Joni 2
2
Bwiinga bwa kuKana
1Ndipakeenda nshiku shobilo kwakaba bwiinga mundabala ya Kana mucishi ca Galili. Banyina Jesu bakalingaako. 2Alakwe Jesu abashikwiiya bakwe bakeetwa kubwiinga. 3Mpeeke waini ndiwakamana, banyina Jesu bakamulwiita ayi, “Waini wabamanina.” 4Jesu wakakumbula ayi, “Ma, ino mutooyanda ayi ncite buyani nebo? Ciindi cangu tacina kushikila.” 5Nakubi boobo banyina Jesu bakalwiita basebenshi ba pabwiinga ayi, “Mucite cili coonse nceshi amwaambile.”
6Ono palya pakalinga nongo sha mabwe shosanwe ayomwi, umo mwakalinga maanshi akusamba ayi balisalashe kweelana aMilawo ya baJuda. Nongo yomwi yakalinga kutola mingomo yosanwe kwaamba ayi isule. 7Mpeeke Jesu wakaambila basebenshi ayi, “Amushisushe maanshi nongo ishi.” Abalo bakashisusha apamilomo. 8Lyalo wakabaambila ayi, “Ono amutekule, mutole kumunene wa bwiinga.” Abalo bakamutolela. 9Ono ndyaakanyumfwa maanshi ayo akasandulwa waini, taakwe kwishiba kwakaswa waini uyo. (Sombi basebenshi bakateka maanshi bakalinga kwishi.) Aboobo wakeeta shibwiinga 10akumwaambila ayi, “Bantu boonse balataanguna kwaaba waini ubotu, kuswawaawo nkokunwa waini utabete kabotu, sombi webo walinga kubikitebo waini ubotu kushikila cino ciindi.”
11Ici, ncaankamiko citaanshi Jesu ncaakacita mucishi ca Galili, wakatondesha nkusu sha bulemu bwakwe, aboobo bashikwiiya bakwe bakamushoma.
12Kuswawaawo Jesu abanyina, banandumi shakwe alimwi abashikwiiya bakwe bakaya kuKapenaumu, uko nkobakekala nshiku shiniini.#Mate 4:13
Jesu mbwaakatanda basambashi muŊanda yakwe Lesa
(Mate 21:12-13; Maako 11:15-17; Luka 19:45-46)
13Paciindi ico, bushiku bwa Pasika bwakwiibaluka kusotokela bwakalinga pafwaafwi, aboobo Jesu wakaya kuJelusalemu.#Kulo 12:1-27 14Ndyaakenjila muŊanda yakwe Lesa, wakacana bantu bamwi kaboolisha ŋombe, mbelele ampolobe. Bamwi bakalinga kushiite kumatebulu kabashinta maali. 15Mpomunyaawo wakapanga ciswepu ca looshi akubatandila pansengwe boonse, pantu pomwi ambelele aŋombe shabo. Wakapinoona matebulu abeshikushinta maali akupalanganya maali. 16Mpeeke wakalwiita bakalinga kuulisha mpolobe ayi, “Amutole mpolobe ishi pansengwe! Tamweelete kusandula ŋanda ya baTa ayi ibe musena wakuulishisha!” 17Lyalo bashikwiiya bakeebaluka Malembo akwe Lesa aamba ayi, “Lusuno lwangu lwa ŋanda yanu nobaLesa, lulancata kumoyo.”#Kulu 69:9
18Mpeeke baJuda bakeepusha ayi, “Ncaankamikonshi nceshi ucite kwaamba ayi tushibe ayi ulicite nkusu shakucita bobulya?” 19Jesu wakabakumbula ayi, “Amumwayulule Ŋanda yakwe Lesa iyi, nebo ndaakwiiyaka alimwi munshiku shotatwe.”#Mate 26:61; 27:40; Maako 14:58; 15:29 20Lyalo baJuda bakaamba ayi, “Ŋanda iyi yakatola myaaka makumi one ayosanwe awomwi kwaamba ayi iyakwe. Ono sa ncakwiila inga waiyaka munshiku shotatwe?” 21Sombi Ŋanda yakwe Lesa njaakalinga kwaamba, ngumubili wakwe. 22Aboobo Jesu ndyaakabushikwa kuswa kubafu, bashikwiiya bakwe bakeebaluka ayi ici wakacaambaawo kale. Mpeeke bakashoma Malembo akwe Lesa amaswi ngaakaamba Jesu.
Jesu ulishi bantu boonse mbobabete
23Jesu ndyaakalinga muJelusalemu, pabushiku bwa Pasika bwakwiibaluka kusotokela, bantu baanji bakamushoma ndibakabona shaankamiko nshaakacita. 24Sombi lakwe Jesu taakwe kubashoma mukwiinga wakalinga kwishi miyeeyo ya bantu. 25Taakalinga kulindila ayi umwi muntu amulwiite shabuumi bwa bantu mukwiinga wakalinga kwishi mwiine shili mumyoyo yabo.
अहिले सेलेक्ट गरिएको:
Joni 2: BBBLI
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Lenje Bible with Deuterocanon © Bible Society of Zambia, 2003.
