Иоан 1
1
Кывйыс лоис мортӧн
1Медводз Кыв вӧлі.
Кывйыс Енкӧд вӧлі.
Кывйыс Ен вӧлі.
2Кывйыс водзысяньыс Енкӧд вӧлі.
3Ставсӧ Сы пыр вӧчӧма.
Сытӧг немтор абу лоӧма.
4Сы пытшкын вӧлі олӧм.
Олӧмыс йӧзыслы вӧлі югыдӧн.
5Югыдыс пемыдас югдӧдӧ,
сійӧс пемыдыс эз пӧдты.
6Ен мӧдӧдіс Иоан нима мортӧс. 7Сійӧ локтіс висьтавны Югыдыс йылысь, медым быдӧн эскис Югыдыслы. 8Ачыс сійӧ эз вӧв югыдыс, сійӧ локтіс висьтавны Югыдыс йылысь.
9Збыль Югыдыс, быд мортӧс югдӧдысь,
локтіс муюгыдас.
10Сійӧ вӧлі муюгыдас,
муюгыдсӧ Сы пыр вӧлі вӧчӧма,
но муюгыдыс эз тӧд Сійӧс.
11Сійӧ локтіс Ас йӧз дінас,
но найӧ эз сибӧдны Сійӧс.
12Сійӧс сибӧдысьяслы, Сылы эскысьяслы,
Сійӧ сетіс лоны Енлӧн ныв-пиӧн.
13Найӧ чужисны эз вирсянь,
эз морт кӧсйӧмсянь,
эз верӧс кӧсйӧмсянь,
а чужисны Енсянь.
14Кывйыс лоис мортӧн,
Сійӧ оліс миянкӧд буралӧм-збыльнас тыр.
Ми аддзылім Сылысь дзирдлунсӧ.
Сӧмын ӧтка Пиыслы
вуджӧ татшӧм дзирдлуныс Батьсяньыс.
15Иоан гораа юӧртліс Сы йылысь: «Тайӧ дзик сійӧ Мортыс, код йылысь ме висьтавлі, мый ме бӧрся Локтысьыс меысь ыджыдджык, ӧд Сійӧ меысь водзджык вӧлӧма».
16Миянлы быдӧнлы Сы озырлунысь вичмис
буралӧм вылӧ буралӧм.
17Индӧдсӧ вӧлі сетӧма Мӧисей пыр,
а буралӧмыс да збыльыс воис Исус Кристос пыр.
18Йӧзыс Енсӧ эз аддзывлыны,
сӧмын ӧтка Пиыс,
Бать дінас олысьыс,
восьтіс Сійӧс миянлы.
Пыртысь Иоан
(Мт. 3:1-12; Мк. 1:1-8; Лк. 3:1-18)
19Иудейяслӧн веськӧдлысьяс мӧдӧдісны Ерусалимысь попъясӧс да левитъясӧс юавны Иоанлысь, коді сійӧ. 20Иоан соссьытӧг веськыда шуис: «Ме абу Кристос#1:20 Видзӧд Мт. 1:16.». 21Сэки сылысь юалісны: «Коді нӧ тэ? Илля?» Сійӧ шуис: «Абу». Найӧ бара юалісны: «Пророк-ӧ тэ?» Сійӧ вочавидзис: «Абу». 22Сэки сылы шуисны: «Коді нӧ тэ? Мый миянлы вочавидзны миянӧс мӧдӧдысьяслы? Мый шуан ас йывсьыд?» 23Иоан вочавидзис налы: «Ме – овтӧминын горзысьлӧн шыыс: ”Веськӧдӧй-шыльӧдӧй туй Господьлы!” Тадзи коркӧ висьталіс Исай пророк».
24Фарисейяссянь мӧдӧдӧмаяс 25юалісны Иоанлысь: «Тэ кӧ абу Кристос, абу Илля, абу пророк, мыйла, сідзкӧ, йӧзсӧ пыртан?» 26Иоан вочавидзис налы: «Ме пырта сӧмын ваӧн, но тіян пӧвстын эм Морт, кодӧс ті онӧ тӧдӧй. 27Сійӧ ме бӧрын локтӧ, но Сійӧ меысь водзджык нин вӧлӧма. Ме ог шогмы разьны Сылысь кӧмкот кӧвсӧ».
28Тайӧ вӧлі Вифаварын, Йӧрдан ю сайын, кӧні Иоан пыртліс йӧзсӧ.
