Luka 8

Karabu ata Kǝra Ndǝr Ɓutsǝ Kulfɛ

(Mat 13:1-9; Mar 4:1-9)

1Aghǝla ǝni, Yɛsu ka mwari akwa di yarɛ nam ngga-ngga kaka nam nkyǝnkyiɗu tǝ dzǝ ada nkǝr musubu ata kǝra kuhyikur Hyal. Ndzǝr nuwurni kum kapu sǝɗɛ ni tsuwɛ dar adzǝni, 2#Mat 27:55,56; Mar 15:40,41; Luk 23:49ba mwahyi yarɛ laka yɛ nam tǝ ndǝ tara mbǝti tǝ dar aka mambǝl yarɛ nam kulɗa ba kasuwa yarɛ damwa: Maryamu nam tǝ ndɛ ada kǝga tǝni aka Magǝdaliya, nam tǝ ndǝ tara kǝdlǝba mambǝl yarɛ nam kulɗa-kulɗa murfwɛ akwa dzari; 3ba Dzauna mwalar Kuza nam nggar ndzǝr kǝthlǝr ahar Hirudus; Suzana; ba mwahyi damwa yarɛ hang. Mwahyi yarɛ ni dar 'ya mbana ka dlar tǝ dar aka sǝ nam tǝ dar akǝri.

4Sakatǝ dlamiyir ndzi ada tsaɓtsǝnidzi ba ndzi ada si adzǝ Yɛsu, nam tǝ dar tara hyati akwa di yarɛ nam pam-pam, Yɛsu ka nkǝrɛ ala dar karabu ǝni apǝri: 5“Ndǝr tsǝwhu laka tǝra lǝba thlǝka kulfɛ. Sakatǝ dzǝ ata kǝra ɓutsǝ kulfǝ ni, laka yarɛ ɗi akwa kuta whalɛ; ndǝ ka dlǝdlaɓuti, ba ika yarɛ ka siya sǝnya tǝ dar. 6Laka yarɛ ka ɗi ata paya, ba sakatǝ dzǝ ntsi, fu yarni mbantadzi kadǝbar dar adi aka lǝsu wɛ. 7Kulfǝ laka yarɛ ɗu akwa ntsa ntsǝkǝɗa yarɛ, ntsǝkǝɗa yarni ka kǝli kaka fu yarni ba dar ka ngyalti tǝ dar. 8Kulfǝ laka yarɛ tsuwɛ ka ɗi ata hai nam ɗaku. Dzǝ ka ntsi, ba dzǝ ka yai munya ka kumthlani hang ta sǝ nam tǝ ndǝ thlǝkati.”

Sakatǝ tǝ dzǝ nkǝr ǝni, dzǝ haɓǝti kuɗahari ka nkǝrɛ, “Ndǝ nam aka thlǝmɛ, ngyar ka dzǝ ngati.”

9Ndzǝr nuwur Yɛsu ka yu tǝni, mi tǝ karabu ni ada nkǝrɛ. 10#Isa 6:9Dzǝ ka nkǝrɛ, “Zǝndi sǝ nam ɗǝwa-ɗǝwa ata kǝra kuhyikur Hyal ndǝ la gǝri ka gǝr zǝndi, ama ala ndzǝ yarɛ damwa Yi ada ndǝrɛ akwa karabu, ani ka,

“‘wala tǝ dar ada wulɛ, dar adi awa wula wɛ;

wala tǝ dar ada nga, dar ada awa ngaba wɛ.’

11“Sǝ tǝ karabu ni ada nkǝrɛ ani ahani: Kulfǝ ni ani ndǝrǝr Hyal. 12Kulfǝ yarɛ nam tara puyidzi akwa whal ni dar ani ndzǝ nam tara ngati ndǝr ni; ama Satan si ka mbuli ndǝr ni akwa ɗǝfa dar, akuya ta dar ta mbǝrsa ka dar ɓui mbatǝdzi. 13Kulfǝ nam tara puyidzi ata vui paya ni, dar ani ndzǝ nam tara ngati ndǝrǝr Hyal ni dar ka dlutsi aka kutsari, ama dar adi aka ngǝyang wɛ. Dar mbǝrsa nǝr saka nkyiɗǝ laka, sakatǝ sǝr nkǝrti tara ɓui tǝ dar ani dar dlantadzi. 14Kulfǝ nam tara puyidzi akwa ntsǝkǝɗa yarɛ ni, dar ani ndzǝ nam tara ngati ndǝrǝr Hyal ni, ama sakatǝ dar akwa kǝlí, tǝkǝma damitsǝnidzǝr sǝr dunya yarɛ, ba bara bǝrbakur aka nga sǝɗar ndzai, mbwa kǝr tsai ala dar, antǝ dar ta kǝli wɛ. 15Ama kulfǝ nam tara puyidzi ata hai nam ɗaku ni, dar ani ndzǝ nam tara ngati ndǝrǝr Hyal ni, ka ngǝzi akwa ɗǝfu dar, ba atar ɓati su dar yai munya.

