Luka 6

Wayirê Roca Şabati

1Jü Roca Şabati de, İsa wertê hêganê genımi ra vêrdenê ra. Telebanê İsay serê genımi cı ra kerdenê, destê xo de kerdenê hurdi, werdenê. 2Tay Ferisiyan inan rê vat: “Sıma Roca Şabati de çay gurinê? No xırabo!”

3İsay ki nia vat: “Key kı Qıral Dawud u havalê xo bi bi vêsan, Dawudi se kerdi bi, sıma nêwanıt? 4Dawud kuti bi Kê Heqi, nano kı bımbareko iy ra werdi bi. Ni nani ra day bi havalanê xo ki, feqet ni nani teyna rayibi şikiyenê borê.” 5Bado İsay inan rê vat: “Lacê Mordemi, Wayirê Roca Şabatio ki.”

6Ancia jü Roca Şabati de İsa şi xavra, waaz da. Uca de jü mêrık esti bi, destê xowo rast seqet bi. 7İlimdaranê itıqati bı Ferisiyan'a uca de pitenê kı ala İsa Roca Şabati de kesi keno wes yan nêkeno. Ekı İsay jüyê wes kerdenê, inan İsa gerrı kerdenê. 8İsay zana inan aqlê xo ra çık vêrnenê ra. İsay mêrıko kı destê xo seqet bi, iy rê nia vat: “Urcı pay, bê wertı, her kes to bıvênero.” Mêrık ust ra, vatena İsay kerdı.

9İsay vat: “Sıma ra pers kenan: Roca Şabati de rındinı yan xırabinı kerdenı rında? Jüyê xelesnayenı yan kistenı rında?” 10İsay mıleto kı dormı dero, inan ro sêr kerd. Mêrıko kı destê xo seqet bi, iy rê vat: “Destê xo derg kı!” Mêrıki destê xo derg kerd, a deqa destê xo bi wes. 11Ferisiyan bı ilimdaranê itıqati'a kı na diye, hêrsan ver bi xêğ. Ninan mabênê xo de qeşi kerdi kı ala İsay rê se bıkerê?

İsa des u dı hawariyanê xo çineno we

12İ rocan de İsa veciya ko kı Heqi rê düan bıkero. A peşew hata sodır düay kerdi. 13Bi sodır, İsay veng da telebanê xo, wertê ninan ra des u dı tenan rê hawari vat. Namê ni hawariyan nia bi:

14Simuno kı İsay cı rê “Petrus” vatenê, bıraê Simuni Andreas, Yaqub, Yuhanna, Filipus, Bartalmay, 15Matta, Tomas, lacê Alfay Yaqub, Simuno kı mıleti cı rê vatenê “Welat-Hezkerdoğ”, 16lacê Yaqubi Yahuda, jü ki Yahuda İskaryot, owo kı bado İsay rê bêbextiye keno.

İsa waaz dano, nêwesan keno wes

17İsa bı hawariyanê xo'a ko ra ama war. Cayê de duzi de, xeylê telebê xo top bi bi; xerca ninan her cayê Welatê Yahudiyan ra, Yeruşalimi ra, u dormê awkı ra ki sukanê Sur u Sayda ra zaf mordemi amay bi uca. 18Ni amay bi uca kı gos bıderê qesanê İsay u nêweşiyanê xo ra bıxeleşiyê ra. İyê kı destê cındıkan ra deci antenê, biyenê wes. 19Qeweta kı İsay ra amenê her kes kerdenê wes, ay ra her kesi wastenê kı dest iy ra no.

20İsay telebanê xo ro sêr kerd, nia vat:

“Ğeji bê sıma, ey feqiri,

Hukumdariya Heqi ê sımawa.

21Ğeji bê sıma, iyê kı nıka vêsanê,

Sıma benê mırd.

Ğeji bê sıma, iyê kı nıka berbenê,

Sıma hunê.

22Ekı saba Lacê Mordemi

Sıma ra hez mekerê,

Sıma megerê mabênê xo,

Sıma xo ra cêr de bıvênerê,

Namê sıma xırabın kerê,

A waxt ğeji bê sıma!

23A rocı kêf bıkerê, bıhuyê,

Xelata sımawa kı asmên de gırsa.

Pi u khalıkanê inan ki

Pêxemberan rê çiyê nanêni kerdi bi.

24Feqet, wey halê sıma, iyê kı variyetınê,

Sıma teseliya xo gırotı.

25Wey halê sıma, iyê kı nıka mırdê,

Sıma vêsan manê.

Wey halê sıma, iyê kı nıka hunê,

Sıma ki şiyan gırê danê, berbenê.

26Ekı her kes sıma goyneno,

Wey halê sıma!

Pi u khalıkanê ninan ki

Pêxemberê zürikeri goynenê.”

