Asse'amaa'n Baxo 7
7
Isxifaanoos Wocu Woshsha
1Hundiinsi lob qeessichchim Isxifaanoosina «Ku woshshi hanqannihe?» yukko. 2#Qoc 12:1 Isxifaanoosim dabaraa «Iyyanno'oo iyyabbaayyuwwaa, an kuroommi woshsha macceessehe. Niyyanni Abrihaam Haaraananne hee'eena maroo'n illageen Maspheexoome'enne hee'ukkuuyyim lombaam Waa'i ixxena moo'amukko. 3Moo'amaa ‹Ki uulliinsii ki qarmanniinsii annanni ikkaa an kiina moo'isoommi uulla mare› yukko. 4#Qoc 11:31; Qoc 12:4 Ee bikkina Abrihaam Kalaade'i uulliinsi annanni ihaa maraa Haaraananne hee'ukko. Ixxi anni lehaa lasage Waa'i Abrihaama ee beyyiinsi fissaa kaba ki'nnuwwi hee'llakkam ka uulla worukko. 5#Qoc 12:7; 13:15; 15:18; 17:8 Waa'i Abrihaamina mat taachcho'o ihooqax uullam ixxi gulummi issaa uwwoo'nnim ‹Kiinaa kiinniinsi lasage ki shumo'inaa ki'nnuwwi gulummi issaa ka uulla uwwoommo› yukko. Waa'i eekka wocu ammane Abrihaamina oos ma'lluchchim hee'ukkoyyo. 6#Qoc 15:13-15 Odim Waa'i Abrihaamina ‹Ki oos mulli manni uullanne waaraan ikka'a hee'llamo; ee uulli mannim ixxuwwa soor xibbi hiinchi afeebe'e hawwissu'uuyyi agiddano gassitamo. 7#Doy 3:12 Odim ixxuwwa agiddano gassu mannanne oogatoommo. Ee lasage ee uulliinsi fitta'a waatta'a ka uullanne iina otossitamo› yaa kurukko. 8#Qoc 17:10 Waa'im Abrihaamina hidi'l mare'i ihoo'isina ballachchancha uwwu bikkina Abrihaam Yisaaqa qaramu sadeenti ayyaamonne ballachchukko. Yisaaqim ixxi beeto Yaaqooba ballachchukko. Yaaqoobim ixxi tommoo lamem oosom ballachchukko. Oo tommii lamem oosim tomminaa lamem Isra'ee'l moollinaa anno'o.
9 #
Qoc 37:11; Qoc 37:28; Qoc 39:2 «Oo niyyanno'im ixxuwwi abbaayyi Yooseefanne to'achchita'a Gibxi uulli mannina biteesso'aarem Waa'i ixxenne maqire hee'ukko. 10#Qoc 41:39 Waa'i ixxo hawwi hundichchiinsim gatisaa Faari'oon illagenne nuuraa qooroomaa uwwaa Faari'oon ixxo iittoo'isa issukko. Oo adilim Yooseefa Gibxi uullannee ixxi mi'n abaroos hundannee gassaanchi issukko. 11#Qoc 42:1 Ee doollenne Gibxi uullannee Kaana'aa'n uullannee hundannem qaanne'i aagaa hee'u bikkina lobakat hawwi ihaa niyyanno'im hurbaata siixxiteena xanto'oyyo. 12Ihukkaarem Yaaqoob Gibxi uullanne hurbaat yoo'isa macceesu ammanenne niyyanno'o luxxaagge ee uulla asse'ukko. 13#Qoc 45:1; Qoc 45:16 Odim la'm korem Gibxi uulla matto'aare Yooseef ixxi gaga ixxi abbaayyuwwina la'isukko. Faari'oonim Yooseef sullo la'ukko. 14#Qoc 45:9 Yooseefim manna asse'aa ixxi anni Yaaqoobaa ixxi qarmannaa hundam lamarayyee onti manchoo ixxi beyyo weeshisukkaare 15#Qoc 46:1 Yaaqoob Gibxi uulla marukko. Ee uullannem ixxii niyyanno'ii leto'o. 16#Qoc 23:3 Ixxuwwi leesham dabarakka'a eebakka'a Abrihaam Hamoor moolliinsi diinatinne bitaa'u uullanne Seekeemanne waammakko'o.
17 #
Doy 1:7-8
«Waa'i Abrihaamina ‹Uwwoommo› yu luwwa uwwoo amman hincukkuuyyi waarukkaare Isra'ee'l minaadab Gibxi uullanne lophphaa fikkaannukkuuyyi marukko. 18Fikkaannukkuuyyi marukkokim Yooseefa la'oobee'i mulli adil Gibxi uullanne ki'eebe'e hee'ukko. 19#Doy 1:10 Oo ki'u haareechchi adil ni shumo'ina hantaaro baxaa ciilluwwa lehona biiranne uunjakkamisa issukko. 20#Doy 2:2 Ee doollennem Muse'e qaramukko. Waa'i illagenne ixxi mishisoo danaam hee'u bikkina qaramu saxxi agan afeebe'e ixxi anni minenne li'ukko. 21#Doy 2:3 Ixxo uunjakko'aare Faari'oon landichcho massita'a is qachchisa issita'a li'isso'o. 22Muse'em Gibxi uulli qooroom hundam losaa wocoo woshshannee baxoo baxonnee malaayyaam hee'ukko.
