गन्ती 9:9-23
गन्ती 9:9-23 नेपाली नयाँ संशोधित संस्करण (NNRV)
तब परमप्रभुले मोशालाई भन्नुभयो, “इस्राएलीहरूलाई यसो भन्: ‘तिमीहरूका परिवारमा मुर्दा छोएर कोही अशुद्ध भएको छ, अथवा टाढ़ा-टाढ़ा परदेश गएको छ भने पनि त्यसले परमप्रभुको निस्तार-चाड़ मानोस्। दोस्रो महिनाको चौधौँ दिन साँझमा तिनीहरूले यो मानून्। तिनीहरूले थुमा, अखमिरी रोटी र तीतो सागसमेत खाऊन्। तिनीहरूले भोलिपल्ट बिहानसम्म त्यसबाट केही पनि बाँकी नराखून्। त्यसको कुनै हाड़ पनि नभाँचून्। निस्तार-चाड़को सबै नियमअनुसार तिनीहरूले मानून्। तर जो मान्छे शुद्ध छ, र यात्रामा पनि छैन, त्यसले निस्तार-चाड़ मानेन भने त्यस्तो व्यक्ति आफ्ना मानिसहरूबाट बहिष्कार गरिओस्, किनभने त्यसले तोकिएको समयमा परमप्रभुको निम्ति आफ्नो बलि चढ़ाएन। त्यस मानिसले आफ्नो पापको दण्ड भोगोस्। “‘यदि तिमीहरूका बीचमा कुनै विदेशीले प्रवास गरेको छ, र त्यसले परमप्रभुको निम्ति निस्तार-चाड़ मान्न खोज्छ भने, त्यसले निस्तार-चाड़का नियम र विधिअनुसार त्यो मनाओस्। विदेशी र स्वदेशीको निम्ति तिमीहरूको एउटै नियम होस्’।” पवित्र वासस्थान, गवाही-पाटीको पाल खड़ा गरेको दिन बादलले त्यसलाई ढाक्यो। पवित्र वासस्थानमाथिको त्यो बादल साँझ परेदेखि बिहानसम्मै आगोको जस्तै रूप देखा पर्यो। यो सधैँ यस्तै हुन्थ्यो— दिनमा बादलले ढाक्थ्यो, र राती आगोजस्तो देखा पर्थ्यो। जब-जब पालमाथिबाट बादल हट्थ्यो, तब-तब इस्राएलीहरू प्रस्थान गर्थे, र जुन ठाउँमा बादल अड़िन्थ्यो, त्यहीँ नै इस्राएलीहरूले पाल टाँग्थे। परमप्रभुको आज्ञामा इस्राएलीहरू प्रस्थान गर्थे, र परमप्रभुकै आज्ञामा तिनीहरूले पाल टाँग्थे। पवित्र वासस्थानमाथि बादल रहुञ्जेल तिनीहरू छाउनीमा नै वास बस्थे। धेरै दिनसम्म बादल पवित्र वासस्थानमाथि रहिरह्यो भने, इस्राएलीहरू परमप्रभुको आज्ञा मानेर प्रस्थान गर्दैनथे। कहिलेकहीँ पवित्र वासस्थानमाथि थोरै दिनसम्म मात्र बादल रहन्थ्यो। परमप्रभुको आज्ञाअनुसार तिनीहरू वास बस्थे, र परमप्रभुको आज्ञाअनुसार तिनीहरू प्रस्थान गर्थे। अनि कहिलेकहीँ साँझदेखि बिहानसम्मै मात्र बादल रहन्थ्यो, र बिहान बादल हटेपछि तिनीहरू प्रस्थान गर्थे। दिन होस् वा रात होस्, बादल उठ्ने बित्तिकै तिनीहरू प्रस्थान गर्थे। दुई दिन वा एक महिना अथवा एक वर्ष भए पनि पवित्र वासस्थानमाथि बादल रहुञ्जेल इस्राएलीहरू प्रस्थान गर्दैनथे, तर बादल हट्ने बित्तिकै तिनीहरू प्रस्थान गर्थे। परमप्रभुको आज्ञामा तिनीहरूले पाल टाँग्थे, र परमप्रभुकै आज्ञामा तिनीहरू प्रस्थान गर्थे। परमप्रभुले मोशाद्वारा जस्तो आज्ञा गर्नुभयो, तिनीहरूले त्यही पालन गर्थे।
