Asse'amaa'n Baxo 6
6
Lamar Awwaadaano Doo'llakko'isa
1Hofqax ammaniinsi lasage amma'nnaa'nnek xig exxukkuuyyi maru ammanenne Giriik suuminne woccam Yihuxxek busar meenti ballina ballina baxxansakka'a uwwakkam hara'mmatonne hawwodanto'i bikkina ixxuwwi gaqqi suuminne woccam Ayihuxxi mannanne quunquunto'o. 2Ee bikkina amma'nnaano hundam tommii lamem asse'amaanim weeshsha'a «Neese hurbaata baxxansimminaa yinaa Waa'i sagara alallaatimma urimmi hanqayyo. 3Niyyabbaayyuwwa, ki'nnuwwi lambe'iinsi danaam sad yoo kee'nneka Keesammi Ayyaanii qooroomii wo'mmaakkoo keeno lamar mancho doo'llehe. 4Ihukkaarem neese Waa'a uunxatonnee Waa'i sagara kurimmi awwaadonnee guruphphammoommo» yito'o. 5Ixxuwwi yito'i woshshanne manni hundim liiramukko. Ee bikkina amma'nnatii Keesammi Ayyaanii wo'mmaakkoo Isxifaanoosa, Filiphphoosa, Firikiraasa, Nikaanora, Ximoona, Farminaasaa Anxooke'e yakkam uullika Ayihuxxi manni amma'nnatonne daba'llaakkoo Niqoolaasaa doo'llito'o. 6Ee keeno asse'amaa'n illagenne amma'nnaan uullisso'aare asse'amaanim ixxuwwi hanenne anga issita'a Waa'a uunxito'o.
7Waa'i sagarim haraarukkuuyyi marukko. Amma'nnaa'n xigim Yerusaaleemanne lobakata li'ukkuuyyi marukko. Lobakat qeessuwwim mishiraachchi sagara aa'lla'a amma'nnito'o.
Awwaadaanchi Isxifaanoosa Amadakko'isa
8Waa'ik uwwanchii malaayyii Isxifaanoosanne wo'mmukko. Ixxim manni lambe'enne lobakata maalalsiisoo luwwaa agannaa issam hee'ukko. 9Ihukkaarem «Wolabbanonne fitto'oo kee'n wixxixxi mine» yakkam wixxixxi mi'n mannik Qaareena yakkam uulliinsi, Alaksaandira yakkam beero'iinsi, Kilqe'ee Issiya yakkam uulliinsii waatto'i mannik mat mat keen Isxifaanoosinne fitantam hee'llo'o.
10Ihukkaarem Isxifaanoos wocoo'isina Keesammi Ayyaan uwwu qooroominne uullixxanteena xanto'oyyo. 11Ee bikkina oo keen «Waa'aa Muse'ee Isxifaanoos game'llukkuuyyi macceensaammo» yitam manna worinne ki'isso'o. 12Ee'isinne minaadaba, lommannaa seera losisaanoo Isxifaanoosanne ki'isso'o. Ixxuwwim Isxifaanoos beyyo matta'a ixxo amadda'a dummichchi daannuwwi illagenne hincaa'llo'o. 13-14Odim «Ku manchi ‹Naazireexxi Yesuus Keesammi Mine bi'isookko. Muse'e niina uwwu losanom dabarookko› yaa ka keesammi beyyonnee Seerannee jora wocukkuuyyi macceensaammo» yita'a naqqassam qophpha'n naqaashshuwwam uullisso'o. 15Dummichchanne afuutto'i manni hundim ixxo wixxita'a moo'llu'uuyyi ixxek illi kolli Waa'i asse'amaanchi illi kollisa ihaakkookkoka moo'llo'o.
अहिले सेलेक्ट गरिएको:
Asse'amaa'n Baxo 6: KeesKita
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
