MARKUS 16

Tong pengebetéé' Yésus

(Mat. 28:1-8, Luk. 24:1-12, Yoh. 20:1-10)

1Avéé' tong ga' Dau Posot, Meriam Magdalena ngan Meriam tinen Yakub ngan Salome, tai melih anyuu' ke' réh mosoo' éh tong patai Yésus. 2Dau migu bé' jak éh peka rema tai réh tong jalan réh modoo' patai Yésus. 3Lem réh lakau tai nah ka' ha' réh, séé' omok nolong tam ngeluvit bateu' éh matep ubaa' luvang rai néh da', ha' réh. 4Irah pané kenat ha' uban bateu' inah ja'au éh. Hun réh avéé' sitai boh réh na'at bateu' inah lepah peluvit tenéh. 5Tioo irah masek boh réh na'at jah kelunan lemanai mokoo' saa' na'au' tong retek patai Yésus bu'un rai, pakai néh mebéng menyun sinah, tekejet réh na'at éh, medai mu'un-mu'un roh na'at éh.

6Ka' ha' lakei' inah ngan réh, Mai keh medai! Akeu' jam ka'ah pitah Yésus kelunan Nasaret éh lepah senalib réh rai, Iah bé' pu'un siteu' lepah betéé tenéh Éh. Tuai keh na'at jalan réh modoo' patai Néh rai. 7#Mat. 26:32, Mrk. 14:28 Jian koh tai bara' ngan kekat bakéh Néh, avéé' tong Péterus péh, Yésus lepah tai Galilia saa' tenah ka'ah, sitai keh omok temeu' ngan Néh, pekua' barei' ha' Néh ngan keh rai, ha' Néh ngan rawah redo inah.

8Irah musit tioo kelap jin sinah, uban réh tekejet ngan medai. Bé' réh pané ngan séé'-séé' péh uban réh medai.

Yésus pepoléng usah Néh ngan Meriam Magdalena

(Mat. 28:9-10, Yoh. 20:11-18)

9La'o Yésus betéé' jin patai Néh tong dau ngivun Dau Migu, bu'un-bu'un néh Iah pepoléng usah Néh ngan Meriam Magdalena (Tujuu' balei' nega' Néh jin Meriam nah). 10Meriam inah tai bara' kenat ngan irah bakéh Yésus, éh mokoo' besau mangaa', 11na' péh irah menéng ha' Meriam bara' Yésus pu'un murip kepéh ngan pu'un éh ta'an néh, bé' réh ngelan éh.

Yésus pepoléng usah Néh ngan duah usah bakéh Néh

(Luk. 24:13-35)

12La'o inah kepéh Yésus pepoléng usah Néh tengéé' layan kepéh ngan duah usah bakéh Néh hun rawah moléé' jin Yérusalem tai leboo' roh. 13Moléé' murin roh kepéh tai Yérusalem ke' roh bara' éh kepéh ngan irah éh jah, bang bé' deke' irah ngelan éh benara' roh nah.

Yésus pepoléng usah Néh ngan jah poloo' jah usah bakéh Néh

(Mat. 28:16-20, Luk. 24:36-49, Yoh. 20:19-23, Peng. 1:6-8)

14Ga' néh Yésus pepoléng usah Néh ngan jah poloo' jah usah irah bakéh Néh tovoo' réh kuman. Iah ma'ah réh uban réh mahéng kenin bé' ngelan ha' irah éh jah éh bara' Iah lepah murip nah. 15#Peng. 1:8 La'ah ka' ha' Néh ngan réh, Jian keh tai pah tipo tana' ngan bara' Rengah Jian jin Allah ngan kekat kelunan. 16Séé'-séé' éh ngelan ngan benatis, iah omok alaa' urip bang kelunan éh bé' ngelan adang néh teneng kenukum. 17Ngan irah éh ngelan telana'-telana' iteu' pu'un ngan réh; Irah omok mega' balei' dalem ngaran ké'; Irah omok pané lem kuraa' ha' éh tejeu'. 18Hun réh ngamit torok ngan mesep ineu'-ineu' éh omok mematai réh, bé' réh pu'un matai, Hun réh mapai ojoo' réh tong kelunan sakit, kelunan sakit inah omok ma'o.

Yésus petéé tai seruga

(Luk. 24:50-53, Peng. 1:9-11)

19 # Peng. 1:9-11 Jin La'o Yésus pané ngan réh, iah netéé' tai seruga Iah menyun saa' na'au' Tuhan Allah. 20La'ah irah bakéh Yésus lakau semah-semah péh bara' Rengah Jian éh jin Allah ngan kelunan. Tuhan pu'un pemung ngan réh, ngan Iah pekelenaa' kekat ha' tebaraa' réh pu'un teneng neu' Iah mena' penyukat Néh ngan réh ke' réh maneu' kuraa'-kuraa' telana' éh ja'au.

Nu geselecteerd:

MARKUS 16: PNT

Markering

Deel

Kopiëren