२ शमूएल 13:1-20

शेयर गर्नुहोस्

२ शमूएल 13:1-20 नेपाली नयाँ संशोधित संस्करण (NNRV)

दाऊदका छोरा अब्‍शालोमकी तामार नाउँ भएकी एउटी सुन्‍दरी बहिनी थिइन्‌। अनि दाऊदका अर्का छोरा अमनोन तिनीसँग प्रेममा फसे। अमनोन आफ्‍नी सौतेली बहिनीको प्रेमले गर्दा यति व्‍याकुल भए कि उनी रोगाउँदैगए। किनभने तिनी कन्‍ये-केटी भएकी हुनाले तिनीसँग केही गर्न अमनोनलाई असम्‍भव थियो। तर दाऊदका दाजु शिमाहका छोरा योनादाब नाउँ भएका अमनोनका एक मित्र थिए, जो अत्‍यन्‍तै चतुर थिए। तिनले अमनोनलाई भने, “हे राजकुमार, तिमी यसरी दिनदिनै हताश हुँदैजाँदैछौ, मलाई किन कारण भन्‍दैनौ?” तब अमनोनले उनलाई भने, “म मेरा भाइ अब्‍शालोमकी बहिनी तामारसँग प्रेममा फसेको छु।” योनादाबले तिनलाई भने, “बिरामी छु भन्‍ने बहाना गरेर ओछ्यानमा सुतिरह। जब तिम्रा पिता तिमीलाई हेर्न आउँछन्‌ तब तिनलाई भन, ‘कृपा गरी मेरी बहिनी तामार आएर मलाई मेरो खानेकुरा देओस्‌। त्‍यसले मेरै सामुन्‍ने त्‍यो पकाओस्, र म त्‍यसले बनाएकी हेर्छु, र त्‍यसकै हातबाट खानेछु’।” यसैले अमनोन बिरामी परेको बहाना गरेर ओछ्यानमा सुतिरहे। जब राजा उनलाई हेर्न आए तब उनले भने, “हजूर, मेरी बहिनी तामार आएर मेरै सामु केही विशेष रोटी बनाइदेओस्, र म त्‍यसको हातबाट खान पाऊँ।” दाऊदले महलमा तामारकहाँ यसो भनेर समाचार पठाए, “तिम्रो दाजु अमनोनको कोठामा गएर त्‍यसको निम्‍ति खानेकुरा पकाइदेऊ।” तामार तिनका दाजुकहाँ आइन्, र उनलाई सुतिरहेका भेट्टाइन्‌। तिनले केही पीठो मुछेर उनको सामुन्‍ने रोटी पकाइदिइन्‌। तब तिनले तावा लगेर अमनोनको सामुन्‍ने रोटी हालिदिइन्, तर अमनोनले खान मानेनन्‌। तब अमनोनले सबैलाई आफ्‍नो कोठाबाट जाने हुकुम गरे। जब तिनीहरू सबै गए, तब उनले तामारलाई भने, “खानेकुरा मेरो भित्री कोठामा ल्‍याऊ, र म त्‍यहाँ तिम्रो हातबाट खानेछु।” आफूले बनाएका रोटीहरू तामारले अमनोनकहाँ भित्री कोठामा लगिन्‌। तर जब तिनले अमनोनलाई ती दिइन्‌ तब उनले तिनलाई समातेर भने, “हे मेरी बहिनी, आऊ, मसित सुत।” तर तिनले जवाफ दिइन्, “होइन मेरो दाज्‍यै, मेरो बेइज्‍जत नगर्नुहोस्‌। यस्‍तो काम इस्राएलमा गर्नुहुँदैन। यस्‍तो नीच काम नगर्नुहोस्‌। मैले मेरो अनुहार कहाँ गएर देखाउनु? अनि तपाईं पनि इस्राएलमा एक दुष्‍ट, मूर्ख बन्‍नुहुनेछ। मेरो निम्‍ति राजासित कुरा गर्नुहोस्, अनि मसित विवाह गर्नलाई उहाँले तपाईंलाई इन्‍कार गर्नुहुनेछैन।” तर उनले तामारको कुरा ट्याक्‍कै सुनेनन्, र तिनलाई जबरजस्‍ती गरेर समाते, र तिनको बेइज्‍जत गरी तिनीसँग सुते। त्‍यसपछि अमनोनले तिनलाई अत्‍यन्‍त घृणा गर्न लागे। अमनोनको अघिको प्रेमभन्‍दा अहिलेको घृणा धेरै थियो। अमनोनले तिनलाई भने, “उठेर गइहाल्‌।” तिनले जवाफ दिएर भनिन्, “अँहँ, मलाई यसरी निकाल्‍नु त साह्रै दुष्‍ट कुरा हो। तपाईंले मसित गर्नुभएको कामभन्‍दा यो झन्‌ असहाय छ।” उनले तिनको कुरा सुन्‍दैसुनेनन्, र आफ्‍नो चाकरी गर्ने केटालाई बोलाएर भने, “यस आइमाईलाई निकालिदे। यसलाई बाहिर निकालेर ढोकामा आग्‍लो लगाइदे।” चाकरी गर्ने त्‍यस ठिटाले तिनलाई बाहिर निकालिदियो, र ढोकामा आग्‍लो लगाइदियो। तामारले विवाह नगरेकी राजकुमारीले लाउने लामो बाहुला भएको लुगा लगाएकी थिइन्‌। तामारले आफ्‍नो कपालमा खरानी हालिन्, आफूले लगाएको लामो बाहुलाको लुगा च्‍यातिन्, र कपालमा हात राख्‍दै रुँदैगइन्‌। तिनका दाजु अब्‍शालोमले तिनलाई सोधे, “के तेरा दाजु अमनोन तँसित थिए? अब चूप लागी बस्‌। उनी तेरा दाजु हुन्, यस विषयमा साह्रै चिन्‍ता नगर्‌।” अनि तामार आफ्‍ना दाजु अब्‍शालोमको घरमा एक त्‍यागिएकी स्‍त्रीझैँ बसिन्‌।