Pitǝla ata Sǝr Hai

(Mar 4:21-25)

16 # Mat 5:15; Luk 11:33 “Ndɛ adai nam awa ngiti pitǝla ka dzǝ hau akwa gǝlam wala hakur akur dǝgǝl wɛ. Ata vuiya ǝni, dzǝ ata hai tǝni ata sǝr haiyari, ani ka ndzǝ nam ata sivi ka dar wula paraku. 17#Mat 10:26; Luk 12:2Sǝ adai nam ɗǝwa-ɗǝwa kura ata sǝba ata babal wɛ, wala sǝ mbumbwɛ adai nam kura ndɛ awa zǝndi wala ka siya ndzai ata babal wɛ. 18#Mat 25:29; Luk 19:26Kadǝbar ǝni ka gǝri 'ya hankal ata kǝra sǝ nam tǝ gǝri ada sǝthlǝmɛ alari. Kǝlara ndǝ nam akǝri ndǝ ata lari hang; kǝlara ndǝ nam kura akǝri, wala sǝ nam tǝ dzǝ ada ɗǝnga apǝri dzǝ akǝri ma ndǝ ata dlutsi akari.”

Angǝra Yɛsu ba Zǝrangǝri

(Mat 12:46-50; Mar 3:31-35)

19Angǝra Yɛsu ba madar angǝra Yɛsu si adzǝni, ama dar ta mǝzi ka natsǝni vui nam tǝ dzǝ ati wɛ, akuya dlamiyir ndzi. 20Ndɛ laka ka nkǝrɛ ala Yɛsu apǝri, “Mamar ngɛ ba madar ma ada hyahyati abǝla dar ada bara ka dar wula tǝngɛ.”

21Ama Yɛsu nkǝrɛ ala dar, “Mana ba madar mana, dar ani ndzǝ nam ada ngati ndǝrǝr Hyal ka kǝlǝngkǝr akǝri.”

Yɛsu Hyantani Sambar

(Mat 8:23-27; Mar 4:35-41)

22Vǝr laka Yɛsu ka lǝkwa sar kaka ndzǝr nuwurni, antǝ dzǝ ka gha ala dar, “Ngyar ka muri mwari tǝbwanda manda ni.” Ani dar baditsǝni mwari. 23Ama sakatǝ dar ata kǝra mwari hanyi ka kǝtǝ Yɛsu. Tǝkǝma sambar nam aka dǝna ka si ka kǝngǝrti yimǝr manda ni, yimi kǝ baditsǝni lǝkwa sar ni, sanga dar kǝ lǝkwa sabwabu nam dzau.

24Ndzǝr nuwur Yɛsu mwari ka hyanti tǝni ata hanyi ni, ka nkǝrɛ, “Ndǝrkǝi, Ndǝrkǝi! Muri ata santadzi!”

Yɛsu ka hyati ka ntsǝhati sambar ni ka ɗǝmnya ala yimi nam ada fǝl alǝti ka sǝgǝl ni dar ka hyati, antǝ kǝlara sǝ nam akwanda ka ndzai kǝɗǝk. 25Yɛsu ka nkǝrɛ ala ndzǝr nuwurni, “Ama hamnta dzǝrǝr gǝri?”

Ama dar ka ndatǝdzi ba hyivǝr tǝ dar ada gha ala kǝma dar, “Wa ǝni nam tǝ dzǝ ada tsau wala ala sambar ba yimi, ba dar ada ngandǝrǝrni ni?”

Yɛsu Mbǝti Ndǝ Laka nam aka Mambǝl nam Kulɗa

(Mat 8:28-34; Mar 5:1-20)

