Luka 24
24
Jesu mbwaakabuka kuswa kubafu
(Mate 28:1-10; Maako 16:1-8; Joni 20:1-10)
1Sombi macuunsacuunsa paSondo, banakashi abo bakanyamuna mafuta atununkila kabotu ntobakabamba akuya kucuumbwe. 2Sombi bakacana libwe balikunkulushaawo pamulyango wa cuumbwe. 3Ndibakenjila mucuumbwe bakacana mutuntu wakwe Jesu taumo. 4Kabacikankamana pacikani ici, kwakaboneka basankwa bobilo bakalinga kufwete shakufwala shimweka kabeemfwi pafwaafwi ambabo. 5Banakashi abo bakaloonda abuumbi akukotamina panshi. Mpeeke basankwa abo bakabeepusha ayi, “Mutoolangwetanshi muntu muumi pakati ka bafu? 6Taamo muno, wabuka kuswa kubafu. Amwiibaluke maswi ngaakamulwiita ndyaakalinga kucili kuGalili 7ayi, ‘MwanaaMuntu ulyeelete kwaabwa mumaansa a bantu beshishibi, kupopwa pamucilingano, akubushikwa kuswa kubafu pabushiku bwatatu.’ ”#Mate 16:21; 17:22-23; 20:18-19; Maako 8:31; 9:31; 10:33-34; Luka 9:22; 18:31-33
8Mpomunyaawo bakeebaluka maswi akwe Jesu. 9Ndibakaswa kucuumbwe, bakalwiita bashikwiiya bali likumi awomwi alimwi abamwi boonse abo bakalinga kukonkela kwiisha kwakwe Jesu, shoonse shakacitika. 10Abo banakashi bakalinga Maliya wa kuMagadala, Joana aMaliya banyina Jemusi. Balo abanakashi bamwi mbobakalingaabo, bakaambila batumwi cikani ici. 11Sombi maswi ayo kubashikwiiya akabonekabo anga nkutamooka, aboobo tabakwe kwaashoma. 12Sombi lakwe Pita wakanyamuka akucicila kucuumbwe. Ndyaakasondelaamo wakabonabo shisani sheenka shakalinga kupombeletwemo mutuntu. Wakaboolela kuŋanda kaakankamene pacikani cakacitika.
Lweendo lwakuya kuEmausi
(Maako 16:12-13)
13Bushiku bweenka ubo bashikwiiya bobilo bakalinga kuya kumushi wiitwa ayi Emausi. Kuswa kuEmausi kuya kuJelusalemu pakalingabo mushinso ulaamfu. 14Ndibakalinga kuya bakalinga kubandika pasheeshi shoonse shakacitika. 15Kabacibandika akwiipushanya makani ayo, Jesu mwiine wakesa pafwaafwi akweendela pantu pomwi ambabo. 16Bakamubona, sombi tabakwe kumwishiba. 17Mpeeke Jesu wakabeepusha ayi, “Ngamakaninshi ngomutooya cibandika?” Lyalo bakeendililabo kwiimikana ashiinso sha buumba. 18Mpomunyaawo umwi wakalinga kwiitwa ayi Kileopasi wakakumbula ayi, “Caboneka anga ndiwebo mweensu weenka muJelusalemu uteshi cakacitika munshiku shamana ishi.” 19Jesu wakeepusha alimwi ayi, “Nshintunshi?” Lyalo bakamukumbula ayi, “Isho shakacitika kuli Jesu wa kuNasaleti. Uyo muntu wakalinga mulaluki wakalinga kucita akwaamba shintu shikankamika pameenso akwe Lesa abantu boonse. 20Sombi bamatanjilili ba bapailishi abaleli besu bakamwaaba ayi acaikwe, kuswawaawo bakamupopa pamucilingano. 21Sombi swebo twakalinga kwiingashite ayi ngweshi akalubule Isilaeli. Ono bulya peenda nshiku shotatwe kuswa ndicakacitika. 22Ono alimwi banakashi bamwi pakati kesu batukankamika. Balinga bafumina kucuumbwe macuunsacuunsa. 23Ono mubili wakwe tabakwe kuucanaamo. Ndibaboola baamba ayi babonabo baanjelo bakwe Lesa abo babalwiita ayi Jesu ngumuumi. 24Bamwi ba mulikoto lyesu balinga baya kucuumbwe akucana bweenka bwaamba banakashi. Sombi Jesu abalo tabakwe kumubona.”
25Lyalo Jesu wakabaambila ayi, “Mwebo nobantu baluya nomucelwa kushoma shintu shoonse shakaamba balaluki bakulukulu! 26Sa tecalinga kweelete ayi Usalitwe apenshekwe mushobo uyo kwaamba ayi enjile mubulemu bwakwe?” 27Mpeeke wakabasansulwita shoonse shakalembwa muMalembo akwe Lesa pali nguwe, kutalikila kuli Mose kushikila akubalaluki bamwi boonse.