Енлӧн Баля
29Аскинас Иоан аддзис сы дінӧ локтысь Исусӧс да шуис: «Видзӧдлӧй, тайӧ Енлӧн Баля. Сійӧ вештӧ став йӧзлысь мыжъяссӧ. 30Сы йылысь ме висьтавлі нин, мый ме бӧрся локтӧ Морт, коді меысь ыджыдджык, ӧд Сійӧ меысь водзджык вӧлӧма. 31Сійӧс ме эг тӧдлы, но локті ваӧн пыртны, медым Израиль тӧдмаліс Сійӧс».
32Иоан веськыда висьталіс: «Ме аддзылі, кыдзи енэжсянь гулю моз лэччис Лов да кольччис Сы вылӧ. 33Ме эг тӧдлы Сійӧс, но ваӧн пыртны менӧ Мӧдӧдысь шуис меным: ”Кор Тэ аддзан, мый код вылӧ кӧ лэччас Лов да кольччас Сы вылӧ, буретш Сійӧ кутас пыртны Вежа Лолӧн”. 34Ме аддзылі тайӧс да эскӧда тіянӧс: Сійӧ – Ен Пи».
Медводдза велӧдчысьяс
35Мӧд луннас Иоан аслас кык велӧдчыськӧд бара сулаліс ю дорын. 36Локтысь Исусӧс аддзигӧн сійӧ шуис: «Видзӧдлӧй, тайӧ Енлӧн Баля!» 37Тайӧс кылӧм бӧрын кыкнан велӧдчысьыс мӧдӧдчисны Исус бӧрся. 38Исус бергӧдчыліс, аддзис Сы бӧрся локтысьясӧс да юаліс налысь: «Мый тіянлы колӧ?» Найӧ вочавидзисны: «Велӧдысь, кӧні Тэ олан?» 39Исус шуис: «Локтӧй да видзӧдлӧй». Найӧ мунісны, аддзисны Сылысь оланінсӧ да кольччисны сэтчӧ лунтыр кежлӧ. Вӧлі нёль час гӧгӧр.
40Тайӧ кыксьыс, кодъяс мунісны Исус бӧрся, ӧтиыс вӧлі Ӧндрей, Симон-Петырлӧн вокыс. 41Сійӧ медводз корсис Симон воксӧ да висьталіс сылы: «Ми аддзим Мессияӧс!» Мӧд ногӧн кӧ, тайӧ лоӧ Кристос.
42Ӧндрей вайӧдіс воксӧ Исус дінӧ. Исус видзӧдліс сы вылӧ да шуис: «Тэ Симон, Ионалӧн пи. Тэнад нимыд лоас Кифа». Сылӧн вежӧртасыс – из, мӧд ногӧн кӧ – Петыр.
Исус корӧ Филипӧс да Нафанаилӧс
43Аскинас Исус мӧдӧдчис Галилея муӧ. Сэтысь аддзис Филипӧс да шуис сылы: «Лок Ме бӧрся». 44Ӧндрей да Петыр моз Филип вӧлі Випсаида карысь. 45Филип аддзис Нафанаилӧс да шуис сылы: «Ми аддзим Сійӧс, код йылысь вӧлі висьталӧма Мӧисей Индӧдын да пророк гижӧдъясын. Тайӧ Назаретысь Исус, Ӧсиплӧн пи». 46Нафанаил шуис Филиплы: «Позьӧ-ӧ мыйкӧ бурсӧ виччысьны Назаретысь?» Филип вочавидзис: «Лок да ачыд видзӧдлы».
47Исус аддзис Сы дінӧ локтысь Нафанаилӧс да шуис сы йылысь: «Тайӧ мортыс збыльысь Израиль войтырысь, сійӧ оз ылӧдчы». 48Нафанаил юаліс Сылысь: «Кытысь Тэ тӧдан менӧ?» Исус вочавидзис: «Филип кортӧдз на Ме аддзылі тэнӧ инжир пу улысь». 49Нафанаил шуис: «Велӧдысьӧй, Тэ – Ен Пи, Тэ – Израильлӧн Ӧксы!» 50Исус шуис сылы: «Тэ эскан, ӧд Ме шуи, мый аддзылі тэнӧ инжир пу улысь. Но тэ ыджыдджыкторъяс на аддзан». 51Сэсся содтіс: «Веськыда, веськыда висьтала тіянлы: ӧнісянь ті кутанныд аддзыны восьса енэжсӧ да Енлысь анделъяссӧ, кодъяс лэччӧны Морт Пи дінӧ да кыпӧдчӧны енэжас».
अहिले सेलेक्ट गरिएको:
Иоан 1: КБ
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
(c) Institute for Bible Translation, Finland, amp Finnish Bible Society, 2023
