Joni 5
5
Jesu mbwaakashilika musankwa kuBetesida
1Pesule Jesu wakaya kuJelusalemu uko kwakalinga kusekelela kwa baJuda. 2Ono muJelusalemu, pafwaafwi aMulyango wa Mbelele, kwakalinga lishiba liitwa ayi Betesida muciEbulu. Mweela lishiba ili mwakalinga kuyakitwe twaanda tosanwe. 3Mutwaanda umo mwakalinga koona balwashi baanji mbuli boofu, balema abakalinga kuyuminite mibili. [Aba bakalinga kulindila maanshi kufundoolwa. 4Mukwiinga ciindi cimwi munjelo wakwe Lesa wakalinga kwisa mukwinjila mulishiba akufundoola maanshi. Aboobo mulwashi uli woonse wakalinga kutaanguna kwinjila mumaanshi, wakalinga kuba kabotu kubulwashi buli boonse mbweenga kaacite.] 5Ono pabantu balwashi abo, pakalinga musankwa umwi wakalinga mulwashi myaaka makumi otatwe ayosanwe alimwi ayotatwe. 6Sombi Jesu ndyaakamubona wakeshiba kwaamba ayi uyo musankwa wakatalika kale kale kuciswa. Mpomunyaawo wakamwiipusha ayi, “Sa ulisuni kuba kabotu?”
7Mulwashi uyo wakakumbula ayi, “Nkambo, taaku muntu wakuntola mumaanshi na afundoolwa. Ndacita ayi njile kucana umwi wanyindila kale.” 8Jesu wakamwaambila ayi, “Nyamuka, bwesa mpasa yako, unooya.” 9Mpomunyaawo musankwa uyo wakaba kabotu. Lyalo wakanyamuna mpasa kaaya.
Bushiku mbocakacitika ici bwakalinga bwakookesha bwa Cibelu. 10Mpeeke bamaloba ba baJuda bakaambila musankwa wakaba kabotu uyo ayi, “Sunu mbushiku bwakookesha bwa Cibelu. Tooelete kunyamuna mpasa yako.”#Neye 13:19; Jele 17:21 11Lakwe wakakumbula ayi, “Uyo muntu wanshilika waŋambila ayi, ‘Bwesa mpasa yako, unooya!’ ”
12Bakamwiipusha ayi, “Ino ngani muntu uyo wakwaambila ayi bwesa mpasa yako, unooya?” 13Sombi musankwa wakaba kabotu uyo, taakwe kumwishiba mukwiinga Jesu wakashiminganabo mulikoto lya bantu lyakalingaawo.
14Kuswawaawo Jesu wakamucana musankwa uyo muŊanda yakwe Lesa akumwaambila ayi, “Bona waba kabotu ono, anu ucileeke kubisha mukwiinga cimwi cibiibi kwiinda cecilya inga caakukucitikila.”
15Mpeeke musankwa uyo wakaya mukwaambila bamaloba ba baJuda ayi nguJesu wamushilika. 16Paceebo ceeco bamaloba ba baJuda bakatalika kupensha Jesu ceebo wakashilika pabushika bwakookesha bwa Cibelu. 17Jesu wakabakumbula ayi, “BaTa balasebensa ciindi coonsebo, aboobo anebo ndyeelete kusebensa.”
18Makani aya akalenga kwaamba ayi bamaloba ba baJuda beendeewo kupinga kucaya Jesu. Teshibo kwaamba ayi wakatyola mulawo wa bushiku bwakookesha, sombi alimwi wakaamba ayi nguMwanaakwe Lesa. Mukwaamba boobo wakalyeelanya aLesa.
Nkusu sha mwanaakwe Lesa
19Mpomunyaawo wakabakumbula ayi, “Ntoomulwiita calushinisho ayi Mwaana taaku nceenga wacita palwaakwe mwiine. Sombi ulacitabo ncaabona baIshi kabacita. Shicita baIshi alakwe Mwaana nshaacita. 20Mukwiinga baIshi balisuni Mwaana, aboobo balamutondesha shoonse nshebacita. Balaakutondesha Mwanaabo ashimwi shiinda waawa, lyalo mulaakukankamana. 21Bweenka baIshi mbobabusha bafu akubapa buumi, alakwe Mwaana ulapa buumi kubaabo mbaasuni kupa. 22BaIshi taboomboloshi muntu, sobwe. Nkusu shoonse sha boomboloshi bakashipa Mwanaabo, 23kwaamba ayi bantu boonse balemeke Mwaana mbobalemeka baIshi. Uyo woonse utalemeki Mwaana taalemeki abaIshi abo bakamutuma.