28Ndibakashika pafwaafwi amushi nkobakalinga kuya, Jesu wakacita anga uciya. 29Sombi bashikwiiya abo bakamukakatisha akwaamba ayi, “Amwikale aswebo mukwiinga kutooya cishiya.” Aboobo wakenjila akwikalaabo. 30Ndyaakekalaabo pakulya wakabwesa shinkwa akulumba Lesa. Mpeeke wakaukomoona akubaabila. 31Mpomunyaawo meenso abo akacaluka. Lyalo bakamwishiba. Kuswawaawo wakashiminganabo. 32Mpeeke bakatalika kwiipushanya ayi, “Sa maswi akwe taalinga kuyasa mumyoyo ndyaalinga kutulwiita Malembo akwe Lesa munshila?”
33Mpomunyaawo bakanyamuka akuboolela kuJelusalemu. Uko bakacana bashikwiiya bali likumi awomwi kababungene pantu pomwi abamwibo, 34kabaamba ayi, “Ncakwiila Mwaami wabuka kuswa kubafu! Walibonekesha kuli Simoni!”
35Lyalo abalo bashikwiiya bobilo balya, bakasansulula cakacitika munshila ambobakeshiba Mwaami ndyaakakomoona shinkwa.
Jesu mbwaakaboneka kubashikwiiya bakwe
(Mate 28:16-20; Maako 16:14-18; Joni 20:19-23; Mili 1:6-8)
36Kabacaamba bashikwiiya bobilo abo, Jesu mwiine wakaboneka kuli mbabo boonse akwaamba ayi, “Luumuno lube amwebo!” 37Sombi bakatilimuka akuloonda mukwiinga bakayeeya ayi babona cipuku. 38Lakwe wakabaambila ayi, “Ino mutoopenshekwanshi akutonsha mumyoyo yanu? 39Amubone maansa ashimpanta shangu kwaamba ayi mwishibe ayi ndime cancinencine. Amuncatecate munyumfwe mukwiinga cipuku tacicite mubili ashifuwa bweenka mbuli mbooncite.” 40Ingayi aambe boobo wakababonesha maansa ashimpanta shakwe. 41Nakubi boobo tabakwe kushoma mukwiinga bakalinga kusangalete abuumbi alimwi akukankamana. Mpeeke wakabeepusha ayi, “Sa muliciteewo cakulya pano?” 42Mpomunyaawo bakamupa cipansha ca nswi yakuyoka. 43Wakacitambula akulya boonse kabamubwene.
44Lyalo wakabaambila ayi, “Ishi nsheshintu nshendakalinga kumulwiita ndindakalingaanu. Ndakalinga kwaamba ayi shoonse shilembetwe pali ndime muMilawo yakwe Mose, abalaluki bakulukulu amuKulumbaisha shilyeelete kucitika cancinencine.” 45Mpeeke wakabacalula tulango kwaamba ayi banyumfwishishe Malembo akwe Lesa. 46Wakabaambila ayi, “Mbulya mbocilembetwe muMalembo ayi Usalitwe wakwe Lesa ulyeelete kupenshekwa akubuka kuswa kubafu pabushiku bwatatu. 47Cililembetwe alimwi ayi muliina lyakwe Makani Abotu ashimikilwe kubantu ba mishobo yoonse, kutalikila kuJelusalemu kwaamba ayi basanduke kuswa kushibiibi shabo, Lesa ndyeshi abalekelele. 48Mwebo muli bakamboni ba shintu ishi. 49Anebo ndaakumutumina cipo ico baTa ncebakashomesha, sombi mulyeelete kwikala mundabala inene kushikila mukatambule nkusu kuswa kwiculu.”#Mili 1:4
Jesu mbwaakatolwa kwiculu
(Maako 16:19-20; Mili 1:9-11)
50Lyalo Jesu wakabatanjilila kuswa mundabala inene iyo kushikila kuBetani. Ndibakashika wakanyamuna maansaakwe akubapa coolwe. 51Mpeeke kaacibapa coolwe wakapansaana abo, watolwa kwiculu.#Mili 1:9-11 52Mpomunyaawo bakamulambila akuboolela kuJelusalemu kabasangalete abuumbi. 53Ciindi coonse bakalinga kucanika muŊanda yakwe Lesa kabamulumbaisha.
अहिले सेलेक्ट गरिएको:
Luka 24: BBBLI
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Lenje Bible with Deuterocanon © Bible Society of Zambia, 2003.