गन्ती 9:9-23 पवित्र बाइबल, नेपाली समकालीन संस्करण (NCV)
त्यसपछि याहवेहले मोशालाई भन्नुभयो, “इस्राएलीहरूलाई यसो भन्: ‘तिमीहरूमध्ये कोही अथवा तिमीहरूका सन्तान लासलाई छोएको कारण अशुद्ध भयो भने अथवा टाढाको यात्रामा छन् भने पनि तिनीहरूले याहवेहको निस्तार चाड मनाउन सक्छन्। तर तिनीहरूले त्यो दोस्रो महिनाको चौधौँ दिनको साँझमा मनाऊन्। तिनीहरूले थुमासँगै अखमिरी रोटी र तिते साग खाऊन्। तिनीहरूले त्यसको केही अंश पनि बिहानसम्म नराखून्, अर्थात् थुमाको कुनै हड्डी नभाचून्। तिनीहरूले निस्तार चाड मनाउँदा सबै नियमहरू पालन गरून्। तर यदि कोही विधिपूर्वक शुद्ध छ र यात्रामा पनि गएको छैन भने त्यस मानिसले निस्तार चाड मनाएन भने, र त्यसले तोकिएको समयमा याहवेहको भेटी चढाएन भने त्यसलाई आफ्ना मानिसहरूबाट बहिष्कार गरून्। त्यसले आफ्नो पापको प्रतिफल भोग्नुपर्छ। “ ‘तिमीहरूसँग बासोबास गर्ने विदेशीले पनि याहवेहको निस्तार चाड मनाउन चाहन्छ भने तिनीहरूले पनि सबै नियम र विधिअनुसार मनाउनुपर्छ। विदेशी होस् वा स्वदेशी, तिमीहरू सबैका निम्ति एउटै नियम लागू हुनैपर्छ।’ ” समागम पाल, साक्षी पाटीको पाल स्थापना गरेको दिन बादलले त्यसलाई ढाक्यो। साँझदेखि बिहानसम्म समागम पालमाथिको बादल आगोजस्तै देखिन्थ्यो। यस्तै निरन्तर भइरह्यो। जहिले-जहिले त्यो बादल समागम पालबाट उठ्थ्यो, तब इस्राएलीहरू प्रस्थान गर्थे। जब बादल अडिन्थ्यो, तब इस्राएलीहरूले पाल टाँग्ने गर्थे। यसरी याहवेहको आज्ञाअनुसार इस्राएलीहरू प्रस्थान गर्थे; र उहाँकै आज्ञामा तिनीहरूले पाल टाँग्ने गर्थे। जबसम्म बादल समागम पालमाथि रहन्थ्यो, तबसम्म तिनीहरू छाउनीमै रहन्थे। जब समागम पालमाथि बादल लामो समयसम्म रहन्थ्यो, तब इस्राएलीहरूले याहवेहको आज्ञा मान्दथे, र प्रस्थान गर्दैनथे। कहिलेकाहीँ बादल समागम पालमाथि केही दिनका लागि मात्र रहन्थ्यो। याहवेहको आज्ञामा तिनीहरूले पाल टाँग्ने गर्थे, र त्यसपछि उहाँकै आज्ञामा तिनीहरू प्रस्थान गर्थे। कहिलेकाहीँ बादल साँझदेखि बिहानसम्म मात्र रहन्थ्यो। अनि बिहान बादल हटेपछि तिनीहरू प्रस्थान गर्थे। चाहे दिन होस् अथवा रात, जब बादल हट्थ्यो, तब तिनीहरू प्रस्थान गर्थे। चाहे बादल दुई दिन अथवा एक महिना वा एक वर्षसम्म समागम पालमाथि रहिरहोस्, तापनि इस्राएलीहरू प्रस्थान नगरी पालमै बस्दथे। तर जब बादल हट्थ्यो, तब तिनीहरू फेरि प्रस्थान गर्थे। याहवेहको आज्ञामा तिनीहरूले पाल टाँग्थे र याहवेहकै आज्ञामा तिनीहरू प्रस्थान गर्थे। मोशाद्वारा याहवेहले दिनुभएको आज्ञाअनुसार तिनीहरूले उहाँको आदेश पालन गर्थे।
