ดอ โฆว 46
46
ลอง อาโกบ ฮาว มืง แอฆึบ
1ปาย ตี อาโกบ ตึอน บอ ฮาว มืง แอฆึบ. อัน บอ ดึห โตต แคะ ปี มึห อัน. ดอ ตัห ฌัม อัน ดี โดง จืร บีราเซบา ตึอน, อัน วี หลู ดี เฌาพรา ปี ดึอม กรึบ อาแซก, อี มูห ฆูณ อัน.
2แคง หมึร เฌาพรา วี แตห อาโกบ ยึร โฆรห อัน. อัน ต็อห, “อึย อาโกบ, อาโกบ.” อาโกบ วี ต็อห, “โอว กอย ดี นี, แม เฌา.” 3อัน เฌา วี ต็อห, “โอว มูห เฌาพรา. โอว มูห เฌาพรา ปี กรึบ ฆูณ แม. เซ แม ฮาว มืง แอฆึบ, แกวะ แตห แม โยว. แคง มืง แอฆึบ โอว ดี แตห แม แบน อาโมยว ดูอี กืน. 4โอว ดี ฮาว รึม โดบ แม. โอว ดี บอ ตึย แม เวณ ดี ตี. อาโยว ดี บลีน งาย แม, เซ แม ยัม.”
5ปัน ตี อาโกบ วี เลห โดง จืร บีราเซบา. เฆ ฆอน อาโกบ ยี แตห ฆูณ เฆ บอ อีบึณ บอ ฆอน เฆ ป็อะ ลักเลา ปี ตึย คูนดีคัม. 6เฆ แฮะ ดึห บอ โดว ซัดดาวา เฆ บอ โตต โตต ดอน โมยว ปี ปึอน เฆ แคง มืง กานัณ. ปัน ตี บอ อาโกบ บอ หลูกหลาน อัน, เฆ ฮา ฌัม แคง มืง แอฆึบ. 7ฆอน อีมาย อัน บอ หลาน อัน, เฆ ดอน อี แฮะ ตัห โดบ อัน.
8อานี อึณ มูห ฌาราง เฆ ดูอี อาโมยว อีซาเรลัะ, อี มูห หลูกหลาน อาโกบ ตึอน อี แฮะ ฮาว มืง แอฆึบ. ฆอน ฆีณ อาโกบ อัน จืร อารูเบน.
9ฆอน อีมาย อารูเบน ตึอน บอ มูห อาฮาน, อาพาลู, อาเฮฌาโรน บอ อาคามี.
10ฆอน อีมาย อาซีเมโอน ตึอน บอ มูห อาเยมูเอน, อายามีน, อาโฌวฮาน, อายาคีน, อาโฌวอาน บอ อาซาอูน. มา อาซาโอน ตึอน มูห อาโมยว กานัณ.
11ฆอน อีมาย อาเลวี ตึอน บอ มูห อาเฆนราโซน, อาโควฮาด บอ อาเมนรารี.
12ฆอน อีมาย อายูดา บอ มูห อาเอรา, อาออนัน, อาเซลา, อาเพเรด บอ อาเฌนรา. อาเอรา ฆาย อาโอวนาน ตึอน ยี แฮะ ยัม แคง มืง กานัณ. อาเพเรด ตึอน วี มึห ฆอน อี จืร อาเฮฌาโรน ฆาย อาฮามูลัะ.
13ฆอน อีมาย อาอีซาคา ตึอน บอ มูห อาโทวลา, อาพูวา, อายาโซบ บอ อาซีมารูน.
14ฆอน อีมาย อาเฌบูโลน ตึอน บอ มูห อาเซเรด, อาเอโลน บอ อายาเลน.
15ดูอี เฆ ตี มูห ฆอน อีมาย นาง เลอา ตึอน แฮะ ดัว ดี อาโกบ ดอ กอย ฆาย แคง มืง พาดานอาราม. อัน บอ มึห ฆอน อีบึณ, อัน จืร นาง ดีนา. ดูอี เฆ ตี ดอน วี บอ อีมาย บอ อีบึณ, เฆ กอย โอย ฆึร ดี โอย วี.
16ฆอน อีมาย อาฆัด ตึอน บอ มูห อาฌีพีโอน, อาฮาฆี, อาซูนี, อาเอฌาโบน, อาเอรี, อาโรวดี บอ อาเรลี.
17ฆอน อีมาย อาเซน ตึอน บอ มูห อาอีมานาฮา, อาอีซาวา, อาอีซาวี บอ อาเบรียา. อัน มึห บอ ฆอน อีบึณ อี จืร นาง เซรา.
ฆอน อีมาย อาเบเรียก บอ มูห อาเฮบา ฆาย อามาลาคีลา.
18ดูอี เฆ ตี มูห ฆอน นาง ซีพา ตึอน. อัน มูห หมาย ปี ดัว อาลับ ตึอน ดี ฆอน อีบึณ อัน อี จืร นาง เลอา. เฆ กอย ฆึร ดี เดา วี.
