Luk 6

Jizɔs angwe uwun ihɔ imɛmɛn Ujus

(Matiyo 12.1-8; Mak 2.23-28)

1Ihɔ imɛmɛn Ujus ingen, Jizɔs ghɛ ayɛghɛnɛv anav vɛru ikaren kɔ ikɔr, ayɛghɛnɛv anav vɛ zɔr asangh akaa vɛ ɛnjingir ghɛ avo vɛru ghi iyan. 2Kpa Ufarasi agenɛv vɛ pine na, “Kine ɛr sɛ umbun igban ina uzɔ ta umbun izɔrun asangh akaa Ihɔ imɛmɛn Ujus?”

3Jizɔs arumun, “Umbu ɔɔr kɔ uka Aonz mɔ Dɛvid a ɛr kpɛ ungwen un ghɛ urɔng una vɛru ijon gha? 4Mɔ anɔr kɔ itumbɛ Aonz atɛng ubrɛd ungwen vɛ tsɛgha kɔ Aonz ungwen ɔr wayi ayayi gha sa apɛɛnɛv anav Aonz tas ne vɛ ayayi. Aya avo urɔng una.” 5Jizɔs akaa avo na, “Uwan Ɔro kpa angwe Uwun Ihɔ imɛmɛn.”

Jizɔs akos ɔr Ihɔ imɛmɛn Ujus

(Matiyo 12.9-14; Mak 3.1-6)

6Ihɔ imɛmɛn Ujus igen, vɛ anɔr kɔ itumbɛ izwangnɛn Ujus ne aru ghi itɛsɛn, ɔr ugen aru ken a umuwa uvo ayanɛgh. 7Ufarasi ghɛ atɛsɛnɛv mɛnna Ujus vɛru ɛnɛn ikeren ihang ingin vɛ kɔr avo na Jizɔs agba mɛnna hin vɛ ram ghɛ ana, ne vɛru ghi ɛnɛn un zan akos ɔr iwan hun Ihɔ imɛmɛn Ujus.

8Kpa Jizɔs afɔ ukwagh ungwen vɛru ghi umburun kɔ ghɛ asɛma. Akaa ɔr iwan hun na, “Mugh isa va atire han ishi hin iyɔr amem vɛ ɛn ghɛ awɛ.” Amugh isa atire hu ishi.

9Jizɔs akaa ghɛ avo na, “Mɛ pine un, kine mɛnna iwas ikaa na ghi ɛr Ihɔ imɛmɛn? Ukwagh usɛ hin ukwagh ube, ɔ arǝn umuwa ɔro hin uwuwan umuwa ɔro?”

10Agɛma ɛn avo amem, akaa ɔr iwan hun na, “Narɛr uvogh.” Anar uvogh, ne uvogh unagh hun ushiya. 11Ufarasi avo atɛsɛnɛv mɛnna anav Mosis, asɛma avihi avo ken vɛ kɔr ghi iramen ukwagh ungwen vɛ ɛr ghu Jizɔs.

Jizɔs atsuwa ayɛghɛnɛv puwɛ ahar

(Matiyo 10.1-4; Mak 3.13-19)

12Aru ihɔ igen Jizɔs ayov kɔ ugo iramen ghu Aonz, atsa ken uramen ghu Aonz kpem usov vuse. 13Ne utur atah ayɛghɛnɛv anav amem atsuwa puwɛ-ahar, amban vɛ atah na, ayɛghɛnɛv amban atsuwa atiye avo nan:

14Samon (ungwen ana un itiye na, Pita). Andurɔ (Uwanomgban Pita).

Jɛm,

Jon,

Filip,

Batalomi.

15Matiyo,

Tɔmɔs,

Jɛm (Uwan una Afɔnsu).

Samon (Ɔr ungwen ityo-ina ingiye un ghi isima).

16Judas (Uwan una Jɛm).

