Luke 24

Jesus Come Back Alive

(Matthew 28:1-10; Mark 16:1-8; John 20:1-10)

1Sunday, da firs day in da week, befo da sun come up, da wahines bring da spices dey wen make ready, an go by da tomb. 2Dey see da big stone Jesus frenz wen use fo close da tomb. But da stone stay on da side now. 3Dey go inside da tomb, but Da One In Charge, Jesus, his body no moa! 4Dey no can figga dat. Right den an dea two guys stan dea by dem. Da guys clotheses stay shine. 5Da wahines stay real sked. Dey go down on dea knees, an ony look da groun. Da two guys tell um, “How come you wahines stay look fo da guy dat stay alive, ova hea aroun da mahke guys? 6#Matt 16:21; 17:22-23; 20:18-19; Mark 8:31; 9:31; 10:33-34; Luke 9:22; 18:31-33Jesus not hea; he wen come back alive! No foget, he wen tell you guys dis wen he still stay wit you guys Galilee side. 7He tell, ‘I Da Fo Real Kine Guy. Dey gotta turn me ova to da bad guys. An dey goin kill me on top one cross. But day numba three, I goin come back alive!’ ”

8Den da wahines rememba wat Jesus wen tell. 9So dey come back from da tomb, an dey tell all dat stuff to Jesus eleven guys an to da odda peopo. 10Mary da Magdala wahine, Joanna, James muddah Mary, an da odda wahines dat wen go wit dem, dey tell all dis stuff to da guys dat Jesus was goin sen all ova da place. 11But dem guys, dey neva tink az fo real kine wat da wahines tell, cuz soun jalike dey wen make um up. 12But Peter stan up an run to da tomb. He bend down, an see ony da grave cloths dea. Den he go way, an he no can figga bout wat wen happen.

Two Guys Go Emmaus Town

(Mark 16:12-13)

13Dat same day had two a Jesus guys wen go one small town Emmaus, bout seven mile from Jerusalem. 14Dey stay talk bout all da stuff dat wen happen. 15So dey talking lidat, an you know wat? Jesus come, an walk wit dem. 16But he neva let um know who him. 17He go aks um, “Wat you guys stay talk bout now wen you walking?”

Dey stan dea, an dey hang dea face. 18One a dem, name Cleopas, tell him, “You mus be da ony guy inside Jerusalem dat donno all da stuff dat jus wen happen ova dea.”

19He tell, “Wat stuff?”

Dey tell, “Da stuff dat dey wen do to Jesus, da guy from Nazaret. He one guy dat talk fo God. Wat he wen tell an do in front God an all da peopo wen show he get powa. 20Da Main Pries guys an oua leada guys wen turn him in fo mahke. Den dey wen kill him on top one cross. 21We wen figga he da guy dat goin cut loose da Israel peopo from da powa da bad kine stuff get ova dem. Dis wen happen day befo yestaday. 22Some wahines dat stay wit us wen blow oua mind, cuz dey wen go by da tomb dis morning, befo da sun come up. 23But dey neva find his body inside dea! Dey wen tell us dat dey wen see someting from God—had angel guys dea, dat tell Jesus come back alive! 24Some a oua guys wen go to da tomb. Eryting stay jalike da wahines tell. But dey neva see Jesus body.”

25Den Jesus tell da two guys, “You guys no tink! You hard head, cuz you guys no trus all da stuff da guys dat wen talk fo God tell! 26Dey tell dat da Spesho Guy God Goin Sen gotta suffa all dis kine stuff, an afta, he goin come real awesome, aah?” 27An den Jesus teach dem eryting da Bible tell bout him from befo time. He start wit da stuff Moses wen write down inside da Rules, an den all da odda guys dat wen talk fo God, wat dey wen write down.

28Den da two guys come nea Emmaus, da small town, an Jesus ack jalike he goin go litto bit mo far. 29But dey tell him, “Stay hea wit us, cuz pau hana, an dark awready.” So he go inside da house, fo stay wit dem. 30He sit down by da table fo eat wit dem. He pick up da bread, an tell God “Mahalo plenny!” an broke um up fo give um to dem. 31Den dey see fo real kine, an know az him. But right den an dea he disappea. 32Den dey tell each odda, “Ho! Oua heart was pounding, all da time he stay talk wit us on top da road, an wen he show us da stuff from da Bible from befo time, aah?”

33Right den an dea dey stan up an go back Jerusalem. Dey find Jesus eleven guys an da odda guys all togedda. 34Da eleven guys tell, “Jesus, Da One In Charge, wen come back alive, fo shua! Simon wen see him!”

35Den da two guys tell um wat wen happen by da road, an dat dey wen know him wen he broke up da bread.

Jesus Show Up Wit Da Guys He Wen Teach

(Matthew 28:16-20; Mark 16:14-18; John 20:19-23; Jesus Guys 1:6-8)

36Wen dey tell Jesus guys dis, ho! Jesus stan dea wit dem! He tell, “No sked. I like you guys stay good inside.”

37But dey sked fo real kine! Dey tink dey seeing one ghost! 38He tell um, “How come you guys all sked? How come you no trus me? 39Look my hands an my feet. Try touch me, an see dat dis me, fo shua! One ghost no mo bones an skin, like you guys see I get.”

40He show dem his hands an feets. 41Dey still no stay shua az fo real kine, cuz dey all hamajang inside. Dey feel real good inside, but same time, dey stay all max out. He tell um, “You guys get someting fo eat?” 42Dey give him one cook fish. 43He take um an eat um in front dem.

44He tell um, “All dis happen jalike I wen tell you guys wen I stay wit you. Eryting Moses wen write inside da Rules, an eryting da odda guys dat wen talk fo God wen write down, an eryting dat get inside da Songs Fo God—all da stuff dat stay from befo time inside da Bible, all dat, talk bout me! An eryting dey wen write, goin happen!”

45Den he help dem undastan da Bible. 46He tell um, “Dis wat dey wen write, ‘Da Christ Guy, da Spesho Guy God Goin Sen, he goin suffa an mahke, an den come back alive on day numba three afta he mahke. 47Afta dat, his guys goin teach all da diffren peopos inside da whole world bout da Christ Guy, da Spesho Guy God Wen Sen. Dey goin tell da peopos dey gotta come sorry fo all da bad kine stuff dey stay do, an no do um no moa. So den, God goin let go da peopos an hemo dea shame fo all da bad kine stuff dey wen do. His guys goin go teach lidat cuz dey his guys an dey get his powa, an dey goin start Jerusalem side.’ 48You guys wen see all dis stuff dat wen happen, an you goin tell da peopo bout um. 49#JGuys 1:4I goin sen you guys wat my Faddah wen promise you. So stay hea inside Jerusalem till you guys get da powa dat come from God in da sky.”

Jesus Go Up Inside Da Sky

(Mark 16:19-20; Jesus Guys 1:9-11)

50 # JGuys 1:9-11 Den Jesus take his guys outside Jerusalem, Betany side. He hold up his hands an tell God fo do good tings fo dem. 51Same time wen Jesus stay tell God fo do good tings fo dem, he start fo go up inside da sky. 52Dey all go down on dea knees fo show Jesus love an respeck. Den dey go back Jerusalem. An dey stay real good inside. 53Dey stay inside da open lanai fo da Temple, praying an telling God how good he stay.

अहिले सेलेक्ट गरिएको:

Luke 24: HPB

हाइलाइट

शेयर गर्नुहोस्

कपी गर्नुहोस्