Jɔn 19
19
1Pilata laam ma pa se ba yɔɔre ba ja Yezu ba fere. 2Soja tiina bam ma kwei sabare ba ma sɔ yipuga ba pu o yuu ne. Ba ma kwei gare-soŋo ba zo‑o ne o ye pɛ mo tei. 3Ba maa vei o tei kuni dedɛ, ye ba tɛ ded‑o ba we, “Juu tiina Pɛ, de n lei”. Ba maa jege o popwaano ba lɔe.#Matiyu 27:27-31; Maake 15:16-20
4Pilata daa ta ma jwoori o nwoŋi pwooni, ye o ta de kɔgɔ kom o we, “Nii-na, amo wó pa se nɔɔno wom nwoŋi o ba o zege abam yiga ne se á wane á lɔre we, amo wo nɛ o na ke kolo o chɔge to.” 5Yezu ma nwoŋi de o yuu sabare yipuga kam de o gare-soŋo kom. Pilata ma ta de-ba o we, “Nii-na nɔɔno wom da.” 6Kaanem yiga tiina bam de ba nɔɔna bam na nɛ‑o to, ba maa tɛ de kwor-dɛa ba we, “Go‑o! Pa‑o dagara yuu ne n go!” O ma ta de-ba o we, “Abam tete nam ja‑o á pa dagara yuu ne, se amo wo nɛ kolo o na ke o chɔge se a ma vane o bora to.” 7Juu tiina bam ma jwoori ba leiri‑o ba we, “Debam jege Wɛ ni delo na bere we o jege se o te to, kolo ŋwaane o bere o tete we o ye Wɛ Bu.”
8Pilata na nigi ba na tage konto to, foone ma tiini de zo‑o. 9O ma jwoori o zo sɔŋɔ kom wo, ye o bwei Yezu o we, “Nmo nwoŋi yei ne mo?” Yezu ma chem. 10O ma ta ded‑o o we, “Nmo chem mo de amo na? Ta‑n yei we amo jege dam se a yage nmo, naa se a pa ba pa nmo dagara yuu ne ba go.” 11Yezu ma leiri‑o o we, “Nmo ya bá ta‑n jege dam amo baŋa ne, ko ná dae Wɛ mo pɛ‑m. Konto ŋwaane, nɔɔno wolo na kwei amo o ke nmo jeŋa ne to mo tiini o ke wo-lɔŋɔ o dwoni nmo.”
12Maŋa kam Pilata na nigi konto to, o maa kwaane o lage chwoŋa se o pa ba yage Yezu. Ko daare Juu tiina bam maa tiini ba tɛ de kwor-dɛa ba we, “Nmo ná yage nɔɔno wonto, ko wó bere we n chuli logo kom Pa-faro wom mo. Nɔɔno wolo ná pɛ o tete paare, konto tu dwoni de Pa-faro wom mo.” 13Pilata na nigi konto to, o ma ja Yezu o nwoŋi, ye o daare o jeini taane dim jeiŋa kam jei ne. Ba bwoi jei sem konto we, ‘Kandwa-pelwaaro jeiga’ mo. Ko yere de Juu tiina taane dem mo ye ‘Gabata’.
14Ko déem ye wea tetare ne mo, dɛ dem tega na wó poore se Atɔgebabaŋa kuri dem di to. Pilata laam ma ta de Juu tiina bam o we, “Nii-na á pɛ wom da.” 15Ba ma jwoori ba laare baŋa baŋa ba we, “Ja‑o n pa dagara yuu ne n go!” O ma bwei-ba o we, “O ye abam pɛ wom ye á lage se a pa ba go‑o na?” Kaanem yiga tiina bam ma leiri ba we, “Debam ba jege pɛ wodwoŋi, ko ná dae logo kom Pa-faro wom yerane.” 16Pilata laam ma kwei Yezu o ke ba jeŋa ne se ba pa‑o dagara yuu ne ba go.
Ba jaane Yezu ba vo ba pa dagara yuu ne
Matiyu 27:32-56; Maake 15:21-41; Luka 23:26-49
Soja tiina bam laam ma ja Yezu, 17ye ba pa o zeŋe dagara kalo ba na lage ba pa‑o ka baŋa ne to. O ma vo o yi jeiga kalo ba na bwoi we, ‘Yu-kwoli-champoa Peo’ to. Ko yere de Juu tiina taane dem mo ye ‘Goligota’. 18Ko ye dáane mo ba jaane‑o ba pa dagara kam yuu ne. Ba ma ja nɔɔna balei de ba pa dagare baŋa ne. Yezu maa wo banto balei tetare ne.
19Pilata ma popone maanem tɔn-kamunu ye o pa ba tane-ko dagara kam yuu ne. Ko poponem dem we:
YEZU, NAZARETE TU,
JUU TIINA PƐ.
20Juu tiina bam dedɛ déem ma ga tɔnɔ kom, kolo ŋwaane jeiga kalo ba na page Yezu da to bwola de teo kom ni. Tɔnɔ kom déem popone de Juu tiina taane, de Rom tiina taane, de Girisi tiina taane mo. 21Juu tiina kaanem yiga tiina bam na nɛ to, ba ma vo ba ta de Pilata ba we, “Ko wo maŋe se n popone we, ‘Juu tiina Pɛ’. Nam popone we, ‘Nɔɔno wonto mo bere o tete we o ye Juu tiina Pɛ.’ ” 22O ma leiri-ba o we, “Amo na popone tei to daa ba kwana.”
