Cenisihs 46
46
Isriyal Kahkina Entashitc Kii'ishaatc Iicipahkiink
1Isriyal (Israel) tahsh okii oshiwanihkaataanan kahkina otaya'iiman ekii ishaatc Piiarshiipa (Beersheba), miitahsh weti kaaishi pakitinaahsoohtamawaatc Kishemanitoon kaakii omanitoominitc otetepaniin Aaisikoon (Isaac). 2Kii‑ishinam tahsh ehtipihkaninik Kishemanitoon ehkanoonikotc ekii'ikotc, “Cekap, Cekap.” Miihsh kaaishi nahkwehtawaatc, “O'omaa nintayaa.”
3Kishemanitoon tahsh okii'ikoon, “Niin Kishemanitoo, kitete oKishemanitooman, keko sekisihken ci‑ishaayan weti Iicipahkiink (Egypt). Niwii ishi'aak ohsha kipiiwesiimak weti citashi paahtiinowaatc. 4Kikashi wiiciiwin hsa weti Iicipahkiink, ninka pikiiwewinaak itahsh miinawaa iki kipiiwesiimak o'omaa ahkiink. Coosap (Joseph) kika wiiciiwik ahpii ani nipowatc,” okii'ikoon.
5Cekap (Jacob) tahsh kiionci maacaa i'imaa Piiarshiipa. Okosihsa' ekiih poosi'ikotc, ekiih poosi'aanitc kaye oniicaanihsini, wiiwini kaye i'imaa otaapaanaahkonk kihciokimaan kaakiih piicinisha'waanitc cipimiwinikowaatc. 6#Act 7.15. Okii maaciinaa' tahsh kaye otawahkaana', otaya'iiman kaye Kenan (Canaan) ahkiink kaakii ontinamowaatc, ekii ishaawaatc Iicipahkiink. Cekap tahsh okii maaciinaa' kahkina opiiwesiima': 7okosihsa', kaakiih kwiiwisenhsiwinitc ooshihsa' kaye, otaanihsa', kaakii ihkwesenhsiwinitc ooshihsa' kaye. Kahkina hsa ko opiiwesiima' okiih pakami wiiciiwaa' i'imaa Iicipahkiink.
8Miiwak itahsh oko Isriyalak kaakii ishaawaatc Iicipahkiink. Miiwa' iitok i'i Cekap opiiwesiima'. Oroopin (Reuben) Cekap nihtam okosihsan. 9Miiwa' itahsh o'o Oroopin okosihsa': Henahk (Hanoch), Paloo (Pallu), Hiisiran (Hezron) kaye Caarmii (Carmi). 10Miihsh o'o Simiyan (Simeon) okosihsa': Ciimiyowel (Jemeul), Cemin (Jamin), Oohaat (Ohad), Cekin (Jakin), Soohaar (Zohar) kaye Sheyol (Shaul), kaakii omaamaatc ihkwewan Kenan ahkiink wenciinitc. 11Miihsh o'o Liipaai (Levi) okosihsa': Kershan (Gershon), Koohat (Kohath) kaye Miireraai (Merari). 12Miihsh wiin o'o Coota (Judah) okosihsa': Ehr (Er), Oonan (Onan), Shiila (Shelah), Piiris (Perez), kaye Siira (Zerah). Ehr a'a kaye Oonan kiihtashi ishkwaa pimaatisiwak Kenan ahkiink. Piiris (Perez) okosihsa': Hiisiran (Hezron) kaye Hemal (Hamul). 13Miiwa' itahsh o'o Iisahkaar (Issachar) okosihsa'. Toola (Tola), Piyooah (Puah), Ceshap (Jashub) kaye Shimran (Shimron). 14Miihsh o'o Sepalan (Zebulun) okosihsa': Siiret (Sered), Iilan (Elon) kaye Caalii'el (Jahleel). 15Miiwa' itahsh i'i Cekap (Jacob) okosihsa' ini kaye otaanihsan Taayinawan (Dinah) kaakii onci nihtaawikinitc ini wiiwan Liiya (Leah) eshinihkaasonitc weti Mesopohtemiya (Mesopotamia) ahkiink. I'i hsa okosihsa' tako kaye otaanihsa' maamaw nihsimitanashinihsin (33) kiihtahshiwa'.
16Miihsh o'o Kaat (Gad) okosihsa': Siihpon (Zephon), Haakaai (Haggi), Shoonaai (Shuni), Espan (Ezbon), Iiraai (Eri), Erati (Arodi) kaye Ariilaai (Areli). 17Miihsh o'o Aahshar (Asher) okosihsa': Imna (Imnah), Ishoo'a (Ishuah), Ishoo'aai (Ishui) kaye Piiraaiya (Beriah). Otaanihsan itahsh Siira (Serah) kii‑ishinihkaasowan. Piiraaiya okosihsa': Hiipar (Heber) kaye Maalki'el (Malkiel). 18Miiwa' itahsh i'i Cekap oniicaanihsa' kaakii onci nihtaawikinitc ini ihkwewan Silpa (Zilpah) eshinihkaasonitc. Mitahshininkotwaahso (16) maamaw kiihtahshiwa'. Lepan (Laban) iitok kiimiikiwekopan Silpawan, ekii miinaakopanen otaanihsan Liiyawan.
