MATYOO 11

Ɓumɓɛ Zyaŋ Bàɓtis à romgà yɛ̀ɛ Yeesus

(Lk. 7:18-35)

1Yɛ̀ɛ Yeesus à lègsìghà kì siitaagh ɓɛyilàg ɓii ǹtɛ̀ɗ rì ɓɛɓɛɛ̀ ɓìɓan ɓi à ghɛ̀ɛ̀sɛ̀ngà ɓɔ kì siitaagh nni à pɛ̀sɛ̀ngà ɓi jàŋ inɛ̀n, à kɛ̀n kì rèsaagh ɓum, à ki kakali Syeesyee à Ɓɔlɛ ɓi bàn yi wɔɔ.

2Wɔ̀lɛ yɛ̀ɛ Zyaŋ Bàɓtis à ɓaghà ɓi naà-zày, à wokà di ɓɛɛ̀ kakali ɓiɓan ɓi Kiris à kìkìghà, nni à romgà ɓɛ̀yilàg ɓii lɛ ɓɛɛ kɛǹ nyi kì tɔɔ̀gh lɛ: 3Wɔ̀ yɛɛ ri nya roànɛ ɓìsii yii lɛ à ɓiì yùu giǹ, tì ghɛ̀ɛ̀sɛɛ tì kì ɓoŋɓoŋi adɛŋ? 4Yeesus à ɓàg ɓɔ lɛ: Kɛ̀ɛna kì kpaà Zyaŋ ɓìɓan ɓi ɓi kìi lɛ, ɓì wog ɓì ki ghɛn. 5Ɓyɛɛ ri lɛ, ɓɛ̀ɗyaŋɗyàŋ ɓɛ ghɛɛ̀ghɛ̀nɛ̀n, ɓɛ̀lɛnlɛm ɓɛ̀ kɛɛ̀kɛ̀ɛ̀ lɛ syeesyee, ɓɛ̀kukwiy ɓɛ pɛɛ̀zɛ̀n kìɓaà lɛ syeesyee ɓi nyoo yàà, ɓɛ̀lɔlɔg ɓɛ woòghwòòghrɛ̀n, ɓìloŋ ɓi gheèghèmɓɛ̀n, Syeesyee à Ɓɔlɛ à ki kaakalɛ̀n a ɓumɓɛ ɓɛ ri nyìighnyìg. 6Mààgh rì ŋwaànɛ àa kɛ̀ɓtɛn ɓi fiɓàg ɓisu wɛ̀m.

7Yɛ̀ɛ ɓumɓɛ Zyaŋ Bàɓtis à romgày ɓɛǹ ɓɛ kɛngà, Yeesus à tumɛ̀n rìtɔtɔ̀g ɗi ɓum mɛ̀tɔɔ̀tɔɔgh ɓi kìɓan ki Zyaŋ, nwèe: Cɛ kɛɛ̀ki ɓì kɛ̀ngà kì fifiɓii ɓi-reɓ? Kìsyòŋ ki bɛ̀ɓ yɛ̀ɛ nyɛ̀ɛnyɛŋzì gìn? 8Nni cɛ kɛɛ̀ki ɓì kɛ̀ngà min ki ghɛɛ̀? Ŋwaànɛ à waatàkà ɓyoo ɓilàà giǹ? Wɔ̀lɛ ɓumɓɛ ɓɛ ti ɓɛ waatàg ɓìlàà ɓi syeesyee, ɓɛ ti ɓɛ kɔràg ɓi mɛɛ mɛ mɛfòm. 9Nni cɛ ɓì kɛ̀ngà min ki kìi? Ɓì kɛ̀ngà kì ghɛɛ̀ ǹkpaŋzì-ɓìɓan? Ɛ̀ɛ̀, ǹkalii mìni lɛ: Ŋwaàncèm à cee gì rìɓa ɗi ǹkpaŋzì-ɓìɓan. 10Lɛ nnyɛɛ rì roànɛ ɓɛ kangà kìɓan kii lɛ:

Mum wɛm̀ à fìtom innɛ ǹɗomi wɔ̀ lɛ beèbɛ̀y, lɛ a log wɔ̀ kì pegsɛɛ bee.