Judas Isikariyot (Ungwen ato Jizɔs mɔ). 17Jizɔs asen ghɛ ayɛghɛnɛv amban atsuwa kɔ ichind, mɔ ayɛghɛnɛv anav tsɛng vɛru hen, ghɛ iyɔr agenɛv tsɛng amban vɛ duwe kɔ utar Judiya, utar Jerusalɛm ghɛ amban vɛ duwe kɔ itar Taya ghɛ Sidon. 18Vɛ va imgban urɛhɛ Aonz ta akos awen avo. Amban ajɔv azayi avo iyɔr mɔ akos avo vɛ shiya. 19Mɔ-mɔ anɔngɔyi uperin un, mɔ ikɔw ukosen aduweyi kɔ ghɛ ana akos avo amem.

Jizɔs aram ukwagh ibɛrɛn ghɛ ivihi-uzɔ

20Jizɔs agɛma kɔ ayɛghɛnɛv anav akaa na:

“Ka shiya un amban umbun ichan,

umbun ghu utorov unav Aonz.

21Ka shiya un amban umbun ijon hanagen,

Aonz ɛr ana un ghɛ akuma un.

Ɛr ka shiya ghu un amban umbun ivangnɛn hanagen,

ɛr usen ahan.

22Ka shiya un amban iyɔr vɛ tsɔn un,

vɛ vund un ɛshigh vɛ hoo un

vɛ vihi un itiye,

ɛchi Uwan Ɔro.

23“Sighan hin ghɛ shiya un ɔ ɛn akaa angan a ɛr ghu un itiyo ikaa, mɛnɛn uwon kɔisa akar avo. Ku mɔ hun ne utir avov atsɛv vɛ tson aramenɛv ɛchi Aonz.

24“Ɛr uyan ichan shisha kɔ ishi un amban umbun utor,

ukorun uwon mɛnɛn han utar.

25Ɛr uyan ichan un amban ɔ iren hanagen,

Ɛr urun ijon.

Ɛr uyan ichan un amban umbun isen ahan hanagen,

ɛr uwan ikuse uvangnɛn.

26Ɛr uyan ichan un amban iyɔr isighan un hanagen,

Ku mɔ ne utir avov vɛ sighayi aramenɛv ɛchi Aonz akerav.

Kashiya un ghɛ atsɔnonov avonov

27“Mɛ ɔɔr un amban umbun imgban; Ghɛshiya un ghɛ atsɔnonov, Ɛr asegh ghɛ amban vɛ tsɔn un. 28Na ibɛrɛn kɔ amban vɛ vihi un uzɔ, ram ghu Aonz ɛchi amban vɛ ɛr ghu uwɛ dangdang mɔ. 29Ɔ ɛn ɔr ata un usamp uhɛnghɛ umɔm gɛma ugenɛgh ukumɔ hin amas itan. Ɔ ɛn ɔr ahonz uwɛ ubagu irigha na un irigha ungwen kɔ imin kpa. 30Na hanamɔ ɔr ungwen a hura kɔ ghu uwɛ, ɔ ɛn ɔr ahonz uwɛ ukwagh de un ghɛ ɛwɛ. 31Ɛr kɔ iyɔr agenɛv ɛn mɔ uker na vɛ ɛr ghu uwɛ.

32“Ɔ ɛn ka shiya uwɛ ghɛ amban ashiya avo ghu uwɛ tas kine mɛnɛn ukɔr ghɛ ɛwɛ? Iyɔr abev kpa amba ɛrɛn isegh kɔ iyɔr amban vɛ ɛr asegh ghɛ avo. 33Ɔ ɛn ɔ ɛr asegh ghɛ amban vɛ ɛr asegh ghu uwɛ tas kine mɛnɛn ukɔr ghɛ awɛ? Iyɔr abev kpa amba ɛrɛn asegh ghɛ iyɔr amban vɛ ɛr asegh ghɛ avo. 34Ɔ ɛn upɔr amban ufɔ na ɛr vɛ kɔrɔw tas, kine mɛnɛn ukɔr ghɛ ɛwɛ? Iyɔr abev kpa amban pɔrun amban vɛ akɔr avo mɔ. 35Kpa ghɛshiya uwɛ ghɛ atsɔnonov avov, ɛr asegh ghɛ avo, pɔr avo ka ber ase na vɛ hire ana uwɛ va gha. Ta mɛnɛn uwow akar avo, Ku mɔ ne urun myem anav Uhɛmban Aonz, itiyo ikaa Un angwe isima isɛ kɔ amban amba pun un ghɛ iyɔr ambusu. 36Run ishon-makɔrum ghi iyɔr, ɛn mɔ Utir uwon kpa angwe ishon-makɔrum.

