HAGONEGAHANI 22
22
God ki bonasia o Abarahamo hanana vi vogasia renia o Isako
1I ta na matena i muri me God ki uhungia o Abarahamo. Ngaia ki unia, ki vi: “Abarahamo.” Mo Abarahamo ki arami, ki vi: “Oi.”
2God ki vi: “Gu torea o Isako o karemu, na kare i tage iamu go takuia bâraha, ma ko merâ i Moria. Igê na hungana i ngekana inê kê page usia tangago, ko susu renia igê tangê.”
3Igê na mahogotana i tangi me, o Abarahamo ki papario tanga na vogasiha ma ki naka na ario igê na gerina na tonki ki tora. O Abarahamo ki merarâ o Isako ma na kariana gi rua. Ngaira ka tavoraha tanga na agua i visia God tanga. 4Igê na oruta na tangiana o Abarahamo ki bâsia râ hagatê na agua ga tabea. 5Ngaia ki vi tangarerua na kariana, ki vi: “Muru meoga so na tonki ikê. O kareku menê kamuru tagere ikana ma kamuru rahesia God igê, ma hemuri kamuru kahu aporo me tangagamurua.”
6O Abarahamo ki vi tanga o Isako ki torea na ario tanga na vogasiha, ma ngaia marena ki toregi na tatapa ma na garaputa na gi, hanana i hagatanga na gi renigi. Matena garu arâ, 7o Isako ki tamasi, ki vi: “Mama.” O Abarahamo ki arami, ki vi: “Na ta, o kareku?” O Isako ki hagate, ki vi: “Bâ, na garaputa na gi ma na ario igê. Ma i he na karena sipi tanga na vogasiha?”
8O Abarahamo ki arami, ki vi: “God ma ki girara.” Ma ngairerua karu râ.
9Matena garu ata igê na agua i bani visia God tanga, o Abarahamo ki tagarahia na panga na bea ni vogasiha ma ki raria renigi na ario. Hemuri ngaia ki rakua o karena ma ki hagatâhia akê igê na ario igê na panga na bea ni vogasiha. 10Ma hemuri ngaia ki tavoa na tatapa. Ma na matena i nanê vi ahura renia, 11ma na angero iana na Araha ki ngere me tenia na vavearo, ki vi: “Abarahamo! Abarahamo!” O Abarahamo ki arami, ki vi: “Oi.”
12Na angero ki vi: “Siana! Naka vê o karemu. Hoi, i ngekê inê kê girara, vi igo ko hagahigasiê ma ko tê viteaku, suria igo ko pe manimania o karemu i tage teniê.”
13O Abarahamo ki sira râ ma ki bâsia na sipi mane, i tu na hona igê na kere roborobo igê na agua i masigu. Ngaia ki râ ma ki torea ma ki susu renia urusina o karena. 14O Abarahamo ki hêtana na agua ngekana vi ‘Na Araha ma ki girara’. Tariha me i ngekê na enoni ka vi: “Igê na hungana iana na Araha ngaia ma ki girara.”
15Na angero iana na Araha ki ngere me nikâ tenia na vavearo tanga o Abarahamo, ki vi: 16“Inê nga ka na Araha. Inê kê tohe reniê mareku, vigê haganahunigo renia na ramana, suria go tê viteaku ma ko pe manimania o karemu teniê. 17Tahema inê kê tohe, vigê hagarakonira na raraha iamu, ka rakorako mangagi na higu i vavearo se mangagi na momogani na one i one. Na raraha iamu ka page henahuraugi na hinua iata na merongata. 18Suria igo ko tê viteaku, tahema na enoni hato i maveta ka page avarasiê, kê korokoro tangara nogata manga gê korokoro tangara na raraha iamu.” 19O Abarahamo ki aporo tangarerua na kariana ma ngaira hato ka râ tanga i Bereseba na hinua iana.
Na raraha iana o Nagore
20I ta na matena i muri me o Abarahamo ki rongo, vi ka Milika kaniana o Nagore o vesina ki aparara na kare ge varu. 21O Usu ki na bêbê ni kare iana. Na ruata ka no Busu. Ma hemuri me ka vora o Kemuele vaemana o Arama, 22o Keseti, o Gaso, o Pilitasi, o Jitilapa mo Betuele, 23o vaemana ka Rebeka. Ka Milika ki aparara o karena ge varu ngegê tanga o Nagore o vesina o Abarahamo. 24Ka Reuma, kaniana râ ma o Nagore, ngaia ki apara o Tebaga, o Gagama, o Tagasi mo Maka.
अहिले सेलेक्ट गरिएको:
HAGONEGAHANI 22: KCB
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2011 Bible Society of the South Pacific