24“Ntoomwaambila calushinisho ayi uyo woonse unyumfwa maswi angu akushoma wooyo wakantuma ulicite buumi butamaani. Teshi akoomboloshekwe, sombi waswa kale mulufu kuya mubuumi butamaani. 25Ntoomulwiita calushinisho ayi ciindi cilaakushikila alimwi cashikila kale, bafu ndyeshi bakanyumfwe liswi lya Mwanaakwe Lesa alimwi abo beshi bakalinyuumfwe balaakuba abuumi butamaani. 26Bweenka baIshi mbobali matalikilo a buumi, alakwe Mwaana bamupa nkusu sha kuba matalikilo a buumi. 27Mwaana wakamupa ankusu shakoombolosha mukwiinga ngoMwanaaMuntu. 28Mutakankamani acikani ici mukwiinga ciindi cilaakushikila bafu boonse ndyeshi bakanyumfwe liswi lyakwe 29akuswa mushuumbwe. Lyalo abo bakalinga kucita buyanda Lesa balaakubuka akuba abuumi butamaani, abalo abo bakalinga kucita shibiibi balaakubuka akoomboloshekwa.#Danye 12:2
Bukamboni bwapali Jesu
30“Nebo taaku nceenga ndaciita palwaangu nemwiine. Ndoombolosha bweenka Lesa mbwaandwiita. Aboobo koombolosha kwangu kuliluleme mukwiinga nshikakatili kucita nsheensuni, sombi shiyanda wooyo wakantuma.
31“Na ndalicitila bukamboni nemwiine, ingayi bukamboni bwangu tabwishi bwalushinisho. 32Sombi nkwaali umwi uncitila bukamboni alimwi ndishi kwaamba ayi nshaamba pali ndime nshalushinisho. 33Mwakatuma batumwi kuli Joni Mubombeki alimwi wakacita bukamboni bwalushinisho.#Joni 1:19-27; 3:27-30 34Teshi kwaamba ayi ndisuni bukamboni kuswa kubantu, sombi ntokwaamba shintu ishi ayi mupulushikwe. 35Joni Mubombeki wakalinga mbuli lilampi lyakalinga kumunika, alimwi mwakakondwa kwaciindi ciniini mumumuni wakwe. 36Sombi ndicite bukamboni bunene kwiinda boobo Joni Mubombeki mbwaakancitila. Shintu nsheencita isho nshaakampa Lesa ayi ncite, nshesheesho shitondesha ayi baTa mbobakantuma. 37Abalo baTa bakantuma balancitila bukamboni. Liswi lyabo tamukwe kulinyumfwaawo nabi kubona ciwa cabo.#Mate 3:17; Maako 1:11; Luka 3:22 38Ncakwiila maswi abo teekali muli ndimwe mukwiinga tamushomi wooyo ngobakatuma. 39Mulabelengesha Malembo akwe Lesa kuyeeya ayi muli ngawo inga mwacana buumi butamaani. Sombi Malembo akwe Lesa eenka aya, ngaancitila bukamboni. 40Sombi mwebo mulakaka kwisa kuli ndime ayi mucane buumi butamaani.
41“Nebo nshisuni kulumbaishikwa kubantu. 42Sombi ndimwishi kwaamba ayi mwebo tamusuni Lesa. 43Nebo ndakesa muliina lya baTa, nakubi boobo tamukwe kuntambula. Sombi umwi na akese muliina lyakwe mwiine, mulaakumutambula. 44Ino ono inga mwashoma buyani na mulisunibo kulilumbaisha nobeene, sombi kamutasuni ayi mulumbaishikwe kuli Lesa womwibo eenka? 45Ono mutayeeyi kwaamba ayi nebo ndaakumushinina pameenso a baTa. Sombi eshi akamushinine nguMose eenka uyo ngomucinkiteemo manungo. 46Na mwakalinga mwashoma Mose cancinencine, anebo naakwiinga mwanshooma mukwiinga Mose wakalemba shapali ndime. 47Ono na kamutashomi shakalemba Mose, ino inga mwashoma buyani maswi angu?”
अहिले सेलेक्ट गरिएको:
Joni 5: BBBLI
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Lenje Bible with Deuterocanon © Bible Society of Zambia, 2003.
