Luka 20

1LOMBA yenzepo pa zuŵa liyake, apo penzoŵasambizya ŵantu mchipupilo noŵirizya evangelo, emzila akuru a ansembe na alembi pamo na akuruakuru; 2elaŵira nonena naye, Tiuzyeni nsaka yanji imuchitirako ivi; empani nsaka iyi ni ŵani? 3Naye eyasuka enena naŵo, Nane kumo nimkonsheni lizu, niuzyeni: 4Nga ubatizo wa Yohana wifuma kumulu, kano ku ŵantu? 5Naŵo ekonshana ŵeka na ŵeka kuti, Tikati ni kumulu, aati, Nchinji pamuliyommvwila? 6Sembe tikati ni ku ŵantu, ŵantu ŵonse atipozere myala: pakuti ewezya mtima kuti Yohana enze muŵirizi. 7Naŵo ŵeyasuka kuti, Situziŵa kwiwifuma. 8Yesu naye eŵauzya, Nane kumo sinimuuzyani nsaka yanji inuchitirako ivi.

9Lomba etatikoŵalaŵilila ŵantu linganizyo ili: Muntu ekomola munda wa mipesya nouyapuzisya ku ŵolima, na kuya ku charo chimbi nsita ikuru. 10Nipo pa nsita yake etuma mlumbwana ku ŵolima ŵala, ampeko vyotwala vya mmunda wa mipesya: sembe ŵolima ŵala emnyata nomsuzula chiliye kantu. 11Naye etuma mlumbwana muyake soti: naye kumo emnyata, nomchitila vyankanza nomsuzula chiliye kantu. 12Nipo etuma na wakatatu: naye kumo emlasa nompoza kunja. 13Lomba mwine wa munda wa mipesya echiti, Nichitenji? nimtume mwana wangu wotemweka: kano akamchinzike yeve. 14Sembe ŵolima akamuŵone eyeruzyana umo na muyake echiti, Uyu ni mpyani: natimpaye, upyani uŵe wasu. 15Naŵo empoza kunja kwa munda nompaya. Teti nga mwine wa munda azaŵachitirenji? 16Aaze noŵacheneka ŵolima ŵala noupa munda ku ŵambi. Naŵo akamvwe echiti, Kusaŵa teti. 17Lomba eŵaŵalazya echiti, Nga ichi chilembewa ni chinji,

Mwala wechikana ŵomanga ng'anda,

Wamene uyo wichishiwa mutu wa mngondya?

18Ali wonse ati apone pa mwala uyo azanyenyekenyenyeke; sembe ali wonse uuti umuwile uzomfuntulefuntule nga ni kafuche.

19Lomba alembi na akuru a ansembe esakomkata pa nsita yamene ila; naŵo eŵayopa ŵantu, pakuti eziŵa kuti walaŵira linganizyo ili kwasusya ŵeve. 20Naŵo enzomlolesya, etuma achisondera amene elipazya ŵolungama kuti amuŵende mkanwa, nomtwala ku nsaka nopinguzi wa mmbili. 21Naŵo emkonsha kuti, Asambizi, tuziŵa kuti munena nosambizya kolungama, simupokera vya ku menso, lomba musambizya chendi njira ya Mlungu: 22Kansi nchozomereka kuli seo kumsonkera Kaisari msonko, kano ntemo? 23Sembe yeve eziŵa uchenjezi waŵo noŵauzya, 24Nilangizyeni kobiri. Nga lina chimvwirimvwiri na malembo vya ŵani? Echiti, Ni vya Kaisari. 25Naye eŵauzya, Teti mopeleka kwa Kaisari vintu vya Kaisari, na kwa Mlungu vintu vya Mlungu. 26Naŵo aliyokumakokata malizu aŵa pa menso pa ŵantu: ezimbwa poyasuka kwake nomyalala.

27Lomba emzila ŵambi a Afarisayo, amene akuti kuzyuka kwa akufwa paliye; emkonsha 28echiti, Asambizi, Musa etilembera kuti muntu akafwa mkwaŵo, ana mkazi na chiliye mwana, mkwaŵo napyane mkazi wake nomvyalila mkwaŵo ŵana. 29Lomba enzepo pokwaŵo asano na aŵiri: wotatika etenga mwanakazi na kufwa chiliye mwana; 30na wakaŵiri; 31na wakatatu emtenga; tetyo na ŵala asano na aŵiri soti ntesiva mwana na kufwa. 32Pavuli pake na mwanakazi echifwa. 33Teti mkuzyuka kula kwa akufwa azaŵe mkazi wa ŵani wa ŵala? pakuti asano na aŵiri emchisya mkazi waŵo. 34Yesu eŵauzya, Ŵana a mcharo chino cha pansi otenga notengeshewa: 35sembe aŵo ochishiwa ŵowamila kuloŵamo mcharo chila nozyuka kwa akufwa ntotenga kano kutengeshewa: 36naŵo saafwa soti, pakuti opalana na malaika; ali ŵana a Mlungu, pakuŵa ŵana a mkuzyuka soti. 37Lomba kuti akufwa ozyushiwa na Musa elulula, pa Chimpuza chila, pechimteya Asikuru ni Mlungu wa Abrahamu, na Mlungu wa Isake, na Mlungu wa Yakobo. 38Lomba nte Mlungu wa akufwa, sembe wa amoyo: pakuti ŵonse ana moyo kuli yeve. 39Nipo ŵambi a alembi eyasuka echiti, Asambizi, mwanena wino. 40Pakuti aliyokaŵalala kumkonsha soti lizu liri lonse.

41Naye enena naŵo, Nga onena tyani kuti Kristo ula ni mwana wa Davide? 42Pakuti Davide mwine echiti mbuku la Masalmo,

Asikuru echiti kwa Asikuru ŵangu,

Nkala weo ku kwanja kwangu kwendi,

43Mpaka penti nituchisye tupondo twako msamilo wa malwayo ŵako.

44Teti Davide omteya Asikuru; nga ni mwana wake syani?

45Lomba penzekumvwa ŵantu ŵonse eŵauzya asambili ŵake, 46Chenjerani na alembi ŵala, amene ofwilafwila kuyendayenda na mitopola itali, notemwa malonje a pa mawalo, na vilimba vya mchinzi mmasunagoge, na vikalo vya mchinzi pa mawinga; 47okhamula ng'anda zya anakazi ŵofwilwa, nosenga kolipazya na malizu anyinji: amene aŵa azapokere kupinguliwa kuŵipa ngako.

अहिले सेलेक्ट गरिएको:

Luka 20: MA23

हाइलाइट

शेयर गर्नुहोस्

कपी गर्नुहोस्