भजनसंग्रह 30:1-7
भजनसंग्रह 30:1-7 नेपाली नयाँ संशोधित संस्करण (NNRV)
हे परमप्रभु, म तपाईंका महानताको स्तुति गाउनेछु, किनभने तपाईंले मलाई गहिराइदेखि माथि उचाल्नुभएको छ, र मेरा शत्रुहरूलाई मेरो हाँसो गर्न दिनुभएको छैन। हे परमप्रभु मेरा परमेश्वर, मैले तपाईंलाई सहायताको निम्ति पुकारा गरें, अनि तपाईंले मलाई निको पार्नुभयो। हे परमप्रभु, तपाईंले मलाई चिहानबाट निकाल्नुभयो, र मृत-लोकमा जानुदेखि मलाई बचाउनुभयो। हे परमप्रभुका पवित्र जन हो, उहाँको निम्ति भजन गाओ, र उहाँको पवित्र नाउँको स्तुति गर। किनकि उहाँको क्रोध क्षणभरिको मात्र हुन्छ, तर उहाँको निगाह आजन्म रहन्छ, आँसु रातभरि मात्र बग्छ, तर बिहान आनन्द आउँदछ। सुरक्षित भएको समयमा, “म कहिल्यै डग्नेछैनँ” मैले भनें। हे परमप्रभु, तपाईंले निगाह गर्नुहुँदा, तपाईंले मेरा पहाड़लाई सुदृढ़ पार्नुभयो। तर जब तपाईंले आफ्नो मुहार लुकाउनुभयो, म दु:खित भएँ।
भजनसंग्रह 30:1-7 पवित्र बाइबल, नेपाली समकालीन संस्करण (NCV)
हे याहवेह, म तपाईंलाई उच्च पार्नेछु; किनकि तपाईंले मलाई गहिराइबाट माथि उचाल्नुभएको छ, र मेरा शत्रुहरूलाई ममाथि विजय हुन दिनुभएको छैन। हे याहवेह, मेरा परमेश्वर, मैले तपाईंलाई सहायताको निम्ति पुकारेँ, र तपाईंले मलाई निको पार्नुभयो। हे याहवेह, तपाईंले मलाई पातालबाट माथि निकालेर ल्याउनुभएको छ; तपाईंले मलाई चिहानमा जानदेखि बचाउनुभएको छ। हे याहवेहका पवित्र जनहरू हो, उहाँको स्तुति गाओ; उहाँको पवित्र नामको स्तुति गर। किनकि उहाँको क्रोध क्षणभरको निम्ति मात्र रहन्छ; तर उहाँको कृपादृष्टि जीवनभरि नै रहन्छ; रुवाइ रातभरि मात्र रहन्छ, तर बिहान आनन्द आइहाल्छ। जब मैले आफूलाई सुरक्षित पाएँ, तब मैले भनेँ, “म कहिल्यै ढलपल हुनेछैनँ।” हे याहवेह, जब तपाईंले ममाथि आफ्नो कृपादृष्टि राख्नुभयो, तब तपाईंले मलाई पहाड समान स्थिर पार्नुभयो; तर जब तपाईंले आफ्नो मुहार लुकाउनुभयो, म निराश भएँ।
भजनसंग्रह 30:1-7 पवित्र बाइबल (NERV)
हे परमप्रभु, तपाईंले मलाई मेरो सङ्कटहरूबाट माथि उठाउनु भयो। तपाईंले मेरो शत्रुहरूलाई जित्न दिनु भएन र मप्रति हाँसो उडाउन दिनु भएन। यसैले तपाईं प्रति म सम्मान जनाउँदछु। हे परमप्रभु, मेरो परमेश्वर, मैले तपाईंलाई प्रार्थना गरें र मलाई निको पार्नु भयो। तपाईंले मलाई चिहानबाट निकाल्नु भयो र बाँच्न दिनुभयो। मैले खाडलमा लडिरहेका मृतकहरूसित मिल्नु परेन। हे परमेश्वरका भक्तजनहरू, परमप्रभु प्रति भजन गाऔ! उहाँको पवित्र नाउँको प्रशंसा गर! परमेश्वर क्रोधित हुनुहुन्थ्यो यसर्थ निर्णय “मृत्यु” हुन गयो। तर उहाँले आफ्नो प्रेम दर्शाउनु भयो र मलाई “जीवनदान” दिनुभयो। म राती रोइरहें, अर्को बिहान म खुशी थिएँ र गाइरहेथें! जब म जोगिएँ र सुरक्षित भएँ, सोचें केही कुरोले पनि मलाई कष्ट पुर्याउन सक्ने छैन! हे, परमप्रभु जब तपाईं मप्रति कृपालु हुनुहुन्थ्यो मैले अनुभव गरें कसैले पनि मलाई पराजित गर्न सक्ने छैन! जब तपाईंले मबाट मुख फर्काएर जानुभयो, म डराएँ र कामे।
भजनसंग्रह 30:1-7 सरल नेपाली पवित्र बाइबल (सरल नेपाली)
हे परमप्रभु! म तपाईंको प्रशंसा गर्छु किनभने तपाईंले मलाई बचाउनुभयो र मेरा शत्रुहरूलाई हाँसो उडाउन दिनुभएन। हे परमप्रभु! मेरा परमेश्वर! मैले तपाईंलाई सहायताको निम्ति पुकारें र तपाईंले मलाई निको पार्नुभयो। तपाईंले मलाई मृत्युदेखि बचाउनुभयो मैले मृत्यु-लोकको बाटो लिएर पाइलो सारेको थिएँ, तर तपाईंले मेरो जीवन फेरि फर्काई ल्याउनुभयो। हे उहाँका सबै विश्वासी प्रजा हो! परमप्रभुको प्रशंसा गर, परमपवित्रको कामको सम्झना गर र उहाँलाई धन्यवाद चढाओ! उहाँको रिस थोरै समयको लागि र उहाँको भलाइ जीवनभरिको लागि रहन्छन्। राती आँसु झर्ला तर बिहान आनन्द आउँछ। मैले आफैंलाई सुरक्षित पाएर भनें, “म कहिल्यै हार्नेछैनँ।” परमप्रभु! तपाईं मेरो निम्ति भलो हुनुहुन्थ्यो, पहाडमाथिको गढीले झैँ तपाईंले मेरो रक्षा गर्नुभयो। तर जब तपाईं मदेखि लुक्नुभयो, म डराएँ।