Cenisihs 47
47
1Coosap itahsh kii‑ishaa ekii anta waapamaatc Peroon ekii'inaatc, “Nintete hsa, niicihkiweyak itahsh kaye, omaanahcaanihshimiwaa' itahsh, opishihkiimiwaa' kaye, kahkina kaye kekoonan eyaawaatc, Kenan ahkiink kiihpionci takohshinook; inashke tahsh weti Kooshin ahkiink ayaawak,” okii'inaan. 2Naanan itahsh okii onaapamaa' wiicihkiweya', ekii ishiwinaatc eshi'ayaanitc Peroon. 3Peroon itahsh okiih kakwecimaani owiicihkiweya', “Aaniin itahsh enanohkiiyek?” okii'inaani.
O'o tahsh kii‑ishi nahkwehtamoo', “Niinawint hsa nintinowimin okanawi maanahcaanihshiwek taapishkoo kaakiih pi ishihcikewaatc ninkehteya'aaminaapaniik,” kii‑ishi nahkwehtamoo'. 4Miihsh kaye kaa‑ani ihkitonitc, “Ninkiih pakami kosimin hsa 'omaa ewii ishitaayaank, aaniihsh koohpaacihse eayaahsinok miicim weti Kenan ahkiink, niinawint itahsh kitanohkii'aakanak kaawiin inkoci mashkohsiihkaahsinoon ketanahshamankitwaa nintawahkaaninaanik. Taka hsa pisaan pakitinihshinaam cikapehshiyaank Kooshin (Goshen) ahkiink,” okii ikoni. 5Coosap itahsh Peroon okii'ikoon, “Kitete hsa, kiicihkiweyak kaye kikii otihsikook, 6i'i hsa Iicipahkiini pisaan oka ayaanaawaa. Taka pisaan Kooshin tashi kapehshiwak, maawac eshi onishihshininik Iicipahkiini. Kiishpin itahsh kihkenimatc awiya eshi'ayaawaatc kekoon nakacihtootc, inahsaahkan ihsa cinaanaakaci'aatc nintawahkaana',” okii'ikoon.
7Coosap itahsh okii ishiwinaan oteten Cekapoon (Jacob) eshi'ayaanitc Peroon; oteten itahsh okii'inaani ciminohsenitc Peroon. 8Peroon itahsh okiih kakwecimikoni, “Aaniin entahso pipoonweyan,” okii ikoni.
9O'o Cekapoon kii‑ishi nahkwehtamoon, “Mii hsa 'i ninkotwaahk nihsimitana (130) tahso pipoon ehpapaami ayaayaan. O'o minihk kaapimaatisiyaan pisanakan nimpimaatisiwin, aahpici kaye pankii inentaakwan iki kotawiin minihk kaakiih pi pimaatisiwaatc ninkehteya'aamipaniik,” kii‑ishi nahkwehtamoon. 10Miitahsh Cekapoon kaaishi shawenimaanitc Peroon, miihsh kaaishi nakanaanitc. 11Coosap itahsh okii ishi kapehshi'aan oteten, wiicihkiweya' kaye, maawac iko eshi onishihshininik Iicipahkiini, weti nahke ootenaank Oremasis (Rameses) kaakii icikaatenik. Okii miinaa' kaye ahkiini citipinawewisinitc, ekii ishihciketc kaakii inaahkonikenitc Peroon. 12Coosap itahsh okii ahshamaan oteten, i'i kaye wiicihkiweya', kahkina kaye oteten owaahkaa'ikaniniink kaakii onciinitc ekii miinaatc miicim kemiicinitc, minihk hsa ko kaakiih tahshinitc oniicaanihsini.