गन्ती 9:9-23 पवित्र बाइबल (NERV)
त्यसपछि परमप्रभुले मोशालाई भन्नुभयो, “इस्राएलका मानिसहरूलाई यसो भन। यो नियम तिनीहरू र तिनीहरूका भावी सन्तानहरूका निम्ति हो। यदि कसैले एउटा मुर्दालाई छुन्छ अनि अपवित्र हुन्छ अथवा कोही टाडा गएका छन् यस्तो दुवै अवस्थामा पनि उसले यो निस्तार चाढ मनाउनु पर्छ। तिनीहरूलाई यो चाड दोस्रो महीनाको चौधौं दिनको गोधुली बेलामा मनाउन देऊ। तिनीहरूले थुमासित अखमीरे रोटी र तीतो साग खानु पर्छ। तिनीहरूले चढाएको निस्तारबलि भोलिपल्ट बिहानसम्म त्यसबाट केही बाँकी नराख्न् र त्यसको कुनै हड्डी नभाँच्नु। सबै निस्तार चाडको नियम अनुसार तिनीहरूले मानुन्। तर यदि कुनै मानिस शुद्ध छ अनि टाढ़ा पनि गएको छैन अनि अझ उसले निस्तार चाड मनाउँदैन भने, रातको समयमा उसले परमप्रभुलाई बलिदान नचढाएको खण्डमा उसलाई उसको मानिसहरूबाट बहिष्कार गर्नु पर्छ। त्यस्तो व्यक्तिले उसको पापको निम्ति दण्ड पाउनेछ। “यदि कुनै विदेशी तिमीहरूसित स्थायी रूपले बसोबास गरिरहेको छ अनि उसले पनि निस्तार चाड मनाउन चाहन्छ भने उसले मनाउन सक्छ, तर त्यस व्यक्तिले निस्तार चाडको नियम पालन गर्नु पर्छ। त्यो प्रत्येकको निम्ति नियम हो।” पवित्र वास स्थान, करारको पाल खडा गरेको दिन परमप्रभुको बादलले त्यसलाई ढाक्यो। पवित्र स्थान माथिको बादल राती आगो जस्तो देखियो। सब समय त्यो बादल पवित्र पालमाथि रह्यो र राती चाँहि त्यो बादल आगो जस्तो देखिन्थ्यो। जब पालमाथिको बादल सर्थ्यो इस्राएली मानिसहरू पनि हिँड्थे र जब बादल पालमाथि अडिन्थ्यो ती मानिसहरूले त्यहीं शिविर हाल्थे। जब परमप्रभुले आज्ञा गर्नु भयो मानिसहरू हिँडे र जब उहाँले आज्ञा दिनुभयो मानिसहरू हिँड्न बन्द गरे र तिनीहरूले छाउनी स्थापित गरे। जबसम्म पवित्र पालमाथि बादल रहन्थ्यो मानिसहरू छाउनी भित्र रहन्थे। कोही समय बादल पवित्र पालमाथि लामो समयको निम्ति रहन्थ्यो। इस्राएलीहरूले परमप्रभुको आज्ञा पालन गरेर कतै सर्दैन थिए। कहिले काही बादल पवित्र पाल माथि केही दिनको लागि रहन्थ्यो। परमप्रभुको आज्ञामा तिनीहरू छाउनी बसाल्थे र परमप्रभुकै आज्ञामा तिनीहरू सर्थे। अनि कोही बेला साँझदेखि बिहान सम्मै अडिन्थ्यो, र बिहान बादल सरे पछि तिनीहरू पनि हिँड्थे। दुइ दिन, एक महिना अथवा पुरै एक बर्ष बादल पवित्र स्थानको पाल माथि अडिरहे इस्राएलको मानिसहरूको शिविर पनि त्यहीं रहन्थ्यो र कतै सर्दैनथ्यो। तर जब त्यो बादल सर्थ्यो इस्राएलका मानिसहरू पनि यात्रा शुरू गर्थे। परमप्रभुको आज्ञा अनुसार तिनीहरूले शिविर हाले अनि परमप्रभुकै आज्ञा अनुसार यात्रा शुरू गरे। मोशाद्वारा तिनीहरूले परमप्रभुको आज्ञा पालन गरे।
