwenə nko zhʉ ə kɨ kənyʉ̀ a kènkə a ghə̀ ngàʼà no fa mpfen byìʼàndo à sə ndiʼ alì mu və neli la kə vəwenə a zhʉ kɨ. Vəwenə mù sə fàynə ə bèm à wen la kənyʉ̀ kènkə shə̀ʼtə̀ la ghò lo?
Yesò ziʼi kùmə̀ wìʼ yì a ghə̀ chò ghə̀ tsen
(Mat 18.1-5; Mak 9.33-37)
46Kəngùmə̀ kə zìtə̀ a ntìntìn ndzɨ̀mtə̀sə bàm Yesò byìʼì wìʼ a ndiʼ kətʉ à vəwenə a ntìntìn. 47Yesò ne kɨ kənyʉ̀ kyì a vəwenə kwòʼtə̀ ə lyɨ̀ wàyndyə ə tom à wenə a mbyɨ̀ 48mù gàʼ à vəwenə la, “No məndo a ghə̀ tuʼmə̀ nə̀ wàyn ghèn à mo a zhiʼi, mu ghə̀ tuʼmə̀li nə̀ mò. No məndo a ghə̀ tuʼmə̀ nə̀ mò nkɨ la ghə̀ tùʼmə̀ nə̀ wìʼ yì a ghə̀ tɨmə mo. Ghə̀ŋ kɨ la wìʼ yì a ghə̀ tyetə; diʼi bàm a ntìntìn ghə̀ŋ vətsèm, à diʼi wen a ghə̀ diʼì kətʉ.”
No məndo a ghə̀ ko bàynə̀ ghə̀ŋ, ghə̀ lì kòŋ ghə̀ŋ
(Mak 9.38-40)
49Joyn bwènsə̀ gàʼ la, “Tìʼ, yès tə yen wìʼ, ghə̀ dzɨ̀mə̀ zhwì byɨvə à wù a zhiʼ, yès gàʼ à wen la kə ghə̀ be a mwòm byìʼàndo ghə̀ ko diʼ wu muʼ fa vəghəŋ a ntìntìn.”
50Yesò gàʼ à wen la, “Kə ghə̀ŋ bè tàm wen byìʼàndo wìʼ yì a ghə̀ ko soynə ghə̀ŋ diʼ à ghə̀ŋ a shə.”
Ntə̀ʼ Sàmalitàn tsen tensə ə shisə Yesò ando ghə̀ kuʼu a Jelusalèm
51Ando zhʉ mboʼsə və kuʼsə Yesò a kàŋ, ghə̀ ghʉ tyɨm wen əkuʼ a Jelusalèm. 52Ghə̀ tɨm viʼi la və dyʉ̀ a mbì a ntə̀ʼ Sàmalitàn ə baʼtə̀ no ghò à wen tsu. 53Alì viʼi Sàmalitàn tyen la vəwenə ko shìsə Yesò byìʼàndo kə ndiʼ nəmwèʼè la ghə̀ nkəŋ dyʉ̀ tò a Jelusalèm. 54Ndzɨ̀mtə̀sə bàm wen, Jems wenə Joyn ne yen kənyʉ̀ a kènkə ə gàʼ la, “Bobo, wu kəŋ la yès ə dzàŋ zhiʼ fa kàŋ ghə̀ shiʼì ə zhwi vəwenə?”
55Alì Yesò fuʼtə ə kənkə vəwenə la kə vəwenə à mwòm. 56Yesò wenə ndzɨ̀mtə̀sə bàm wen lù ə dyʉ̀ a ntə̀ʼ kədyàŋ.
Kə sə to ghoʼ viʼi dzɨ̀mtə̀ Yesò
(Mat 8.19-22)
57Vəwenə mù sə jèʼè dyʉ̀ a ji, wulɨm tsen vi gàʼ à Yesò la, “Mà a dzɨ̀mtə̀ wù ə dyʉ̀ no fe a wù dyʉ̀.”
58Yesò bwènsə̀ gàʼ à wen la, “Məsòŋnə̀ kiʼi bʉ̀ʼ vəwenə, mənyin kiʼi təlòʼ, tə vəwenə alì Wàyn Wìʼ ko kiʼ kəshi ə nyòŋsə̀ kətʉ kə wen tsu ə zhʉ̀tə̀.”
59Yesò nè bè gàʼ à wùtsen la, “Dzɨ̀mtə mo.”
Alì wìʼ ayì gàʼ à wen la, “Bobo, ghʉsə mà pfwo ə bvɨ̀mə̀ tìʼ ghom mimbu vì ə dzɨ̀mtə̀ wù.”
60Yesò gàʼ à wen la, “Ghʉsə, viʼi və pfʉkəvə bvɨ̀mə̀ viʼi və pfʉkəvə, alì fà wù, wu nshə̀ʼtə̀ dyʉ̀ nə̀ soʼgho kùmə̀ soʼ fòyn Nyìngòŋ.”
61Wùtsen bè gàʼ la, “Ma dzɨ̀mtə̀ wù a Bobo, alì ghʉsə mà dyʉ̀ ə toŋtə viʼi vwomə mi.”
62Yesò gàʼ à wen la, “No məndo a ghə̀ ghaʼà shɨ̀ ə shyèʼ ə be fuʼtə ə ki bàm ghə̀ ko kwʉʼ a soʼ fòyn Nyìngòŋ.”
Nu geselecteerd:
Luk 9: bbkDBLnt
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