26Yɛsu ba ndzǝr nuwurni ka fǝlba alǝkwa diyir ndzǝr Garasina, nam abǝla hǝiya mandar Galili. 27Sakatǝ Yɛsu tara sǝba ata nya gar, ndǝ laka akwa kuta mǝlmɛ ka si adzǝni, nam aka mambǝl nam kulɗa akwa dzari. Kǝ sǝkar tǝ ndɛ ǝni adi ada ha lǝkutu wɛ, wala dzǝ adi ada ndzai aivi wɛ, ama dzǝ ada ndzai akwa bǝri kulɛ. 28Sakatǝ dzǝ tara wula Yɛsu, dzǝ ka ndǝri lǝlɛ ka whui ka dla akǝma Yɛsu adzǝ thlǝlari, tǝ dzǝ ka ndǝrɛ aka dǝna ka gha apǝri, “Mǝr ngɛ ka yɛ, Yɛsu, gǝ nam Zǝr Hyal nam Ati ta sang? Yi ada kǝgyǝ tǝngɛ, ta gǝ ta lai bwanai mai!” 29Dzǝ nkǝr apani, akuya tǝ Yɛsu tara tsau ala mambǝl yarɛ nam kulɗa ni apǝri ka dar sǝba akwa dza ndǝ ni. Akuya ka hang nam tǝ mambǝl yarɛ nam kulɗa ni ada nkai tǝni; antǝ wala tǝ ndɛ ada ɓǝla tǝni, ka mbwai tsiyari aka thlǝlari aka tsalala yarɛ ka kukwai tǝni ata yang yarɛ, tsu dzǝ ada tadǝrnta tsalala yarɛ ni, tǝng mambǝl yarɛ nam kulɗa ni ada kǝdlu tǝni alǝkwa ntaku vui nam kura ndɛ akwa.

30Yɛsu ka yu ndǝ ni, “Mǝ thlǝma gǝ?”

Dzǝ ka gha, “Thlǝmawai Yar Hang.” Dzǝ nkǝrɛ apani akuya tǝ mambǝl nam kulɗa ni dar hang. 31Ba mambǝl yarɛ nam kulɗa ni ka kǝgyǝ tǝni atakǝr-atakǝr apǝri, ta dzǝ ta tsau ala dar ka dar pudzi akwa Kau nam Dzǝgam ni mai.

32Bǝri gadu hang adai akwandari ada sǝmɛ ati ata ngwama gar. Mambǝl yarɛ nam kulɗa ni ka kǝgyǝ Yɛsu apǝri ka dzǝ ngyar tǝ dar ka dar lǝkwa dzá gadu yarni, antǝ dzǝ ka ngyar tǝ dar. 33Sakatǝ mambǝl yarɛ nam kulɗa ni ka sǝba akwa dza ndǝ ni ka lǝkwa dzá gadu yarni, antǝ bǝri gadu yarɛ ni ka whuiya sǝghǝl ata dzá gar ni ka pudzi akwa manda ni ka ntsǝghǝldzi akwa yimi.

34Sakatǝ ndzǝr ɓǝla gadu yarɛ ni tara wula sǝ nam tara 'ya, dar ka whui atǝra ka lǝka nkǝrnta ndǝrari akwa kuta dai ba akwa mǝlmɛ nam nkyǝnkyiɗu. 35Ba ndzǝ ka whuiya lǝba akuya ka dar wula sǝ nam tara 'ya, sakatǝ dar tara si adzǝ Yɛsu, antǝ dar ka wula ndǝ nam tǝ mambǝl yarɛ nam kulɗa ni tara sǝba akwa dzari, ada ndzai adzǝ thlǝla Yɛsu, tara hati lǝkutǝrni tsip adzǝni, tǝ dzǝ akwa hankalari kal-kal; sanga dar kǝ kǝtǝ hyivǝr. 36Tǝ sanga ndzǝ nam tara wula tǝ ndǝ nam aka mambǝl kulɗa yarɛ ni tara ɓui mbǝtǝdzi, dar kǝ ghanta ala ndzǝ damwa su ata kǝri. 37Antǝ sanga ndzǝ nam tara dli diyir Garasina kǝ kǝgyǝ Yɛsu apǝri ka dzǝ tǝra ka ngyar tǝ dar; akuya ta dar tara yakatsǝnidzi aka hyivǝr kulɗa; antǝ Yɛsu ka lǝkwa sar ka tǝra.

38Ndɛ nam tǝ mambǝl nam kulɗa yarɛ ni tara lǝba akwa dzari ni ka kǝgyǝ Yɛsu apǝri ka dzǝ ngyar tǝni ka dzǝ nu tǝni, ama Yɛsu ka hau tǝni akwa whalɛ ka gha alari, 39“Ka gǝ ɓita lǝhǝi, ka gǝ lǝka nkǝrnta sǝ nam tǝ Hyal tara 'ya ala gǝ.” Antǝ ndǝ ni ka dlǝti sanga kuta mǝlmɛ ada nkǝrɛ sǝ nam tǝ Yɛsu tara 'ya alari ni.

Nkwa Tara Nti ba Mwala Kura Kalang

(Mat 9:18-26; Mar 5:21-43)

40Sakatǝ Yɛsu tara ɓakta ɓiti alǝba tǝbwanda manda nda, antǝ dlamiyir ndzi kǝ dlutsi tǝni aka tsi sǝɗɛ, akuya tǝ sanga dar sǝkar ata kǝra sǝkǝ tǝni. 41Antǝ ndza ndɛ laka tǝ thlǝmari Yayirus kǝ si; dzǝ ani nggar fǝr vǝkǝr sǝlaiyir ndzǝr Yahudi akwa vui laka, antǝ dzǝ ka si ka dla akǝma Yɛsu ada kǝgyǝ tǝni apǝri ka dzǝ mwari aharni, 42kadǝbar dzǝ aka nkwa duku, nam tǝ fárni kudzǝghɛ aka kum kapu sǝɗɛ, tǝ dzǝ ada pi ata nya nti.

