मत्ती 7

दोष मा लागाडाहा

(लूका 6.37-38,41-42)

1तुमाआ दोष काढण्याम आवहू कायना कोईत तुमु कोडाआ दोष काढहु नाहा; 2काहाके ज्यपोरोत तुमु दिहराहा दोष काडीलो तेह्लाम तियाआ प्रकारे तुमाआ पण दोष लागाडे अने ज्या मापोवांही तुमु मापीत आपी, तियाआ मापोवांही तुमा कोअता मापाय. 3तू काहा आपाआ पायहोओ डोआम कोसरू पालत्लू, अने आपाआ डोआमेऱ्यूं कोसरू होमजाडीत नाहा. 4किंवा तू आपाआ पायहोहो केहलु कोहू सेकेहे का, लेतआव, आयताआ डोआमेऱ्यूं कोसरू काढीत आपोहो तेबी पाला, कोसरू ताहा स्वतःआ डोआम होय? 5ओ ढोंगी, पहीले ताआ डोआमेऱ्यूं कोसरू काढीत ले, तेहलाम ताहु आपाआ पायहोओ डोआमेऱ्यूं कोसरू काडीला साफ देखाईलो. 6पवित्र वस्तु कुत्राहा आपुहू नाहा अने आपाआ मोती डुकरांपुढे मा टाकाहा नाहा, का एहलो उवूंहू नाहा का ते तियाहा गुडानिसे तुडवितील अने फिरीत तुमाहाजे फाडीत टाकीदेय.

परमेश्वर पोरोत मांगलोओ

(लूका 11.9-13)

7मांगा म्हणजे तुमाहा आपे, हुदा म्हणजे तुमाहा जोडे, ठोका म्हणजे उगाड्ये जाइअलो. 8काहाके जो कोडु मांगत्लू तियाहा जोळे जो कोडु होदत्ले तियाहा जोडत्लो, जो कोडु ठोकीलो त्यांकोअता उगाड्ये जाइअलो. 9तुमामे एहेलू कोडू होय जो आपाआ सुआहा जांहा तो भाकर मांगनारू तेहलाम दगडू आपी? 10किंवा मासे मागेहे ताहा तियाहा हाप आपे? 11जर तुमु वाईट ओत कायनाहा आपाआ पोऱ्याहा हाजा वस्तु आपलो होमजतोलो ताहा तुमाआ बाह्हू जो होर्गाम होय तो आपाआ हाजा वस्तु जाखा काहा आपी नाहा? 12त्यापोत जेहेलो तुमामे वाटिलो का मांहे तुमाहा वागीलो तेहलूज तुमु बीही त्याआरी वागा. काहाके नियमशास्त्र अने संदेष्टे ओच हिकाडतो होय.

सरल अने कठिन मार्ग

(लूका 13.24)

13हाकडी बाअनामरोत विसमे प्रवेश को काहाके वोडू मार्ग होय तो विनाश मेहे लेत जात्लू, अने जास्तीज मांहे तीयावाही विसमे प्रवेश कोअता. 14पण हानू अने रुंद होय तो मार्ग जीवनापो घेऊन जात्लू अने कोम मांहे तीयावाही विसमे जातेहे.

फलोसी साड उल्खाय

(लूका 6.43-44; 13.25-27)

15खोटो संदेष्टयापासून सावध रोजे मेंढरांहा वेहोमेहे तुमाआ आहने आवत्ले होय पोन मायरोत फाडनारा भेडीया होय. 16तियाआ फलापोरोत तियाहा तुमु ओलखीत लेहा, किबी काटाआ झाडाउपो द्राक्षे किंवा रीगनाई साडोपोरोत अंजीर काडीलो तेह्लाम नाहाकोत? 17यावाही हर एक हाजो साड हाजो फोल आपोहो, पण वाईट साड वाईट फोल आपोहो. 18हाजो साड वाईट फोल आपुहू सेकेहे नाहा, अने वाईट साड हाजो फोल आपुहू सेकेहे नाहा. 19हर एक साड जे हाजो फोल आपित नाहा आगीम टाकिला आवे. 20याकोअता तुमु तियाआ फलापोरोत ओलखीत लेहां. 21हर एक जोओ जो माहु ओ प्रभू, ओ प्रभू कोत्लू, तिया होर्ग्याआ राज्याम प्रवेश उवे नाहा, पण जो माआ होर्गाआ बाह्हाआ इच्छेवाही चालीलो तोज होर्ग्याआ राज्याम प्रवेश उवे. 22न्यायो दीही जास्तीज मांहे माहु कोत, ओ प्रभू, ओ प्रभू, आमाहा ताआ नावामेहे भविष्यवाणी कोल्यु, ताआ नावामेहे दुष्टात्मा काढीलो, अने ताआ नावामेहे केतो आश्चर्यकर्म कोल्यु नाहा? 23तेहलाम आय तियाहा हीदू कोही, आय तुमाहा केधीज ओलख्यु नाहा. ओ पाप कोअनारावाही मापोरोत सेटे ओ.

बुद्धिमान अने मुर्ख मांहो

(लूका 6.47-49)

24त्यापोत जो कोडु माआ याआ वचनाआ होम्लाडित तेहलो चालीलो, तो तियाअ बुद्धिमान मांहो होच होय, जीआ आपाआ कोअ खोडकापो बानदल्यो होय. 25अने पाई पोडीत, खाडी आवयी, वारू ए आवयू तेबी तियाअ कोओहो लाग्यू तेबी ते कोअ पोडये नाहा, काहाके तिया पायु खोडकापो टाक्यू ओतु. 26पोन जो कोडु माआ वचनांमे मानत्लू, अने तियाआ पालीत कोईत नाहा, तो तियाअ गांडाहोस होय जीआ आपाआ कोअ रेटापो बानदल्यो होय. 27अने पाई पोडीत, खाडी आवयी, वारू ए सुलटोया तिया कोओहो लाग्यू, तेहलाम ते पोडीत गोये अने आखो सत्यानाश ओत गोयो. 28याआ परिणाम ओ ओवयू का, जांहा येशु याआ गोठी कोत ओवल्यु तेहलाम एखठी उवली गोर्दी तियाआ शिक्षणापोरोत आश्चर्यचकित उवी. 29काहाके तो तियाआ शास्त्रीहोस नाहा ताहा अधिकाराआ होस हिकाडतो ओतु.

अहिले सेलेक्ट गरिएको:

मत्ती 7: NOINT

हाइलाइट

शेयर गर्नुहोस्

कपी गर्नुहोस्