11Ǹkalii mìni ɓi saaɗ lɛ, ɓi ɓum ɓɛ̀cèm ɓɛ ɓɛ yalɛ̀ngà ɓi ɗùm ɗi giɓ, ŋwaànɛ à cee Zyaŋ Bàɓtis à ka ɓaghà ɓi. Wɔ̀lɛ ŋwaànɛ à ɓiisɛɛ kì ɓaà lɛsàg ɓi kìlɔ̀ŋ ki aɗyoo, à cee nyi. 12À tumɛ̀n ɓi mɛ̀ru mɛ Zyaŋ Bàɓtis à kpaŋ ɓigomìnɛ ɓum ɓɛɛ̀ rùurunɛ̀n kìlɔ̀ŋ ki aɗyoo nni ɓɛ̀tèteɗ ɓɛɛ ni ràgɛn ɗi kɔ. 13Ɓɛ̀kpaŋzì-ɓìɓan ɓɛ̀cèm rì ɓìdɔ̀gsɛna ɓi Moyis ɓɛ kalìghà kìɓan ki ki seesee kìlɔ̀ŋ ki Bɛ̀ll à kpaŋ ɓi cààmɛ̀n ki Zyaŋ à yùghà. 14I ɓì rì lɛ ɓi wog rìkpaa ɗyɛ̀m, Zyaŋ ànɛ̀n yɛɛ ri Eli ànɛ ɓɛ kpaaghà lɛ à ghɛ̀ɛ̀sɛɛ kì yùtii. 15Ŋwaànɛ à rì rì mɛ̀reè, à wog.

16Ǹɗì lɛ ǹfèg ɓà ɓumɓɛ ɓi mɛ̀ru mɛ ɗì rìkuu ɗi mum a ɗi? Ɓɛ ri fɛlɛ yɛ̀ɛ ɓɔɓti ɓɛ ɓɛ kɔkɔrii ɓi ǹlɛmɓog, ɓɛ rerèŋì ɓɛ̀geni ɓaa di ɓɛɛ kpaakpaa lɛ:

17Tì mɛ kì lɛ, tì kɛɛ̀gh mìni mɛ̀ɓàlì rì zàro, kɛ̀ ɓi ɗyen, tì ki kɛɛgh mini tyem ti riwù, kɛ̀ ɓi rèn. 18Lɛ yɛ̀ɛ Zyaŋ à yùghà, à kì lɛ; kɛ̀ɛ ɗi ɓiɗilàg, kɛ̀ɛ ki nɔ mɛrɔ̀g nnyaa ànɛn à rì rì kìɓeɓtàg ki nghay. 19Man à Mum à yù, à kìkì lɛ, à ɗiɗì ɓìɗilàg, à ki nɔnɔ mɛrɔ̀g, nnyaa ànɛn à rì lɛ, ànɛ̀n ǹɗiì-com, ànɛn ǹnɔɔ̀-mɛ̀rɔ̀g, à ki ɓa ti righan ɗi ɓɛ̀terì-làmpoŋ̀, rì ɓɛ̀kìì-kìɓe. Kìɓan kifog ɗyomzɛ̀n ɗi Bɛ̀ll ɗi ti ɗi ghɛnàg lɛ ɗi ri lɛ saaɗ ɓi ɓìɓan ɓi ɗi kiì.

Kìɓan ki bàn yi yi ɓengà kì gherɛɛ Yeesus

(Lk. 10:13-15)