Ka gba inan ɔr ibe gha

(Matiyo 7.1-5)

37“Ka tunɛyi ɔr gha, ɛn uwɛ kpa vɛ tunɛ uwɛ gha. Ka nayi iyɔr ibe tsuwar gha, ɛn uwɛ kpa vɛ de inan uwɛ ibe tsuwar. Guwe iyɔr ɛn uwɛ kpa vɛ guwe uwɛ. 38Nata Aonz ana uwɛ, ukar usɛ, akindigh, akɔr ayenges, ayiv ahayi, ta vɛ aha uwɛ ghi ikagh. Ikagh ikin ukar una ɔr ikine Aonz akar ta ana uwɛ.”

39Jizɔs atuwa avo ikan ingin: “Ɔr upir ase abɛɛn itɛsɛn upir ase ihang gha? Ɔ ɛn a ɛr mɔ avo amem vɛ agba kɔ ihingwa gha? 40Ɔr yɛghɛn ahɛmban Ɔr tɛsɛn una gha, kpa ɔ ɛn ayɛgh shisha abe afɔ ɛn Ɔr tɛsɛn una.

41“Kine ɔ ɛnɛn ihurugh ikin iki uwanomgban uwow kɔ ase, sɛ uku waiko ugungur ukon ungun kɔ ase awow gha? 42Nan uhiye su ukaa uwanomgban uwow na, ‘Uwanomgban dem mɛ du ihurugh ikin kɔ ise,’ ta uku ɛn ugungur ukon ungun kɔ ise iyow gha? Un atsunuv iyɔr, vandi iduwun ugungur ukon kɔ isɛ iyow, ta ɔ ɛn shisha su udu ihurugh ikin kɔ isɛ uwanomgban uwɛ.

Ufɔn ukon kɛ ghɛ atam ana

(Matiyo 7.16-20; 12.33-35)

43“Ukon ushiyan ungu umuwen atam abe gha, ukon ube ungu umuwen atam asɛ gha. 44Ufɔn ukon kɔ ghɛ atam ana angan umuwɛ. Ube uza sang atam ɔfig kɔ itine ukon asang gha. Atam ugrɛp amba sangen kɔ itine ukon asang gha. 45Ɔr usɛ ɛrɛn akaa asɛ angan anga un kɔ isima, ɔr ube ɛrɛn akaa abe, ɛn mɔ anga un kɔ isima. Ukwagh ungwen ɔr aramen aduwe kɔ isima ina.

Jizɔs aram ɔr uman ufɔn ukwagh ghɛ ɔr uman uranen ukwagh

(Matiyo 7.24-27)

46“Kine utanem na, ‘Uwun, Uwun,’ sɛ ukaa ɛrɛn akaa angan mɛ kaa gha? 47Hanamɔ ɔr ungwen ava kan ghu umwe sɛ amgba itɛsɛn iyam ta ɛr mɔ mkaa, mɛ tes un mɔ angwe. 48Angwe ɛn ɔr ungwen angwe iman itumbɛ ta atume itiyo itumbɛ sɛ ikuwe shisha ta awa iyi kɔ angon. Ɛr uvǝra una shisha sɛ uhǝng ukuwa utaiyi, kpa igba gha Ku mɔ vɛ tɔr vɛ ama shisha. 49Kpa ɔr ungwen amgba amu aam sɛ a ɛr gha angwe ɛn ɔr ungwen ama itumbɛ kɔ uwɔrawa sɛ awa itiyo itumbɛ gha. Ɛr uvǝra una shisha uhǝng ukuwa uta itumbɛ iginmɔ isɛnd inya imem.”

अहिले सेलेक्ट गरिएको:

Luk 6: UTA

हाइलाइट

शेयर गर्नुहोस्

कपी गर्नुहोस्