Jɔn 7
7
Yezu wo Jerusalem ne o bere nɔɔna
1Yezu déem maa wo Galili ne o beera. O déem maa ba lage se o vo Judea o beeri da, kolo ŋwaane Juu tiina balo na wo dáane to lage chwoŋa mo se ba go‑o. 2Ko déem ma daare fee se Juu tiina di ba kuri delo yere na ye ‘Vwoa chwiim kuri’#Chullu 23:32; Nia Gulim 16:12 to. 3Yezu nyaana ma ta ded‑o ba we, o yage Galili jei sem se o daare o vo Judea se o kwaga tɔgena bam wane ba na totoŋa yalo o na jege o ke to. 4Ba ta maa we, “Nɔɔno wolo na lage se o yere zaŋe jei maama ne to ba seigi kolo o na ke to. Konto ŋwaane, nmo ná lage n ke wonnu tento, n jege se n ta‑n ke-te jaja nabiina maama yiga ne mo, se n yé seigi-te.” 5Ba na tage tei to bere we ba tete ta wo ke ba wo-dedoa ded‑o.
6Yezu ma ta de-ba o we, “Amo maŋa kam ta wo yi se a vo a di kuri dem. Ko nam ná ye abam, maŋa maama lana ka pa abam mo. 7Nabiina bá wane ba taa chuli abam. Ba nam chuli amo, kolo ŋwaane amo yɔɔre a tɛ-ba jaja mo we ba kikia ba tɔge chwoŋa. 8Abam nam véi-na á di kuri dem, se amo ta bá vo leile, kolo ŋwaane amo maŋa kam ta wo yi ka ti se a bere a tete jaja.” 9O na tage konto to, o ma maŋe Galili ne.
10Yezu nyaana bam na kɛ ba daare to, o de laam ma zaŋe o vo kuri dem. O na vei konto to, o maa wo vei jaja se nɔɔna lɔre ko ni ne. 11Juu tiina balo na wo kuri dem ne to maa kare ba beeri‑o ye ba we, “O wo yei ne mo?” 12Nɔn-kɔgɔ kom na wora to maa tiini ba jege o taane ba waasa. Nɔɔna badwonna maa tɛ ba we, “O ye nɔn-ŋom mo.” Badaara maa tɛ ba we, “Aawo, o dae konto, se o jege nɔɔna bam o gane mo.” 13Nɔɔn-nɔɔno nam wo tage o taane jaja, ba na kɔre Juu tiina dedɛɛra bam to ŋwaane.
14Ba na di kuri dem ba yi de da yam tetare to, Yezu laam ma vo o zo Wɛ diga kam o wora o bere nɔɔna. 15Juu tiina dedɛɛra bam maa tiini ba ye yaau. Ba maa tɛ ba we, “Nɔɔno wonto nam wo zamese tɔnɔ nɔɔn-nɔɔno tei ne, ye o yi ke tɛ mo de poore de yei Wɛ tɔnɔ kom konto dwoŋi?”
16Yezu ma leiri-ba o we, “Amo na bere tei to dae amo tete nyem, se ko ye wolo na toŋe-ne to nyem mo. 17Wolo nam ná boŋe se o ke Wɛ boboŋa na lage kolo to, konto tu wó lɔre amo berem dem kuri na nwoŋi mɛ to, de ná ye Wɛ nyem mo naa ko ná ye amo tete dam mo a ma a bera. 18Nɔɔno wolo ná ŋɔɔne de o tete dam, konto tu kwaane se o na yere mo o pa o tete. Ko daare wolo nam ná kwaane se o lage yere o pa wolo na toŋe‑o to, konto tu mo ye wolo na jege chega, ye o ba jege tusim kolokolo baŋa ne. 19Moses nam maŋe o pa abam lɔre Wɛ nia yam. Abam wolowolo nam ba tɔge-ya. Bɛ mo ye abam kwaane á lage chwoŋa se á go amo?”