२ शमूएल 13:1-20 पवित्र बाइबल (NERV)

दाऊदका अब्शालोम नामका एका छोरा थिए। अब्शालोमकी सानी बहिनी तामार नामकी थिई। तामार असाध्यै राम्री थिई। दाऊदका अर्का एकजना अम्मोन नाउँ गरेको छोरा थियो जसले तामारसँग प्रेम गरेको थियो। तामार कुमारी थिई। अम्नोनले उसको कन्यापन भ्रष्ट पार्न सक्छ भन्ने सोचेका थिएनन्। तरै पनि अम्नोनले उनलाई साह्रै चाहान्थ्यो। अम्नोनले उनलाई सधैँ सम्झिरहने भएकोले आफैं बिरामी भयो। अम्नोनका एउटा मित्रको नाउँ योनादाब थियो जो शिमीका छोरा थिए। (शिमी दाऊदका दाजु थिए।) योनादाब साह्रै चलाख थिए। योनादाबले अम्मोनलाई सोधे, “प्रत्येक दिन तिमी दुब्लाउँदै गइरहेका छौ। तिमी त राजकुमार हौ। खान लाउनुको कुनै अभाव छैन, तरै पनि दुब्लाउँदै छौ? मलाई भन त! किन?” अम्नोनले योनादाबलाई भने, “म तामारलाई प्रेम गर्छु। जो अब्शालोमकी बहिनी हुन् तर म तिमीहरूको सौतेलो भाइ हुँ।” योनादाबले अम्नोनलाई भने, “ओछ्यानमा सुत र बिमारीले गरे झैं गर। त्यसपछि तिम्रा पिताजी तिमीलाई हेर्न आउनुहुन्छ। उहाँलाई भन, ‘दया गरी मेरी बहिनी तामारलाई आउन दिएर मलाई खाना खुवाउनु भन्नुहोस्। मेरै अगाडि खाना तयार गर्न लगाउनु होस्। म त्यो हेर्नेछु र उनकै हातले खाना खानेछु।’” त्यसरी अम्नोन ओछ्यानमा लडेर बिमारीले जस्तै गर्न थाले। राजा दाऊद उसका छोरालाई हेर्न आए। अम्नोनले दाऊदलाई भने, “दया गरी तामार बहिनीलाई मेरो कोठा भित्र आउन अनुमति दिनुहोस्। दया गरी भनिदिनु होस् मेरो अघिल्तिर दुइवटा रोटी बनाइदिनुहोस्। त्यसपछि म तिनकै हातबाट खान्छु।” दाऊदले तामारको घरमा दूतहरू पठाए। दूतहरूले तामारलाई भने, “तिम्रा दाइ अम्नोनका घर गएर खाना बनाइदिनु अरे।” यसकारण तामार अम्नोनको घर गइन्। अम्नोन ओछ्यानमा लडिरहेका थिए। तामारले मुछेको आँटा हातमा लिएर थिच्दै रोटी पकाइदिइन्। अम्नोनले हेर्दा हेर्दै तिनीले रोटी बनाइन्। त्यसपछि तावाबाट रोटी निकालेर अम्नोनलाई भाग लगाइदिन्। तर अम्नोनले खान मानेनन्। अम्नोनले आफ्ना नोकरहरूलाई बाहिर