Jɔn 4
4
Samaria tiina kaane lɔre Yezu
1 Farisi tiina bam déem ma ni we Yezu wora o pae nɔɔna dedɛ tɔge o kwaga ko dwoi Jɔn, ye o ta kwori o pa-ba sɛɛm Wɛ ŋwaane. 2Ko nam dae Yezu tete mo pɛ ba jwoŋi sɛɛm, se ko ye o kwaga tɔgena bam mo ke konto. 3Yezu na maane we Farisi tiina bam lɔre konto to, o ma zaŋe Judea ne o jwoori o maa vei Galili. 4O na maa vei konto to, o jege se o tɔge Samaria wo mo o kɛ.
5O ma vo o yi Samaria teo kodwoŋi, ko yere mo Suchare. Ko bwola de tega kalo Jakob déem na kwei o pa o bu Josɛf faŋa faŋa to.#Josua 24:32 6Jakob déem jege vole jei sem konto ne. De ta maa wora de zem maama. Yezu na vei taa konto to, o ma bugi. O ma vo o jeini vole dem ni ne. Wea maa wo yupare baŋa ne. 7-8Yezu maa jei da konto, ye o kwaga tɔgena bam ya maŋe ba kɛ teo kom wo se ba yeigi wodiu. Samaria tiina kaane wodwoŋi laam ma ba se o mɔ na. Yezu ma ta ded‑o o we, o ke na o pa‑o se o nyɔ. 9Kaane wom ma ta de Yezu o we, “Nmo ye Juu tu mo, ye amo ye Samaria tiina kaane. Bɛ mo ye n ta we, a ke na a pa‑m?” Kaane wom tage konto kolo ŋwaane ko ke‑o yaau mo, kokuri Juu tiina de Samaria tiina ware daane. 10Yezu ma leiri‑o o we, “Nmo nam yeiri pɛɛre delo Wɛ na lage o pa nmo to. Amo taga se n ke na n pa-ne, ye n yeiri amo na ye wolo to. Nmo ya ná yei, nmo tete ya wó bwei amo, ye a pa nmo na balo na jege ŋwea ba pae nabiina to.”
11Kaane wom ma ta ded‑o o we, “Amo tu, nmo ba jege gwoŋo, ye vole dem luuna. Nmo nam wó ke tɛ mo n mɔ na balo na jege jworo ba pae nabiina to? 12Nmo nam bá wane n ta‑n dwoi dé nabaaro Jakob wolo déem na koge vole dento o pa debam to. Wonto tete, de o bia, de o vara maama déem mɔɔne na ywo-seeni mo faŋa faŋa ye ba nyɔa.” 13O ma leiri‑o o we, “Ko ná ye vole dento na bam, nɔɔno wolo maama ná nyɔge-ba, na-nyɔm ta wó ja kotu mo. 14Ko nam ná ye na balo amo na wó pa nɔɔna to, na-nyɔm daa bá ja wolo na nyɔge-ba to. Na bam a na wó pa to wó ji buli-yi o yera ne, ye de wó taa bura na balo na wó pa‑o ŋwea kalo na ba jege kweelim Wɛ tei ne to.”#Gurim 21:6 15Kaane wom daa ma ta ded‑o o we, “Amo tu, pa-ne na bam konto dwoŋi, se na-nyɔm daa yé ja-ne se a taa tui ywo a mɔɔne na.”
16Yezu ma ta‑o o we, o véi o bwoŋi o baro se o da o ba. 17Kaane wom ma leiri we, omo ba jege baro. O ma ta o we, “Nmo na tage kolo to ye chega mo. 18Nmo nam zo banna banu mo, ye nmo na wo nɔɔno wolo tei ne leile to seene o dae n baro. Ko ye chega mo n tage n bere-ne.” 19Kaane wom ma ta ded‑o o we, “Amo tu, amo lɔre we n ye Wɛ ni-jwoŋinu mo. 20Debam Samaria tiina nabaara bam déem tui peo konto yuu mo ba ware Wɛ. Ko daare abam Juu tiina bere we, ko maŋe se nɔɔna taa ware Wɛ Jerusalem teo ne mo.”
21Yezu laam ma ta ded‑o o we, “Kaane, jwoŋi a taane dem. Maŋa wó ba ye nɔɔna ná lage ba ware dé Kwo Wɛ, ko bá taa ye peo kom yuu ne, naa Jerusalem teo wone. 22Abam Samaria tiina yeiri wolo á na zuli to. Debam Juu tiina nam yei wolo dé na zuli to, kolo ŋwaane Wɛ yeini o da Juu tiina bam jeŋa mo o vere nabiina. 23Ko daare maŋa maa beena leile konto, ye balo na seene ba zuli dé Kwo Wɛ chekke to wó tɔge o Sin-laao kom ŋwaane mo ba zuli‑o de ba bochara de chega. Mo dé Kwo Wɛ na lage se nabiina taa zuli‑o tei to. 24Wɛ ye siu mo. Balo maama na lage ba pa‑o zula to jege se ba tɔge o Sin-laao kom ŋwaane ba zuli‑o de ba bochara de chega.”
25Kaane wom ma ta o we, “Amo yei we Wɛ Dam Tu wolo yere na ye Krista to mo wó ba. O nam ná tua, o wó ta Wɛ chega kam maama o bere debam.” 26Yezu ma leiri‑o o we, “Ko ye amo mo konto, a zege a ŋɔɔne de nmo.”
27Yezu kwaga tɔgena bam laam ma jwoori ba ba. Ba na nɛ Yezu na zege o ŋɔɔne de kaane konto to, ko ma tiini ko ke-ba yaau. De konto de, ba wolowolo nam wo bwei ba we, “Bɛ mo nmo laga?” naa “Bɛ mo ye n ŋɔɔne de kaane wom?”
