San Mateo 11
11
1Enga Jesusi k'amarapka jurhengorheri jémbechani arhistakuani ambe engaksï xáni úpiringa, kéndikuspti, ka ambakiti aiangperakuani máteru iretecharhu niraspti aiangpeni ka jurhentpeni.
Juánu itsï atajtsïkpiriri ánchperata úricha
(Lc 7.18-35)
2Juánu itsï atajtsïkpiri k'ataperakuarhu jatini kurhajchpespti ambe enga Krístu úni jápka, ka tsimani jurhengorheri jémbechani axaaspti eskaksï nipiringa Jesusini 3kurhamarheni: “¿T'úeski ima enga jupiringa, óchi máteruni erokaa?”
4Ka Jesusi arhiaspti: “Níntsï je ka aianguntsï je Juánuni ambe engajtsï exeni jaka ka kurhani jarhani. 5Pátenharhichaksï exexati, ka chkéjchuechaksï xanharaxati ka xúta jukarichaksï ambakentaxati; ka kándichaksï kurhaxati ka uarhirichaksï tsíntaxati, ka kómu jándichaksï ambakiti aiangperakuani aiangunhantaxati. 6Tsípeksï ima engaksï jíndeni jimbo nómbe ma nósesi exejka.”
7Engaksï Juánueri jurhengorhericha k'uanhatsentani jápka, Jesusi Juánueri ambe ísï uandaspti: “¿Andi ambejtsï niraski exeni jima enga no irenhaka? ¿P'atamuntkujtsï niraski exeni enga tarhiata juírhuskaka? 8¿O ambejtsïsï niki exeni? ¿Achetini ma enga ambakiti ambe xukuparhatini jaka? Ima engaksï ambakiti ambe xukuparhajka, irechoksï jarhasti. 9Jiájkani, ¿Néntsïsï niki exeni? ¿Diósïri uandarini ma? Jo, ísïsti, ka sánderu k'éri ambe eska Diósïri uandari ma, 10jimboka inderi ambesï karakata jaka:
‘Jíkini urhetatachepaxaka
jucheti uandakua párini,
engakini xanharini
p'arhikjantskachepaaka.’”
11“Sési jimboksïni arhixaka, eska nómeni andajpenuxapka sánderu k'éri ma eska Juánu itsï atajtsïkpiri, ka k'óru ne enga auandarhu anapu irechekuarhu sánderu sapichueka, Juánu jinguni sánderu k'éri ambesti.”
12“Jiájkani uératintki enga Juánu itsï atajtsïkpirika ka iásï jamberi, auandarhu anapu irechekua uinhamu etsakurhixati, ka uiuinharhatichajkuksïsï úati inchani, náuejki ima engaksï no jiókorhejka jángorhentani jaka k'amajkuni. 13Diósïri uandaricha ka juramukua, Diósïni jimboksï uandasti jiájkani jamberi enga Juánu arhijtsïkpeka. 14Ka ekajtsï uéjka íni ambe kurhanguni, Juánu Eliasïsti, ima enga jupiringa. 15Ne enga jurhenaka kurhani, kurhangunte.”
16“¿Ambe jinguni terukutantaua iásï anapuechani? Tumbinksï járhasti engaksï kópekuarhu uaxapejka pámpiri jémbechani uinhachakuani: 17‘Kústacheskaksïni ka nójtsï uarhaska; mískorheteriksïni kústacheska, ka nójtsï sáni ueraska.’ 18Jimboka Juánu ixu jámaxapka, ima enga no t'irempka ka ni kauikua ts'ému, ka chájtsï ísï uandasïnga eska nóambakiti incharhetixapka. 19Ka iásï acheti uájpa jurhasti, enga t'irejka ka kauikuajtu ts'émuni ka chájtsï uandasïnga: ‘I jukari t'iresïndi ka kauini, ka tumina tánaticha ka k'amanharhintsticha jinguni jámasïndi.’ K'óru Diósïri mímixekua, jánguarhu xarharasïndi.”
K'érati iretechaksï xerenhantaati
(Lc 10.13-15)
20Jesusi xukaaspti imani iretechani enga xáni milagruechani úapka, jimbokaksï ima Diósïni no andarhentaspka ka arhiaspti: 21“¡Áke t'u Korasini! Ka ¡Áke t'u Betsaida! Jimboka engaksï Tíro ka Sidoni únhapiringa milagruecha engaksï chénio únhaka, iátkipirindia eskajtsï móantatini japiringa ch'erapiti xukuparhantatini ka t'upuri jápu atajtsïparini. 22Sési jimboksïni arhixaka eska imani jurhiatekua enga arhinharhikperanhaaka, Tíro ka Sidoni nóksï xáni k'amanharhiranhantaati eskajtsï cha na k'amanharhiranhantaaka. 23Ka t'u Kafarnaumi, ¿Andi eratsexakiri eskari auandarhu k'érikuarhu péranhaaka? Sánderuri kénhekua k'uaninhanhaaka, jimboka engaksï Sodoma únhapiringa milagruecha engaksï chénio únhaka, ima ireta japirinditeru. 24Ísï jimboksïnisï arhini jaka, eska ima jurhiatekua enga arhinharhikperanhaaka, nóksï xáni k'amanharhiranhantaati Sodoma anapuecha, eskari t'u na k'amanharhiranhantaaka.”
Jesusi Diósïni k'éri ambe arhisti
(Lc 10.21-22)
25Imani jurhiatekuechani jimbo, Jesusi uandaspti: “Táte, auanda ka parhakpeniri Acha, k'éri ambekini arhisïnga, jimbokari mímixetichani ka jánhaskatichani íni ambe jískakuaska, ka sapirhatichandi xarhatakuaska. 26Jo Táte, jimbokari t'u ísï tsitiska.”
27“Jucheti Táterini iámendu ambe jurajkuchesti. Tátejkusï Uájpani míteti, ka Uájpajkusï Táteni míteti, ka Uájpa ne engani uékauaka mítetaraani.” 28“Juini je jíndeni jinguni cha engajtsï kuataratini jaka xáni ánchekorheni, ka cha engajtsï xáni uandanheani jaka, jíksïni mintsikustaaka. 29Jucheti uanajchakuani pa je, ka jurhengorhe je, ka ísï jama je eskani ji na jámka, jíchkani tekaantasïnga ka sési jimbo kétsekua uérasïnga, ísïjtsï mintsikorheaka. 30Jimboka jucheti uanajchakua no p'atujchakpesïnga ka no k'uetsapesti ambe engani ji párpejka.”
अहिले सेलेक्ट गरिएको:
San Mateo 11: DKPJ
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Biblia en P´urhépecha, Michoacán, México © Sociedad Bíblica de México, A.C.
