Luka 5
5
Jesu mbwaakeeta bashikwiiya bakwe bataanshi
(Mate 4:18-22; Maako 1:16-20)
1Bushiku bumwi Jesu wakalinga kwiimfwi muloombe lwa Lweenge lwa Genesaleti. Bantu baanji bakalinga kushindikana kwaamba ayi banyumfwe maswi akwe Lesa. 2Lyalo Jesu wakabona maato obilo kaangitwe muloombe, beshikucaya nswi kabali baswaamo kabasansha toombe twabo. 3Jesu wakenjila mubwaato bomwi ubo bwakalinga bwakwe Simoni, mpeeke wakamusenga ayi abushindike kwaamba ayi butalamukeeko kuswa muloombe. Mpomunyaawo wakekala mubwaato watalika kwiisha bantu abo.#Mate 13:1-2; Maako 3:9-10; 4:1
4Ndyaakamanisha kwiisha, wakaambila Simoni ayi, “Katiya pakatikati kwaamba ayi muwaale toombe twanu mumaanshi mucate nswi.” 5Simoni wakakumbula ayi, “NoBafundishi, swebo bwatuceta pamaanshi katusuni kucata nswi, sombi maawe akomuubo. Nakubi boobo toombe ntootuwaalaawo mukwiinga ndimwe mwaamba.”#Joni 21:3 6Ono ingayi bacite kweelana ambobakaambilwa, bakacata nswi shiinji cakwaamba ayi toombe katuyanda kupasuka.#Joni 21:6 7Lyalo bakeetabo babyaabo bakalinga mubwaato bumwi ayi bese babacafweeko kusubula. Abalo bakesa mpeeke basubula nswi shilya akususha maato obilo ayo cakuyanda kupila. 8Ndyaakabona boobo, Simoni Pita wakafukama kunembo lyakwe Jesu akwaamba ayi, “Amunshiiye Nkambo, mukwiinga ndimucita shibi!”
9Simoni ababye bakakankamana abuumbi pakufula kwa nswi shilya nshibakacata. 10Jemusi aJoni bana bakwe Sebedi babye Simoni abalo bakakankamana abuumbi. Lyalo Jesu wakaambila Simoni ayi, “Utaloondi mukwiinga bulya kuswa sunu, unanooli shikuleta bantu kuli ndime, bweenka mbowalinga kucata nswi.”
11Mpomunyaawo maato abo bakaakwelela kuloombe lwa lweenge. Kuswawaawo bakashiya shoonse akukonkela Jesu.
Jesu mbwaakashilika musankwa wakalinga kuciswa manata
(Mate 8:1-4; Maako 1:40-45)
12Jesu ndyaakalinga kucili mundabala imwi wakakumana amuntu wakalinga kuciswa manata mubili woonse. Ingayi abone Jesu, wakafukama kunembo lyakwe akumusenga ayi, “Nkambo, na kamusuni inga mwanshilika.”
13Jesu wakafungulula lyaansa lyakwe wakamucata akwaamba ayi, “Ee ndisuni, ba kabotu!” Lyalo manata akamana. 14Kuswawaawo Jesu wakamwaambila ayi, “Nyumfwa, utalwiiti muntu nabi womwi pacikani ici. Sombi ululamebo kuya kumupailishi, ukalitondeshe kuli nguwe ayi waba kabotu. Koya upe cipo kweelana abwakaamba Mose kwaamba ayi bantu bashome ayi waba kabotu.”#Bene Lefi 14:1-32
15Nakubi boobo impuwo yakwe Jesu yakanyumfwika kubantu baanji. Aboobo bantu baanji bakesa kuli nguwe kwaamba ayi banyumfwe maswi akwe alimwi ayi malwashi abo amane. 16Sombi lakwe wakabashiya akuya kumusena kwatakalinga kwikala bantu mukupaila.
Jesu mbwaakashilika musankwa wakalinga kuyuminite mubili
(Mate 9:1-8; Maako 2:1-12)
17Bushiku bumwi Jesu ndyaakalinga kwiisha, baFalisi abafundishi ba Milawo bamwi bakalingaawo abalo apo. Bantu abo bakaswa mumishi yoonse ya kuGalili, kuJudeya alimwi akuJelusalemu. Nkusu shakwe Lesa shakushilika shakalinga muli Jesu. 18Mpomunyaawo bantu bamwi bakaleta musankwa wakalinga kuyuminite mubili pamacila. Bakeelesha kumwinjisha muŋanda ayi bamooneke muliimfwa lyakwe Jesu. 19Sombi pakumwiinshila kumutola mukati pakabula mukwiinga wa bantu kufula. Lyalo bakatantaakwe peculu lya ciluli ca ŋanda akupanga bulyango. Bakamwiinsha akumuleelesha pamacila pakati ka bantu kushikila muliimfwa lyakwe Jesu. 20Jesu ndyaakabona lushomo lwabo, wakaamba ayi, “Ndaba, shibiibi shako shalekelelwa.”
