San Mateo 2
2
Ndi̱xaa nda ndíchi, nda ndíkuni kimi, ndi̱xaa nda xíto nda Jesús
1Tá ka̱ku Jesús ñuu Belén ya ndíkaa estado Judea, ta ra Herodes ku ra ndi̱xiyo rey nuu na. Ta tiempo ikán ndi̱xaa nda ndíchi, nda ndíkuni kimi ñuu Jerusalén, ta ki̱xi nda chí nuu kéta ñu̱ꞌù vaxi ya. 2Saa tá ndi̱xaa nda ta ndi̱ndakan tuꞌun nda na ñuu Jerusalén, káchi nda saa:
―¿Mií kua ka̱ku ra loꞌo, ra kúu rey nuu na Judío? Saa chi nuu kéta ñu̱ꞌù xi̱ni nde ke̱ta kimi, saa ku̱ndaa ini nde xa ka̱ku ra, yakan vaxi nde koto nde ra, xaa kaꞌnu ñaꞌa nde ―káchi nda ndíchi ikán.
3Tá ku̱ndaa ini ra rey Herodes xaꞌa tuꞌun ya ndi̱kaꞌan nda ndíchi ikán, ta ndi̱ndiꞌi ni ini ra. Saa ndíꞌi ni tu ini ndiꞌi na ñuu Jerusalén va. 4Saa ku̱u nuu ndi̱kaya ndiꞌi ra rey Herodes nda naꞌnu nuu sutu, xiꞌin nda maestro nda sínaꞌa ya ta̱a ra Moisés, ta ndi̱ndakan tuꞌun ra nda mií kua kaku ra kúu Cristo, ra vaxi sikaku na ñuu ivi. 5Saa ndi̱kuiin nda, káchi nda saa:
―Ñuu Belén, ya ndíkaa estado Judea yóꞌó kaku ra, chi saa káchi tuꞌun Ndioxi ya ta̱a nda profeta, nda ndikaꞌan ndoso tuꞌun yuꞌun Ndioxi xinaꞌa, káchi ya saa:
6Ñuu Belén, ya ndíkaa estado Judea kuu iin ñuu ya ndáa yaꞌvi ni ka nuu ndiꞌi ñuu,
chi nda ñuu ikán kixi ra xaa kuenta xiꞌin na ñuu Israel,
káchi Ndioxi, nuu ta̱a nda profeta ―káchi nda ndíso chiñu nuu na judío xiꞌin ra rey Herodes.
7Saa ka̱na sěꞌe ra Herodes nda ndíchi, nda ndíkuni kiti kimi, ta ndi̱xaa nda nuu ra. Saa ndi̱ndakan tuꞌun ra nda ndá kivi ku mií ya ndixa ndi̱yeꞌe kiti kimi ikán. 8Saa ti̱ꞌvi ra nda kuaꞌan nda ñuu Belén, ta ndi̱kaꞌan ra soꞌva xiꞌin nda, káchi ra saa:
―Kuáꞌan ndo ñuu Belén, ta ndakan tuꞌun vaꞌa ndo xaꞌa ra loꞌo. Tá ku̱ndaa ini ndo xaꞌa ra nuu íyo ra, ta saa ndiko koo tuku ndo ndituꞌun ndo xiꞌin i, saa kuꞌun i xaa toꞌo i ra ―káchi ra Herodes xiꞌin nda.
9Sindiꞌi tá xi̱ni soꞌo nda ya ndi̱kaꞌan ra rey xiꞌin nda, saa ka̱na koo nda kuaꞌan nda. Ta kimi kiti xi̱ni nda ñuu nda, ínuu ri nuu nda kuaꞌan nda. Saa ndi̱xaa ri ndi̱kunuu ri nuu índuꞌu ra loꞌo ikán xiꞌin siꞌí ra. 10Tá xi̱ni nda ndi̱kunuu tí kimi ikán, ta saa ku̱sini ni nda.
11Tá ndi̱kiꞌvi nda ini veꞌe, saa xi̱ni nda íyo yá María, xiꞌin ra loꞌo seꞌe yá, saa si̱kusiti nda xáa kaꞌnu nda ra loꞌo ikán. Saa xu̱na nda xatun vali ndíso nda, ta ta̱va nda kàà oro xiꞌin xuxa ya yaꞌvi ni ta tami ni xaꞌan ya, xiꞌin nduta tami xaꞌan, rá náni mirra. Ndiꞌi ya yóꞌó si̱niꞌi nda nuu ra loꞌo ikán. 12Saa si̱xani Ndioxi nda ndíchi ikán, ta ku̱ndaa ini nda, ya ndïko koo nda ñuu nuu íyo ra Herodes. Ta saa ndi̱ko koo nda kuanuꞌu nda ñuu nda, ta köo ndi̱ndiko koo nda nuu ra Herodes. Inka ichí ndi̱kiꞌin nda kuaꞌan nda.