Dısmenanê xo ra hez bıkerê

27İsay nia dewam kerd#6:27 İsay nia dewam kerd: Ni qesi metnê Yunanki de çinê, feqet ma ni çarnayış de ni qesi nusnay kı çımê sıma ra meremo kı İsa qeşikerdena xo rê dewam keno. Ni ayetê kı cêr de nusnê, ninan de ma pêro zê jübini nusnay: 6:27, 6:37, 6:43, 15:8, 16:10, 16:19, 21:20: “İyê kı gos nanê mın ser, inan rê vanan: Dısmenanê xo ra hez bıkerê, iyê kı sıma ra hez nêkenê, inan rê rındinı bıkerê. 28İyê kı sıma rê naleti wanenê, sıma saba inan rındinı bıwazerê. İyê kı sıma rê dısmeninı kenê, sıma inan rê düan bıkerê. 29Ekı jüyê dano gepa sıma ro, gepa xoa binı ki açarnê. Ekı jüyê çaketê sıma gêno, sıma işliga xo ki cı derê. 30Kamo kı sıma ra çiyê wazeno, bıderê cı. Jüyê kı sıma ra thaba gıroto, cı ra peyser mewazerê. 31Sıma kı saba xo, sari ra çık wazenê, saba sari ki ay bıkerê.

32“Ekı sıma teyna iyê kı sıma ra hez kenê, inan ra hez bıkerê, çı qimetê iy esto? Gunakari ki, iyê kı cı ra hez kenê, inan ra hez kenê. 33Ekı sıma teyna iyê kı sıma rê rındinı kenê, inan rê rındinı bıkerê, çı qimetê iy esto? Gunakari ki nia kenê. 34Key kı sıma dên danê jüyê, ekı inam kenê kı cı ra dênê xo peyser gênê, çı qimetê iy esto kı? Gunakari kı bızanerê dênê xo peyser gênê, i ki dên danê gunakaranê binan. 35Nıka sıma dısmenanê xo ra hez bıkerê. İnan rê rındinı bıkerê, inan ra thaba mepiyê, hini dên bıderê cı. Ekı sıma nia bıkerê, xelata sıma gırs bena. Owo kı her çi ra berco, sıma benê domanê iy. Çıkı O rama xo dano xırabınan u gunakaran bilı. 36Senên kı Piyê sımao kı asmên de ramaniyo, sıma ki zê iy ramani bıberê.”

Heqa kesi de hukım mederê

37İsay nia dewam kerd: “Heqa kesi de hukım mederê kı Heq ki heqa sıma de hukım medero. Kesi gunakar mekerê kı Heq ki sıma gunakar mekero. Ef bıkerê kı Heq ki sıma ef bıkero. 38Bıderê kı Heq ki bıdero sıma. Qaba de rınd hengıtayiya, hente kı pırra, ser de sona, bı a qab'a sıma rê varneno. Sıma kı çıqa bıderê sari, Heq ki hente dano sıma.”

39İsay inan rê mesela de nanênı qeşi kerdı: “Jü mordemo kor şikino ray bımuskıno korê bini? Ekı hini bıkero, ni hurdmena pia nêgınê çalı ro? 40Telebı malımê xo ra berc niyo, feqet telebıo kı mektebê xo bıqedıno, bı malımê xo'a beno jü dus ra.

41“Çay zelıko kı çımê sari de vênenay, mertego kı çımê xo de iy nêvênenay? 42Mertegê çımê xo nêvênenay, jü ki sari rê vanay, ‘Bıra, fındı, zelıko kı çımê to dero iy veceri.’ Tı çıqa dı-rüyınay! Sıftı mertegê çımê xo vecı kı zelıko kı çımê iy de rınd bıvênerê kı vecerê.”

Dara rındı meywê rındi dana

43İsay nia dewam kerd: “Dara rındı meywê xırabıni nêdana; dara xırabını ki meywê rındi nêdana. 44Her darı meywê xo ra nas bena. Dırrıkı ra hêcirı, çaliyan ra ki hengurı nêna top kerdenı! 45Mordemo rınd zerria xo de rındinı dareno we, ay ra qesawa rındı vano. Mordemo xırabın ki zerria xo de xırabiyayenı dareno we, ay ra qesawa xırabını vano. Zerria mordemi de kı çık esto, fekê iy ra ki o vecino.

Dı mordemi, dı banan vırazenê

46“Sıma çay mı rê ‘Ya Wayir, ya Wayir’ vanê, feqet vatena mın nêkenê? 47Owo kı êno lê mın, qesanê mın eşino pê, vatena mın keno, mando kami, sıma rê vaceri: 48No mordem, mêrıko kı ban vırazeno, mando iy. O herd rınd kıneno, temelê bani erceno serê kemerı. Ban rınd amo vırastenı, ay ra hurindia xo de mano. Laşêr kı bêro, ban nêrıjino. 49Owo kı vatena mın eşino pê, feqet ay nêkeno, o ki mêrıko kı banê xo bêtemel vırazeno, mando iy. Laşêr kı bêro no ban a deqa rıjino, beno têser u têbını ra.”

अहिले सेलेक्ट गरिएको:

Luka 6: kiu

हाइलाइट

शेयर गर्नुहोस्

कपी गर्नुहोस्