मात्ति छाप्लाङाना चिनारि
छाप्लाङाना चिनारि
ना नुना खाबोर मात्तिङा छेप्टुना॥ ना छाप्लाङा पाइलेलाम्मा डोक् माङ्हुप् चोक्बालाक् काहिङ्मेप्बा डाङ्बा येसु नुङ् माट्टुए॥ आच्छो बेलाङि माङ्हाङ्ङा ओयाप्मि याहुदिचि लोङ्सा ठिबाङ् काहिङ्मेप्बा डाङ्बा पाङ्माना चामारसिङा चोगुना डाना॥ हिट्ना चामारसिङा माङ्हाङ्ङा येसु नाराङि पाङ्सुङ् पुरो चोगुए॥ ना नुना खाबोर उन् पोङ्साना याहुदि छोङ्चि लोङ्सा एडोक् माखाक् ख्वाप्पा याप्मिचि लोङ्सा चा ए॥
मात्तिङा छेप्टुना नुना खाबोर नुलोक् टोङ्सा युङ्साइसे॥ ना छाप्लाङि येसु पोङ्साना, उन् सियाना हिट्नुङ् फेरि सियाउङ् कोबा काडाना रिङ्ङाना बायान् चोगाइसे॥ नाहि उन् पोङ्साना, बाप्टिस्मा, निङ्ग्वा छिक्मा हिट्नुङ् उन्ङा गालिललेङ् पारचार चोगुना, उन्ङा हिसिक्टुचिगा रिङ् हिट्नुङ् नुमानिङ् चोगुना टोॽवाङाना बारेङि चा छेप्टेसे॥ नाट्टेप्मा एरोक् माखाक्, उन् यरुसलेम खाडाना, हिट्नि उन् लाट्ना हाप्टा सोम्मा युङाना, खाप्चेङि सियाना हिट्नुङ् फेरि उहिङ्ग्वाट् लिसाना रिङ्चि बारेङि चा छेप्टेसे॥
ना नुना खाबोरङा येसु धारमाबिधि हिट्नुङ् टोनालोग् मुलुक्ङाना बारेङि उटुप् माप्माना आधिकार टोगुना ठिबाङ् ठेना काहिसिक्बा नुङ् माट्टुएसुए॥ नागा रिङ् बारेङि उन्ङा हिसिक्टुएसुचे:
(१) झोन्झोबोङाना उपादेस– आध्याए ५-७ ङि टोनालोग्ङिना मुलुक्ङिगा याप्मिचि लोङ्सा चाहाब् लिना रिङ् हिट्नुङ् आधिकारङाना बारेङि माट्टुटु॥
(२) आध्याए ठिमेक्ङि बारा जाना चेलाचिलोङ्सा पारचार चोक्माना आग्याँ
(३) टोनालोग्ङिना मुलुक्ङाना मुन्डुम्– आध्याए १३
(४) चेला लिमाना उटुप्– आध्याए १८
(५) हाट्लेना जुगङाना बारेङि लोक् खिरिस्टङाना दोस्रो खेप् टाना बारे– आध्याए २४-२५
बिसाए-सुचि
येसु खिरिस्टङाना पुङ्ला लोक् उन् पोङ्साना बारे १:१–२:२३
बाप्टिस्मा कापि युहान्नाङाना टोॽवा ३:१-१२
येसुङाना बाप्टिस्मा लोक् निङ्ग्वा छिक्मा ३:१३–४:११
येसुङा गालिलङि चोगुना टोॽवा ४:१२–१८:३५
गालिललाम्मा यरुसलेम सोम्मा १९:१–२०:३४
यरुसलेमङि उन्ङाना आन्तिम् हाप्टा २१:१–२७:६६
येसु सियानालाम्मा हिङा काडाना हिट्नुङ् चेलाचि माझाङि पारकाट् लिसाना २८:१-२०
अहिले सेलेक्ट गरिएको:
मात्ति छाप्लाङाना चिनारि: APH
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2023, Wycliffe Bible Translators, Inc. and Nepal Bible Society