20Ba ma leiri‑o ba we, “N yirisi mo. Nɔɔn-nɔɔno ba lage nmo gom.” 21Yezu ma leiri-ba o we, “Amo ke totoŋ-kamunu dedoo siu dɛ ne, ye abam ye yaau. 22Moses déem pɛ abam ni se á ta‑á gwoni á bia peina. Ko nam maŋe ko dae we Moses mo pɛ se ko bobo. Ko nam ye abam nabaara mo bobo-ko.#Pulim 17:10 Moses na pɛ abam ni dem konto to, abam wae á gwoni á bia peina siu dɛ dem ne, se ko yé pa á chɔge Wɛ ni dem konto. 23Abam na jege chwoŋa se á ke konto dwoŋi siu dɛ dem ne to, bɛ mo ye abam jege ban-zɔŋɔ de amo na yɔɔre jaweeno siu dɛ dem ne pa o na yazura to ŋwaane? 24Abam nam yé ta‑á gare á yaale nɔɔno keim. Á nam jege se á boŋe mo á nii kolo amo na ke to, se á laam daare á bore chega bora.”
Juu tiina dedɛɛra kwaane se ba ja Yezu
25Nɔɔna balo na zoore Jerusalem ne to badaara laam maa tɛ Yezu taane ba we, “Ko dae nɔɔno wonto mo ba kwaane se ba go na? 26Nii-na o na ke tei. O zege o ŋɔɔne mo jaja, ye nɔɔn-nɔɔno nam ba tɛ kolokolo se ba che‑o. Debam dedɛɛra bam daa wo boŋe we wonto mo ye Wɛ Dam Tu Krista wom naa bɛ mo? 27Debam maama yei wonto na nwoŋi mɛ to. Ko nam ná ye Wɛ Dam Tu wom, nɔɔn-nɔɔno bá taa yei o na nwoŋi mɛ.”
28Yezu déem na wo Wɛ diga kam wone o bere nɔɔna to, o ŋɔɔne de kwor-dɛa mo o we, “Ko ye chega mo, abam yei amo, ye á kwori á yei amo na nwoŋi mɛ to. Amo nam wo tu a tete ne, se ko ye nɔɔno mo toŋe-ne, ye wonto ye chekke mo. Abam nam yeiri‑o. 29Amo mo yei‑o, kolo ŋwaane a nwoŋi o tei mo, ye wonto nam mo toŋe-ne.”
30Yezu na tage konto to, ba laam ma kwaane se ba ja‑o. O maŋa kam ta na wo yi to, nɔɔn-nɔɔno wo nɛ chwoŋa se o ke‑o kolokolo. 31Ko daare nɔn-kɔgɔ kom wo nɔɔna dedɛ ma ke ba wo-dedoa ded‑o, ye ba tɛ ba we, “Wɛ Dam Tu wom ná tua, o bá wane o ke wo-kenkagela dedɛ se ko dwoni wonto na maŋe o ke tei to.”
32 Farisi tiina bam ma ni nɔn-kɔgɔ kom na waasa wonnu tento ba tɛ Yezu taane tei to. Ba de Wɛ kaanem yiga tiina bam laam ma toŋe ba nɔɔna se ba vo ba ja Yezu.
33Yezu laam ma ta o we, “Amo bá tiini a dáane abam tei ne. Ko ná ke fee, amo wó jwoori a vo wolo wom na toŋe-ne to tei. 34Abam nam wó beeri amo jei á ga, kolo ŋwaane amo na wo mɛ to, abam bá wane da á vo.” 35O na tage konto to, Juu tiina dedɛɛra bam maa ŋɔɔne daane ba we, “O boŋe se o vo yei ne mo ye debam bá na‑o? O ga boŋe se o vo Juu tiina balo na zoore Girisi tiina teene dem ne to tei mo, se o taa bere-ba na? 36Dé yeiri o taane dem kuri de o na tage o we, debam wó beeri omo jei dé ga, ye o ta we, omo na wo mɛ to, debam bá wane da dé vo.”