गन्ती 9:9-23 सरल नेपाली पवित्र बाइबल (सरल नेपाली)
परमप्रभुले मोशालाई भन्नुभयो, “इस्राएलीहरूलाई यसो भन्, ‘तिमीहरू कोही वा तिम्रा कुनै सन्तान लाश छोएर अशुद्ध भएको छ वा टाढा यात्रामा गएको छ तर त्यसले निस्तार-चाड मनाउन चाहन्छ नै भने तिनीहरूले एक महिनापछि सो चाड मनाउन पाउनेछन्। त्यस्ताहरूले दोस्रो महिनाको चौधौँ दिनको साँझमा अखमिरी रोटी र तीतो साग खाएर चाड मनाउनेछन्। कुनै पनि खानेकुरा भोलिपल्ट बिहानसम्म नउबार्नू र पशुको कुनै पनि हड्डी नभाँच्नू। सबै नियमअनुसार निस्तार-चाड मनाउनू। तर जो अशुद्ध छैन वा टाढा यात्रामा छैन र पनि त्यसले निस्तारचाड मनाएन भने त्यसलाई फेरि मेरो प्रजा हो भनी मानिनेछैन किनभने त्यसले तोकिएको समयमा मलाई भेटी चढाएन। त्यसले आफ्नो पापको फल भोग्नेछ। “तिमीहरूका माझमा बास गर्ने विदेशीहरूले निस्तार-चाड मनाउन चाहन्छन् भने तिनीहरूले सारा व्यवस्था र नियमहरू मान्नुपर्नेछ। विदेशी वा स्वदेशी सबैलाई एउटै नियम लागू हुनेछ।” जुन दिन परमप्रभुले बास गर्ने पवित्र पाल स्थापना गरियो, त्यस दिन बादल आएर त्यसलाई ढाक्यो। राती त्यो बादल आगोजस्तो देखिन्थ्यो। जब त्यो बादल सर्दथ्यो, इस्राएलीहरूले छाउनी उठाउँथे र जुन ठाउँमा त्यो बादल बस्दथ्यो, त्यहाँ फेरि छाउनी हाल्थे। परमप्रभुको आज्ञामा इस्राएलीहरूले छाउनी उठाउँथे, उहाँको आज्ञामा तिनीहरूले छाउनी लाउँथे। जबसम्म बादलमाथि रहन्थ्यो, तिनीहरू त्यहाँ छाउनीमा बसिरहन्थे। पवित्र पालमाथि धेरै बेरसम्म बादल रहिरहे तिनीहरू परमप्रभुको आदेश मानेर अघि बढ्दैनथे। कहिलेकाहीँ बादल थोरै दिन मात्र पवित्र पालमाथि रहन्थ्यो। जे भए पनि तिनीहरू परमप्रभुको आज्ञाअनुसार छाउनीमा बसिरहन्थे वा अघि बढ्थे। कहिलेकाहीँ बादल साँझदेखि बिहानसम्म मात्र रहन्थ्यो र बादल सर्ने बित्तिकै तिनीहरू हिँड्थे। दिन वा रातमा जब बादल सर्दथ्यो, तब तिनीहरू अघि बढ्थे। दुई दिन, महिना दिन, वर्ष दिन वा त्योभन्दा धेरै, जबसम्म बादल पवित्र पालमाथि रहन्थ्यो, तिनीहरू बढ्दैनथे। तर जब त्यो सर्दथ्यो, तिनीहरू अघि बढ्थे। परमप्रभुले तिनीहरूलाई मोशाद्वारा दिनुभएको आज्ञाअनुसार तिनीहरूल छाउनी हाल्थे वा उठाउँथे।