Gén 10
10
Noé lechetsos tä tälhe leles
(1~Crón 1.5-23)
1Häp tähesna Noé lechetsos tä Sem, Cam lhäy'e Jafet leles, tä tälhe fwalas tä tajyäme pelhay tä itäyhat wichi:
Jafet leles lhäy'e lechetsos
2Jafet leles häpehen Gomer, Magog, Maday, Javán, Tubal, Mesec, lhäy'e Tiras. 3Wet Gomer leles häpehen Askenaz, Rifat, lhäy'e Togarma. 4Wet Jafet lhäs elh tä lhey Javán, leles häpehen Elisa, Tarsis, Quitim, lhäy'e Rodanim. 5Häp tähestso Jafet leles tä lepes lheley, wet lhamel yen lew'etesa honhates tä iwhäye lewomekitas. Wet iyhäjpej ihi honhat tä laka honhat wet lhämtes w'enha lhamej.
Cam leles lhäy'e lechetsos
6Wet Noé lhäs elh tä lhey Cam, leles häpehen Cus, Misraim, Fut, lhäy'e Canaán. 7Cus leles häpehen Seba, Havila, Sabta, Raama, lhäy'e Sabteca. Wet Cus lhäs elh tä lhey Raama, leles häpehen Seba lhäy'e Dedán.
8Cus häpe p'ante tä lhäs Nimrod, häp hin'o tä ichun p'ante tä wichi iwujyen. 9Häpe elh tä haw'ektsaj tä takhajay, häp tä isej Lhawuk lech'otyaj. Wet häp tä iche n'olhämet tä õyok, “¡Is chik Lhawuk ayen häpeya haw'ektsaj tä takhajay, hätet iwoye Nimrod p'ante!” 10Wet hupuy tä lhamenya tä lewuk Nimrod häpe p'ante Babel, Erek, Akad, lhäy'e Kalne, tä lhamel ihi p'ante honhat tä lhey Sinar. 11Wet häp honhattso häpe p'ante tä hin'o tä lhey Asur tälhe, wet lham yenlhi p'ante hupuy lhayis tä lhey Nínive, Rehobot-ir, Kalaj, 12lhäy'e hupuy tä wuj tä lhey Ts'ifwik Lhetek tä Nínive tumej lhip elh wet Kalaj tumej lhip elh.
13Wet Cam lhäs elh tä lhey Misraim, leles häpehen wichi tä lhey Lud lhayis, Anam lhayis, Lehab lhayis, Naftuh lhayis, 14Patros lheley, Casluh lhayis, wet Caftor lhayis tä häpehen Filisteo lhayis letetsel.
15Wet Cam lhäs elh tä Canaán iwo lhäsa, wet elh tä ichun lhey Sidón, wet elh lhey Het. 16Wet wichi tä Canaán leles häpehen Jebús lhayis, Amorreo lhayis, Gerges lhayis, 17Hiv lhayis, Arak lhayis, Sin lhayis, 18Arvad lhayis, Semar lhayis, lhäy'e Hamat lhayis. Tä paj p'ante, Canaán leles tä lepes lheley ifwtsatpehen honhat. 19Wet honhat tä lewuk lhamel tiyäjche t'at honhat tä tatshupiye Gerar, tälhe Sidón pajtha nichäte hupuy tä lhey Gaza, wet häp lhip tä tumej hichä nichäte hupuy tä Sodoma, Gomorra, Adma, lhäy'e Seboyim, wet lepes häpe hupuy tä lhey Lesa.
20Häp tähestso Cam lechetsos, iyhäjpej lhaiw'enhathen tä ihi laka honhat wet äp lhämtes w'enha lhamej.
Sem leles lhäy'e lechetsos
21Wet häp Noé lhäs elh tä lhey Sem, häp Jafet lechila, häte leles iche. Nilhokej Heber leles tälhe t'at Sem. 22Wet Sem leles häpehen Elam, Asur, Arfaxad, Lud, lhäy'e Aram. 23Wet Aram leles häpehen Us, Hul, Geter, lhäy'e Mas. 24Wet Arfaxad lhäs lhey Sélah, wet Sélah häp tä lhäs Heber. 25Wet iche p'ante täkwfwas leles häp Heber. Elh lhey Peleg tä õyen at lheyayej häp fwalas tä lham ihi p'ante tä õhw'enhomche honhat lhipey wichi häpkhilek laka honhates.#10.25 Häp n'olhey Peleg yiwitej n'olhämet p'ante yok, Õhw'enho lhipey. Wet Peleg lech'inij lhey Joctán. 26Wet Joctán leles häpehen Almodad, Selef, Hasar-mavet, Jera, 27Hadoram, Uzal, Dicla, 28Obal, Abimael, Seba, 29Ofir, Havila, lhäy'e Jobab. Nilhokej lhameltso häpehen p'ante Joctán leles. 30Wet lhamel yen lew'etesa honhates tä tälhe Mesá pajtha nichäte honhat tä lhey Sefar tä häpe honhat tä chenhas tä tumej hichä.
31Häp tähestso Sem lechetsos, iyhäjpej lhaiw'enhathen tä ihi laka honhat wet äp lhämtes w'enha lhamej.
32Häp tähestso Noé leles tä iwo lelesa p'ante wet ihiche laka honhates. Wet tälhe lhameltso lhäy'e lhip tä wujpey wichi tä w'enhache lhamej, tä tälhe fwalas p'ante pelhay itäyhat wichi tä ihi honhat.
अहिले सेलेक्ट गरिएको:
Gén 10: WCHB
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Biblia Wichí, Dios Lhämtes tä Matchehen © Sociedad Bíblica Argentina, 2002.