Maki 5
5
Tisasi Ɂe Ɂeroa Hi Apa Enisero Mae Sena Ɂiwera Maania Mane Wau Keresa
(Matiu 8:28-34; Ruku 8:26-39)
1-6Tisasi haɂania para ni mane naia na kira raa horosia namo Kariri, ma kira hura poɂo ni ɂare wau ana namo ana hanua rataɂi Keresa. Te mane ne enisero mae sena ɂe ana, ɂe ɂoni taina.
Ɂoniɂoniha mane nena sii hana Tisasi ɂe hura taha ɂe ɂuriɂe. Ɂe ɂoni raona hii haooto hana rukasi ana hii noni kira mae ana hanua nena. Ɂe ɂokira rikaɂa. Ɂe rikaɂa hana toɂi haahi ana ɂewaɂa. Ɂihaitaa taki ana ɂe rau ana seni wau sii, seni ɂe si toɂi haahia. Horoɂa ɂiwera taɂaa kira takia rua ɂaiɂaina ma rua ɂaɂena ana seni. Ɂoneho, ma ɂe moosia seni na ke, ma ɂe potaria rua ɂaeani kira rua takia rua ɂaɂena. Ɂe ɂoni matorana hii haooto ana hanua ni oha ma ana hii ira taraha. Ɂe ka uro ma ka hunua rapena ana nasi.
Sii hana horoɂa Tisasi ɂe hura, ɂe ɂoni haɂitau raona namo kane. Ma mane ɂaiɂe ɂe piɂi reesia Tisasi. Ma ɂe oro rawahia tarea maania hii haooto. Horoɂa Tisasi ɂe hura, ma ɂe taɂe maania irora. Siia, mane ɂaiɂe ɂe poruru ma ɂe pautou naɂo hana. 7-8Nena, ma Tisasi ɂe piɂi naɂa ɂuriɂe, “Enisero mae sena, ɂo ko raa hi apa maania mane ɂaiɂene.”
Ɂoneho, ma enisero mae sena na, ɂe poi paina ɂuriɂe, “Waratoɂo ɂe paina taroriu. Ma ɂi ɂo, Tisasi, ɂo Miɂi Tarena Waratoɂo. Ɂe mae roroɂai ɂo. Na ka ɂiuutanai ɂo hana ɂo ko naɂa akau naɂo hana Waratoɂo hana ɂo si haɂaweo nau!”
9Nena, ma Tisasi ɂe suuaia, “Ratamu atai?”
Ma ɂe orisia Tisasi ɂuriɂe, “Rataku Hutaa Paina, tona ɂana ɂi ɂami ɂiwera rikaɂa.” 10Ma enisero mae sena ɂiwera na, kira sukaa hana ɂe si ɂero kira maania hanua nena.
11-13Ma haoraɂia ni poo paina kira hana hana popona ira karahinia rihi Tisasi ɂe ɂoni ai. Haoraɂia nena ɂe marisiina rua sinora ni poo. Nena, ma enisero mae sena na kira sukaa ɂuriɂe, “Horoɂa ɂo ko ɂero ɂami, ma ɂo ko raitaɂani ɂami hana ɂami ka raa tarea poo ma ɂami ka ɂoni ana kira.”
Nena, ma Tisasi ɂe raitaɂani kira ke, ma enisero mae sena ɂiwera na, kira raa maania ma kira siri hi raona haoraɂia ni poo na. Ma haoraɂia ni poo kira oro tarea kekere ɂana ira ne ɂe araɂa rikaɂa, ma kira teke raona namo, ma kira koɂu.
14Nena, ma hii mane ne kira rio soɂona haoraɂia ni poo na, kira oro hi raona komu Kerasa ma ana te haru komu masika ɂohia hana haɂanoroha soɂona hii ɂare ɂe rau nena. Nena, ma rautana noni kira hura taha hana reesi ana ɂare ɂe rau noɂo. 15Kira raa mai tarea Tisasi, ma kira reesia mane ne enisero mae sena ɂiwera kira haɂapipiua sii. Ma mane nena, ɂe toɂoru ɂapina Tisasi ke, ma ɂe hoko, ma ɂe rio manamanata ruɂu. Ma taɂaa nena, kira maɂu. 16Ma hii noni ne kira reesia huɂihuɂita ɂe rau, kira haɂanoroa te haru noni soɂona kura ana mane na, ma soɂona koɂuha rikimana poo na. 17Nena, ma taɂaa nena kira suuaia Tisasi hana ɂe ka raa maania hanua kira.
18Nena, ma ɂe ori ma ɂe taɂe raona irora. Ma mane enisero mae sena ɂiwera kira haɂariiriaa sii, ɂe ɂiuutanaia hana raaha haɂania. 19Ɂoneho, ma Tisasi ɂe parea, ma ɂe iria hana ɂuriɂe, “Ɂo ko ori hana nima ɂo, tarea taɂaa ɂo. Ma ɂo ko haɂanoro kira soɂona Waratoɂo ɂe raeuruhi ɂo ma ɂe taua hii ɂare rikaɂa hamu noɂo.” 20Ɂe ɂuna, ɂone mane nena ɂe roɂo hana. Ma ɂe raa haɂe haɂanoro raona hanua paina rataɂi Tekaporisi, ana ɂare rikaɂa Tisasi ɂe taua hana noɂo. Taɂaa kira noroa, ma kira rahe.