Ama sakatǝ Yɛsu ata kǝra mwari, hangkur dlamiyir ndzǝ angwada ghyaɓunta tǝni. 43Tǝ akwa ntsa ndzǝ yarɛ ni, mwala laka adai nam tǝ masi ada whui akur dza fa kumɛ kapu sǝɗɛ; dzǝ ka kurai sanga sǝ tǝ dzǝ akǝri ala ndzǝr 'ya kuzugu, ama ndǝ nam tara mǝzi ka mbǝti tǝni wala duku adi wɛ. 44Dzǝ ka gwarɛ alǝghǝla Yɛsu ka tsǝkwar nya lǝkutǝrni, tǝkǝma antǝ masi nam ada whui akur dza ni ka hyati kǝtsik.

45Yɛsu ka yuwɛ apǝri, “Wa tara tsǝkwar tǝra ni?”

Sakatǝ sanga ndzǝ kǝ baditsǝni ɓwalnya adi Yi wɛ adi Yi wɛ, Bitrusu ka nkǝrɛ, “Ndǝrkǝi, dlamiyir ndzi ani tara dlǝi tǝngɛ ada mbǝmbiya tǝngɛ, ama gǝ ada yu apǝri, ‘Wa tsǝkwar tǝra ni.’ ”

46Ama Yɛsu gha, “Ndǝ laka kǝ tsǝkwar tǝra, akuya Yi kǝ ngati sakatǝ dǝna tara sǝba akwa dzawai.”

47Sakatǝ mwala ni tara wuti apǝri dzǝ adi ata mǝzi ka mbu wɛ, antǝ dzǝ ka sǝba aka kǝrni ada kǝgǝdzi, tǝ dzǝ ka dla akǝma Yɛsu, dzǝ ka ghaba akǝma sanga ndzi sǝ nam tara 'ya tǝ dzǝ tara tsǝkwar Yɛsu, ba whalɛ nam tǝ dzǝ tara ɓui mbǝtǝdzi tǝkǝma ni. 48Antǝ Yɛsu ka gha alari, “Nkwarna, hamnta dzǝrǝr ngɛ kǝ mbǝti tǝngɛ; ka gǝ mwari aka ndzai lapiya.”

49Sakatǝ Yɛsu tsu ata kǝra nkǝr ndǝr ni, antǝ ndza ndǝ laka nam tara hyati ahar nggar fǝr vǝkǝr sǝlaiyir ndzǝr Yahudi ni, ka siya gha, “Nkwar ngɛ kǝ kurtaka nti, antǝ ta gǝ ta dzakti Malǝm ni kǝra mai.”

50Ama sakatǝ Yɛsu tara ngati apani, antǝ dzǝ gha ala Yayirus, “Ta gǝ ta hyivǝr mai, ama ka gǝ mbǝrsa ba dzǝ ata mbǝtǝdzi.”

51Sakatǝ Yɛsu tara tsǝbti kǝi nda, antǝ dzǝ ta ngyar ka waima livi atakǝmaduku kaka dza wɛ, tar Bitrusu ba Yawhana ba Yakubu aka atǝgǝra nkwani ba angǝri. 52Antǝ sanga ndzǝ nam akwanda ada tuwa ba lǝlɛ akuya ka dza; ama Yɛsu nkǝrɛ, “Ta gǝri ta tuwa mai; akuya dzǝ ta nti mai, ama dzǝ ata hanyi.”

53Dar ka ngusi tǝni, akuya dar kurta zǝndi apǝri dzǝ kurtaka nti. 54Ama Yɛsu ka ngǝzi tsiyari ka kǝga tǝni ka nkǝrɛ, “Zǝr nkwa, hyati!” 55Mambǝlǝrni ka si adzǝni, dzǝ ka mbǝtǝdzi tǝkǝma, antǝ Yɛsu ka nkǝrɛ apǝri ka ndǝ lari sǝr sǝmɛ ka dzǝ sǝmɛ. 56Ndzǝr yarni ka ndatǝdzi, ama Yɛsu ka tsau ala dar apǝri, ta dar ta gha ala waima sǝ nam tara 'ya ni.

अहिले सेलेक्ट गरिएको:

Luka 8: CKL

हाइलाइट

शेयर गर्नुहोस्

कपी गर्नुहोस्