Matyiu 5
5
1O Mâ‐a yěněkidi bebimba bea bato, ka Mâ‐a beta ukodi; o Mâ‐a diyakidi diya, ka beyokwedi beaju bea viya o Mâ‐a jadi. 2Ka Mâ‐a bumudě udumbu muaju, na Mâ‐a ka yokwakidě bâ, na,
3Ibâtâ na ba nyamakě o melema; ikabojana ipangiya ja Hěvěn i nd‘ ijabu.
4Ibâtâ na ba yěněkě ngěbě ikabojana ba ka yenudwěndi mbya.
5Ibâtâ na ba di hwě: ikabojana ba ka jigandi he.
6Ibâtâ na ba yokakě nja na evělě o ivaha ja bwamu: ikabojana ba ka vulandi.
7Ibâtâ na ba yěněněkiyě ngěbě: ikabojana ba ka yěnudwě tepě ngěbě.
8Ibâtâ na ba bebumulema bea kěngěngě: ikabojana ba ka yěněndi Anyambě.
9Ibâtâ na balati ba monga: ikabojana ba ka tubwi na bana ba Anyambě.
10Ibâtâ na ba hakwě njuke o pělě ’a bwam‘: ikabojana ipangiya ja Hěvěn i nd‘ ijabu. 11Ibâtâ n‘ inyěni, oningě bato ba kilaka inyěni, na bâ‐ba ka haka inyěni njuke, na bâ‐ba ka timbakě inyěni jângâ ja ndaga ibe jěhěpi ja bojowa, o nyang‘ ’amě. 12Peyakani, n‘ inyěni o ka yěněkěni mbya ’něně; ikabojana mahomano manyu ma nd‘ o kena o Hěvěn: nonaně tepě o bâ‐ba hakidi basâki ba taki na viya njuke.
13O ndini vyanga via he: ndi oningě vyanga via nyangě hombo ’aju, vi ka pahiya lě pě hombo na ove? vakâna via bě te bwam‘ boa naně, na bo uhwakwě, na viâ vi ka pitakwě na beko bea bato. 14O ndini bwe ya he. Mboka ’něně ya longwě o ukodi yaa kutame. 15Bato ba běkě vitwa yoděngo, na bâ baa ngidě viâ ibomako ja kwe, ndi ba vamaki viâ o uhângâ; na viâ vi ka věkě bwe o ba jad‘ o ndabo běhěpi. 16Bwe ’anyu e bumwake o bato ba jadi, ovaně nd‘ o bâ‐ba ka yěně behavu beanyu beyamu, na bâ‐ba ka bendakě Hângw‘ ’anyu a jad‘ o Hěvěn.
17O piviyakeni n‘ ipě na Mbi viyendi ka weya belekanako na basaki: Mbu viya ka weya, ndi kabo ka timě beâ. 18Mbi vâki n‘ inyěni, pâkwěpâkwě, oba na he ndi be ka tombě, nd‘ o ibě n‘ itâbě na ba epuhu ehâlě yâkâ e ka tombě o belekanako, kabo beěhěpi bea timwě. 19A ka weyě elekanako yâkâ o belekanako tě behâlě ekabe, na mâ‐a ka yokwakidě bato nonaně, a ka tubwi bohâlě o ipangiya ja Hěvěn: nd‘ a ka hayě na mâ‐a ka yokwakidě, mâ t‘ a ka tubwi boněně o ipangiya ja Hěvěn. 20Ikabojana Mbi vâki n‘ inyěni, na, Oningě bwamu boanyu bo kebe boa Balěndi na Farisi, o ’běni na ngudi e ngakiyěni o ipangiya ja Hěvěn.
21O teni yokango na e vânâkudwi na ba ’gombe ya vyo, na, O weyake moto: nd‘ a ka weyě moto a ka diye na mahihi o yěkě: 22ndi Mbi vâki n‘ inyěni, na, A ka linguwě na mwana nyangwě o naně, a ka diyandi na mahihi o yěkě: tepě, na, A ka vâyě na mwana nyangwě, na, Raka, a ka diyandi na mahihi o ’hoka: nd‘ a ka vâyě, na, Morě, a ka diyandi na mahihi ma veya via Hěl. 23Nd‘ oningě wa vana bova boâvě o âltar, na nâvě wa yongidě na o na mwana nyângwě na ’lombo, 24wa ta dika bova boâvě ovaně pyělě na âltar, na nâvě wa ta vala ka nyěvěnidě na mwana nyângwě, nandi běngě o vake ka vě bova boâvě. 25Lataka n‘ uloni muâvě wâwâ o âvě o ngit‘ o njeya na ju; o banga egombe te ’gombe, uloni muâvě mâ‐a vě âvě o uyěkidi, n‘ uyěkidi mâ‐a vě âvě o uvomwanidi, na nâvě wa vamwě o meboka. 26Pâkwěpâkwě, Mbi vâki na nâvě, wa pume na vilolombo kabo wa vě farthing ya madikanido.