Tisasi Ɂe Kuraa Pore Taerasi Ma Te Keni Ɂe Kiruhaɂa
(Matiu 9:18-26; Ruku 8:40-56)
21Tisasi ma para ni mane naia, kira ori ana irora hi poɂo ni ɂare wau ana namo Kariri. Horoɂa kira ori taha, taɂaa ɂiwera kira roko ɂohia Tisasi taina kekere ɂana namo. 22Te mane paina ana nima ni hoɂaha taina, ratana Taerasi, ɂe raa mai raɂo. Ɂe reesia Tisasi, ma ɂe poruru naɂo hana. 23Ma Taerasi ɂe ɂiuutanaia ɂuriɂe, “Pore nau na ɂe ka kiru hana maeha. Raa mai, ma ɂo ko toɂi toɂo ana hana ɂe ka mauri ruɂu.” 24Nena, ma Tisasi ɂe raa haɂania, ma noni ɂiwera kira raa haɂania Tisasi raɂo, ma kira pepe ɂohia.
25Ma te keni ɂe mae rae ɂonisenaha rete, tona ɂana ɂapuna ɂe tahania soɂona awara ni harisi mana rua. Keni ɂaiɂene ɂe ɂoni taina ke raɂo. 26Ma ɂe weo rikaɂa. Ɂe horia rautana mane ni kuraha taraha, taɂa kira mae haipoonia, ma rikimana pata naia ɂe siko maania noɂo. Ma kiruha nena ɂe rikaɂa taroriua sii. 27Ɂe noroa wara soɂona ɂokiraha Tisasi hana haɂamauri ana noni. Ɂe ɂuna, ɂone ɂe haɂe raa matorana noni ɂiwera puri ɂana Tisasi, ma ɂe tau toɂo ana kareko naia. 28Ɂe niɂirae hana ɂe ka tau toɂo ana kareko Tisasi ke, ma ɂe ka mauri. 29Nena, ma keni ɂaiɂene ɂe tau toɂo ana kareko Tisasi na, ma ɂapuna ɂe topo rawahia ana aheha. Ma ɂe tau raea raona rapena, kiruha ma weoha naia ɂe siko hautaɂai noɂo.
30Nena, ma Tisasi ɂe raea ɂokiraha naia ɂe piɂi haɂamauria te noni, taɂa ɂe mae raea atai. Ɂe ɂuna, ɂone Tisasi ɂe riɂutaɂi matorana noni ɂiwera, ma ɂe suuai kira ɂuriɂe, “Atai ɂe tau toɂo ana kareko nau?”
31Ma para ni mane naia, kira orisia ɂuriɂe, “Ɂo reesia noni ɂiwera kira mai pepe tare ɂo! Ɂe tau ɂutaa ɂo suuai ɂami soɂona atai ɂe tau toɂo amu?”
32Ɂoneho, ma Tisasi ɂe rio ɂohia hana rae ana atai ɂe tau toɂo ana.
33Keni nena ɂe raea ɂare ɂe rau ana noɂo, ma ɂe raa mai tarea Tisasi, ma ɂe rawariri haɂi raeikiha. Ma ɂe apa naɂo hana Tisasi, ma ɂe haɂanoroa Tisasi ana rikimana ɂare noɂo.
34Nena, ma Tisasi ɂe iria taria, “Hoeku, ɂo mauri noɂo tona ɂana ɂo norutoɂo aku. Ɂo ko ori haɂi pepeataɂaha. Kiruha ɂo nena, ɂe siko noɂo.”
35Nena, ma te haru mane, kira hurataha mai maania nima mane paina Taerasi na. Kira hura taha ana horoɂa Tisasi ɂe ani naɂaha kane tarea keni nena, ma kira haɂanoroa Taerasi ɂuriɂe, “Pore ɂo na ɂe mae noɂo. Ɂo si ɂiuutanaia mane paina ɂaiɂe ruɂu. ”
36Ɂoneho, ma Tisasi ɂe noroa wara hii mane nena kira iria. Ma ɂe naɂa ɂuriɂe hana mane paina nena, “Manatamu ɂe si hiɂa. Norutoɂo ana na ka haipoonia kane.”
37Nena, ma Tisasi ɂe mae raitaɂania taɂaa hana kira ka raa haɂania hana nima Taerasi na, tai Pita ma rua mai waɂana Temesi ma Tione ke. 38Kira raa, ma kira hura taha ana nima Taerasi na. Ma Tisasi ɂe noroa taɂaa ana maeha na kira ani naraha ma amaha rikaɂa ma ɂe reesia tautaurana kira ɂe pipiuɂa. 39Tamana Tisasi ɂe raea ɂe ka rao haɂamauria pore keni na, ɂe suuai kira ɂuriɂe ana horoɂa ɂe siri hi raona nima na, “Ɂe tau ɂutaa ɂau ka nara ma ama rehono? Mera keni ɂaiɂe ɂe mae mae. Ɂe maɂasu ke ɂaiɂe.”
40Ɂoneho, ma kira masi tamana ɂare ɂe iria na ke. Nena, ma ɂe ɂero kira hi senaha. Siia, ɂe taraia maamana ma tetena mera keni na haɂania Pita ma Temesi ma Tione. Ma kira raa hi raona tohi mera keni ɂe ɂoni raoɂi na. 41Ma Tisasi ɂe toɂi ana ɂaiɂaina mera ɂe mae na, ma ɂe iria hana ana naɂaha kira ɂuriɂe, “Tarita koum!” ne raerae ai ɂe ɂuriɂe, “Ɂo ko taɂeraɂi noɂo, mera keni!” 42-43Ma ɂe taɂeraɂi rawahia noɂo, ma ɂe raa. Mera nena ɂe awara ni harisi mana rua. Ma kira rahe rikaɂa. Nena, ma Tisasi ɂe pare rikahi kira hana kira si haɂanoroa te noni soɂona ɂare ɂe taua nena. Ma ɂe iria hana kira ka watea hanara ɂana mera nena.
अहिले सेलेक्ट गरिएको:
Maki 5: ALU
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2023 (Active), Wycliffe Bible Translators, Inc. All rights reserved.
