M. Yohana 1
1
1PA chiyambiyambi penze Lizu, na Lizu enze kwa Mlungu, nalo Lizu enze Mlungu. 2Wamene uyo enze pa chiyambiyambi kwa Mlungu. 3Vyonse viumbiwa na yeve; penzeve kantu keumbiwa kamene keumbiwa paliye yeve. 4Mwa yeve mwenze moyo, na moyo uyo wenze mwenje wa ŵantu. 5Mwenje ula uyaka mu mfinzi, nayo mfinzi iliycuziŵa. 6Echiza muntu otumiwa na Mlungu, z na lake Yohana. 7Wamene uyo ezila untoni, auchitire untoni mwenje, wakuti ŵonse azomere mwa yeve. 8Yeve ntenze mwenje ula, echizouchitira untoni mwenje. 9Penze mwenje wendi, ula usanikira ŵantu ŵonse, ukuza mcharo. 10Enze mcharo cha pansi, na charo chiumbiwa na yeve, na charo sichimziŵa. 11Ezila ku vyake, naŵo ŵenze ŵake ntempokelela. 12Sembe ŵonse amene empokelela eŵapa ŵala nsaka yakuŵa ŵana a Mlungu, ni ŵala ozomera zina lake: 13amene evyalikwa, nte pa mlopa, nte popangwa kwa muŵili, nte popangwa kwa muntu, sembe kwa Mlungu. 14Lomba Lizu echiŵa muŵili, nolaluka pakati pasu (nase tiŵona mchinzi wake, mchinzi nga ni wa wovyalikwa yeka kwa Awisi), wozula chawanzi na vyendi. 15Yohana emchitira untoni nokuwa kuti, Uyu enze wamene winenzonena zyake, Uyo akuza pavuli pangu lomba ali pantanzi pangu: pakuti enze pantanzi pangu. 16Pakuti mazulilo ŵake seo ŵonse tipokako, chawanzi chipoka chawanzi. 17Pakuti dango lipewa mwa Musa; chawanzi na vyendi vichiza mwa Yesu Kristo. 18Paliye muntu emuŵona Mlungu vyaka vyonse; Mwana sichimo ali mchifuŵa cha Awisi wamene uyo ni emlulula.
19Uyu ni untoni wa Yohana, apo Ayuda a pa Yerusalemi pechituma kwake ansembe na Alevi kumkonsha, Nimwe ŵani? 20Yeve ezomera, aliyokana; ezomera kuti, Ntenili Kristo. 21Naŵo emkonsha, Nga syani? Nimwe Eriya? Echiti, Nte neo yai. Nimwe ula muŵirizi? Eyasuka, Yai. 22Naŵo enena naye, Nimwe ŵani? tiwezye malizu ku etituma. Nga mweka mkuti nne ŵani? 23Echiti, Nine lizu la woŵirikizya mmalambo, Lungamikani njira ya Asikuru, umo mwechinenera Isaya muŵirizi. 24Ŵala etumiwa na Afarisayo. 25Lomba emkonsha emnenera, Nga pamubatiza kati simuli Kristo ula, kano Eriya, kano ula muŵirizi? 26Yohana eŵayasuka echiti, Neo nubatiza na manzi: pakati panu popanama umsaziŵa, 27niye akuza kuvuli kwangu, unisawamila neo kumangulula nsinga ya nkwaŵilo yake. 28Ivi vintu vichitiwa pa Betaniya, silya lila la Yordani, penzobatiza Yohana.
29Mmawa mwake emuŵona Yesu omzila echiti, Ŵonani, Kambelele ka Mlungu, woviimyapo viipa vya mvyaro vyonse! 30Uyu ni winenzonena zyake, Pavuli pangu pakuza muntu wamene lomba ali pantanzi pangu: pakuti enze pantanzi pangu. 31Nane niliyomziŵa; sembe kuti aŵoneshewe kwa Israeli ni penizila neo kubatiza na manzi. 32Yohana echita untoni wakuti, Nimuŵona Mzimu omsikira nga ni nkunda kufumira kumulu, naye enkala pali yeve. 33Nane niliyomziŵa: sembe uyo enituma nibatize na manzi eninenera, Wamene uuti uzoŵone Mzimu omsikila nonkala pali yeve, wamene uyo ni ula obatiza na Mzimu Mtuŵa. 34Nane niŵona, nochita untoni wakuti uyu ni Mwana wa Mlungu.
35Soti mmawa mwake Yohana enzepeneme, na asambili ŵake aŵiri; 36emlolesya Yesu penzoyenda echiti, Ŵonani, Kambelele ka Mlungu! 37Naŵo asambili ŵala aŵiri emumvwa polaŵira, naŵo emkonka Yesu. 38Lomba Yesu echeuka eŵaŵona ŵokonka, eŵanenera, Musakanji? Naŵo enena naye, Rabbi (kulongosolewa ni kuti Msambizi), munkala kuni? 39Eŵauzya, Izani mkaŵone. Teti echizoŵona penzonkala, enkala naye siku lamene ilo: zuŵa likati senda. 40Umo wa aŵo emumvwa Yohana polaŵira nomkonka ni Andreya, pokwaŵo na Simoni Petro. 41Uyo etangulofwanga Simoni mkwaŵo wa vumo limo emuuzya, Tamfwanga Messiya (kulongosolewa ni kuti Kristo). 42Echiza naye kwa Yesu. Yesu emlolesya echiti, Niwe Simoni mwana wa Yohana: woteyewa Kefa (ni kuti kulongosolewa Petro).
43Mmawa mwake echiti aye ku Galilaya, naye efwanga Filipo: Yesu emuuzya, Unikonke neo. 44Lomba Filipo enze wa ku Betsaida, wa ku munzi wa Andreya na Petro. 45Filipo efwanga Natanayeli nomuuzya, Tamfwanga ula wechilemba zyake Musa mdango, na aŵirizi, ni Yesu wa ku Nazarete, mwana wa Yosefe. 46Natanayeli enena naye, Nga kansi kantu kaweme kangafume mNazarete? Filipo emuuzya, Tiyeni mkaŵone. 47Yesu emuŵona Natanayeli omzila enena zyake, Ŵonani, Muisraeli wendi, muliye chiŵepeko mwake! 48Natanayeli enena naye, Mwaniziŵa tyani? Yesu eyasuka emuuzya, Pakaliyokuita Filipo, pewenze mnyansi mwa chiku, nakuŵona. 49Natanayeli emyasuka echiti, Rabbi, nimwe Mwana wa Mlungu; nimwe Mfumu ya Israeli. 50Yesu eyasuka enena naye, Nga panati kwako kuti nakuŵona mnyansi mwa chiku kansi wazomera? uzoŵone vikuru kupula ivi. 51Naye emuuzya, Lezee lezee numuuzyani kuti mze muŵone kumulu kwazuliwa, na malaika a Mlungu okwera nomsikila Mwana wa muntu.
अहिले सेलेक्ट गरिएको:
M. Yohana 1: MA23
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Mapangano Alomba © Bible Society of Zambia, 1923.