19ฆอน อีมาย นาง ราเอน ตึอน อี มูห อีบึณ อาโกบ, ฆาย จืร อาโยว ฆาย อาเบนยาม ตึอน.
20อาโยว วี แบน ฆูณ ฆอน อีมาย อา วี, อี จืร อามานาเซ ฆาย อาเอพารีม. ฆาย มูห ฆอน นาง เอซานาด, อี มูห ฆอน อีบึณ ดา อี หลู ดี เฌาพรา อี จืร อาโพวทีพีรา อี กอย มืง โอน. ฆาย บอ ฆึอด แคง มืง แอฆึบ.
21ฆอน อีมาย อาเบนยาม ตึอน บอ มูห อาเบนลา, อาเบคารา, อาจาเบน อาฆีรา, อาเนมาน, อาเอฮี, อาโรด, อามูพีม, อาฮูพีม บอ อาราอัด.
22ดูอี เฆ ตี มูห หลูกหลาน นาง ราเอน ตึอน. เฆ กอย ฆึร ดี พวน วี.
23ฆอน อีมาย อาดาน ตึอน มูห อาฮูซีม.
24ฆอน อีมาย อานาบทาลี ตึอน บอ มูห อายาเฌเอน, อาฆูนี, อาเยเฌน บอ อาซีเลม.
25ดูอี เฆ ตี มูห หลูกหลาน นาง บีลา ตึอน, อี มูห หมาย ปี ดัว อาลับ ตึอน ดี ฆอน อีบึณ อัน, อี จืร นาง ราเอน ตึอน. เฆ ดอน อี กอย บู วี.
26เฆ ดูอี อาโมยว อาโกบ ตึอน, เฆ วี ฮาว โลง มืง แอฆึบ, เซ ตู ตีห เอา อัน, อึณ กอย เดา ฆึร ดี เดา วี. อึณ มูห มี เฆ หลูกหลาน อาโกบ. 27เซ บอ ตีห ฆอน อาโยว อา วี, อี ฆึอด แคง มืง แอฆึบ ตึอน, เฆ ดูอี อาโมยว อาโกบ ตึอน แบน บู ฆึร วี ดอ ตัห เฆ แคง มืง แอฆึบ.
28อาโกบ ตึอน ยี แฮะ ตึย อายูดา, แตห อัน แยต ดี อาต, แตห อัน ฌัม มืง โฆวเซน แคง มืง ตาง แอฆึบ. ดอ ตัห ฌัม เฆ มืง ตี, 29อาโยว ตึอน วี จัร อี ตึย อัน แคง ลักเลา อัน, แตห อัน ฮาว มืง โฆวเซน, รวห ฆูณ อัน. อัน แฮะ ยึร ฆูณ อัน, อัน วี เงียม ฆูณ อัน, ยาม กอ เหลณ กาเซา.
30อาโกบ ตึอน วี ต็อห, “ดอ ตี นี โอว แฮะ ปึอน ยัม. โอว แฮะ วี ยึร ดี งาย โอว, แม ซี กอย.”
31ปัน ตี อาโยว ตึอน วี กาลาง โฆรห ดี อูกัด อูวา อัน, บอ เฆ อึณโฮม ฆูณ อัน, แตห เฆ โทม ดอน อี. อัน ต็อห, “โอว ดี ฮาว โดง กอย คูนดีคัม. โอว ดี ต็อห ดี อัน, ‘เฆ อูกัด อูวา โอว บอ ฆูณ โอว, เฆ แฮะ เลห มืง กานัณ ตึอน, ตัห ฌัม โดง กอย โอว. 32ดูอี เฆ ตี, เฆ มูห ดา อี เฮียง มาบู ซีณ ดอ โฆว อัน. เฆ แฮะ ดึห โตต แคะ ปี มึห เฆ, บอ โดว ซัดดาวา เฆ.’ 33โคว อัน ตี, เซ คูนดีคัม วี แดะ เบ ตัห ดี อัน, เซ อัน ดีหมอด ลอง ปี ดี โบง เบ, 34เบ โลว กาลาง, ‘อู ซีณ ดอ โฆว อัน ฌัม อาตึร, หมาย แม แฮะ เฮียง โดว ซัดดาวา. บอ ฆูณ เย แฮะ โบง ปาย ตี.’ เซ เบ ต็อห ปาย ตี อัน ดี แตห เบ กอย แคง มืง โฆวเซน ตี. อัน ดี แตห เบ กอย กาย็อห ดี เฆ ดูอี แอฆึบ. โคว, เฆ ตู อึง ดา อี เฮียง มาบู.”
अहिले सेलेक्ट गरिएको:
ดอ โฆว 46: pce
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2021, Wycliffe Bible Translator, Inc. All rights reserved.