23 #
Doy 2:11-15
«Muse'e qaramukkaanniinsi sor hiincho ihu ammanenne ixxi abbaayyuwwi ikko'i Isra'ee'l ooso moo'eena sawwukko. 24Ee Isra'ee'l oosika mato Gibxi uulli manchi hawwodukkuuyyi Muse'e moo'aa Isra'ee'l manchina agaagaa ee Gibxi uulli mancho aphphisaa shaa baado miqisukko. 25Waa'i ixxi kollinne ihaa ixxuwwa wolabbanonne fissoo'isa ixxi abbaayyuwwi laqqo'oka labisukkaarem ixxuwwi eekka qoossita'a laqqo'oyyi hee'ukko. 26Odim la'm balla Isra'ee'llek lam manchi wocantu'uuyyi moo'aa iittanseena hasaa ‹Manna, ki'nnuwwi lamim abbaayyuwwa; mahina wocantakkamuulla?› yukko. 27Ixxi beshichcho hawwodam hee'u manchi dabaraa ‹Keese ni hanenne gassaanchoo oogataanchoo issukkok ayyette? 28Beeballa Gibxi uulli mancho shittisam eesem shiteena hassaatennihe?› yaa Muse'e gafe'ukko. 29#Doy 18:2 Muse'e oo manchi wocu woshsha macceesu ammanenne Gibxi uulliinsi gibaa Miidiyaa'm uulla marukko. Eekke'em lam ooso qarukko.
30 #
Doy 3:1-10
«Muse'e Miidiyaa'm uulla marukkaanniinsi sor hiincho ihaa lasage Waa'i asse'amaanchi Muse'ena Siina'i duu'n udma'i shif lambe'enne gii'l laba'nnisa ihaa moo'amukko. 31-32Muse'e moo'u ammanenne ee moo'u luwwanne maalalaa moo'eena hincu ammanenne ‹An kiyyanno'i Waa'a, Abrihaam Waa'a, Yisaaq Waa'aa Yaaqoob Waa'aa› yoo sagar Waa'iinsi waarukko. Muse'em baa'aa huxe'aa moo'imma baddukko. 33Waa'im Muse'ena ‹At uullitti beyyi keesamaakkoohan ihu bikkina ki lokkiinsi caamma'a fisse. 34Gibxi uullanne yo'i i minaadabanne afu hawwo hanqinam moo'aammo. Ixxuwwi laachcham macceesaa an ixxuwwa ee hawwiinsi fisseena waaraammo. Kaba waare; an keese Gibxi uulla asse'oommo› yukko.
35 #
Doy 2:14
«Isra'ee'l minaadab ‹Keese ni hanenne gassaanchoo oogataanchoo issukkok ayyette?› yita'a sabbo'i Muse'e, Waa'i gassaanchoo wolabbanonne fissaanchoo issaa udma'anne shif woronne moo'amu ixxi asse'amaanchi kollinne asse'ukko. 36#Doy 7:3 Muse'em Gibxi uullanne, Ertiira'i Dambalaqannee uulli udma'annee maalalsiisoo luwwaa agannaa issukkuuyyi sor hiincho awwonsukko. 37#Se'l 18:15 Isra'ee'l minaadabina ‹Ki'nnuwwi abbaayyuwwiinsi Hiraagaanchi eese Waa'i ki'isukkisam#7:37 «Eese ki'isukkisam» yoo sagar «Iinni'nnoo'oka» yimmam iheena xanookko. ki'nnuwwina ki'isookko› yukkok ka Muse'etteme. 38#Doy 19:1—20:17; Se'l 5:1 Siina'i duunanne ixxena wocu Waa'i asse'amaanchinne, niyyanno'innee udma'anne wixxu minaadabinnee hee'ukkok ka Muse'etteme. Ixxim niina afiseena heechchi sagara Waa'iinsi aa'ukko. 39Niyyanno'i ixxo gafe'llo'o bagaan ixxena ijaajanto'oyyo. Ixxuwwim ixxuwwi wodanonne Gibxi uulla daba'lliteena mixxa'a 40#Doy 32:1 Aaroonina ‹Ku neese Gibxi uulliinsi fissu Muse'e maha ihuda'e lanqummoyyo. Ni illagenne maroo waa'uwwa baxe› yito'o. 41#Doy 32:2 Ee ammanem wee'ichchi misila baxxa'a ee misilina kitima hincaa'lla'a ixxuwwi angi baxukkaannonne liiranto'o. 42#Amo 5:25-27 Ihukkaarem Waa'i ixxuwwiinsi annanni ihaa iima'n boollaanki gogotina otossitamisina higisaa uwwukko. Oohim hiraagaan kitaabbo'i kitaabbuwwanne
‹Isra'ee'l minaadaba,
sor hiinchi afeebe'e udma'anne hee'llakko'i ammane
duramoo diinatee kitimaa iina hincaa'llakko'oyyo.