जानु भने, यसैले सबै बाहिर गए। तब अम्नोनले तामारलाई भन्छन्, “सुत्ने कोठामा खाना ल्याएर मलाई आफ्नै हातले खुवाइदेऊ।” त्यसरी तामारले आफूले बनाएको रोटी लिएर दाइको सुत्नेकोठामा गइन्। उनले अम्नोनलाई खुवाउन मात्र थालेकी थिइन्, तर अम्नोनले उनको हात समाते। तिनले उनलाई भने, “बहिनी, आऊ मसँग सुत।” तामारले अम्नोनलाई भनिन्, “होइन, दाजू! मलाई जबरजस्ती नगर्नुहोस्। यस्तो लाजमर्दो काम नगर्नुहोस्। यस्तो भयानक कार्य इस्राएलमा कहिले हुनैसक्दैन। यस्तो लाजमर्दो अवस्थाबाट म कहिले पनि मुक्ति पाउने छैन। मानिसहरूले सोच्नेछन् तपाईं एउटा साधारण दुष्ट जस्तैं बन्नु भयो। दया गरी राजासँग भन्नुहोस्। उहाँले हामी दुवैलाई विवाह गर्न दिनुहुनेछ।” तर अम्नोन तामारका कुरा सुन्न पटक्कै राजी भएनन्। तिनी तामार भन्दा बलिया थिए। उसले शारीरिक सम्बन्ध राख्न जबरजस्ती गरे। त्यसपछि अम्नोनले तामारलाई घृणा गर्न थाले। पहिले जति माया गर्थे त्योभन्दा ज्यादा घृणा गर्नथाले। अम्नोनले तामारलाई भने, “उठेर यहाँबाट गइहाल।” तामारले अम्नोनलाई भनिन्, “होइन! यसरी मलाई ननिकाल। तिमीले मलाई केही क्षण अघि जे गर्यौ त्योभन्दा खराब भएर जानेछ।” तर अम्नोनले तामारका कुरा पटक्कै सुनेनन्। अम्नोनले आफ्ना नोकरहरू बोलाए र भने, “अहिले नै यस केटीलाई कोठाबाट निकाल! त्यसपछि दैलो बन्द गर।” अम्नोनका नोकरले तामारलाई निकालेर दैलो बन्द गरिदिए। तामारले कन्यकेटीहरूले राजदरवारमा लगाउने लुगा जस्तो लामो बाहुला भएको रङ्गी-बिरङ्गी लुगा लगाएकी थिईन्। तामारले लगाएका विभिन्न रंगको लुगा च्यातेर टाउकोभरि खरानी दलिन्। अनि टाउकोमा हात राखेर रून थालिन। तब, तामारका दाजू अब्शालोमले तिनलाई भने, “के तेरो ठूलो दाजू अम्नोन तँसित थिए? उसले तँलाईं चोट पुर्यायो? अब, शान्त हो बहिनी। अम्नोन तेरै दाज्यू हो। अब यी कुरा तेरो हृदयमा नली।” त्यसपछि तामार चुप लागिन्। तिनी अपमानित स्त्री भई अब्शालोमको घरमा बसिन्।

२ शमूएल 13:1-20 सरल नेपाली पवित्र बाइबल (सरल नेपाली)