28Kaane wom laam ma yage o kɔɔro wom ye o daare o vo teo kom wo. O na yi da to, o ma ta de nɔɔna bam o we, 29“Ba-na á nii nɔɔno, o na tage amo na ke kolo maama to o bere-ne. A yeiri wonto mo wó taa ye Wɛ Dam Tu wom naa wɔ mo.” 30O na tage o bere-ba konto to, ba ma nwoŋi teo kom wone ba maa vei Yezu tei.
31Konto déem na wora ko ke to, Yezu kwaga tɔgena bam ma lwoori‑o se o di wodiu. 32O ma leiri-ba o we, “Amo maŋe a jege wodiu se a di, ye abam yeiri ko ni ne.” 33O kwaga tɔgena bam laam ma bwei daane ba we, “Nɔɔno ga mo jaane wodiu o ba o pa‑o na?” 34Yezu ma ta de-ba o we, “Ko ná ye amo ni-wodiu, ko ye se a tɔge wolo wom na toŋe-ne to boboŋa mo, se a toŋe o totoŋa yam a ti.#Jɔn 6:38-39 35Abam yeini á tɛ á we, ‘Ko daare chane sena mo se dé zage mena.’ Amo nam tɛ abam se á fɔge á nii kadwi sem na ye tei. Se nye de se mena yam bege ya ti, ye ya laam daare zagem mo.#Matiyu 9:37-38 36Maŋa kam yia se nɔɔna vo ba zage mena yam, se ba daare ba jwoŋi ba ŋweero. Wodiiru telo ba na jege se ba la ba ke daane to mo ye nɔɔna balo Wɛ na jwoŋi pa se ba na ŋwea kalo na ba jege kweelim to. Konto to, nɔɔno wolo na dugi mena yam to de wolo na zage-ya to maama wó tɔge daane ba di ywoni. 37Taane dento ye chega mo: ‘Nɔɔno mo dugi mena, wodwoŋi laam ma zage.’ 38Amo toŋe abam se á vo á la nɔɔna á pa Wɛ. Ko ye nenɛɛne abam wo vage mena yam, ye á laam wó vo á zage-ya. Nɔɔna badwonna mo vage-ya, ye abam di nyɔɔre ba totoŋa yam baŋa ne.”
39Samaria tiina kaane wom ya tage o bere o teo kom tiina we, Yezu tage omo na ke kolo maama to o bere-o. Ko ma pa Samaria tiina dedɛ ke ba wo-dedoa de Yezu. 40Samaria tiina bam ma vo Yezu tei ba lwoori‑o se o dáane ba tei ne. O ma ke da yalei de-ba.
41Nɔɔna dedɛ daa ta ma ke ba wo-dedoa ded‑o, o ni taane dem ŋwaane. 42Ba ma ta de kaane wom ba we, “Dé laam ke dé wo-dedoa ded‑o, ye ko dae nmo na tage kolo n bere debam to ŋwaane, se debam tete nigi o taane, ye dé kwori dé lɔre we, wonto mo seene o ye nabiina Vereno wom.”
Yezu yɔɔre dedɛɛro wodwoŋi bu
43Da yalei yam déem na kɛ konto to mo Yezu zaŋe o maa vei Galili laŋa kam. 44Yezu tete nam mo yeini o tɛ o we, ba ba nege Wɛ ni-jwoŋinu o tete teo ne. 45Yezu na vei o yi Galili to, nɔɔna ma jeeri‑o lanyerane, kolo ŋwaane ba ya na vei Jerusalem se ba di Atɔgebabaŋa kuri dem to, ba nɛ wo-kenkagela yalo maama o na ke da to.
46Yezu laam ma jwoori o vo Galili teo kodwoŋi, ko yere mo Kana. Ko maa ye jei selo o ya na pɛ na bam ji sa-soŋo da to. O na yi da to, dedɛɛro wodwoŋi maa wora o na nwoŋi Kaparenia, ye o bu laam daare sɔŋɔ ne, o ba jege yazura. 47O na lɔre we Yezu nwoŋi Judea ne o ba Galili to, o ma vo o tei o lwoori‑o se o vo Kaparenia o yɔɔre o bu wom, o na lage o te to ŋwaane. 48Yezu ma ta ded‑o o we, “Abam ná wo nɛ wo-kenkagela yalo na bere we Wɛ toŋe-ne to, abam bá fɔge á sɛ amo.” 49Dedɛɛro wom daa ma ta o we, “Amo tu, pa se dé vo lela ye amo bu wom daa ta wo tege.” 50Yezu laam ma ta ded‑o o we, “Véi, se n bu wom daa bá te.”
Nɔɔno wom ma ke o wo-dedoa de Yezu na tage tei to, ye o zaŋe o viiri. 51O ta na wo chwoŋa ne o maa vei sɔŋɔ to mo o tontoŋena jeeri‑o, ye ba ta ba we, “N bu wom yera yam gara.” 52O ma bwei-ba o we, “Maŋa kɔ mo ko gare bu wom yera ne?” Ba ma ta ba we, “Ko ye diim, wea tetare ne mo, o paa kam yage‑o.” 53Ba na tage konto to, nɔɔno wom ma guli we ko ye maŋa kam konto ne nɔɔ mo Yezu tage o we, o bu wom daa bá te. O de o sɔŋɔ tiina maama laam ma ke ba wo-dedoa de Wɛ.
54Konto to, Yezu na nwoŋi Judea ne o jwoori o ba Galili ye o ke wo-kenkagele delo to mo ke kuni belei.
अहिले सेलेक्ट गरिएको:
Jɔn 4: KBG
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2020, Ghana Institute of Linguistics, Literacy and Bible Translation (GILLBT)