Kivi kuaꞌan na veꞌe Jesús ñuu Egipto
13Tá ke̱e nda ndíchi ikán kuanuꞌu nda, ta ñǔu saa ndi̱kixi ra José, saa ndi̱xani ra ndi̱tuvi iin tatun ke̱e nuu Ndioxi nuu ra káꞌan ya xiꞌin ra, káchi ya saa:
―Kuándikoo, ta ndikiꞌin un ra loꞌo kuꞌun xiꞌin un xiꞌin siꞌí ra, ta kama ni koo ndo kunu ndo kuꞌun ndo xiꞌin ra ñuu Egipto. Ikán koo ndo nda kivi ná kaꞌan i xiꞌin ndo, saa ndiko koo ndo, saa chi ndinduku ra rey Herodes ra loꞌo, chi kúni ra kaꞌni ñaꞌa ra ―káchi tatun Ndioxi ikán xiꞌin ra José.
14Saa ndi̱koo ñǔu ra José ndi̱kiꞌin ra kuaꞌan ra xiꞌin yá María tin ra loꞌo, kuaꞌan na chí ñuu Egipto. 15Ikán ndi̱xiyo na nda kuiya ndi̱xiꞌi ra rey Herodes. Saa ndi̱xinu tuꞌun Ndioxi ya ta̱a iin ra ndi̱kaꞌan ndoso tuꞌun ra xinaꞌa nuu ndi̱kaꞌan ra, káchi ra saa: “Ka̱na i seꞌe i ke̱ta ra ñuu Egipto, ta ndiko koo ra nuꞌu ra ñuu ra”, káchi tuꞌun Ndioxi, ya ta̱a iin ra ndi̱kaꞌan ndoso tuꞌun Ndioxi.
Xa̱ꞌnda chiñu ra rey Herodes ya ná kaꞌni na ndiꞌi na vali
16Tá ku̱ndaa ini ra Herodes ya si̱ndaꞌvi nda ndíchi ikán ra, saa ndi̱saa ni ra. Ta ki̱ꞌin ra kuenta xiꞌin tiempo ya ndi̱kaꞌan nda xiꞌin ra. Saa xa̱ꞌnda ra chiñu ya ná kaꞌni nda lapa ndiꞌi na taa vali, na ndóo ñuu Belén xiꞌin ndiꞌi ñuu ya ñúꞌu yati, na uvi kuiya chí ni̱nu̱ ku na kuvi ndiꞌi káchi ra. 17Saa ndi̱xinu tuꞌun ya ta̱a ra ndi̱kaꞌan ndoso tuꞌun Ndioxi, ra Jeremías, káchi ra saa:
18Xi̱ni soꞌo na xáku ni ná síꞌi ñuu Ramá,
ndee ni xáku ná, ta kúsuchi ni ini ná,
yá Raquel ku yá, xáku ni xaꞌa seꞌe yá
ta köo xíin yá ndiko ini yá xaꞌa seꞌe taa vali yá saa chi nda xa ndi̱xiꞌi ku nda, káchi tuꞌun Ndioxi, ya ta̱a ra Jeremías xinaꞌa.
19Sindiꞌi tá ndi̱xiꞌi ra Herodes, saa iin ñǔu ndi̱xani ra José tá íyo ra ñuu Egipto, ndi̱xani ra ndi̱xaa tatun Ndioxi káꞌan ya xiꞌin ra, káchi ya saa:
20―Kuándikoo ta ndikiꞌin ra loꞌo xiꞌin siꞌí ra, ndiko koo ndo kuꞌun ndo xiꞌin ra ñuu Israel. Saa chi xa ndi̱xiꞌi na kúni kaꞌni ñaꞌa ―káchi tatun Ndioxi xiꞌin ra ndi̱xani ra.
21Saa ndi̱koo ra José ndi̱kiꞌin ra ra loꞌo xiꞌin siꞌí ra, ta ndi̱ko koo na kuanuꞌu na ñuu Israel. 22Saa ku̱ndaa ini ra José ya ra Arquelao, seꞌe ra Herodes, ku ra ndi̱kiꞌin chiñu nuu iva ra estado Judea, ta ndi̱ndiꞌvi ra kuꞌun ra chí ikán. Saa ndi̱xani tuku ra nuu ndi̱kaꞌan iin tatun Ndioxi xiꞌin ra ya küꞌun ra estado Judea. Ta saa ndi̱kiꞌin ra kuaꞌan ra ichí ya kuaꞌan estado Galilea. 23Tá ndi̱xaa ra ikán ta ndi̱kiꞌin ra kuaꞌan ra koo ra ñuu Nazaret ya ndíkaa estado Galilea, saa ndi̱xinu tuꞌun ya ta̱a nda ndi̱kaꞌan ndoso tuꞌun yuꞌu Ndioxi xinaꞌa, ka̱chi nda saa: “Ra tiꞌvi Ndioxi sikaku na ñuu ivi ta ra ñuu Nazaret ku ra”, káchi tuꞌun Ndioxi ya ta̱a na xinaꞌa.
अहिले सेलेक्ट गरिएको:
San Mateo 2: xta
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Active: ©Wycliffe Bible Translators, Inc. All rights reserved.