दाऊदको छोरा अब्‍शालोमकी तामार नाम गरेकी एउटी सुन्‍दरी विवाह नभएकी बहिनी थिई। दाऊदको अर्को एउटा छोरो अमनोन तिनीसित प्रेममा फस्यो। अमनोन तामारको प्रेमले गर्दा रोगाउन थाल्यो किनभने उसले केटीलाई पाउन असम्‍भवजस्‍तो देखिन्‍थ्‍यो। कन्‍ये केटी हुनाले त्यसलाई पुरुषहरूसित भेट गर्न दिँइदैनथ्‍यो। तर उसको योनादाब नाम गरेको अत्‍यन्‍त चतुर मित्र थियो। दाऊदका दाजु शिमाहका छोरा योनादाब थिए। योनादाबले अमनोनलाई भने, “तिमी राजाका छोरा हौ र पनि म तिमीलाई सधैँ उदास देख्‍छु। किन, के भयो?” उनले जवाफ दिए, “म मेरो सौतेलो दाजु अब्‍शालोमकी बहिनी तामारलाई प्रेम गर्दछु।” योनादाबले भने, “बिरामी छु भनी बहाना गरेर ओछ्यानमा सुत। तिमीलाई हेर्न तिम्रा बुबा आउँदा तिनलाई यसो भन, ‘मेरी बहिनी तामारलाई आएर मलाई खुवाउनलाई दिनुहोस्। त्‍यसले मेरो सामुन्‍ने खाना तयार गरेर मलाई पस्‍किदिएको म खान चाहन्‍छु।” यसरी बिरामी भएको बहाना गरेर अमनोन ओछ्यानमा सुतिरह्‌यो। दाऊद राजा तिनलाई हेर्न गए। अमनोनले राजालाई भने, “हजुर, कृपा गरी मेरी बहिनी तामारलाई यहाँ आई मेरो सामुन्‍ने केही रोटी आफ्‍नै हातले पकाएर मलाई खुवाउने अनुमति दिनुहोस्।” यसकारण दाऊदले तामारलाई महलमा खबर गरे, “अमनोनको घर गएर त्‍यसको निम्‍ति खाना पकाइदे।” त्‍यहाँ गएर तिनले अमनोनलाई ओछ्यानमा सुतेको देखिन्। केही पिठो मुछेर तिनको सामुन्‍ने तामारले रोटी पकाइन् र तिनले ताईबाट रोटी निकालिन् तर अमनोनले खाएन। उसले भन्यो, “सबैलाई जान लगाऊ,” र तिनीहरू सबै बिदा भए। तब उसले तामारलाई भन्यो, “रोटी मकहाँ ओछ्यानमा नै ल्‍याऊ र आफ्‍नै हातले मलाई खुवाऊ।” रोटी लिएर तिनी अमनोनछेउ गइन्। उनले रोटी अमनोनलाई दिइन्; तर उसले तिनको हात समातेर भन्यो, “आऊ, ओछ्यानमा सुत।” तिनले भनिन्, “अँहँ, हुँदैन। मलाई यस्‍तो निच काम गर्न जबरजस्‍ती नगर्नुहोस्। यो डरलाग्‍दो कुरा हो! त्‍यसपछि कसरी मैले मानिसको अघि आफ्‍नो शिर उठाउन सक्‍छु? र तपाईंको नि? सारा इस्राएलमा तपाईंको बदनाम हुनेछ। राजासँग कुरा गर्नुहोस् र निश्‍चय उहाँले मलाई तपाईंको निम्‍ति दिनुहुनेछ।” तर उसले तिनको कुरा सुनेन अनि आफू तामारभन्दा बलियो भएकोले जबरजस्‍तीसित उसले तामारलाई काबुमा लिएर तिनलाई बलात्‍कार गर्‍यो। त्‍यसपछि अमनोनलाई तामारप्रति ठूलो घृणा भयो। अघिको प्रेमभन्दा अहिलेको घृणा अझ धेरै भयो। उसले तामारलाई भन्यो, “निस्‍केर जा।” तिनले उत्तर दिइन्, “अँहँ, हुँदैन। मलाई यसरी लखेटी पठाउनु तपाईंले मसित अहिले गरेको कुकर्मभन्दा अझ ठूलो अपराध हो!” तर अमनोनले तिनको कुरा सुनेन। उसले आफ्‍नो चाकरलाई बोलाएर भन्यो, “यस आइमाईलाई मेरो सामुन्‍नेबाट हटा! त्‍यसलाई धकेलेर बाहिर निकालिदे र ढोकामा आग्‍लो लगा!” चाकरले तिनलाई घरबाट निकालेर ढोका बन्‍द गरिदियो। तामारले कन्‍ये-राजकुमारीले लाउने त्‍यस बेलाको पूरा बाहुला भएको लबेदा लाएकी थिइन्। तिनले आफ्‍नो कपालमा खरानी हालिन्, आफ्‍नो लबेदा च्‍यातिन् र हातले मुख छोपेर रुँदै गइन्। तिनका दाजु अब्‍शालोमले तिनलाई देखेर सोधे, “के अमनोनले तँलाई बलात्‍कार गर्‍यो? बहिनी, साह्रै विचलित नहोओ। त्‍यो तेरो सौतेलो दाजु हो र यो कुरा कसैलाई नभन्।” तामार अब्‍शालोमको घरमा बस्‍न लागिन्, तिनी एक्लै र उदास थिइन्।