उहाँले हामीलाई नाम काटेर बोलाउनुहुन्छनमूना

ब्वाँसो

यो एक चेतावनी हो। हाम्रो एक शत्रु छ र त्यसको मुख्य उद्देश्य चोरी गर्नु, मार्नु र नष्ट पार्नु हो। त्यो बेलामौकामा भेडाको रूपमा प्रस्तुत भई बगालमा मिसिन खोजिरहेको हुन्छ। हामीले परमेश्‍वरको वचन जान्न र परमेश्‍वर को हुनुहुन्छ र को हुनुहुन्न भनेर थाहा पाउन अत्यन्त महत्त्वपूर्ण छ। कुनै चीज ज्योति जस्तै देखिन सक्छ, तर यदि त्यो परमेश्‍वरको वचनसँग मेल खाँदैन भने, त्यो अन्धकार हो र त्यसले तपाईंलाई खतरनाक बाटोमा लैजान्छ। परमेश्‍वरले तपाईंलाई उहाँको वचनको सीमाभन्दा बाहिरको काम गर्न कहिल्यै पनि लगाउनुहुन्‍न। उहाँले कहिल्यै आफूले भन्नुभए विपरित गर्नुहुन्न। याद गर्नुहोस् कि हाम्रो शत्रु चतुर, डरलाग्दो र धेरै धुर्त छ। उत्पत्तिमा, अदनको बगैंचामा, जब सर्प पहिलो पटक दृश्यमा आयो, त्यसले हव्वालाई सोध्छ, "के परमेश्‍वरले साँच्चै भन्नुभएको छ...?" त्यसले परमेश्‍वरको वचनलाई घुमाउँछ र शंकाको बीउ रोप्छ।

१ यूहन्ना ४:१ ले भन्छ, "प्रिय हो, जुनसुकै आत्‍मालाई विश्‍वास नगर, तर आत्‍माहरू परमेश्‍वरबाट आएका हुन्‌ कि होइनन्‌ भनेर तिनको जाँच गर। किनभने धेरै झूटा अगमवक्ताहरू यस संसारमा निस्केका छन्‌।" यदि कोही अलमल्लमा परेको छ वा स्पष्टता चाहिन्छ भने, परमेश्‍वरले बाइबलमा बताउनु भएको छ कि हामीले उहाँलाई सोध्‍न सक्छौँ र उहाँले हामीलाई उहाँका सत्यहरू प्रकट गर्नुहुनेछ (याकूब १:५)। जब हामी येशूलाई खोज्छौं, हामीले उहाँलाई भेट्टाउनेछौं र के कुरा उहाँबाट हो र के उहाँबाट होइन भनेर हामीले चिन्नेछौं। यदि कोही भेडा जस्तै देखिन्छ र भेडा जस्तै काम गर्दछ, तर धर्मशास्त्रलाई घुमाउँछ भने... भाग्नुहोस्! तपाईंको खोरमा ब्वाँसो छ।