Miicim Kaakiinoontehsek Ekiinihshiwanaacihcikemakahk
13I'iwe tahsh kaakii ayaahsinok miicim i'imaa misiwe ahkiink wiinke kiihkakwaatakentaakwan. Iicipahki (Egypt), Kenan (Canaan) ahkiink eyaawaatc pemaatisiwaatc hsa kaawiin kiiani saapaatisihsiiwak onsaam ekii ayaahsinok miicim. 14Pemaatisinitc itahsh kaakii ataawenitc miicim, Coosap (Joseph) okii maawaci'aan kahkina shooniyaan, miihsh kaa‑ani ishi ishiwinaatc Peroon (Pharaoh) owaahkaa'ikaniniink. 15Ahpii kaahcaakinaanitc oshooniyaamini pemaatisinitc kaakii onciinitc Iicipahkiink, Kenan ahkiink kaye, kahkina Iicip kaaonciinitc okiih pi naasihkaakoo' Coosap ekii'ikotc, “Miishihshinaam miicim. Wekonen itahsh keonci nipoyaankipan eshi'ayaayan? Ninkiih caakinaanaan ohsha nishooniyaaminaan,” okii'ikoo'.
16Coosap itahsh okii ishi nahkwehtawaa', “Piinihkwahk hsa kitaya'aawihshimiwaak; kika miinininim itahsh miicim meshkwac miishiyek aya'aawihshak, kishooniyaamiwaa kotawiin aasha ekiih caakihsetc,” okii'inaa'. 17Miitahsh iko 'i pemaatisinitc kaaishi piinaanitc otawahkaanimini eshi'ayaatc Coosap. Miicim meshkwac okii miinaa' cimiinikotc omihtatimoomini, omaanahcaanihshiimini kaye, omaanatihkomini kaye, opishihkiimini kaye, i'i kaye omaanshimihtatimoomini. I'i tahsh peshiko pipoon eishihsenik okiih pimahshamaa' miicim ekii miinaatc meshkwac itahsh ekii miinikotc kahkina otawahkaanimini.
18Ahpii tahsh miinawaa eani pipooninik, miinawaa okiih pi naasihkaakoo' ekii'ikotc, “Kaawiin hsa nintaa kaatamawaahsiwaanaan nintookimaaminaan tepwe ekiih caakihsetc nishooniyaaminaan, nintawahkaaninaanik kaye kiin ehtipenimatwaa. Kaawiin itahsh kekoon nintayaahsiimin kemiinikooyampan, miiyehtako niwiiyawinaanin, nintahkiiminaanin kaye. 19Wekonen itahsh keonci kawaskateyaankipan o'omaa kitahkiimink? Cimashashkwaakipan itahsh nintahkiiminaanin! Ataawaanihshinaam, ataawen kaye nintahkiiminaanin meshkwac cimiishiyaank miicim. Niinawint itahsh Peroo ninka tipenimikonaan cipamiihtawankitc, nitahkiiminaanin kaye oka tipentaanan. Miishihshinaam kihtikaanenhsan cikihtikaatamaank cipimaatisiyaank cinipohsiwaank, i'i tahsh ahki kaawiin tamihci paashkwaahsinoon,” okii'ikoo'. 20Coosap itahsh okii ataawehtamawaan Peroon kahkina Iicipahkiini. Kahkina hsa Iicip kaaonciiwaatc entahshiwaatc okii ataawaakenaawaan okihtikewahkamikowaan, onsaam aaniihsh kiihkohpaacihsewak ekii ayaahsininik miicim. Kahkina tahsh i'i ahkiini Peroo kihciokimaa okiih tipentaan. 21Miitahsh i'i nahke Coosap kaaishi kashki'aatc kahkina pemaatisinitc cinehpici mihtanohkiihtawaanitc kihciokimaan misiwe i'imaa ahkiink. 22I'iweni ahkiini ehta kaakii ishitaanitc anami'ewikimaa' kaawiin kiiataawehsii, aaniihsh Peroon okiih pakitinaani imaa ci‑ishitaanitc, Peroon iitok okii miinaani keontaatisinitc. Miitahsh kaakii onci ataawaakehsinik otahkiimini. 