हिब्रू 3:7-14
हिब्रू 3:7-14 नेपाली नयाँ संशोधित संस्करण (NNRV)
यसकारण पवित्र आत्मा भन्नुहुन्छ, “आज तिमीहरूले उहाँको शब्द सुन्यौ भने, उजाड-स्थानमा परीक्षाको समयमा विद्रोहका दिनमा गरेजस्तो आफ्ना हृदयलाई कठोर नपार, जहाँ तिम्रा पुर्खाहरूले मेरो परीक्षा गरे, र चालीस वर्षसम्म मेरा कामहरू देखे। यसकारण त्यस पुस्तासँग म क्रोधित भएँ, र भनें, ‘तिनीहरूका हृदय सधैँ बरालिन्छन्, तिनीहरूले मेरा मार्ग चिनेका छैनन्।’ यसैले मैले आफ्नो क्रोधमा यसरी शपथ खाएँ, ‘मेरो विश्राममा तिनीहरू कहिल्यै पस्नेछैनन्’।” भाइ हो, होश गर, तिमीहरूमध्ये कसैमा भएको दुष्ट र अविश्वासी हृदयले तिमीहरूलाई जीवित परमेश्वरबाट टाढ़ा नलैजाओस्। जबसम्म “आजको दिन” भन्ने कुरा छ, तबसम्म एउटाले अर्कालाई अर्ती देओ, र पापको छलछामले तिमीहरू कसैको हृदय कठोर नहोस्। यदि हामीले हाम्रो सुरुको भरोसालाई अन्त्यसम्मै दृढ़तासाथ थामिराख्यौं भने, हामी ख्रीष्टका सहभागी भएका छौं।
हिब्रू 3:7-14 नेपाली समकालीन संस्करण (NCV)
यसकारण जसरी पवित्र आत्मा भन्नुहुन्छ: “आज तिमीहरूले उहाँको स्वर सुन्यौं भने, तिमीहरूले उजाडस्थानमा परीक्षाको समयमा, बागी भएझैं आफ्ना हृदयलाई कठोर नपार, जहाँ मैले चालीस वर्षसम्म के गरें, सो देखेर पनि। तिमीहरूका पुर्खाहरूले मलाई जाँच र परीक्षा गरेका थिए, त्यसैकारण म त्यस पुस्तासँग रिसाएको थिएँ, अनि मैले भनें, ‘तिनीहरूका हृदय सधैं बरालिन्छन्, अनि तिनीहरूले मेरा मार्गहरू जानेका छैनन्।’ यसकारण मैले आफ्नो क्रोधमा शपथ खाएर घोषणा गरें, ‘तिनीहरू कहिल्यै पनि मेरो विश्राममा पस्नेछैनन्।’ ” यसकारण हे दाजुभाइ-दिदीबहिनीहरूहो, यसमा विचार गर कि, तिमीहरूसँग जीवित परमेश्वरदेखि टाढा रहने पापपूर्ण र अविश्वासी हृदय नहोस्। तर “आजको दिन” रहँदा नै एक-अर्कालाई दिनहुँ ढाडस देओ, ताकि तिमीहरूमध्ये कोही पनि पापको छलद्वारा कठोर नबनोस्। हामीसँग भएको आत्मविश्वासलाई दृढतापूर्वक अन्त्यसम्मै पक्रिराख्यौं भने, हामी ख्रीष्टका सहभागी भएका छौं।
हिब्रू 3:7-14 पवित्र बाइबल (NERV)
त्यसैकारण पवित्र-आत्मा भन्नहुन्छ, “आज यदि तिमीहरूले परमेश्वरको आवाज सुन्यौ भने, अतितमा जस्तै तिमीहरू हठधर्मी नबन, जतिबेला तिमीहरूले परमेश्वरको विरोधमा विद्रोह गर्यौ, त्यसै बेला मरूभूमिमा परमेश्वरको परीक्षा लियौ। चालिस वर्षसम्म मरूभूमिमा मैले के-के गरें, त्यो तिम्रा पिता-पुर्खाहरूले देखे। तर तिनीहरूले मेरो धैर्यको परीक्षा लिए। त्यसैले म तिनीहरूसित रिसाएँ र मैले भनें ‘तिनीहरूका विचार सधैँ गल्ती छन् तिनीहरूले कहिल्यै मेरो बाटो बुझेनन्।’ त्यसैले म रिसाएँ र शपथ लिएँ की, ‘तिनीहरूले कहिल्यै प्रवेश पाउने छैनन्, र मसित विश्रान्ति पाउने छैनन्।’” त्यसकारण दाज्यू-भाइहरू र दिदी-बहिनीहरू, होशियार बस जसमा कि तिमीहरूमा कोही पापी नहोऊ, विश्वासलाई अस्वीकार नगरोस् र जीवित परमेश्वरलाई नछोडोस्। तर हरेक दिन एक-अर्काको उत्साह बढाऊ। “आज” नै यो गर। एक अर्काको सहायता गर जसमा कि कोही पाप र यसको कपटपूर्ण तरिकाले कोही पनि कठोर नबनोस्। हामी सबै ख्रीष्टका सहभागी छौं हामीले शुरूमा पाएको विश्वास अन्त सम्म थामिरह्यौं भने यो सत्य रहने छ।
हिब्रू 3:7-14 सरल नेपाली पवित्र बाइबल (सरल नेपाली)
त्यसो हुँदा पवित्र आत्माले भन्नुभएझैँ: “आज तिमीहरूले परमेश्वरका आवाज सुन्यौ भने तिमीहरूका पुर्खाले परमेश्वरको विरोध गरेर मन कठोर भएजस्तो नहोओ। तिनीहरूले मरुभूमिमा परमेश्वरको जाँच गरेर उहाँको विरोध गरे। त्यहाँ तिमीहरूका पुर्खाले चालीस वर्षसम्म मैले गरेको काम देखेर पनि पत्याएनन् र मलाई जाँचे। त्यसैले ती मानिसहरूसँग मलाई रिस उठ्यो र मैले भनें, ‘यी मानिसहरू कति धेरै अविश्वासी छन्। तिनीहरू मेरो बाटोमा हिंड्नै मानेनन्। यसैकारण मैले रिसमा शपथ खाएर भनें, “तिनीहरू मैले विश्राम दिने ठाउँमा कहिल्यै पस्न पाउनेछैनन्।” दाजुभाइहरू, होश राख। तिमीहरूमा कोही पनि विश्वास नगर्ने पापी हृदयको भएर जिउँदा परमेश्वरलाई नछोडोस्। तर धर्मशास्त्रमा ‘आज’ भनेको समय रहुञ्जेल प्रत्येक दिन एक-अर्कालाई हौसला देओ। नत्रता पापको छलछामले हृदय नै कठोर पारिदिन्छ। हाम्रो सुरुको भरोसामा हामी आखिरिसम्म दिगो रह्यौं भने हामी ख्रीष्टसँग साझे हकदार हुनेछौं।