Asse'amaa'n Baxo 1
1
1 #
Luq 1:1
Iittantaattoo Teewoofiloosa, an luxxeka kitaabummi kitaabanne Yesuus Kiristoos luxxaanniinsi ki'isaa iimane massamoo balli afeebe'e issu luwwaa losisu luwwaa hundam kitaabaammo. 2Iimane marukkokim ixxi doo'llu asse'amaanina Keesammi Ayyaa'n kollinne ijaajo uwwaa lasage. 3Ixxim lehiinsi ki'aa lasage sor balla lobakat googinne lehiinsi ki'ukkisa ixxuwwina moo'isukko. Waa'i adilla'n bikkinam kurukko. 4#Luq 24:49 Odim Waa'i aagu neeyyata egerimmiinsi bagaan Yerusaaleemiinsi fittambee'isa ixxuwwinne maqire hee'u ammanem qoxxisaa kurukko. 5#Mat 3:11; Mar 1:8; Luq 3:16; Yoh 1:33 Oohim «Yohaannis wo'inne xammaqaakko. Ihukkaarem hofqax ammaniinsi lasage ki'nnuwwanne Keesammi Ayyaan hee'oo'isa issimminne xammaqoommo» yaa ixxuwwina kuru luwwa.
Iimane Yesuus Marukkisa
(Mar 16:19-20; Luq 24:50-53)
6Awwonaan Yesuusinne maqire mat ikka'a wixxito'i ammanenne Yesuusina «Moollanna! Kaba Isra'ee'l adillano dabattaa uullissoohonnihe?» yita'a xa'mmito'o. 7Yesuusim ixxuwwina «Iyyanni Waa'i ixxi malaayyinne issu doollee ammanee laqqakkamisina ki'nnuwwina uwwamukkoyyo. 8#Mat 28:19; Mar 16:15; Luq 24:47 Ihukkaarem Keesammi Ayyaan ki'nnuwwanne dilloohaare malaayye aa'llakka'a Yerusaaleemanne, Yihuxxi uulli hundanne, Samaare'i uullannee uulli hundannemii i bikkina kuttakkam keen ikkakkamo» yukko. 9#Mar 16:19; Luq 24:50 Eekka wocukkisam ixxuwwi moo'llu'uuyyim iim ki'ukko. Duubim ixxuwwi illiinsi daphphaa'ukko.
10Yesuus iimane marukkaare awwonaan iim xuxxita'a moo'llonam qadaalli eddechcha edde'llo'oo lam manchi ixxuwwi gadanonne uullito'o. 11Ixxuwwim awwonaanina «Galii'l uulli manna, iimane moo'llakku'uuyyi mahina uullitakka'ate? Ku ki'nnuwwiinsi iimane massamu Yesuus moo'llakku'uuyyi iimane marukkisam ee'isam daba'llaa waarookko» yito'o.
Yihud Beyyonne Maatiyaas Doo'llamukkisa
12 #
Mat 10:2-4; Mar 3:16-19; Luq 6:14-16 Ee lasage asse'amaan Wee'l duuniinsi Yerusaalee'm beero'o daba'llito'o. Oo Wee'l duun Yerusaalee'm beero'iinsi honsi xibbi meetira ihooqax goog hee'ukko.#1:12Giriik kitaab «Mat Usheexxaxxi Ayyaa'm googo» yookko. Oohim lam kum angiqax beyyo yimma. 13Ixxuwwim Yerusaalee'm beero'o aagga'a eraare usheexxitam beyyo oohim biddiqaa baxamaakkoo mi'n iimane fitto'o. Fitto'i keenim Pheexiroosatte, Yohaannisatte, Yaaqoobatte, Indiraasatte, Filiphphoosatte, Toomaasatte, Bartoloomoosatte, Maatiwoosatte, Ilfiyoos beet Yaaqoobatte, to'achchaanchi Simi'oonattee Yaaqoob beet Yihudattee hee'llo'o. 14Oo keen hundim mat ikka'a Yesuus ama Maaraame, Yesuus abbaayyuwwaa mulli meentoo edda'a Waa'a uunxatonne guruphphanto'o.
15Mat ayyaamo Pheexiroos mat xibbee lamiyyee ikkam amma'nnaan abbaayyuwwi lambe'enne uullaa 16«Iyyabbaayyuwwa, Keesammi Kitaabanne #1:16 «Keesammi Kitaaba» yamamukkok xale'i Eraa'l Hidi'l Kitaabinatte. Yesuusa amadiisu Yihud bikkina Daawiit kollinne ihaa Keesammi Ayyaan gaassaatim wocu woshshi wo'mmimmi hasisookko. 17Yihud niinninne maqirem doo'llamaa ka awwaadonnem ixxena qood hee'ukko. 18#Mat 27:3-8 Oo Yihud hantaarinne siidu diinatinne uulla bitaa'ukko. Eekke'em illillaachcha ubaa diqamukkaare godaphphi mu'ut daadukko. 19Ee woshsham Yerusaaleemanne hee'llam manni hundim laqqo'o. Ee bikkina oo uulli ixxuwwi suuminne Akeldaama yamamaa weeshamukko. Eehid yimmim ‹xiiqqi uulla› yimma. #1:18-19 Ku lamem xigim Pheexiroos wocu woshshi ihoo'n Luqaas wocukkane. 20#Maz 69:25; Maz 109:8 Oohim Daawiit kitaabu kitaabanne
‹Ixxi hee'u beyyi udma'i ihona.
Ee uullanne ayyim hee'oone› yamamukkane.
Odim ‹Ixxi awwonsimmi baxom
mulli manni aa'ona› yamamaa kitaabamukkane.
21-22 #
Mat 3:16; Mar 1:9; Luq 3:21; Mar 16:19; Luq 24:51 Ee bikkina Yohaannis xammaqam hee'u ammaniinsi ki'isaa Moollanni Yesuus iimane mareebe'i afeebe'e ni woronne daba'llamam hee'u amman hundam niinninne maqire hee'u mannik mat manchi Yesuus lehiinsi ki'ukkisa niinninne maqirem kurona» yukko. 23Ee lasage Yoosxoosa te'im Baarsabaasa yakkam Yooseefaa Maatiyaasaa lam mancho amma'nnaan hincaa'llo'o. 24-25Ixxuwwim «Manni hundikam wodano laqqoo Moollanna, Yihud ixxena laboo beyyo mareena uru beyyonne asse'amaanchi ihaa awwaadoo'isina ka lamem manchiinsim at doo'llittok ayyetda'e ihukkisa niina moo'ise» yita'a Waa'a uunxito'o. 26Ee lasage laminam saamo issito'aare saam Maatiyaasina afukko. Maatiyaasim tomminnee mat asse'amaaninnee exxaa xigamukko.
अहिले सेलेक्ट गरिएको:
Asse'amaa'n Baxo 1: KeesKita
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
