MATYOO 6

Rìfa ɗi ɓum ɓɛ nyìighnyìg com

1Konaaghna lɛ, kìsay ki ɓi kìki Bɛ̀ll kɛ̀ kɛɛ̀ ɓa yɛ̀ɛ ɓi rèeresɛ̀n ɓi mis mɛ ɓum, di ɓì ɓiì ki mɛ̀mi mɛlèɓ yɛ̀ɛ Seŋi wìn anɛ à rì aɗyòò.

2Cààmɛ̀n ki u fafa ŋwaà nyìighnyìg com, kɔ̀ɔ ɓog ǹkeŋ lɛ ɓum ɓɛɛ ghɛǹ wɔ̀, fɛlɛ yɛ̀ɛ ɓum ɓɛ fyɛɛ̀fyɛɛ̀ ɓi ŋwɔm, ìghèy ɓi ɗùm ɓɛ ti ɓɛ kilàg, ɓi naa yi bɔ̀ŋzɛ̀n, rì ɓi ɓìɓàà lɛ ɓɛɛ sɛsɛg ɓɔ. Ǹkalii mìni ɓi saaɗ lɛ, mɛ̀lèɓ maa mɛɛ ri lɔ̀ɔ̀. 3Wɔ̀lɛ, cààmɛ̀n ki u fafa ŋwaà nyìighnyìg com, càg kɔɔ ki kimɛŋ ki ghɛɛ̀sɛɛ ɓi ki yiì com ki càg ki weèlem ki faa; 4fɔlɔɔ nnɛ rìfa ɗyɔɔ ɗi ɓiì ɓaà a rìnyam; nni Seŋi wɔ̀ɔ̀ ànɛ à ti à ghɛngì ɓìɓan ɓi a rìnyam, à rì wɔ̀ ɓiì lèɓi.

Kìɓan ki bɔ̀ŋzɛ̀n

(Lk. 11:2-4)

5Cààmɛ̀n ki ɓi kìki bɔ̀ŋzɛ̀n, kɛ̀ ɓi ki yɛ̀ɛ ɓum ɓɛ fyɛɛ̀fyɛɛ̀ ɓi ŋwɔm ìghèy ɓi ɗùm ɓɛ ɓɛ ti ɓɛ keesàg rìɓɔŋzàg ɗi Bɛ̀ll mɛ̀rɛy, ɓi naa yi bɔ̀ŋzɛ̀n, rì ɓi bèn yi ɓiɓàà lɛ ɓum ɓɛɛ seèsee ɓɔ. Ǹkalii mìni ɓi saaɗ lɛ; ɓɛ ti rì mɛ̀lèɓ maa yɛɛ lɔ̀ɔ̀. 6Wɔ̀lɛ i ù ti ɓiì ɓɔ̀ŋzaagh Bɛ̀ll, ɗiŋi ɓi kìden kɔɔ ki naa, u sim̀ ìsuunaa, di u ɓɔŋzag Seŋi wɔ̀ɔ̀ anɛ àrì ɓi jàŋ inɛ a rìnyam ìnɛ̀n, fɔlɔɔ nnɛ Tààta wɔ̀ɔ̀ anɛ à ti à ghɛngì ɓìɓan ɓi a rìnyam à rì wɔ̀ ɓiì lèɓi.

7I ɓi ɓɔ̀ɔɓɔŋzàg Bɛ̀ll, kɛ̀ ɓi ràŋzi ki kpaakpàà jɛ̀ɛ̀ yi kɛ̀ɛ̀ ìsu yɛ̀ɛ ɓumɓɛ ɓɛ yii ɓi Bɛ̀ll ɓɛ ti ɓɛ kilàg. Lɛ ɓɔɔ̀ fèki lɛ, i ɓɛ ciɓtaagh rìkpaakpàà, fɔlɔɔ nnɛ Bɛ̀ll à ɓàg bɔ̀ŋzɛ̀n yàà. 8Kɛ̀ ɓi pisɛn ɓɔ ɓi kìsyɔ̀ɔ̀ kiǹ, ɓisuulɛ Seŋi wìn a yii com kìcèm ki ɓi kɔ̀nkɔ̀n, di ɓì ka tɔg gi ɓi nyi kɔ.

9Ɓì ghɛ̀ɛ̀sɛɛ kì ɓɔ̀ŋzaagh Bɛ̀ll fɛlɛ:

Tààta wìs ànɛ à rì aɗyoo

10ɗii ɗyɔɔ ɗyɛɛ ɓa kìcèlì,

rìlàmì ɗyɔɔ ɗyɛɛ yu,

rìkɔ̀n ɗyɔɔ ɗyɛɛ kilɛn ɓi ziinɛ, yɛ̀ɛ ɗyɛɛ̀ kìikilɛ̀n aɗyòò.

