Matyiu 7
7
1O yěkěněkiděni, o banga wa yěkudwěni. 2Ikabojana yěkě ’anyu e yěkěněkidě yâ tepě eanyu e ka yěkěnudwě; na eyějâ ’anyu e yějěněkě yâ tepě eanyu e ka yějěnwě. 3E lě nd ’eâvě e umbwakiyě uhâmbâ u didi o dihâ ja mwana nyângwě, ndi wa piviye ukâkâ u didi o dihâ jâvě? 4Nd‘ o ka vâ lě na mwana nyângwě, na, Ta ha, mbi věngidě uhâmbâ o dihâ jâvě; umbwakiyate, ukâkâ u ndi o ijâvě dihâ? 5Âvě unoki, ta věngidě ukâkâ u jadi o dihâ jâvě mětě; běngě o yěněke bwe o ivěngidě ja uhâmbâ o dihâ ja mwana nyângwě.
6O věkeni e jadi hole mbwa, o uhwake tepěni pěrl janyu o ngweya i jadi, o banga ja pita jâ na beko beabu, na jâ ja ’luwa pě ka kom‘ inyěni.
7Uwakani, e ka věwěndi ’nyěni: vahakani, o ka duwandini: tinakiděni, i ka dubuwěndi ’nyěni: 8ikabojana, a uwakě uěhěpi a pahakiyandi; a vahakě a duwakandi; na, o a tinakidě, i ka dubuwěndi. 9A lě nja momo‐ě a didi ’nyěni o jadi, a di a běkě mwan‘ ’aju a uwa mâ pěmbě, na mâ‐a vě mâ ilale? 10Tombe a uwa mâ ejaka, a ka vi mâ mbamba? 11Opělě ’nyěni, ba di babe, wa yowě lěni ivě ja bana banyu belombo beyam‘, na kumbakidě Hângw‘ ’anyu a jad‘ o Hěvěn, hanga na a ka vi ba uwakě Mâ belombo beyamu wa? 12Ndi belombo beěhěpi ibeanyu be vahakě bato bapâkwe ba haka inyěni, haka tepi bâni nonaně; ikabojana ekae e ndi Elekanako na Basâki.
13Ngakiyani o jâmb‘ ihâlě; ikabojana jâmbě i n‘ upuju, na njeya e tepě o kena, e valanakidě o iwedo, na baitě ndi ba kěkě ovoně: 14Ikabojana jâmbě i nd‘ ihâlě, na njeya e kopya, e valanakidě o ’měnâ, na ba duwakě yâ ba te nyěvâ.
15Bandamakiděni na basâki ba ’vela ba vakě o ’nyěni o jadi na ibâtâ j‘ udâmbě, ndi o utema njâ ja majake. 16O ka yowěndi bâni na bebuma beâbu. Bato ba palakandi ngakya o mbolobonji, na belola o mbângě? 17Nonaně nd‘ o, ele eyamu yěhěpi e lângâkândi bebuma beyamu; ndi ele ’be e lângâkândi bebuma bebe. 18Ele ’yamu yaa lânge bebuma bebe, na ele ’be e ibě tepě na ngudi e lângâkě bebuma beyamu. 19Ele yěhěpi e ha lângâkâ bebuma beyamu, e kwělěkwěndi na yâ‐ya ’hwě o veya. 20Nandi, o, ka yowěndi bâni na bebuma beabu. 21Hanga na uěhěpi a vâkě n‘ Umba, na, Upangiyi, Upangiyi, nd‘ a ka pâyě o ipangiya ja Hěvěn: ndi kabo a hakě upango mua Paia a jad‘ o Hěvěn. 22Baitě ba ka vândi n‘ Umba o buhwa těboně, na, Upangiyi, Upangiyi, hwa bu yokwakidě na dina jâvě, na o dina jâvě ho pumakě děvil, nâ o dina jâvě ho haka belombo beitě be mamanakwě? 23Vâkâna Mbi ka pupi bâ, na, Mba ’wě inyěni: věngěměkěni Umbi jadi, ’nyěni ba hakě bobe:
24Ndi uěhěpi a yokakě ndaga tě ijamě ekadi, na mâ‐a haka jâ, Mbi ka kwanidi mâ moto wa iyowě a longakidi ndabo ’aju o ilale; 25Mbwiya ja nâ, na tonda ja pâ, n‘ upupě mua vunga, na beâ bea nyěmbělěně o ndabo tě: na yâ e kwe, ikabojana e kâmâmâkindi o ilale. 26Ndi uěhěpi a yokakě ndaga tě ijamě ekadi, na mâ‐a haye jâ, a ka kwanudwěndi eboki ya moto e longakidi ndabo ’aju o ebonda: 27mbwiya ja nâ, na tonda ja pâ, n‘ upupě mua vunga; na beâ bea nyěmbělěně o ndabo tě; ka yâ ya kwa; na ikwa jaju i diyakindi ’něně.
28E diyakindi, o Jisus a hukakidě ndaga těkadi, bato ba mamakindi iyokwanidě jaju. 29Ikabojana a yowkwakidi bâ panika moto a di na ngudi, hanga ka Balěndi.
अहिले सेलेक्ट गरिएको:
Matyiu 7: BNG1895
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Published by the American Bible Society in 1895.