43Moolooka yakkam qophpha'n waa'ika dukkaana iyyitakko'o.
Otossitakkeena baxxakko'i boollaanki misilam
Erefaana yakkam qophpha'n waa'ika iyyitakko'o.
Ee bikkina an ki'nnuwwa Baabiloo'n uulla qeessoommo› yamamaa kitaabamukkane.
44 #
Doy 25:9
«Niyyanno'i udma'anne hee'llu'uuyyi Waa'inne edantam dukkaan hee'ukko. Oo dukkaanim baxamukkok Waa'i Muse'ena kurukkisinnettee moo'isu duuha'innettee. 45#Iya 3:14 Niyyanno'im ixxuwwi anno'iinsi ee dukkaana aa'lla'a Waa'i hollu minaadaphphi uulla aaggu'uuyyi Iyyaasinne maqirem ee dukkaana iyyita'a matto'o. Oo dukkaan Daawiit doolli afeebe'e ee beyyonnem hee'ukko. 46#2Sam 7:1 Daawiitim Waa'i illagenne nuura siixxaa Yaaqoobik Waa'i#7:46 Mat mat tiraxxi kitaabbuwwi «Yaaqoobina Waa'a» yookkoka «Isra'ee'l minaadaphphi Waa'a» yookko. hee'oo mine baxeena Waa'a uunxukko. 47#1Adl 6:1 Ihukkaarem Waa'ina mine baxukkok Salamoonatte. 48Salamoon mine baxona bagaan manni angi baxu minenne hundam xanoo Waa'i garooyyo. 49#Isa 66:1-2 Oohim hiraagaanchi
‹Waa'i «Iiman Iina adilla'n barcuma.
Uullim an hance'oommane.
Ki'nnuwwi iina baxxakkam min hinkido'ane?
Te'im an hee'oommi beyyi hinkido'ane?
50Oo luwwi hundim i angi baxukkaneyyonnihe?» yoolla› yukkane.
51 #
Isa 63:10
«Ki'nnuwwi xiiqqantakkam keeno, ki'nnuwwi wodanim ifiisamaakkoo keeno, ki'nnuwwi maccim macceesoobee'i keenoo odim ki'nnuwwi anno'isam amman hundam Keesammi Ayyaan kuroo luwwa sabbakkam keenoo! 52Hiraagaaniinsi ki'nnuwwi anno'i hawwissa'a yaayyitoo'n utto'ok ayyi yookko? Muccur awwaadaanchi waaroo'isa gaassita'a kutto'i keeno ki'nnuwwi anno'i shito'isam ki'nnuwwim ee muccur awwaadaancho higissakka'a uwwitakka'a shitakko'o. 53Ki'nnuwwi odim Waa'i asse'amaaninne uwwamu Waa'i ijaajo aa'llakka'a egettakko'oyyo» yukko.
Isxifaanoosa Kininne Aphphisakka'a Shakko'isa
54Oo manni eekka macceesso'i ammanenne Isxifaanoosinne nadadda'a inqe iicco'o. 55Ihukkaarem Isxifaanoosanne Keesammi Ayyaan dillukkaare xuxxaa iimane moo'ukko. Iimanennem Waa'ika lombaa Yesuus Waa'i makkanne uullaakkookkokaa moo'ukko. 56Ixxim «Moo'llehe! Iiman fooqaa Manchi Beetim Waa'aannonne makkanne uullaakkookkoka moo'oommuulla» yukko. 57Ihukkaarem ixxuwwi sagara iimaa'lla'a shuutta'a wocoo woshsha macceessambee'isa macce ifiixxita'a mat ikka'a Isxifaanoos hanenne geetto'o. 58Ee ammanem beero'iinsi tochchonne fissita'a kininne aphphisso'o. Woddaa'i naqaashshuwwim ixxuwwika eddechcha Saawula yakkam woraadichchi egeroo'isina ixxi lokki beyyonne dissito'o. 59Ixxo aphphissonam Isxifaanoos «Moollanni Yesuusa, i foore at aa'e!» yukko. 60Odim guruphphaa sagara iimaa'aa «Moollanna! Ixxuwwika baaxiilo haafihe» yaa Waa'a uunxukko. Eehid yaa Waa'a uunxaa lasage lehukko. Saawulim Isxifaanoos lehoo'isina iittamaa hee'ukko.
अहिले सेलेक्ट गरिएको:
Asse'amaa'n Baxo 7: KeesKita
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