20Nni Yeesus à tumɛ̀ngà rìfwààdɛ̀n ɗi bàn yi à kìghà dàm wɔɔ lɛɛ̀gwey, ɓisuulɛ ɓumɓɛ wɔɔ ɓɛ kɔngà ɓi lɛ, ɓɛɛ lɔɔ̀ghrɛn mɛ̀rem. 21Nyìighnyìg rì wɔ̀ Korazɛŋ, nyìighnyìg rì wɔ̀ Bɛdsayida, ɓisuulɛ, i dàm yi yi kilɛ̀ngà a lɔŋkin yɛɛ kilɛn fɔlɔɔ ɓi bàn yi lɛ, rì Tiir rì Sidɔŋ, di ɓumɓɛ wɔɔ ɓɛ lɔɔ̀ghrɛ̀ngà mɛ̀rem fìɗyàɓ, ɓɛ waatɛ̀n mɛ̀kùtì, ɓɛ Siŋɗɛ̀n kìɓu. 22Kìɓan kiǹ kɛɛ̀ki ǹkpaa mìni lɛ, ŋwosi ɓɛyɔ̀m ɓɛ Bɛ̀ll kìɓan ki, ɓumɓɛ a Tiir rì ɓɛ a Sidɔŋ ki nyɛni gɛ ɓi à kpaŋ yɛ̀ɛ kiŋkìn. 23Nni wɔ̀ Kapɛrinawum, u fèki nya lɛ, ù rì ɓiì ɓɔɔ̀gh aɗyoo? Èe èe, ɓɛ ri lɔŋ wɔ ɓiì sɛɛ̀dii à kpaŋ a nywɛ̀y, lɛ ì dàm yi yi kìlɛ̀ngà a lɔ̀ŋkɔɔ yɛɛ kilɛn fɔlɔɔ à Sɔdɔm di bàn ìnɛn ì kaka lɛ rì ɓɛ̀gɛɛnɛ-ànkan miì. 24Kìɓan kiǹ kɛɛ̀ki ǹkalii wɔ̀ lɛ, ŋwosi ɓɛyɔ̀m ɓɛ Bɛ̀ll, kìɓan ki ɓumɓɛ a Sɔdɔm ki nyɛni gɛ ɓi yɛ̀ɛ ki ɓumɓɛ a lɔ̀ŋkɔɔ.

Bɛ̀ll à rèsìghà ɓìɓan ɓii a ɓoɓti ɓɛsàg

(Lk. 10:21-22)

25Nni ɓi cààmɛ̀n kiǹ, Yeesus à pɛ̀sìghà ɓìtòkì à kpaa lɛ: Tààta, wàànɛ ù lamii lɛ rì ɗyoo rì zi, ǹfaa wɔ̀ ɓìtògsɛ̀n ɓisuulɛ ù nyamgàkà ɓɛ̀yiì-ɓìɓan rì ɓum ɓɛ ɗyomzɛ̀n ɓìɓan ɓi, ù rèsì ɓɔɓti ɓɛsàg ɓyɔ. 26Ɛ̀ɛ̀ Tààta, ǹtògsaagh wɔ̀, lɛ fɔlɔɔ yɛɛ ɓaghà syeesyee wɔ̀ɔ̀ à fèg. 27Seŋi wɛ̀m à faghà mɛ̀ ɓìɓan ɓicèm; ŋwaàdɛŋ à yii ɓi Man i ki yin lɛ Seŋi, ŋwaàdɛŋ kɛɛ ki yi Seŋi i ki yin lɛ Man, ǹsòò lɛ ŋwaànɛ ki kɔni Man lɛ a resi nyi Seŋì. 28Yùuna a lɔ̀ŋkɛm̀, mìni ɓɛ̀sɛ̀ɛ̀ ɓɛ̀cèm ɓɛ, ɓì rì ɓɛ fɔlɛn, mɛ̀tɛ̀g mɛ ki rìriɗ mini, ǹfa mìni rìfɔɔsɛ̀n. 29Foŋɗɛɛna ɓi kìɓèg kɛm̀, ɓì nɔ̀ɔ̀tì ɓìɓan ɓi nɗèrèsì, ɓisuulɛ, nɗem wɛ̀m wuri lɛ fyòoog, wu ki ɓa ti wu sɛɛ̀dɛn ɓi zi, fɔɔnnɛ mɛ̀ghay min mɛ̀ ri ɓiì ghɛɛ̀ rìfɔɔsɛ̀n. 30Lɛ kìɓèg kɛm̀ ki yeesɛɛ bi, ǹtɛ̀g wɛm̀ wɛ̀ kɛɛ̀ ki rìɗ.

अहिले सेलेक्ट गरिएको:

MATYOO 11: BAFNT

हाइलाइट

शेयर गर्नुहोस्

कपी गर्नुहोस्