37Ko déem ma ba ko yi kuri dem tiim dɛ. Dɛ dem konto mo ye kuri dem dɛ-kamunu. Dɛ dem konto ne Yezu maa zege da o ŋɔɔne de kwor-dɛa o we, “Na-nyɔm ná jege wolo maama, se o ba amo tei o nyɔ.#Izaya 55:1 38Kokuri, wolo maama na ke o wo-dedoa de amo to wó na ŋwe-doŋa Wɛ tei ne, nenɛɛne Wɛ tɔnɔ kom na maŋe ko bere tei ye ko we, ‘Na balo na jege jworo ba pae nabiina to wó taa buri konto tu bochare ne.’ ” 39Yezu na tage na bam taane konto to, ko ye se o bere Wɛ na wó ke o Sin-laao kom balo na sɛ omo to bochara ne tei to mo. Kanto maŋa ne Wɛ Sin-laao kom ya daa ta wo tu ba tei, Yezu daa ta na wo jwoori o bi o na nenɔŋ-fɔrɔ Wɛ tei ne to ŋwaane.#Izaya 44:3
40Nɔn-kɔgɔ kom déem na nigi Yezu na tage tei to, nɔɔna badaara maa tɛ ba we, “Nɔɔno wonto seene o ye Wɛ ni-jwoŋinu wolo na maŋe se o ba to mo.” 41Badaara de maa tɛ ba we, “O ye Wɛ Dam Tu Krista mo.” Ko daare ye badaara de tɛ ba we, “Ko dae‑o. Wɛ Dam Tu wom ná tua, o bá nwoŋi Galili. 42Wɛ tɔnɔ kom bere we, Wɛ Dam Tu wom wó taa ye Pɛ David dwi tu mo ye o nwoŋi Bɛtelehem, teo kolo David déem na zoore da to.”#Mika 5:2 43Konto baŋa ne, popɔra déem ma ba nɔn-kɔgɔ kom wo Yezu ŋwaane. 44Badaara lage se ba ja‑o, ye nɔɔn-nɔɔno nam wo nɛ chwoŋa se kotu ke‑o kolokolo.
45Wɛ kaanem yiga tiina bam de Farisi tiina bam na toŋe nɔɔna balo to ma jwoori ba vo ba tei. Ba ma bwei-ba ba we, “Bɛ mo ye á wo jaane‑o á ba?” 46Nɔɔna bam ma leiri-ba ba we, “Nɔɔn-nɔɔno wo fɔge o ŋɔɔne se ko maŋe de nɔɔno wom konto na ŋɔɔne tei to.” 47Farisi tiina bam ma ta-ba ba we, “Abam pɛ se o gane abam de mo na? 48Debam de dé dedɛɛra bam wolowolo wo sɛ‑o. Abam yeiri konto na? 49Ko nam ná ye nɔn-kɔgɔ kom konto, banto yeiri Wɛ nia yam Moses déem na tiŋi o pa debam to. Konto ŋwaane, Wɛ sɔɔlem wo ba yuu ne.”
50Farisi tiina bam nɔɔno dedoa déem maa tɔge o wora, o yere mo Nikodema. Wonto mo ye wolo ya na maŋe o vo Yezu tei to.#Jɔn 3:1-21 O ma zaŋe o ta de o dwonna bam o we, 51“Ko ná ye Wɛ nia yam Moses na tiŋi o pa debam to, ya bere we ko chula se dé chɔge nɔɔno, ye dé ta wo bwei‑o dé nii o na ke kolo to.” 52Ba laam ma leiri ba we, “Nmo de ye Galili tu mo na? Buŋi jei maama ne, se nmo wó na we, Wɛ ni-jwoŋinu tera o na wó nwoŋi Galili ne.”
[53Ba maama ma jage ba vo ba sam.
अहिले सेलेक्ट गरिएको:
Jɔn 7: KBG
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2020, Ghana Institute of Linguistics, Literacy and Bible Translation (GILLBT)