11Faa ɓìsi ɓìɗilàg ɓi ɓi ghɛɛ̀sɛɛ rì ɓìsi ɓi ŋwos a gɛɛ̀nɛ.

12Cenɛn ɓìsi ɓìɓan ɓi ɓeɓɛn ɓi tì mɛ kì, fɛlɛ yɛ̀ɛ ɓìsi girig tì mɛ cenɛn ɓɛ̀roɓɛ ɓɛ kighà ɓìsi kìɓe.

13Kɔ̀ɔ gherɛn lɛ, ti kpi ɓi mɛ̀fèèghrɛn ɓi ɗùm, lɔŋ pisi ɓìsi ɓi kìɓe, lɛ rìlàmì, rì ìtèɗ, rì rìkem ɓi ri ɓyom ɓyɔɔ fiɗyàɓ fikɔ̀ɔ̀. Ààmɛ̀n

14Lɛ i ɓì cenɛɛ ɓum ɓìɓan ɓi ɓeɓtɛn ɓi ɓɛ kii mìni Seŋi wìn anɛ aɗyoo à cenɛ̀n girig mìni; 15kìɓan kifog, ì ɓì cenɛɛ ɓi ɓum kìɓe ki ɓɛ kii mìni. Seŋi wìn àa cenɛn ɓi mini, girig ɓìɓe ɓin.

16Cààmɛ̀n ki ɓì rì ɓi kìcèlì ki ɓiɗilàg kɛ̀ ɓi ɓa yɛ̀ɛ ɓi wowog bim, yɛ̀ɛ ɓum ɓɛ fyɛɛ̀fyɛɛ̀ ɓi ŋwɔm ìghèy ɓi ɗùm, ɓɛɛ ti ɓɛ kagàg mɛ̀su lɛ ɓum ɓɛɛ yi lɛ, ɓɛ ri ɓi kìcèlì ki ɓiɗilàg. Ǹkalii mìni ɓi saaɗ lɛ, ɓɛ ti rì mɛ̀lèɓ maa. 17Kìɓan kifog, cààmɛ̀n ki ù cèlii ɓìɗilàg, foŋɗɛn tìrààree ɓi ǹto, ù ki sòò ìsu wɔɔ 18fɔlɔɔ nnɛ wàa rèsi ɓi ɓum lɛ ù rì ɓi kìcèlì ki ɓiɗilàg, lɔŋ Soŋi ànɛ à rì a rìnyam cɛ̀ncii yɛɛ ri ɓiì ghɛɛ̀. Nni Soŋi ànɛ à ti à ghɛngì ɓìɓan ɓi a rìnyam à rì wɔ̀ ɓiì lèɓi rikì ɗiǹ.

Kɔɔ̀kɔɔ̀ à ìkum

(Lk. 12:33-34)

19Kɛ̀ ɓi saasaɓtàg ìkum win fɛ ɓi ziinɛ jàŋ inɛ Zyèɗ rì geègee ɓi ti ɓi yogsàg wɔ, nsoò lɛ jàŋ inɛ ɓɛ̀wiiwìì ɓɛ ti ɓɛ ɓɛkì naa, ɓɛ yii wɔ. 20Wɔ̀lɛ saɓtaaghna ìkum win ɓi ɗyoo ɓi ɗùm lɛ wɔɔ nnɛ Zyèɗ rì geègee ɓi yin lɛ ɓi yogsì wɔ, nsoò ɓɛ̀wiiwìì ɓɛ yin lɛ ɓɛ ɓɛg jàŋ wɔɔ lɛ ɓɛɛ yiì wɔ. 21Ɓisuulɛ, jàŋ inɛ ìkum wɔɔ wu ri wɔɔ nnɛ ǹɗem wɔɔ wu ri ɓiì ɓaà girig.

22Ɗis ɗyɛɛ ri lamɓà ànɛ ɓi nyoo ì mum; i ɗis ɗyɔɔ ɗi ri lɛ syeesyee, nyoo yɔ̀ɔ̀ bimiɗ ì ɓa lɛ kperèèŋ; 23kìɓan kifog i ɗis ɗyɔɔ ɗi yin lɛ syeesyee, nyoo yɔ̀ɔ̀ bimiɗ ì ɓiì ɓaà ɓi birìm. Nni i kìtɛɛtɛn ki ki ri ɓi wɔ ki ti birìm, birìm ìnɛn ì rì ɓiì tèghɛɛ ì cee.

