Matius 6
6
Aroh nganyap koponara ingkan dongan
6:1
1“Borondong-rondong yoh nyan waktu ikan nguan kowajipan agama. Aroh nguan alogawi taiyoh nyan muka dulun ina tonoto doh. Awi amun ikan nguan isan iyoh maka Mohotara co Tamam mu nyan sorga aroh angar mihi tombah indam me.
Tujuan sodakah indan dulun mala
6:2-4
2 Cuntueh, kotika iko mihi sodakah indan dulun mala, aroh nara aang cioh. Kawan dulun co herak pura-pura umpi isan iyoh. Iroh herak mihi sodakah indan dulun mala nyan muka umum nyan kawan lopo ika sombayang atawa nyan calan. Iroh umpieh ma cara cioh ina dongan nara iroh. Porhatiboh co tomantun Kuh tuh: Iroh ocop haba koponara ingkan dongan sobagai tombah doh. Iroh aroh angar haba tombah ome-ome ingkan Mohotara. 3Tapi, kotika iko mihi sodakah indan dulun mala, umpi iyoh socara toni-tonih. 4Olueh alogawimmu yoh aroh tomonau pian ome bewe, kocuali Tamammu nyan sorga. Kitai-Eh alogawim co tocuhuk yoh, hintang angar ihi-Eh tombah indam.”
Tujuan doa
6:5-15
(Luk. 11:2-4)
5“Kotika ikan bodoa, aroh isan kawan dulun co herak pura-pura. Iroh herak bodoa tonjok nyan muka umum nyan kawan lopo ika sombayang atawa nyan kawan simpang calan bahai. Iroh bodoa ma cara cioh ina dongan doh noto paluh nara iroh. Porhatiboh co tomantun Kuh tuh: Iroh ocop haba koponara ingkan dongan sobagai tombah doh. 6Tapi kotika iko bodoa, muntam ponah bukungmu, paluh mantop antop. Bodoaboh hia Mohotara co Tamammu co oko nyan ika tocuhuk yoh. Maka baya Mohotara co Tamammu lian monau aang cioh, aroh dongam. Paluh, Are angar mihi tombah indam.
7Amun ikan bodoa, aroh dulak dulok nain dulun co aroh nyono Mohotara. Iroh monyangka bahawa sawot doh angar tongoneh tului doa doh co ombu yoh. 8Jadi, arohboh ikan bodoa isan iroh. Awi, Mohotara co Tamam me ocop monau koporuluan me sorinai ikan nyawot hia-Eh. 9Awi tului iyoh, bodoaboh ikan nain otuh:#6:9 Otuh aroh kotikas ico doa co boraoi tonisi kawan murid Yesus, molengkan Yesus mihi iroh cuntu doa. Maksuteh co penting.
‘Tamang-Kuh co nyan sorga, kaih bodoa.
Tomoliabat aram-Mu.
10Dombutbat Korojaan-Mu.#6:10 Memang Mohotara Tama ocop jarin Laca, tapi Lacan Setan incah oko kuasai nyan dunia tuh. Ico kotika daai, Yesus angar dombut hopuli ingkan sorga hia dunia tuh. Yesus majar kawan murid-Eh bodoa ina korombut-Eh indan koduo kali yoh tojadi ponah waktu dokin. Kotika iyoh, Lacan Setan angar topokalah hintang aroh bokuasa bat nyan dunia tuh.
Nyolungleh kojere-Mu nyan pindaondo tuh samah isan nyan sorga.
11Mihiboh kaih kondai tuh ongkun ponguman kaih socukup eh.
12Mampunboh kosalaan kaih, isan kaih mahi mampun sika dulun co sala ma kaih.
13Arohboh mehen kaih hia ponah tingkoh.
Tapi nyolamat kaih ingkan kuasan jahat.
[Awi Iko leh co empun Korojaan, kuasa hintang komuliaan dapot sokotahi-tahieh. Amin.]’
14Jadi, mampun kawan dulun co sala ma ikan. Awi amun ikan mongampun iroh, maka Mohotara co Taman me nyan sorga mahi angar mampun kawan dosam me. 15Tapi amun ikan aroh mampun dulun co sala ma ikan, maka Mohotara co Tamam me nyan sorga mahi aroh angar mampun kawan dosam me.”
Tujuan puasa
6:16-18
16“Kotika ikan puasa, aroh tampa me jorung isan dulun co nara arop eh puasa. Iroh yoh herak mubah alik tampa doh ina dongan doh noto iroh dahat puasa. Porhatiboh antun Kuh tuh: Iroh ocop haba koponara ingkan dongan doh sobagai tombah doh. 17Tapi kotika ikan puasa, ngorasih tampa hintang nguu kuhungmu ina tokitan isan biasa. 18Maka, dongam me aroh angar monau bahawa ikan dahat puasa. Baya Mohotara Tama co aroh kitan, Are co kito aang cioh. Paluh, Are angar mihi tombah indam me.”