23Soja tiina bam na page Yezu dagara kam yuu ne ba ti to, ba laam ma kwei o gwaaro tem ba pɔɔre-te kuni bena, se soja tu maama kwei o nyem. Ba ma kwei o gare-bu wom de. Ko maama déem sɔge puna mo, ko ba jege twoŋim jei. 24Ko na ye konto to, ba ma ta daane ba we, “Yé pa-na se dé kaare-ko. Nam pa-na dé ta jɔrɔ se dé nii wolo na wó jwoŋi-ko to.” Ko déem ke konto mo se ko pa kolo na popone Wɛ tɔnɔ kom wone to mo ji chega de ko na we, “Ba pɔɔre amo gwaaro ba pa daane, ye ba daare ba ta jɔrɔ amo gare-bu wom ŋwaane.”#Lei 22:18 Soja tiina bam ma seene ba ke konto.
25Balo déem na zega ba bwola de Yezu dagara kam to mo ye o nu wom, de o nu nyaane, de Mary wolo na ye Kalopa kaane to, de Mary wolo na ye Magadala tu to.#Luka 8:2 26Yezu na nɛ o nu wom de o kwaga tɔgeno wolo o na jege o swono lanyerane, ye ba zege da to, o ma ta de o nu wom o we, “A nu, nii nmo bu wom da.” 27O ma daare o ta de o kwaga tɔgeno wom o we, “Nii n nu da.” Ko zege maŋa kam konto ne o kwaga tɔgeno wom jaane Yezu nu wom o pa o zoore o sɔŋɔ ne mo.
28Konto kwaga ne Yezu maa yei we woŋo maama ke ko ti. O na lage se Wɛ tɔnɔ kom seene ko ji chega to, o laam ma ta o we, na-nyɔm jege‑o.#Lei 69:21 29Zoŋa déem mo zege da, ye ka ni su de sana balo na nyɔna to. Ba ma kwei sɔsɔɔ ba de sa-nyɔna bam wone, ye ba vɔ-ko daa ni ne ba tei wɛɛne ba pa se ko yi o ni. 30Yezu ma nyɔ sa-nyɔna bam, ye o ta o we, “Ko laam ke ko ti.” O ma daare o chɔɔle o yuu tega ne, ye o laam pa o jworo kom nwoŋi o tei ne.
31Ko déem ye dɛ delo Juu tiina maama na yeini ba ti ba yiga se ba siu dɛ dem laam yi to mo. Tega na wó poore se ko taa ye ba siu dɛ-kamunu kom to, ba maa ba lage se nɔɔna bam yera yam taa wo dagare sem yera ne dɛ dem konto ne. Konto ŋwaane Juu tiina badwonna ma vo Pilata tei ba ta ded‑o se o pa chwoŋa se ba bwori nɔɔna bam nɛ se ba daare ba pare ba yera yam. 32Konto ŋwaane, soja tiina bam ma vo balo ba na go ba woli de Yezu to tei, ye ba bwori da-yiga nɔɔno wom nɛ, de o dwoŋi wom nɛ. 33Ba ma vo ba yi Yezu. Ba ma na we o maŋe o te mo ye ba daa wo bwori wonto nɛ. 34Ko daare soja tu dedoa ma kwei o chichwei o ma zɔ Yezu saŋa ne. Jana de na maa tae ba nwoŋa. 35Nɔɔno wolo yi na nɛ konto to mo ŋɔɔne ko taane se ko pa abam de wane á sɛ. O maa yei we o na tage kolo to ye chega mo, ye o zege chega kam konto kwaga ne.
36Konto nam ke se ko pa Wɛ tɔnɔ kom ji chega de ko na we, “O kua de dedoa de bá bwori.”#Nwoŋim 12:46; Jeelim 9:12; Lei 34:20 37Wɛ tɔnɔ kom ta tage ko we, “Nɔɔna wó fɔge ba nii wolo wom ba na zɔge to.”#Zekaria 12:10
Ba ke Yezu yibeeli wone
Matiyu 27:57-61; Maake 15:42-47; Luka 23:50-56
38Konto kwaga ne nɔɔno wodwoŋi o yere na ye Josɛf ye o nwoŋi Arimatea to ma zaŋe o vo Pilata tei. O déem ye Yezu kwaga tɔgeno mo ye o ba bere o tete jaja, o na kɔre Juu tiina dedɛɛra bam to ŋwaane. O ma vo o bwei Pilata se o nii, o wó wane o pare Yezu yera yam dagara kam yuu ne na. Pilata ma sɛ se o kwei-ya. Josɛf ma vo o kwei o ja viiri. 39Nikodema wolo déem na vei o na Yezu tete ne to maa tɔge o wora.#Jɔn 3:1-10 O maa jege terale nuga dedɛ o tei ne, ko na maŋe de garewaa yi. Nuga kam ye Mura de Alowa nuga mo gwaane daane. 40Nɔɔna bam konto balei ma kwei Yezu yera yam ba turi-ya de terale nuga kam, ye ba daare ba pipiri‑o de gare-jale, ne Juu tiina na yeini ba ke ba twa tei to. 41Gaare mo wo jei selo ne ba na page Yezu dagara yuu ne to. Peo maa wo gaare dem wone, ye yibeeli-doore wora peo kom yera ne, ba ta na wo ke nɔɔn-nɔɔno da. 42Ko na ye dɛ delo tega na wó poore se ko taa ye ba siu dɛ dem to, ba ma kwei Yezu yera yam ba tiŋi yibeeli dem wone, de jei na bwola to ŋwaane.
अहिले सेलेक्ट गरिएको:
Jɔn 19: KBG
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2020, Ghana Institute of Linguistics, Literacy and Bible Translation (GILLBT)
