Luka 20
20
Yezu dam dem nwoŋi yei ne mo?
Matiyu 21:23-27; Maake 11:27-33
1Dɛ dedwe mo Yezu déem wo Wɛ diga kam konkɔlɔ kom ne o tɛ Wɛ kwor-ywoŋa kam o bere nɔɔna. Juu tiina kaanem yiga tiina, de ba zamesem tiina bam, de ba teo kom nakwa bam ma vo ba yi o tei. 2Ba ma ta ded‑o ba we, “Ta n bere debam, wɔ mo pɛ nmo chwoŋa se n ke wonnu telo maama n na ke to?”
3O ma leiri-ba o we, “Yage-na se a bwei abam taane dedwe se á leiri-de á pa-ne. 4Jɔn na pɛ nɔɔna sɛɛm to, ko ye Wɛ mo pɛ‑o chwoŋa naa nabiina mo?” 5O na bwei-ba konto to, ba maa wora ba bane daane se ba nii ba na wó ta kolo to, ye ba we, “Debam ná leiri dé we, ko ye Wɛ mo, o laam wó bwei debam we, bɛ mo ye dé wo sɛ Jɔn taane dem? 6Ko daare, dé ná we, ko ye nabiina mo pɛ‑o chwoŋa, nɔɔna bam maama wó dole debam de kandwa ba go, kolo ŋwaane ba maama pae se Jɔn ye Wɛ sampwora mo.”
7Konto ŋwaane ba ma leiri Yezu we ba yeiri wolo na pɛ Jɔn chwoŋa to. 8Yezu laam ma ta de-ba o we, “Ko na ye konto to, amo de nam bá ta wolo na pɛ-ne chwoŋa se a taa toŋe to.”
Nɔɔno de o gaare memaŋe
Matiyu 21:33-46; Maake 12:1-12
9Yezu daa ta ma maŋe memaŋe dedwoŋi o bere nɔɔna bam o we, “Nɔɔno wodwoŋi mo wora. O ma zaŋe o che gaare, ye o daare o jeiri Vini teeni de wone. O laam ma kwei nɔɔna o yage da se ba taa vara, ye o daare o vo teo kodwoŋi o dáane da. 10Tio-bia bam gworim maŋa ma yi. O ma toŋe o tontoŋeno se o vo vala bam tei se ba pɔɔre tio-bia bam ba pa‑o. Tontoŋeno wom na yi ba tei to, ba ma mage‑o. Ba ma daare ba pa o viiri de je-yaara. 11Nɔɔno wom daa ma toŋe o tontoŋeno wodwoŋi. Ba ma mage wonto de, ye ba twe‑o dedɛ. Ba ma pa se o de viiri de je-yaara. 12O daa ma toŋe tontoŋeno wodwoŋi o ke kuni betɔ. Ba ma ja wonto de ba mage ba kaare o yera, ye ba zeili‑o gaare dem wone.
13Gaare dem tu wom laam ma boŋe o we, ‘Amo nam wó ke tɛ mo? Amo na wó ke tei to, a wó toŋe a tete bu, a na jege o swono to. Ko ná ye wonto, ba wó nege‑o.’ 14Vala bam nam na nɛ‑o to, ba ma bane daane ba we, ‘Mo gaare dem tu bu-kwea kam, ye wonto mo lage o ba o taa tei o kwo wom wonnu. Pa-na se dé go‑o, se dé daare dé taa tei o wonnu tem.’ 15Ba laam ma vaŋe‑o ba ja nwoŋi gaare dem wone, ye ba mage‑o ba go.
Tɔ. Gaare dem tu laam wó ke vala bam konto bɛ mo? 16O jege se o ba o go-ba, se o daare gaare dem o kwei o pa nɔɔna badwonna se ba taa nii-de.”
Nɔɔna bam na nigi konto to, ba ma ta ba we, “Wɛ bá sɛ.” 17Yezu ma yɔɔre o nii ba seeni ye o we, “Ko ná dae konto, bɛ mo ye ko popone Wɛ tɔnɔ kom ne we:
‘Kandwɛ delo lɔra bam na ve to
laam mo jwoori de ba de ji kandwɛ delo na pae diga kam dana to’#Lei 118:22?
18Ko ná ye kandwɛ delo Wɛ na kuri to, nɔɔno wolo maama na mage o tete dedaane-de to wó tiini o chochoge o tete mo. Ko daare wolo maama kandwɛ dem ná to o baŋa ne, de wó meere konto tu mo.”#Izaya 8:15
19Yezu na tage wonnu tem konto to, Juu tiina kaanem yiga tiina bam de ba zamesem tiina bam ma lɔre we o maŋe memaŋe dem banto ŋwaane mo. Konto to, ba ma kwaane ba lage chwoŋa se ba ja‑o lela. Ba ma ware, ba na kɔre foone de nɔɔna bam to ŋwaane.
Lampwoo ŋweem
Matiyu 22:15-22; Maake 12:13-17
20Juu tiina yiga tiina bam déem ma yere Yezu se ba daa ta nii o na wó ta kolo to. Ba maa lage chwoŋa se ba bere we o tusi, se ba wane ba ja‑o ye ba daare ba ke‑o gɔmena tu wom jeŋa ne se o waare‑o. Ba ma le nɔɔna se ba ke nenɛɛne ba ye nɔn-ŋona mo tei, ye ba kwaane se ba ja‑o de o taane dem.#Luka 11:53-54 21Banto ma vo Yezu tei ba bwei‑o ba we, “Berem tu, dé yei we taane delo nmo na yeini n tɛ n bere nɔɔna to jege chega. Nmo ba pɔɔre nɔɔna daane de n na ke-ba tei to. Nmo nam yeini n bere nɔɔna Wɛ chwoŋa chekke. 22Dé lage dé bwei dé nii, debam Juu tiina ná ŋwe lampwoo dé pa logo kom Pa-faro wom, ko chɔge debam chullu na?”