Aroh ngumpur harta nyan dunia
6:19-24
(Luk. 12:33-34,11:34-36,16:13)
19“Aroh ngumpur harta indan arop me nyan dunia tuh. Hosuk hintang tiron morusak harta banda nyan dunia tuh.#6:19 Hiah jaman cioh, dulun tato boraoi ngumpur kain atawa logam co darang. Rayap boraoi norop benang cioh hintang tiron boraoi ngorusak logam cioh. Nohani, dulun nako boraoi muntam hia ika mika harta banda cioh paluh nakoeh. 20Tapi ikan sobulih ngumpur harta nyan sorga. Awi nyan sorga hosuk hintang tiron aroko boraoi morusak eh. Dulun nako aroh lian muntam paluh nakoeh. 21Awi nyan omoh hartame oko, nyan intin ka atoime oko.
22Mata somporengu lampu indan beti. Amun matan dulun pio, borati ngolauh betieh pandau. 23Amun matammu jahat, pindongboh ngolauh betim. Jadi, amun kopandau co oko nyan iko pindong, cikar kopindong kitop eh kopindong cioh!#6:23 Yesus hapo parumpamaan cotuh ika majar orong aang. (Noto cotatan nyan Lukas 11:34.) Mungkin nyan intoi ‘kopadau’ borati dulun co herak pomihi. ‘Pindong’ borati dulun co pongalam.
24Aroh bodai ico jungus bogawi indan duo tuan. Amun are umpi alo isan iyoh, are baya angar mongasihi ico tuan tapi dolee ma icoeh. Are baya angar tuhit ma ico tuan, tapi aroh tuhit ma co icoeh. Sanioh ka ma ikan. Aroh bodai ikan jarin jungus Mohotara nyan waktu co samah ka ikan jarin jungus koponato.”
Aroh koatir tapi bosimpuh ma Mohotara
6:25-34
(Luk. 12:22-31)
25“Awi Mohotara monguasa kobolum me, maka aroh koatir tintun kanon korih indan kobolumme. Aroh koatir tintun lembon pokajan indan betimme. Bolum meleh penting hangki kanon. Beti meleh penting hangki lembon pokajan. 26Bolajar ingkan kawan beleu nyan langit. Iroh aroh mimbun, aroh mutoi. Iroh aroh mika kanon ponah uwung. Tapi Mohotara co Tamammu nyan sorga nyodia kanon ina doh boraoi bolum. Mositi ikan ocu meleh boleka hangki kawan beleu taiyoh! 27Oluco ikan koatir ikan mahi aroko angar lian nambah umur me.
28Aroh ikan koatir tintun lembon pokajan. Bolajar ka ingkan kawan dolak uru co nyuluh. Kawan dolak taiyoh aroh bogawi hintang aroh nusuk. 29Tapi kawan dolak taiyoh ocu meleh bungah hangki lembon laca Salomo hiyah jaman sinan. 30Ooi ikan co kurang porocaya uru nyan dolan aang nyuluh somontara leh, derek tongonati paluh tonyaha, tomasuk kawan dolak uru taiyoh. Tapi Mohotara tenden umpieh komok. Mositi Mohotara angar dohop ikan meleh hangki uru hintang dolak nyan dolan aang. 31Jadi, aroh koatir dapot mantun: Ome co angar tonganon kaih? Ome co angar tongorih kaih? Ome co angar tonyungkop kaih? 32Kawan dulun co aroh nyono Mohotara horoholuh baya nganyap tintun kokon onon. Tapi Mohotara co Tamam me nyan sorga ocop monau kokon koporuluan me yoh. 33Jadi, nganyap bat houn kokon aang co bujur nyan Korojaan Mohotara. Maka, opah iyoh, uras koporuluan me cagar ihin indam me ka. 34Poko tului iyoh, kondai cotuh aroh koatir tintun ondo nyuap. Momikir tintun ondo nyuap nyan kondai nyuap. Oko cukup orong kosusah ponah ico ondo ika tomomikir.”#6:34 Ayat cotuh aroh borati ito boraoi nganyap kosonangan sika ondo paluh aroh momikir tintun ondo nyuap. Pikiran cioh sala (1Kor. 15:32; Luk. 12:19-20). Ayat cotuh borati, amun ito bosimpuh ma Mohotara, sika ondo ito boraoi mongatasi kosusah co oko.
अहिले सेलेक्ट गरिएको:
Matius 6: TBSS
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