19Miiwa' itahsh o'o Cekap okosihsa' Orehcalwan (Rachel) kaakii onci nihtaawikinitc: Coosap kaye Penciman (Benjamin). 20#Gen 41.50-52. Weti hsa Iicipahkiink Coosap wiiwan Aasinaaht (Asenath) eshinihkaasonitc kiionci nihtaawikiwa' okosihsa' Manaahsa (Manasseh) kaye Iihpariyam (Ephraim) ekii ishinihkaasonitc. Aasinaaht hsa Paatipira (Potiphera) kii‑ishinihkaasowan oteten anami'ewikimaan On (On) ootenaank. 21Miihsh o'o Penciman okosihsa': Piila (Bela), Piikar (Beker), Aashpel (Ashbel), Kiira (Gera), Neaman (Naaman), Iihaai (Ehi), Rash (Rosh), Mapim (Muppim), Hapim (Huppim) kaye Aart (Ard). 22Miiwa' itahsh i'i okosihsiwaa' a'a Orehcal a'a kaye Cekap. Mitaahshiniiwin (14) maamaw kiihtahshiwa'.
23Miiwan tahsh ono Ten (Dan) okosihsan: Hooshim (Hushim). 24Miihsh wiin o'o Napihtalaai (Naphtali) okosihsa': Cahsii'el (Jahziel), Koonaai (Guni), Ciisar (Jezer) kaye Shilem (Shillem). 25Miiwa' itahsh i'i Cekap okosihsa' kaakii onci nihtaawikinitc ini ihkwewan Pilha (Bilhah) eshinihkaasonitc. Niishwaahso (7) maamaw ekiih tahshinitc. Lepan iitok kiimiikiwekopan Pilhawan, ekii miinaakopanen otaanihsan Orehcalwan.
26Iki tahsh kahkina Cekapoon kaakii ishi wiiciiwaawaatc Iicipahkiink; i'i hsa tipinawe opiiwesiima', ninkotwaahsimitanashininkotwaahso (66) kiihtahshiwa'. Kaawiin wiin okosihsa' wiiwini kiihtakwakimaahsiiwa'. 27#Act 7.14. I'i tahsh niishin Coosapoon okosihsini kaakii nihtaawikinitc Iicipahkiink, mii 'i maamaw niishwaahsimitana (70) Cekap kiihtahshiwaatc kii‑ishaawaatc Iicipahkiink.
Cekap Entahshitc Kii'ishaatc Iicipahkiink
28Cekap (Jacob) itahsh okii niikaaninisha'waan Cootawan (Judah) cianta waapamaanitc Coosapoon (Joseph) cikihkino'amaakowaatc aanti inahke eshi'ayaanik Kooshin (Goshen). Miitahsh kaakiih takohshinowaatc Kooshin ahkiink. 29Coosap itahsh kiihpoosi omiikaasowi otaapaanaahkwan ekii ishaatc Kooshin cinakishkawaatc oteten Isriyalan (Israel). Ahpii tahsh iko kaanaakositc eshi'ayaanitc, okiih kihkincikwepinaan, kinwesh itahsh kiimawi ekiih kihkincikwenaatc. 30Isriyalan itahsh okii'ikoon, “Miitahsh i'i noonkom pisaan cinipoyaan, niin iitok iko kiwaapamin keyaapi ehpimaatisiyan,” okii'ikoon.
31Coosap itahsh okii'inaa' wiicihkiweya', i'i kaye oteten owaahkaa'ikaniniink kaakii onciinitc, “Niwii'ishaa hsa Peroo (Pharaoh) o'o ewii awi'inak, ‘Niicihkiweyak hsa, iki kaye nintete owaahkaa'ikanink wenciinitc, kaakii ishitaawaahpan Kenan (Canaan) ahkiink, ninkii otihsikook. 32Ninka wiintamawaa kaye ehkanawi maanahcaanihshiwininiiwiyek, ehkanawenimekwaa aya'aawihshak. Ninka wiintamawaa kaye ekiih piinimek maanahcaanihsha', pishihkiwa' kaye, kahkina kaye kekoon eyaayek.’ 33Ahpii tahsh ishihsenik Peroo antominek o'o tahsh ishi kakweciminek aaniin enanohkiiyek? 34O'o tahsh kika'inaawaa, ‘Niinawint hsa kitanohkii'aakanak, mewisha hsa ko kiihpi kwiiwisenhsiwiyaank ninkiih pionci inanohkiimin ehkanawenimankitwaa aya'aawihshak, taapishkoo ninkehteya'aaminaapaniik kaakiih pi ishihcikewaatc.’ Miitahsh i'i cipakitinikooyek cishi kapehshiyek Kooshin inahke ahkiink, aaniihsh Iicip (Egypt) kaaonciiwaatc okakwaanihsakenimaawaa' kahkina okanawi maanahcaanihshiwe',” Coosap kii‑ihkito.
Nu geselecteerd:
Cenisihs 46: OJBR
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Ojibwe Shorter Bible (Roman Script) © 2008 Canadian Bible Society