23Yezu ma lɔre ba na ke swa yalo to, ye o ta de-ba o we, 24“Nam kwei sabu-dale á bere-ne. De nam jege wɔ nyenyego de o yere mo de baŋa ne?” 25Ba ma leiri‑o ba we, “Ko ye Pa-faro wom mo.”
O laam ma ta de-ba o we, “Ko lamma. Á nam ta‑á ŋwe kolo na ye Pa-faro wom nyem to á pa‑o, se á daare á ta‑á pae Wɛ kolo de na ye o nyem to.” 26Yezu na tage konto de-ba to, ba ma ware ba ja‑o nɔɔna bam maama yiga ne. O na leiri-ba tei to so-ba dedɛ ye ba chem.
Wɛ telaao ŋwea na wó taa ye tei to
Matiyu 22:23-33; 22:41–23:7; Maake 12:18-27, 35-44; Luka 11:37-54
27Saduka tiina badwonna déem ma zaŋe ba vo Yezu tei. Banto mo bere we, nɔɔno ná tega, o daa bá jwoori o bi. 28Ba ma vo ba bwei‑o ba we, “Berem tu, Moses déem na popone kolo o tiŋi o pa debam to, o bere we, nɔɔno zembaaro ná tega ye o daare kaane, ye ba ná wo loge bia, too wom nyaane mo jege se o di kaane wom se ba wane ba lo bia zembaaro wom ŋwaane.#Nia Gulim 25:5 29Konto to, nu-bia barepɛ ya mo wora. Ba nakwe wom ma di kaane ye o te o daare‑o ye ba ba jege bia. 30Wolo na saŋe to ma di kadeim dem. 31O de ma te o daare‑o, ye batɔ tu wom laam di‑o. Ko ma ke ba maama konto dwoŋi. Ba maama barepɛ ma te, ye ba wo loge bia. 32Ba maama na tege to, kaane wom de laam ma te. 33Konto to, ba maama barepɛ na di kaane wom to, ba laam ná tu ba bi toone wone, banto wɔ mo wó taa tei kaane wom?”
34Yezu ma leiri-ba o we, “Ko ná ye zem logo baŋa nɔn-bia mo, baara yeini ba di kaana, ye kaana de zoore banna. 35Ko daare nɔɔna balo na maŋe se ba bi toone wone ye ba daare ba taa ŋwe maŋa kam konto ne to, banto bá di kaana naa ba zo banna. 36Ba daa bá wane ba te, ba na wó taa nye de Wɛ malese sem to ŋwaane. Ba na maŋe se ba bi toone wone to, ba maa ye Wɛ tete bia. 37Ko nam ná ye twa biim, Moses maŋe o bere we nɔɔna wó seene ba bi. O déem tole maŋa kalo Wɛ na veere o tete sabare wone ye o ta kolo to taane. Moses ma bere we Yuu-tu Baŋa Wɛ ye Abaraham Wɛ, de Izaak Wɛ, de Jakob Wɛ mo.#Nwoŋim 3:6 38Ko bere we banto daa ta jege ŋwea mo Wɛ tei ne, kolo ŋwaane Wɛ ye ŋwea tiina nyem mo se o dae twa nyem. Wɛ tei ne, nɔɔna maama ta jege ŋwea, de balo na tege to de.”
39Wɛ nia zamesem tiina badwonna na nigi konto to, ba maa we, “Berem tu, n tage chega.” 40Nɔɔna maama déem ma kɔre se ba daa bwei‑o taane.
41Yezu laam ma ta de-ba o we, “Nɔɔna yeini ba bere we, Wɛ Dam Tu Krista wom ye Pɛ David dwi tu mo. Ko nam wó wane ko taa ye konto na? 42David tete nam popone Wɛ Seinim Lei tɔnɔ kom ne o we:
‘Yuu-tu Baŋa Wɛ tage de amo Teiru wom o we:
Ba n jeini amo jazem seeni
43se a laam wane nmo dona bam maama
a ke nmo dam kuri ne se n ta‑n tei-ba.’#Lei 110:1
44Konto to, David tete na seene o bwoŋi Wɛ Dam tu wom o we o Teiru wom to, ko wó ke tɛ mo ye dé daa taa bwoi‑o we David dwi tu?”
45Nɔɔna bam maama ta na wora ba cheigi o taane konto to, o ma ta de o kwaga tɔgena bam o we, 46“Ta‑á yei-na á tete de Wɛ nia zamesem tiina bam. Banto swoi se ba zo gare-dedwaaro se ba taa beera ye nɔɔna nii-ba. Ba ná vei yaga, ba swoi se nɔɔna maama taa tui ba seini-ba. Ba ná yeini ba zo ba jeerim di sem, ba wó taa lage jei-kamunnu mo se ba jeini yiga ne. Ba ná vei nɔɔno sɔŋɔ se ba di kuri, ko ye jei-laao jei ne mo ba lage se ba jeini da. 47Ba nam yeini ba gane kadeina se ba jwoŋi wonnu ba tei ne. Ba maa bere ba tete de ba na tiini ba ware Wɛ tei to. Konto ŋwaane Wɛ wó tiini o waare-ba dedɛ.”
अहिले सेलेक्ट गरिएको:
Luka 20: KBG
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2020, Ghana Institute of Linguistics, Literacy and Bible Translation (GILLBT)