27O teni yokango na e vânâkudwěndi na ba vyo, na, O diyake na ihonde: 28ndi Mbi vâki n‘ inyěni, na, Uěhěpi a ka tamuwě mwajo o idokuwa jaju, a handi ihonde na ju pâni o ulema muaju. 29Oningě dihâ jâvě iyomi ja panga ’vě o kâbâkâ, tongwaka jâ, na nâvě wa uhwa jâ: ikabojana e ndi bwamu na nâvě na evand‘ ’âvě yâkâ e nyangaka, ndi hanga na nyolo ’âvě yěhěpi e uhwakwě o Hěl. 30Tepě, oningě ikadu jâvě iyomi ja panga ’vě o kâbâkâ, lenaka jâ, na nâvě wa uhwa jâ: ikabojana e ndi bwamu na nâvě na evand‘ ’âvě yâkâ e nyangaka ndi hanga na nyolo ’âvě yěhěpi e uhwakwě o Hěl. 31E vânâkudwi, na, A ka věngidě mwad‘ ’aju, a věke mâ ejanganangobo ya ivěngidě. 32Ndi Mbi vâki n‘ inyěni, na, A ka věngidě mwad‘ ’aju, i diye itato j‘ ihonde, vâkâna a pangi mâ a haka ihonde: na a ka bâyě mâ a di věngudwěngo, a handi ihonde.
33O tepěni yokango na e vânâkudwi na bâ o ’gombe ya vyo, na, O kanakiye nyolo ’âvě mětě, ndi timakě ikana jâvě o Upangiyi a jadi. 34Ndi Mbi vâki n‘ inyěni, na, O kanakiyeni na vilolombo; tombete Hěvěn, ikabojana e nd‘ eka ya Anyambě; 35tombete he, ikabojana e ndi ebonga ’aju e pitakiyě; tombete Jěrusalěm, ikabojana e ndi mboka ya Upol‘ uněně. 36Na nâvě, tepě, o kanakiye molo muâvě, ikabojana wa yâlě o panga howe pâkâ botano tombe bovindo. 37Ndi joyi janyu i diyake, E, e; Nyawě, nyawě: ikabojana beěhěpi be di wa na ekabe be vakiyandi o bobe.
38O teni yokango na e vânâkudwi, na, Dihâ te dihâ, ihonga t‘ ihonga: 39ndi Mbi vâki n‘ inyěni, na, O timbakeni bobe: ndi a ka bweyě âvě ibuku ’yomi, ulwakidě mâ ipâkwě tepě. 40Oningě moto a ha ’vě ’vâvâ, na mâ‐a nângâ ngâi ’âvě, a nangake tepě koto ’âvě. 41Na, a ka pinyilid‘ âvě na kěkě na ju nanda pâkâ, kěkěngě na ju ibale. 42Věkě a jombakě âvě, na nâvě o kumbakiye a vahakě o nângânâ âvě njěmbi mbuhwa.
43O teni yokango na e vanakudwi, na, Tândâkâ a diyakě pyělě na nâvě, o ka binaka uloni muâvě. 44Ndi Mbi vâki n‘ inyěni, na, Tândâkâni baloni banyu, vambakiyani ba hâkâkě inyěni ibâtâ, hakani ba binakě ’nyěni bwamu, n‘ inyěni o ka kalakiyani o pělě ’a ba ngongolakidě ’nyěni, na ba hakě ’nyěni njuke; 45ovaně nd‘ inyěni o ka diyěni bana ba Hângw‘ ’anyu a jad‘ o Hěvěn: ikabojana A pumaki joba o babe na o bayamu ba jadi, na Mâ‐a nâkidě mbwiya o ba mahuwa na ba ha ibě mahuwa ba jadi. 46O li na nja mahomano‐ě, oningě o tândâkâni ba tândâkě ’nyěni? bayoli pago baa hakate nyanga tě? 47Nandi, oningě wa homani bana ba nyângwě pa, nd‘ o haka li nde wa na bapâkwě? bayoli pago baa hakate nyanga tě? 48Diyakani bânjâbiyěngo, panika Hângw‘ ’anyu A jadi o Hěvěn A di hanjâbiyěngo.
अहिले सेलेक्ट गरिएको:
Matyiu 5: BNG1895
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Published by the American Bible Society in 1895.