Kɛ̀ ɓi ghɛ̀ri mɛrem aɗyoo

(Lk. 12:22-31)

24Mum à yin lɛ à say ɓɛ̀masà ɓɛɓɛɛ̀ ɓisuulɛ, à rì ɓiì ɓèèzɛɛ bog, à keesì roàmbog; nsoò lɛ à ràrɛ̀n rì bogtɛ̀n, à sɛɛtì roàmbog. Ɓì yin lɛ ɓì say lɛ rì Bɛ̀ll rì mɔ̀ɔ̀ni cààmɛ̀n kìfog.

25Kìɓan kiǹ kɛɛ̀ki ǹkpaa mìni lɛ: mɛ̀rem min mɛ̀ kɛɛ̀ cɛɛcɛɛ̀rɛ̀n ɓi kìɓan ki ɓiɗilàg ɓi ɓyɛɛ̀ mɛmɛni ɓyɛɓ ɓin nsoò lɛ ɓisuu ɓilàà ɓi ɓyɛɛ lɔg nyoo yìn; mɛ̀ɛ nti cɛɓ ki cee ɓìɗilàg, nyoo ì cee ɓìlàà yèè? 26Ghɛɛna ɓà tììlì ti aɗyoo ti ti ri lɛ, tyɛ̀ kɛɛ̀ say dɛm, tyɛ̀ kɛɛ̀ saŋ ɓiɗilàg, tyɛ̀ kɛɛ̀ ki nyam com rì com ɓi zarò, wɔ̀lɛ Seŋi wìn anɛ à rì aɗyoo à ti à falàg tyɔ ɓìɗilàg. Ɓì yii ɓì nya lɛ rìɓa ɗin ɗi cee ɗi tììlì tiǹ lɛ vɔ̀ɔ̀m? 27Ghɛn anɛ ɓi mìni yɛɛ ri lɛ à ràɓsì cɛɓ kii nsoò lɛsàg, lɛ yɛ̀ɛ à ɓiisɛɛ kì ghɛ̀ghɛrii nɗem aɗyoo?

28Nni mɛ̀rem min mɛɛ̀ cɛɛcɛɛ̀rɛ̀n ɓi ɗùm rì kìɓan ki nwaà lɛ cɛ? Fiɓiina yɛ̀ɛ ɓyaaɓi ɓi ɓi dɛm ɓi ti ɓi tɔɓkì, ɓyaaɓi ɓi ti ɓyɛ̀ kɛɛ̀ say, ɓyɛ̀ kɛɛ̀ ki tìŋ ɓìlàà; 29kìɓan kifog, ǹkalii mìni lɛ, nsoò Salomɔŋ nyimiɗ ɓi rìkem ɗii ɗicèm, à waatɛ̀ngà ɓi ɓilàà ɓi rɔɔtɛn yɛ̀ɛ kìbog ki ɓi ɓyaaɓi ɓiǹ. 30I Bɛ̀ll à ti à rɛ̀gì ɓyaaɓi ɓi ɓi dɛm fɔlɔɔ, ɓyaaɓi ɓi ɓi ri lɛ, gɛɛ̀nɛ ɓi ɓa wɔɔ, rìduri ɓɛ pig ɓyɔ ɓi ɗuu, lannɛ à ɓiì rɔ̀ɓi lɛ à waasii ɓi mini ɓìlàà, mìni ɓumɓɛ maa rìgherɛ̀n lɛsàg ɓɛ? 31Kɛ̀ ɓi ghɛ̀ghɛri min mɛrem aɗyoo di ɓi kpaakpaa lɛ: Tì rì ɓiì ɗiì cɛ, tì nɔ cɛ, nsoò lɛ, cɛ tì rì ɓà ɓiì waatɛɛ yɔ? 32Ɓyom ɓìn, ɓumɓɛ ɓɛ yii bi Bɛ̀ll ɓɛɛ ti ɓɛ raŋzàg ɓyɔ kì kaakaa, wɔ̀lɛ Seŋi wìn anɛ à rì aɗyoo à yii lɛ ɓì ghɛ̀ɛ̀sɛɛ kì ɓaà rì ɓyɔ. 33Looghna kì kaà kìlɔ̀ŋ kii rì saaɗ wìì, fɔɔnnɛ ɓyom ɓìn ɓìcèm ɓi ri mìni ɓiì sagtɛɛ. 34Fɔɔnnɛ kɛ̀ ɓi ghɛ̀ri ǹɗem aɗyoo rì rìduri, lɛ rìduri a ɓiì yùu ri ɓìɓan ɓii; ŋ̀wos bimiɗ à ghɛ̀ɛ̀sɛɛ rì ntɔɓ wìì.

अहिले सेलेक्ट गरिएको:

MATYOO 6: BAFNT

हाइलाइट

शेयर गर्नुहोस्

कपी गर्नुहोस्