21Ingayi bafundishi ba Milawo alimwi abaFalisi bakatalika kwiipushanya ayi, “Ino ngani uyu utoocobola Lesa? Ngani weenga walekelela shibiibi? sa te nguLesa eenkabo?” 22Lyalo Jesu wakeshiba ncibakalinga kuyeeya mumyoyo yabo wakabeepusha ayi, “Ino mutooyeeyelanshi shintu sha mushobo uyu mumyoyo yanu? 23Ncili cuubu kwaambila muntu ayi, ‘Shibiibi shako shalekelelwa,’ nabi kwaamba ayi, ‘Nyamuka, weende’? 24Sombi ntooyanda kwaamba ayi mwishibe ayi MwanaaMuntu ulicite bulemu ankusu shakulekelela shibiibi pacishi ca panshi.” Mpomunyaawo wakaambila uyuminite mubili ayi, “Ntookwaambila, nyamuka, bwesa macila ako uye kumishaanu.”
25Mpomunyaawo wakabuka mumeenso abo, wabwesa macila mpaakalinga kulete akutalika kunooya, kaaya cilumbaisha Lesa. 26Bantu boonse bakakankamana abuumbi alimwi bakaloonda. Lyalo bakatalika kulumbaisha Lesa akwaamba ayi, “Ici ncetwabona sunu, tatuna kucibonaawo.”
Jesu mbwaakeeta Lefi
(Mate 9:9-13; Maako 2:13-17)
27Kuswawaawo Jesu wakaswita pansengwe akubona shikusonkesha wakalinga kwiitwa ayi Lefi, kaashite mukaanda kamusonko. Mpeeke Jesu wakamwaambila ayi, “Nkonkele.” 28Mpomunyaawo alakwe wakasulukoobo pasheesho shoonse shakalinga mukaanda akumukonkela. 29Lefi wakabamba shakulya shiinji kwaamba ayi basekelele aJesu muŋanda yakwe. Kwakalinga beshikusonkesha abantu bamwibo bakacanikaawo akulya pantu pomwi ambabo. 30BaFalisi bamwi abafundishi ba Milawo ba mulikoto lyabo, bakatalika kutongookila bashikwiiya bakwe Jesu ayi, “Ino mutoolitanshi akunwa pantu pomwi abeshikusonkesha alimwi abantu batakonkeli Milawo yakwe Mose?”#Luka 15:1-2 31Lyalo Jesu wakabakumbula ayi, “Teshi bantu bayumu balangoola mushiliki, sombi balwashi beenka. 32Nshikwe kwisa mukwiita baluleme, sombi bamucita shibi kwaamba ayi basanduke kuswa kushibiibi shabo.”
Mwiipusho wa pakulikasha kulya
(Mate 9:14-17; Maako 2:18-22)
33Bamwi bantu bakeepusha Jesu ayi, “Bashikwiiya bakwe Joni Mubombeki liinji balaba aciindi cakulikasha kulya akupaila, abalo bashikwiiya ba baFalisi balacita bweenka ubo, sombi baako tababiiwo aciindi ici, balalya akunwa.”
34Lyalo Jesu wakabaambila ayi, “Sa inga babye shibwiinga mwabakakatisha kutalya shibwiinga kaacili abo? Sobwe! 35Sombi ciindi cilaakushika shibwiinga ndyeshi akakushikweewo pali mbabo, lyalo paciindi ico ndyeshi bakalikashe kulya.”
36Kuswawaawo Jesu wakabalwiitaawo cikoshanyo ayi, “Taaku muntu weenga wakwamuna cimami kunsalu ipya akutunga pacakufwala cikulukulu. Taakoonshi kucita boobo mukwiinga ubo inga wanyonyoola nsalu iyo alimwi cimami ico inga taceendelani acakufwala ico. 37Taaku muntu weenga wabika waini upya munkomwe sha shipaya shikulukulu. Na wabikamo waini upya ulapasula nkomwe alimwi waini woonse ulatika ashalo nkomwe shilanyonyooka. 38Nkokwaamba ayi waini upya ulyeelete kubikwa munkomwe sha shipaya shipya. 39Taaku muntu weenga wasuna kunwa waini upya na wamana kunwa waini ukulukulu mukwiinga ulaamba ayi, ‘Ulya ukulukulu ngubotu.’ ”
अहिले सेलेक्ट गरिएको:
Luka 5: BBBLI
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Lenje Bible with Deuterocanon © Bible Society of Zambia, 2003.