23Coosap itahsh okii'inaa' pemaatisinitc, “Inashke tahsh noonkom kaakiishikahk kikii ataawaaninim, kitahkiimiwaa kaye Peroo citipentank, ina itahsh onoweniwan kihtikaanenhsan kekihtikaatamek kikihtikaanahkiiwaank. 24Ahpii tahsh kiishinihtaawikinkin kekoonan, entahso naanan nehtaawikihtooyek, peshik i'imaa kika onci miinaawaa Peroo.#47.24 Entahso naanan nehtaawikihtooyek, peshik i'imaa kika onci miinaawaa Peroo: Mii hsa i'iwe kaa'icikaatek, pemaatisiwaatc ekii inaahkonintwaa cimiinaawaatc kihciokimaan peshik kekoon entahso naanan kekoon kaakii nihtaawikihtoowaatc. Ninkotink kaye o'o taicikaate peshik naanan. Kiinawaa tahsh wiin kika ayaam kotak i'i entahso naanan niiwin kaaishkonamek cikihtikaakeyek, ciomiicimimiyek itahsh, iki kaye eyaawaatc kitaawiniwaank, kiniicaanihsiwaak itahsh kaye,” okii'inaa'.
25O'o tahsh okii'ikoo', “Kikiih pimaacihtoonan ihsa nimpimaatisiwininaanin. Taka hsa minwaapamihshinaam, kiin iitok nintookimaaminaan; Peroo tahsh ninka tipenimikonaan,” okii'ikoo'. 26Coosap itahsh kii‑inaahkonike i'imaa Iicipahkiink, entahso naanan kekoonan kaanihtaawikininikin peshik i'imaa cionci miinimintc Peroon citipinawewisinitc. O'o tahsh inaahkonikewin keyaapi noonkom kaakiishikahk pimihse. I'i hsa ehta ahkiini kaakii ishitaanitc anami'ewikimaa' kaawiin okiih tipentansiini Peroon.
Cekap Ishkwaac Kaakii'ishipakohsenimotc
27Iki tahsh wiin Isriyalak (Israel) kii‑ishi kapehshiwak Kooshin (Goshen) inahke i'imaa Iicipahkiink (Egypt), ekii ani wenootisiwaatc, ekii ani nihtaawiki'itiwaatc itahsh kaye. Wiinke hsa kiiani paahtiinowak. 28Cekap (Jacob) itahsh mitaahshiniishwaahso (17) pipoon kiihtashi pimaatisi Iicipahkiink, piinihsh itahsh ninkotwaahk niimitanashiniishwaahso (147) ekiih tahso pipoonwetc. 29#Gen 49.29-32; 50.6. Ahpii tahsh wecihcihsenik aasha kekaa Isriyal cinipotc, okii antomaan okosihsan Coosapoon (Joseph) ekii'inaatc, “Kiishpin hsa menwaapamiwanen, taka ishininciinin shiipaa i'imaa nimpwaamink ciahshotaman ciminotootawiyan, citepweyan itahsh kaye. Keko Iicipahkiink ishi ninkwa'ohshihken. 30Ninantawentaan ihsa ahpii nipoyaan, Iicipahkiink cionci maaciinikooyaan ciawi na'inikooyaan eshi na'inintwaa ninkehteya'aamipaniik,” okii'inaan.
Coosapoon itahsh okii'ikoon, “Eya', ninka ishihcike i'i kaa'ishiyan.”
31Cekap itahsh kii‑ihkito, “Ahpimon hsa 'i ci‑ishihcikeyan,” okii'inaan. Miitahsh Coosapoon kaaishi ahpimonitc. Cekap itahsh kiiacitawihkweni ekii miikwehciwentank enihkwehshink inahke onipewinaahkonk.
Nu geselecteerd:
Cenisihs 47: OJBR
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Ojibwe Shorter Bible (Roman Script) © 2008 Canadian Bible Society
